Vumela Ilizwi LikaThixo Likukhanyisele
‘Ilizwi lakho likukukhanya endleleni yam.’—INDUMISO 119:105.
1, 2. Kuxa sisenza ntoni ukuze ilizwi likaYehova lisikhanyisele?
ILIZWI likaYehova liya kusikhanyisela ukuba siyalivumela lenjenjalo. Ukuze sinandiphe oko kukhanya kokomoya, simele sibe ngabafundi abakhutheleyo beLizwi likaThixo elibhaliweyo size sisebenzise isiluleko salo. Kuxa sisenza njalo kuphela esiya kuthi sivakalelwe ngendlela efanayo nomdumisi owathi: “Ilizwi lakho lisisibane elunyaweni lwam, nokukhanya endleleni yam.”—INdumiso 119:105.
2 Ngoku makhe sihlolisise INdumiso 119:89-176. Ezi ndinyana zibhalwe ngokweziqendu ezili-11, ziqulethe inkcazelo eninzi gqitha. Zinokusinceda sihlale endleleni esa kubomi obungunaphakade.—Mateyu 7:13, 14.
Kutheni Ufanele Ulithande Ilizwi LikaThixo?
3. INdumiso 119:89, 90 ibonisa njani ukuba sinokuthembela kwilizwi likaThixo?
3 Ukuthanda ilizwi likaYehova kwenza ubani azinze ngokomoya. (INdumiso 119:89-96) Umdumisi wavuma esithi: “Ukusa kwixesha elingenammiselo, Yehova, ilizwi lakho limile emazulwini. . . . Uwuzinzise ngokuqinileyo umhlaba, ukuze uqhubeke umile.” (INdumiso 119:89, 90) Ngelizwi likaThixo—‘imimiselo yakhe yamazulu’—indalo esesibhakabhakeni ijikeleza ngaphandle kokuphazamiseka yaye umhlaba uya kuma ngokuqinileyo ngonaphakade. (Yobhi 38:31-33; INdumiso 104:5) Sinokuthembela kuwo onke amazwi aphuma emlonyeni kaYehova; oko uThixo akutshoyo kuya ‘kuphumelela ngokuqinisekileyo’ ukuze kuzaliseke injongo yakhe.—Isaya 55:8-11.
4. Ukuthanda ilizwi likaThixo kubenzela ntoni abakhonzi bakhe abajamelene nenkxwaleko?
4 Umdumisi ‘ngewayetshabalele kwinkxwaleko yakhe ukuba wayengawuthandi umthetho kaThixo.’ (INdumiso 119:92) Wayengaxhwalekiswa ngabantu basemzini; yayingamaSirayeli angabaphuli-mthetho aweyemthiyile. (Levitikus 19:17) Kodwa oku akuzange kube ngaphaya kwamandla akhe, kuba wayewuthanda umthetho kaThixo owawumomeleza. EKorinte, umpostile uPawulos ‘wayekwiingozi phakathi kwabazalwana bobuxoki,’ mhlawumbi kuquka ‘abapostile abaziincamisa’ ababezama ukumbek’ amabala. (2 Korinte 11:5, 12-14, 26) Sekunjalo, uPawulos waqhubeka omelele ngokomoya kuba wayelinda ilizwi likaThixo. Ekubeni silithanda iLizwi likaYehova elibhaliweyo yaye sikwenza oko likutshoyo, siyabathanda abazalwana bethu. (1 Yohane 3:15) Kwanentiyo yehlabathi ayisenzi siyilibale nayiphi na imiyalelo kaThixo. Siqhubeka sisenza ukuthanda kwakhe ngenxa yokumanyaniswa luthando nabazalwana bethu njengoko sijonge phambili ekumkhonzeni ngovuyo ngonaphakade.—INdumiso 119:93.
5. UKumkani uAsa wamfuna njani uYehova?
5 Sivakalisa ukuzinikela kwethu kuYehova, sinokuthandaza njengomdumisi sithi: “Ndingowakho, khawundisindise, ngenxa yokuba ndiyifunile imiyalelo yakho.” (INdumiso 119:94) UKumkani uAsa wamfuna uThixo waza waphelisa uwexuko kwaYuda. Kwindibano enkulu kunyaka we-15 wokulawula kuka-Asa (963 B.C.E.), abemi bakwaYuda “benza umnqophiso wokufuna uYehova.” UThixo ‘wafunyanwa ngabo waza waqhubeka ebanika ukuphumla macala onke.’ (2 Kronike 15:10-15) Lo mzekelo ufanele ukhuthaze nabani na oye walishiya ibandla lamaKristu ukuba amfune kwakhona uThixo. Uya kubasikelela aze abakhusele abo baqalisa ukunxulumana nabantu bakhe kwakhona.
