“Yomelelani! Mna Ndiloyisile Ihlabathi”

USUKU lokufa kukaYesu—usuku lwe-14 kwinyanga yamaYuda enguNisan—lwaqala emva kokutshona kwelanga ngoLwesine, Matshi 31, 33 C.E. Ngobo busuku, uYesu nabapostile bakhe bahlanganisana kwigumbi eliphezulu kwindlu ethile eYerusalem ukuze benze iPasika. Njengokuba wayelungiselela ukuba “emke kweli hlabathi aye kuYise,” uYesu wabonisa ukuba abapostile bakhe wayebathande kwade kwasekupheleni. (Yohane 13:1) Njani? Ngokubafundisa izifundo ezibalulekileyo, ngaloo ndlela ebalungiselela oko babeza kujamelana nako kwixesha elizayo.

Njengokuba ubusuku babuhamba, uYesu wathetha nabafundi bakhe esithi: “Yomelelani! mna ndiloyisile ihlabathi.” (Yohane 16:33) Wayethetha ukuthini ngaloo mazwi abonisa inkalipho? Ngokuyinxalenye, wayesithi: ‘Ububi basemhlabeni abundenzanga ndanengqumbo yaye abundenzanga ndaziphindezelela. Andilivumelanga ihlabathi ukuba lindenze ndifane nalo. Nani ninokwenjenjalo.’ Oko uYesu wakufundisa abapostile bakhe abathembekileyo kuloo mizuzu yokugqibela ephila emhlabeni kwakuya kubanceda nabo ngokufanayo baloyise ihlabathi.

Ngubani onokukhanyela ukuba ububi bandile ehlabathini namhlanje? Senza ntoni xa siphathwa ngokungekho sikweni nangogonyamelo olungaka? Ngaba ezi zinto zisenza sibe nengqumbo size sifune ukubuyisela ububi ngobubi? Isichaphazela njani imilinganiselo ewohlokayo yabantu abasingqongileyo? Ukongezelela kukungafezeki kwethu kobuntu notyekelo lwesono, sifanele silwe iimfazwe ezimbini: silwe nehlabathi elingendawo ngaphandle kotyekelo lobubi olukuthi. Ngaba singanethemba lokoyisa ngaphandle koncedo lukaThixo? Sinokulufumana njani uncedo lwakhe? Ziziphi iimpawu esifanele sizihlakulele eziya kusinceda siyichase iminqweno yenyama? Ukuze sifumane impendulo, masibuyele koko uYesu wakufundisa abapostile bakhe abathandayo kusuku lokugqibela lobomi bakhe emhlabeni.

Yoyisa Ikratshi Ngokuthobeka

Ngokomzekelo, khawucinge ngengxaki yekratshi, okanye ukukhukhumala. Ngokuphathelele lona, iBhayibhile ithi: “Ikratshi liphambi kokuwa, yaye umoya wekratshi uphambi kokukhubeka.” (IMizekeliso 16:18) Kwakhona iZibhalo zisiluleka zisithi: “Ukuba ubani ucinga ukuba unguthile xa engeyonto, ukhohlisa ingqondo yakhe.” (Galati 6:3) Ewe, ikratshi liyingozi yaye liyakhohlisa. Siya kuba silumkile ukuba sikuthiyile “ukuziphakamisa nekratshi.”—IMizekeliso 8:13.

Ngaba abapostile bakaYesu babenengxaki yokuziphakamisa nekratshi? Ubuncinane kwisihlandlo esinye, baxambulisana ngokuthi ngubani omkhulu. (Marko 9:33-37) Ngesinye isihlandlo, uYakobi noYohane bacela izikhundla eziphakamileyo eBukumkanini. (Marko 10:35-45) UYesu wayenqwenela ukubanceda abafundi bakhe bawoyise lo mkhwa. Ngoko ke ngoxa babesitya isidlo sePasika, waphakama, wabhinqa itawuli, waza waqalisa ukuhlamba iinyawo zabafundi bakhe. Alithandabuzeki elokuba wabafundisa okuthile ngesi senzo. UYesu wathi: “Ukuba mna, nangona ndiyiNkosi noMfundisi, ndihlambe iinyawo zenu, nani nifanele ukuhlambana iinyawo.” (Yohane 13:14) Ikratshi lifanele lithatyathelw’ indawo luphawu oluphikisana nalo—ukuthobeka.

