Nime Ngokuqinileyo Ningahexi
INguqulelo Yehlabathi Elitsha—Ixatyiswa Zizigidi Ehlabathini Lonke
KWATHABATHA iminyaka eli-12, iinyanga ezi-3, neentsuku ezili-11 zomsebenzi onzima. Noko ke, ngoMatshi 13, 1960 inxalenye yokugqibela yenguqulelo entsha yeBhayibhile yagqitywa. Yabizwa ngokuba yiNguqulelo Yehlabathi Elitsha YeZibhalo Ezingcwele.
Kunyaka kamva, amaNgqina kaYehova apapasha le nguqulelo kumqulu omnye. Olo hlelo lwashicilelwa lwayimibhalo esisigidi ngowe-1961. Namhlanje, inani leenkupho ezishicilelweyo liye ladlula izigidi ezilikhulu, lisenza INguqulelo Yehlabathi Elitsha ibe yenye yezona Bhayibhile zisasazwe ngokubanzi. Noko ke, yintoni eyabangela amaNgqina ukuba alungiselele le nguqulelo?
Kwakutheni Ukuze Kufuneke INguqulelo Entsha YeBhayibhile?
Ukuze aqonde aze avakalise isigidimi seZibhalo Ezingcwele, amaNgqina kaYehova aye asebenzisa iinguqulelo zeBhayibhile ezininzi ezahlukahlukeneyo zesiNgesi ukutyhubela iminyaka. Nangona ezi nguqulelo ziye zaba luncedo, ngokufuthi ziye zaphenjelelwa zizithethe zonqulo neemfundiso zeNgqobhoko. (Mateyu 15:6) Ngoko ke amaNgqina kaYehova aye ayibona imfuneko yenguqulelo yeBhayibhile ekumela ngokuchanileyo oko kwakukwimibhalo ephefumlelweyo yantlandlolo.
Inyathelo lokuqala ekuzalisekiseni le mfuno lathatyathwa ngo-Oktobha 1946 xa uNathan H. Knorr, ilungu leQumrhu Elilawulayo lamaNgqina kaYehova, wacebisa ukuba kwenziwe inguqulelo entsha yeBhayibhile. NgoDisemba 2, 1947, iKomiti YeBhayibhile YeNguqulelo Yehlabathi Elitsha yaqalisa ukulungiselela inguqulelo efana nombhalo wamandulo, eyayiza kuquka izinto zakutshanje ezifunyenwe ngabaphengululi kwimibhalo-ngqangi yeBhayibhile esandul’ ukufunyanwa, neza kusebenzisa intetho eza kuqondwa lula ngabafundi banamhlanje.
Ukupapashwa kwenxalenye yokuqala—iNew World Translation of the Christian Greek Scriptures—ngowe-1950, kwabonakala ukuba abaguquleli baye balufeza usukelo lwabo. Imibhalo yeBhayibhile ebingaqondwa kakuhle ngaphambili yacaca ngokumangalisayo. Ngokomzekelo, cinga ngombhalo odidayo kuMateyu 5:3: “Basikelelekile abangamahlwempu ngokomoya.” (King James Version) Lo mbhalo waguqulelwa ngokuthi: “Banoyolo abo bayiphapheleyo intswelo yabo yokomoya.” Isiluleko sikampostile uPawulos esiguqulelwe ngokuthi “ningabi nankathalo yayo nantoni” (King James Version) saguqulelwa ngokuthi: “Musani ukuxhalela nantoni na.” (Filipi 4:6) Yaye nembekiselo ekuMateyu 24:3 ethi “umqondiso wokufika kwakho” (King James Version) ifundeka ngolu hlobo, “umqondiso wobukho bakho.” Kucacile ukuba, INguqulelo Yehlabathi Elitsha yavelisa indlela entsha yokuqonda.
Abaphengululi abahlukahlukeneyo bachukumiseka. Ngokomzekelo, umphengululi weBhayibhile waseBritani uAlexander Thomson wathi INguqulelo Yehlabathi Elitsha ibalasele ekuguquleleni ngokuchanileyo ixesha elimiyo lesiGrike. Ngokomzekelo: Eyabase-Efese 5:25 ifundeka ngolu hlobo, “Madoda, qhubekani nibathanda abafazi benu” kunokuthi nje “Madoda, bathandeni abafazi benu.” (King James Version) UThomson wathi ngokuphathelele INguqulelo Yehlabathi Elitsha: “Ayikho enye inguqulelo eye yayivelisa le nkalo ngendlela echane kangaka nangokuphindaphindiweyo.”
Enye inkalo ebalasele ngayo INguqulelo Yehlabathi Elitsha yindlela elisebenzisa ngayo igama likaThixo, uYehova, kwinxalenye yeZibhalo zesiHebhere nezesiGrike. Ekubeni igama lesiHebhere likaThixo livela phantse izihlandlo ezingama-7 000 kwiTestamente Endala kuphela, kucacile ukuba uMdali wethu ufuna abanquli bakhe basebenzise igama lakhe baze bamazi njengomntu. (Eksodus 34:6, 7) INguqulelo Yehlabathi Elitsha iye yanceda izigidi zabantu ukuba benjenjalo.