6. Liliphi ikhondo elinokusikhusela ngokomoya?
6 Ilizwi likaYehova lisinika ubulumko obunokusikhusela ngokomoya. (INdumiso 119:97-104) Imiyalelo kaThixo isenza silumke ngakumbi kuneentshaba zethu. Ukuthobela izikhumbuzo zakhe kusenza sibe nengqiqo, yaye ‘ukugcina imiyalelo yakhe kusenza siziphathe ngokuqonda ngakumbi kunamadoda amakhulu.’ (INdumiso 119:98-100) Ukuba amazwi kaYehova ‘agudile enkalakahleni yethu,’ siya kukuthiya okubi size siwuphephe “umendo wobuxoki.” (INdumiso 119:103, 104) Oku kuya kusikhusela ngokomoya njengoko sidibana nabantu abanekratshi, abaziindlobongela nabangamoyikiyo uThixo kule mihla yokugqibela.—2 Timoti 3:1-5.
Lisisibane Elunyaweni Lwethu
7, 8. Ngokuvisisana neNdumiso 119:105, yintoni esifanele siyenze?
7 Ilizwi likaThixo lisoloko lisinika ukukhanya kokomoya ngokuthembeka. (INdumiso 119:105-112) Enoba singamaKristu athanjisiweyo okanye amaqabane awo “ezinye izimvu,” sithi: “Ilizwi lakho lisisibane elunyaweni lwam, nokukhanya endleleni yam.” (Yohane 10:16; INdumiso 119:105) Ilizwi likaThixo lifana nesibane esisikhanyiselayo, ukuze singakhubeki size siwe ngokomoya. (IMizekeliso 6:23) Sekunjalo, simele sivumele ilizwi likaYehova libe sisibane elunyaweni lwethu.
8 Sifanele sime ngokuqinileyo njengomqambi weNdumiso 119. Wayezimisele ukungaphambuki kwimiyalelo kaThixo. Wathi: “Ndenze isifungo, yaye ndiza kusigcina, ukuba ndigcine izigwebo zakho [zikaYehova] zobulungisa.” (INdumiso 119:106) Simele singaze sikujongele phantsi ukubaluleka kokufundisisa rhoqo iBhayibhile nokuba nenxaxheba kwiintlanganiso zamaKristu.
9, 10. Sazi njani ukuba abathile abazahlulele kuYehova ‘banokubhadula emiyalelweni yakhe,’ kodwa oku kunokuphetshwa njani?
9 Umdumisi akazange ‘abhadule emiyalelweni kaThixo,’ kodwa oko kunokwenzeka kumntu ozahlulele kuYehova. (INdumiso 119:110) UKumkani uSolomon wabhadula, nangona wayengomnye wohlanga oluzahlulele kuYehova yaye ekuqaleni wayesenza ngokuvisisana nobulumko awayebunikwe nguThixo. “Kwanaye abafazi basemzini bamonisa” ngokumphembelela ekubeni anqule oothixo bobuxoki.—Nehemiya 13:26; 1 Kumkani 11:1-6.
10 ‘Umbambisi weentaka,’ uSathana, ubeka izabatha ezininzi. (INdumiso 91:3) Ngokomzekelo, uthile ebesinqula naye ngaphambili unokuzama ukusilukuhlela ekubeni siyishiye indlela yokukhanya kokomoya siye kubumnyama bowexuko. Phakathi kwamaKristu aseTiyatira, “kwakukho laa mfazi uIzebhele,” mhlawumbi iqela labafazi ababefundisa abanye ukuba banqule izithixo nokuhenyuza. UYesu akazange abunyamezele obo bubi, nathi simele senze okufanayo. (ISityhilelo 2:18-22; Yude 3, 4) Ngoko masithandazele uncedo lukaYehova ukuze singabhaduli kwimiyalelo yakhe kodwa sihlale ekukhanyeni kwakhe.—INdumiso 119:111, 112.