Noko ke, akulula ukoyisa ikratshi. Kamva ngobo busuku, emva kokuba uYesu emgxothile uYudas Skariyoti, owayeza kumnikela, kwaqalisa impikiswano eshushu phakathi kwabapostile abali-11. Kwakuphikiswana ngantoni? Ngalowo ubonakala emkhulu kunabanye! Kunokubangxolisa, kwakhona uYesu ngomonde wagxininisa ukubaluleka kokunceda abanye. Wathi: “Ookumkani beentlanga baba ziinkosi phezu kwazo, nabo banegunya phezu kwazo babizwa ngokuba ngabaBabali. Ke nina ze ningabi njalo. Kodwa lowo ungoyena mkhulu phakathi kwenu makabe njengoyena mncinane, nalowo usebenza njengentloko abe njengalowo ulungiselelayo.” Ebakhumbuza ngomzekelo wakhe, uhlabela mgama esithi: “Phakathi kwenu ndinjengalowo ulungiselelayo.”—Luka 22:24-27.

Ngaba abapostile bayifumana ingongoma? Kubonakala njalo. Kwiminyaka ethile kamva umpostile uPetros wabhala: “Cingani nto-nye nonke, nivelane, ninomsa wobuzalwana, nemfesane, nithobekile engqondweni.” (1 Petros 3:8) Hayi indlela ekubaluleke ngayo ukuba nathi soyise ikratshi ngokuthobeka! Siya kuba sizizilumko ukuba asizabalazeli udumo, igunya okanye isikhundla. IBhayibhile ithi: “UThixo ubachasile abanekratshi, kodwa ubanika ububele obungasifanelanga abathobekileyo.” (Yakobi 4:6) Ngokufanayo, umzekeliso wamandulo wobulumko uthi: “Umphumo wentobeko nokoyika uYehova bubutyebi, uzuko nobomi.”—IMizekeliso 22:4.

Ukoyisa Intiyo—Njani?

Khawucinge ngolunye uphawu oluxhaphakileyo ehlabathini—intiyo. Enoba ibangelwa luloyiko, ukungazi, ikhethe, ingcinezelo, ukungabikho kokusesikweni, ubuhlanga, ubuzwe, singqongwe yintiyo. (2 Timoti 3:1-4) Intiyo yayixhaphakile nangomhla kaYesu. Ababuthi berhafu babethiywe ngeyona ndlela ngamaYuda. AmaYuda ayengenabudlelane namaSamariya. (Yohane 4:9) AbeeNtlanga, okanye ababengengomaYuda, nabo babenyeliswa ngamaYuda. Noko ke, ekuhambeni kwexesha indlela yonqulo eyasungulwa nguYesu yayiza kuquka abantu beentlanga zonke. (IZenzo 10:34, 35; Galati 3:28) Ngoko ngothando wanika abafundi bakhe into entsha.

UYesu wathi: “Ndininika umyalelo omtsha, wokuba nithandane; kanye njengoko ndinithandileyo mna, ukuba nani nithandane.” Kwakuza kufuneka bafunde ukulubonakalisa olu thando kuba waphinda wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.” (Yohane 13:34, 35) Lo mthetho wawumtsha kuba wadlulela ngaphaya kokuthanda “idlelane lakho njengawe siqu.” (Levitikus 19:18) Ngayiphi indlela? UYesu wawucacisa lo mbandela, esithi: “Nguwo lo umyalelo wam, wokuba nithandane kanye njengoko ndinithandileyo. Akukho bani unothando olukhulu kunolu, lokuba uthile anikezele umphefumlo wakhe ngenxa yabahlobo bakhe.” (Yohane 15:12, 13) Kwakuza kufuneka bakulungele ukunikela ubomi babo ngenxa yabanye.