INguqulelo Yehlabathi Elitsha Iveliswa Ngeelwimi Ezininzi
Ukususela kwixesha eyaqala ngalo ukufumaneka ngesiNgesi, amaNgqina kaYehova emhlabeni wonke ayakulangazelela ukufumana INguqulelo Yehlabathi Elitsha ngolwimi lwawo—yaye ngesizathu esihle. Kwamanye amazwe, kwakunzima ukufumana iinguqulelo ngeelwimi zasekuhlaleni kuba abameli beMibutho yeBhayibhile ezisasazayo babengakholiswa kukubona isixa sabo seeBhayibhile siphelela ezandleni zamaNgqina kaYehova. Ngaphezu koko, ngokufuthi iiBhayibhile zolwimi lwasemzini ezinjalo ziye zazifihla iimfundiso ezibalulekileyo. Umzekelo oqhelekileyo yinguqulelo yolwimi lwaseYurophu olufihla imbekiselo ebalulekileyo ngegama likaThixo ngokuthabathel’ indawo amazwi kaYesu athi “Malingcwaliswe igama lakho” ngathi “Abantu mabakuzukise.”—Mateyu 6:9.
Ngowe-1961, abaguquleli baqalisa ukuguqulela umbhalo wesiNgesi weNguqulelo Yehlabathi Elitsha kwezinye iilwimi. Kwiminyaka nje emibini kamva, INguqulelo Yehlabathi Elitsha YeZibhalo ZamaKristu ZesiGrike yagqitywa ngeelwimi ezintandathu ezongezelelekileyo. Ngelo xesha, amaNgqina ama-3 kwama-4 emhlabeni wonke ayenokuyifunda le Bhayibhile ngolwimi lwawo. Sekunjalo, umsebenzi ongakumbi wawumele wenziwe ukuba amaNgqina kaYehova ayeza kudlulisela umbhalo wale Bhayibhile ezandleni zezigidi ezininzi zabantu.
Ngowe-1989 laphantse lazaliseka olo sukelo ngokuvulwa kwesebe ekuthiwa yiTranslation Services kwikomkhulu lehlabathi lamaNgqina kaYehova. Elo sebe liye lavelisa inkqubo yokuguqulela equka ukuphanda ngamagama eBhayibhile ngobugcisa bekhompyutha. Ukusebenzisa le nkqubo kuye kwabangela ukuba ezinye iilwimi ziguqulele iZibhalo ZamaKristu ZesiGrike ngonyaka nje omnye zize iZibhalo ZesiHebhere ziguqulelwe kwiminyaka emibini—ixesha elincinane kuneliqhelekileyo elifunekayo kumsebenzi wokuguqulela iBhayibhile. Ukususela kwixesha lokuqaliswa kwale nkqubo, kuye kwaguqulelwa iintlelo ezingama-29 zeNguqulelo Yehlabathi Elitsha zisuswa kwisiNgesi zaza zakhululwa ngeelwimi ezithethwa ngabantu abangaphezu kwezigidi ezibini zamawaka. Lo msebenzi ngoku wenziwa ngezinye iilwimi ezili-12. Ukuza kuthi ga ngoku, INguqulelo Yehlabathi Elitsha yesiNgesi iye yaguqulelwa, iphelele okanye ngokuyinxenye, kwezinye iilwimi ezingama-41.
Ngoku kuye kwadlula iminyaka engaphezu kwengama-50 ukususela ekukhululweni kwenxalenye yokuqala yeNguqulelo Yehlabathi Elitsha ngoAgasti 3, 1950, kwiNdibano Yolwando Lobuthixo yamaNgqina kaYehova kwisiXeko saseNew York. Ngeso sihlandlo, uNathan H. Knorr wabongoza abo babehlanganisene apho esithi: “Thabathani le nguqulelo. Yifundeni yonke, yaye nikwenze oko ngovuyo. Yifundisiseni, kuba iza kuninceda niliqonde kakuhle ngakumbi iLizwi likaThixo. Yisasazeni nakwabanye.” Siyakukhuthaza ukuba uyifunde iBhayibhile imihla ngemihla, kuba isigidimi sayo sinokukunceda ‘ume ngokuqinileyo ungahexi kuko konke ukuthanda kukaThixo.’—Kolose 4:12.
[Igrafu/Imifanekiso ekwiphepha 8, 9]
(Ukuba ufuna inkcazelo ehlahlelwe kakuhle, yiya kwimpapasho)
“Ukukhululwa KweNguqulelo Yehlabathi Elitsha”
Yakhululwa okokuqala ngesiNgesi, INguqulelo Yehlabathi Elitsha ngoku ifumaneka iphelele okanye inxalenye yayo ngeelwimi ezongezelelekileyo ezingama-41
IZibhalo ZamaKristu ZesiGrike IBhayibhile Epheleleyo
1950 1
1960-69 6 5
1970-79 4 2
1980-89 2 2
1990-Ukuza kuthi ga ngoku 29 19