Ukomelezwa Lilizwi LikaThixo
11. Ngokutsho kweNdumiso 119:119, uThixo ubajonga njani abangendawo?
11 Ukuba asiyishiyi imimiselo yakhe, uThixo uya kusomeleza. (INdumiso 119:113-120) Asikholiswa ‘ngabantliziyo imbaxa,’ kanye njengokuba uYesu engakholiswa ngabo bathi bangamaKristu kodwa bedikidiki. (INdumiso 119:113; ISityhilelo 3:16) Ngenxa yokuba sikhonza uYehova ngokusuk’ entliziyweni, ‘uyindawo yethu yokuzifihla’ yaye uya kusomeleza. Uya ‘kubalahla bonke abo balahlekayo emimiselweni yakhe’ xa bebhenela kwinkohliso nobuxoki. (INdumiso 119:114, 117, 118; IMizekeliso 3:32) Abo bangendawo ubajonga “njengentlenge”—izibi ezisuswe kumatye axabisekileyo, njengesilivere negolide. (INdumiso 119:119; IMizekeliso 17:3) Akwaba besinokuhlala sizithanda izikhumbuzo zikaThixo, kuba nakanjani na asifuni kuqukwa nabangendawo abayinkunkuma nje efunjiweyo yezibi!
12. Kutheni kubalulekile ukumoyika uYehova?
12 Umdumisi wathi: “Inyama yam iye yankwantya ngokunkwantyiswa kuwe [Yehova].” (INdumiso 119:120) Ukumoyika kwethu uThixo ngendlela efanelekileyo, okubonakala ngokuphepha oko kungamkholisiyo, kubalulekile ukuze asomeleze njengabakhonzi bakhe. Ukumoyika uYehova kwenza uYobhi waphila ngobulungisa. (Yobhi 1:1; 23:15) Ukoyika uThixo kunokusenza sihlale kwikhondo elimkholisayo phezu kwabo nje ubunzima esimele sibunyamezele. Noko ke, ukuze ubani anyamezele, ufanele athandaze ngokunyaniseka enokholo.—Yakobi 5:15.
Thandaza Unokholo
13-15. (a) Kutheni sinokuba nokholo lokuba imithandazo yethu iza kuphendulwa? (b) Yintoni enokwenzeka xa singakwazi oko simele sikuthethe emthandazweni? (c) Yenza umzekelo wendlela INdumiso 119:121-128 enokunxulumana ngayo ‘nokugcuma kwethu okungathethekiyo’ emthandazweni.
13 Sinokuthandaza sinokholo lokuba uThixo uya kukwenza oko sikucelayo. (INdumiso 119:121-128) Njengomdumisi, siqinisekile ukuba imithandazo yethu iya kuphendulwa. Ngoba? Kuba siyayithanda imiyalelo kaThixo, “ngaphezu kwegolide, ewe, igolide esulungekisiweyo.” Ukongezelela koko, ‘siyigqala njengelungileyo yonke imiyalelo kaThixo ephathelele zonke izinto.’—INdumiso 119:127, 128.
14 UYehova uyayiva imithandazo yethu kuba sithandaza sinokholo yaye ngenyameko senza ngokuvisisana nemiyalelo yakhe. (INdumiso 65:2) Kodwa kuthekani ukuba maxa wambi sineengxaki ezinzima de singazi nokuba sithini xa sithandaza? Xa kunjalo “umoya ngokwawo uyasibongozela ngokugcuma okungathethekiyo.” (Roma 8:26, 27) Ngamaxesha anjalo, uThixo uthabatha imithandazo ekwiLizwi lakhe njengemela iintswelo zethu.
15 IZibhalo zinemithandazo neengcamango ezininzi ezinxulumene ‘nokugcuma kwethu okungathethekiyo.’ Ngokomzekelo, cinga ngeNdumiso 119:121-128. Indlela izinto ezichazwe ngayo apha inokuvisisana neemeko zethu. Ngokomzekelo, ukuba soyika ukuqhathwa, sinokucela uThixo asincede ngendlela umdumisi awenza ngayo. (Indinyana 121-123) Masithi mhlawumbi kufuneka senze isigqibo esinzima. Sinokucela ukuba umoya kaYehova usincede sikhumbule izikhumbuzo zakhe size sizisebenzise. (Indinyana 124, 125) Nangona ‘siwuthiyile wonke umendo wobuxoki,’ kusenokufuneka sicele uThixo asincede ukuze singayekeleli kwizilingo ezithile size saphule umthetho wakhe. (Indinyana 126-128) Ukuba siyifunda yonk’ imihla iBhayibhile, iindinyana eziluncedo njengezi sinokuzikhumbula xa sithandaza kuYehova.
Ukuncedwa Zizikhumbuzo ZikaYehova
16, 17. (a) Kutheni kufuneka sifumane izikhumbuzo zikaThixo nje, yaye sifanele sizijonge njani? (b) Abanye banokusijonga njani, kodwa yiyiphi eyona nto ibalulekileyo?