Abantu abangafezekanga banokuyiphelisa njani intiyo eyingozi ebomini babo? Ngokuyithabathel’ indawo ngothando lokuzincama. Izigidi zabantu abanyanisekileyo beentlanga zonke, iimvelaphi, iinkonzo, namaqela ahlukahlukeneyo obupolitika benza kanye oko. Ngoku bayahlanganiswa ukuze bamanyane yaye bangabi nantiyo—babe bubuzalwana bomhlaba wonke bamaNgqina kaYehova. Bathobela amazwi aphefumlelweyo kampostile uYohane athi: “Lowo umthiyileyo umzalwana wakhe usisibulala-mntu, yaye niyazi ukuba akukho sibulala-mntu sinobomi obungunaphakade obuhleliyo kuso.” (1 Yohane 3:15) AmaKristu okwenyaniso akafuni nje kuphela ukuya emfazweni kodwa kwakhona azabalaza ngamandla ukuze abonakalise uthando phakathi kwawo.

Noko ke, sifanele sibajonge njani abo bangengawo amakholwa nabanokusithiya? Ngoxa wayexhonywe kumthi wentuthumbo, uYesu wabathandazela abo bambulalayo, esithi: “Bawo, baxolele, kuba abakwazi oko bakwenzayo.” (Luka 23:34) Xa amadoda awayezaliswe yintiyo amxuluba ngamatye wade wafa umfundi uStefano, kumazwi akhe okugqibela wathi: “Yehova, musa ukusibalela kubo esi sono.” (IZenzo 7:60) UYesu noStefano babebanqwenelela okuhle nabo babebathiyile. Babengenangqumbo entliziyweni yabo. IBhayibhile iyasiyala: “Masenze okulungileyo kubo bonke.”—Galati 6:10.

‘Umncedi Ngonaphakade’

Njengoko wayesele echithe ixesha elithile nabapostile bakhe abathembekileyo abali-11 kwintlanganiso ababenayo, uYesu wabaxelela ukuba kungekudala akasayi kuphinda abe nabo esenyameni. (Yohane 14:28; 16:28) Kodwa wabaqinisekisa esithi: “Ndiza kumcela uBawo yaye uya kuninika omnye umncedi wokuba kunye nani ngonaphakade.” (Yohane 14:16) Lo mncedi wayethenjisiwe ngumoya oyingcwele kaThixo. Wawuza kubafundisa izinto ezinzulu zeZibhalo uze ubakhumbuze oko uYesu wayebafundise kona ebudeni bexesha lobulungiseleli bakhe emhlabeni.—Yohane 14:26.

Umoya oyingcwele unokusinceda njani namhlanje? Kaloku, iBhayibhile iliLizwi likaThixo eliphefumlelweyo. Abantu abasetyenziswa ukuba baprofete baze babhale iBhayibhile “babeqhutywa ngumoya oyingcwele.” (2 Petros 1:20, 21; 2 Timoti 3:16) Ukufundisisa kwethu iZibhalo nokusebenzisa oko sikufundileyo kusenza sibe nolwazi, ubulumko, ingqiqo, ukuqonda, yaye sibe namandla okucinga. Ngaba asikho kwimeko entle yokujamelana neengcinezelo zeli hlabathi lingendawo?

Kwakhona umoya oyingcwele usinceda ngenye indlela. Umoya oyingcwele kaThixo usinika amandla okwenza okulungileyo, wenza abo baphenjelelwa nguwo babonakalise iimpawu zobuthixo. IBhayibhile ithi: “Isiqhamo somoya luthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.” Ngaba ezi asizompawu esifanele sibe nazo ukuze sikwazi ukoyisa iminqweno yenyama enjengokuziphatha okubi, usukuzwano, umona, ukugqajukelwa ngumsindo, nezinto ezinjengezo?—Galati 5:19-23.

