Abavakalisi BoBukumkani Bayabalisa
“Ndandifuna Ukukhonza UThixo”
“PHUMANI kuyo, bantu bam.” Elo yayililizwi lengelosi elaviwa ngumpostile uYohane kwinkulungwane yokuqala yeXesha Eliqhelekileyo. Kwixesha lethu izigidi zabantliziyo zinyanisekileyo ziye zasabela zaza zasaba ‘kwiBhabhiloni Enkulu,’ ubukhosi behlabathi bonqulo lobuxoki. (ISityhilelo 18:1-4) Phakathi kwazo nguWilner waseHaiti, obalisa amava akhe esithi.
“Ndazalwa ngowe-1956 kwintsapho yamaKatolika kwidolophu encinane yaseSt. Marc, eHaiti. Khawufan’ ucinge indlela intsapho yakowethu eyavuya ngayo xa ndakhethwa kwakunye nabanye ababini kwidolophu yethu, ukuba siye kwisikolo sabefundisi eSt. Michel de l’Atalaye, eHaiti. Emva koko, ngowe-1980, sathunyelwa eStavelot, eBelgium, ukuze sifumane uqeqesho olungakumbi. Nalapho saya kwiyunivesithi yamaKatolika.
“Ekuqaleni ndandinehlombe ngokuba ngumfundisi. Ngenye imini kwigumbi lokutyela isidlo sasemini, umfundisi ophethe iqela lethu wandicela ukuba ndishiyeke imizuzwana nje embalwa kuba kwakukho into awayefuna ukundixelela yona. Khawuthelekelele indlela endothuka ngayo xa wandixelela ngokuphandle ukuba utsaleleke ngokwesini kum! Andizange ndivume ukuthandana naye kodwa ndadana kakhulu. Ndabhalela intsapho yasekhaya ngesi siganeko ndaza ndasishiya isikolo sabefundisi kwiinyanga ezimbalwa kamva, nakuba yayingafuni ndihambe. Ndafumana indawo yokuhlala kwidolophana ethile ndaza ndafundela nto yimbi.
“Ukubuyela kwam eSt. Marc, ndandingasayithembi iCawa yamaKatolika. Sekunjalo, ndandifuna ukukhonza uThixo, kodwa ndandingazi ukuba ndenze ntoni. Ndaya kwicawa yamaSabatha, kwicawa yamaBhaptizi ekwakuthiwa yiEbenezer necawa yeeMormon. Ndandilahlekile ngokomoya.
“Emva koko ndakhumbula ukuba ngoxa ndandihamba isikolo sabefundisi eBelgium, ndandidla ngokufunda iBhayibhile ekuthiwa yiCrampon. Kuyo ndafumanisa ukuba uThixo unegama. Ngoko ndisebenzisa igama lakhe, ndathandaza ngokusuk’ entliziyweni kuThixo ukuba andincede ndifumane unqulo lokwenyaniso.
“Kungekudala emva koko, amaNgqina kaYehova amabini afudukela ebumelwaneni. Ayethule yaye ehloniphekile kwaye enesidima. Ndandikholiswa yindlela awayephila ngayo. Ngenye imini, omnye wala maNgqina mabini, wandimema ukuba ndiye kwiSikhumbuzo saminyaka le sokufa kukaKristu. Ndayinandipha ngokupheleleyo loo ntlanganiso ndaza ndasamkela isifundo seBhayibhile esithe rhoqo namaNgqina. Kwiinyanga nje ezinokuba ntandathu, ndandiqinisekile ukuba ndiyifumene indlela efanelekileyo yokukhonza uThixo. Ndahlulela ubomi bam kuYehova ndaza ndabhaptizwa ngoNovemba 20, 1988.”
Ekuhambeni kwexesha, uWilner waqalisa inkonzo yexesha elizeleyo. Namhlanje, ukhonza njengomdala webandla. Yena nomfazi wakhe, kwakunye nabantwana babo ababini, bakhonza ngovuyo ebandleni.
[Umfanekiso okwiphepha 9]
Ngokufunda iBhayibhile, uWilner wafumanisa ukuba igama likaThixo nguYehova