16 Ukuze imithandazo yethu iviwe nguThixo aze akholiswe sithi, simele sithobele izikhumbuzo zakhe. (INdumiso 119:129-136) Ekubeni silibala, sifuna izikhumbuzo zikaYehova ezibalaseleyo ezisikhumbuza imiyalelo nemithetho yakhe. Kakade ke, siyakuvuyela ukufumana ukukhanya kokomoya okutsha okutyhilwa lilizwi likaThixo. (INdumiso 119:129, 130) Kwakhona sinombulelo kuba uYehova eye ‘wakhanyisa ubuso bakhe kuthi’ nangona ‘kusihla imisinga yamanzi emehlweni ethu’ ngenxa yokuba abanye besaphula umthetho wakhe.—INdumiso 119:135, 136; Numeri 6:25.
17 Sinokuqiniseka ukuba uThixo uya kuqhubeka ekholiswa sithi ukuba sithobela izikhumbuzo zakhe zobulungisa. (INdumiso 119:137-144) Njengabakhonzi bakaYehova, siyaqonda ukuba unelungelo lokusimisela izikhumbuzo zakhe zobulungisa njengemithetho esifanele siyithobele. (INdumiso 119:138) Ekubeni umdumisi weyeyithobela imithetho kaThixo, kwakutheni ukuze athi: “Andibalulekanga yaye ndidelekile”? (INdumiso 119:141) Kuyabonakala ukuba, wayebhekisela kwindlela ezazimjonga ngayo iintshaba zakhe. Ukuba sibumela ngokuqinileyo ubulungisa, abanye banokusijongela phantsi. Ukanti, eyona nto ibalulekileyo kukuba uYehova uyakholiswa sithi kuba siphila ngokuvisisana nezikhumbuzo zakhe zobulungisa.
Ukunqabiseka Nokuba Seluxolweni
18, 19. Kuba nayiphi imiphumo ukuthobela kwethu izikhumbuzo zikaThixo?
18 Ukuthobela izikhumbuzo zikaThixo kusenza sihlale sisondele kuye. (INdumiso 119:145-152) Ngenxa yokuba sinikel’ ingqalelo kwizikhumbuzo zikaYehova, siziva sikhululekile ukuthandaza kuye ngokusuk’ entliziyweni, yaye sinokulindela ukuviwa. Sinokuvuka “ekuzeni kokusa” size sikhalele uncedo. Eli lelona xesha lifanelekileyo lokuthandaza. (INdumiso 119:145-147) Kwakhona uThixo usondele kuthi kuba siyakuphepha ukuziphatha okubi yaye ilizwi lakhe siligqala njengeliyinyaniso, njengoko uYesu wenzayo. (INdumiso 119:150, 151; Yohane 17:17) Ulwalamano lwethu noYehova luyasomeleza kweli hlabathi lizaliswe ziinkathazo yaye luya kuqhubeka lusenjenjalo ukutyhubela imfazwe yakhe enkulu yeArmagedon.—ISityhilelo 7:9, 14; 16:13-16.
19 Ngenxa yokuba silixabisa ngokunzulu ilizwi likaThixo, sinqabiseke ngokwenene. (INdumiso 119:153-160) Ngokungafaniyo nabangendawo, ‘asiphambukanga kwizikhumbuzo zikaYehova.’ Siyayithanda imiyalelo kaThixo yaye ngenxa yoko sinqabisekile kububele bakhe bothando. (INdumiso 119:157-159) Izikhumbuzo zikaYehova zisenza sikhumbule oko afuna sikwenze kwiimeko ezithile. Kwelinye icala, imiyalelo kaThixo iyasalathisa, yaye siyaqonda ukuba uMdali wethu unelungelo lokusalathisa. Ekubeni siqonda ukuba ‘lonke ilizwi likaThixo liyinyaniso’ yaye asinako ukwalathisa amanyathelo ethu ngokupheleleyo, silwamkela ngovuyo ulwalathiso lukaThixo.—INdumiso 119:160; Yeremiya 10:23.
20. Kutheni ‘sinoxolo oluninzi’?
20 Ukuthanda kwethu imithetho kaYehova kusenza sibe noxolo oluninzi. (INdumiso 119:161-168) Intshutshiso ayisiphulukanisi ‘noxolo lukaThixo’ olungenakuthelekiswa nanto. (Filipi 4:6, 7) Izigwebo zikaYehova zobulungisa sizixabisa kangangokuba sisoloko simdumisa ngenxa yazo—“izihlandlo ezisixhenxe ngosuku.” (INdumiso 119:161-164) Umdumisi wavuma wathi: “Uxolo oluninzi lolwabo bathanda umthetho wakho, yaye kubo akukho mqobo usisikhubekiso.” (INdumiso 119:165) Ukuba siyawuthanda umthetho kaYehova size siwugcine, asiyi kukhutyekiswa ngokomoya koko kwenziwa ngomnye umntu okanye yiyo nayiphi na enye into.