Ngokuthembela kumoya oyingcwele kaThixo, kwakhona sinokufumana “amandla angaphaya koko kuqhelekileyo” ukuze sikwazi ukujamelana naziphi na iingxaki okanye iinkxwaleko. (2 Korinte 4:7) Nakuba umoya oyingcwele usenokungaziphelisi iimvavanyo okanye izilingo, ngokuqinisekileyo unokusinceda ukuze sizinyamezele. (1 Korinte 10:13) UPawulos wabhala esithi: “Ezintweni zonke ndinamandla ngenxa yalowo undomelezayo.” (Filipi 4:13) UThixo udlulisela kuthi loo mandla ngomoya wakhe oyingcwele. Hayi indlela esifanele sibe nombulelo ngayo ngomoya oyingcwele! Uthenjiswe abo ‘bamthandayo uYesu nabayigcinayo imiyalelo yakhe.’—Yohane 14:15.

“Hlalani Eluthandweni Lwam”

Kubusuku bakhe bokugqibela njengomntu, kwakhona uYesu wathi kubapostile bakhe: “Lowo unemiyalelo yam aze ayigcine, nguye ondithandayo. Lowo undithandayo uya kuthandwa nguBawo.” (Yohane 14:21) Wababongoza esithi: “Hlalani eluthandweni lwam.” (Yohane 15:9) Ukuhlala eluthandweni lukaBawo neloNyana kusinceda njani kumlo wethu neminqweno yesono ekuthi nehlabathi elingendawo elingaphandle?

Ngaba ngokwenene singakwazi ukulawula iminqweno emibi ukuba akukho nto esishukumisela ukuba senjenjalo? Luluphi ukhuthazo olungaphezu komnqweno wokuba nolwalamano oluhle noYehova uThixo noNyana wakhe? Umfana onguErnesto,a owayesilwa nokuziphatha okubi, okwakuyindlela yakhe yokuphila ukususela oko wayekwishumi elivisayo, ucacisa esithi: “Ndandifuna ukukholisa uThixo, yaye ndafunda ngokusuka eBhayibhileni ukuba akayamkeli indlela endiphila ngayo. Ngoko ndagqiba kwelokuba ndibe ngumntu owahlukileyo, ukuze ndithobele ulwalathiso lukaThixo. Suku ngalunye, kwakufuneka ndilwe neengcinga ezimbi nezingcolileyo ezazisoloko zifika engqondweni yam. Kodwa ndandizimisele ukoyisa kulo mlo, yaye ndathandaza ngokuzingisileyo kuThixo ndicela uncedo lwakhe. Emva kweminyaka emibini ndoyisa kwelo dabi, nangona ndingekayekelel’ umxakatho.”

Xa sicinga ngokulwa nehlabathi elingaphandle, cinga ngomthandazo wokugqibela kaYesu awawenza ngaphambi kokunduluka kwigumbi eliphezulu eYerusalem. Ethandazela abafundi bakhe, wathi kuYise: “Ndiyakucela, kungekhona ukuba ubasuse ehlabathini, kodwa ukuba ubalinde ngenxa yalowo ungendawo. Abayonxalenye yehlabathi, kanye njengoko nam ndingeyonxalenye yehlabathi.” (Yohane 17:15, 16) Oku kwabomeleza ngokwenene! UYehova uyabalondoloza abo abathandayo aze abomeleze njengoko bezigcina bahlukile ehlabathini.

“Bonisani Ukholo”

Ukuthobela imithetho kaYesu ngokwenene kunokusinceda ukuze soyise ekulweni nehlabathi elingendawo neminqweno yethu yesono. Noko ke, nakuba kubalulekile ukoyisa, akunakuliphelisa ihlabathi nesono esisizuz’ ilifa. Kodwa akufanele siphelelwe lithemba.

IBhayibhile ithi: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” (1 Yohane 2:17) UYesu wanikela ngobomi bakhe ukuze ahlangule esonweni nasekufeni “wonk’ ubani obonisa ukholo kuye.” (Yohane 3:16) Njengokuba siye sizuz’ ulwazi ngokuthanda kukaThixo neenjongo zakhe, masithobele isiluleko sikaYesu esithi: “Bonisani ukholo kuThixo, bonisani ukholo nakum.”—Yohane 14:1.

[Umbhalo osemazantsi]

[Umfanekiso okwiphepha 6, 7]

UYesu wayalela abapostile bakhe esithi: “Hlalani eluthandweni lwam”

[Umfanekiso okwiphepha 7]

Kungekudala abantu baza kukhululeka esonweni nakwimiphumo yaso