21. Yiyiphi imizekelo yeZibhalo ebonisa ukuba asifanele sikhubeke ukuba kuvela iingxaki ebandleni?
21 Abantu abaninzi abakhankanywe eBhayibhileni abazange bavumele nantoni na ibe ngumqobo osisikhubekiso ohlala uhleli. Ngokomzekelo, indoda engumKristu uGayo akazange akhubeke kodwa ‘waqhubeka ehamba enyanisweni’ nakubeni uDiyotrefe wayeziphatha ngendlela engahlonel’ uThixo. (3 Yohane 1-3, 9, 10) UPawulos wabongoza abafazi abangamaKristu uWodiya noSintike “ukuba bacinge nto-nye beseNkosini,” esenjenjalo mhlawumbi ngenxa yengxaki esenokuba yayiphakathi kwabo. Kuyabonakala ukuba, bancedwa bayicombulula ingxaki yabo, ibe baqhubeka bekhonza uYehova ngokuthembeka. (Filipi 4:2, 3) Ngoko ke asimele sikhubeke xa kuvela iingxaki ezithile ebandleni. Masizimisele ukugcina imiyalelo kaYehova, sikhumbula ukuba ‘zonke iindlela zethu ziphambi kwakhe.’ (INdumiso 119:168; IMizekeliso 15:3) Ngoko akukho nto iya kusenza siphulukane ngokupheleleyo ‘noxolo oluninzi.’
22. (a) Ukuba sithobela uThixo, liliphi ilungelo esinokuba nalo? (b) Sifanele sibajonge njani abanye abaye balishiya ibandla lamaKristu?
22 Ukuba sisoloko simthobela uYehova, siya kuba nelungelo lokuhlala simdumisa. (INdumiso 119:169-176) Xa siphila ngokuvisisana nemimiselo kaThixo, asiyi kunandipha kuphela unqabiseko ngokomoya kodwa ‘imilebe yethu iya kuqhubeka impompoza indumiso kaYehova.’ (INdumiso 119:169-171, 174) Eli lelona lungelo libalaseleyo sinokuba nalo kule mihla yokugqibela. Umdumisi wayefuna ukuqhubeka ephila yaye edumisa uYehova, kodwa nangona kungachazwanga, kuyabonakala ukuba wakha ‘wabhadula njengemvu elahlekileyo.’ (INdumiso 119:175, 176) Bambi abaye balishiya ibandla lamaKristu basenokuba basamthanda uThixo yaye bafuna ukumdumisa. Ngoko ke masenze konke esinako ukubanceda ukuze bafumane unqabiseko lokomoya baze banandiphe uvuyo lokudumisa uYehova nabantu bakhe kwakhona.—Hebhere 13:15; 1 Petros 5:6, 7.
Ukhanyiselo Oluhlala Luhleli
23, 24. Ziziphi izinto oye wangenelwa kuzo kwiNdumiso 119?
23 INdumiso 119 inokusinceda ngeendlela ezahlukahlukeneyo. Ngokomzekelo, inokusenza sikholose ngakumbi ngoThixo, kuba ibonisa ukuba ulonwabo lokwenene lufumaneka ‘ngokuhamba emthethweni kaYehova.’ (INdumiso 119:1) Umdumisi usikhumbuza ukuba ‘lonke ilizwi likaThixo liyinyaniso.’ (INdumiso 119:160) Ngokuqinisekileyo oku kufanele kusenze silixabise ngakumbi lonke iLizwi likaThixo elibhaliweyo. Ukucamngca ngeNdumiso 119 kufanele kusenze sizifundisise ngenkuthalo iZibhalo. Ngokuphindaphindiweyo umdumisi wathandaza kuThixo esithi: “Ndifundise imimiselo yakho.” (INdumiso 119:12, 68, 135) Kwakhona wambongoza esithi: “Ndifundise ukulunga, ingqiqo nokwazi, kuba ndibonise ukholo kwimiyalelo yakho.” (INdumiso 119:66) Sifanele sithandaze ngendlela efanayo.
24 Ukufundiswa nguYehova kusenza sibe nolwalamano olusondeleyo naye. Izihlandlo ezininzi umdumisi uzibiza ngokuthi ngumkhonzi kaThixo. Eneneni, uthetha noYehova ngala mazwi achukumisayo: “Ndingowakho.” (INdumiso 119:17, 65, 94, 122, 125; Roma 14:8) Kulilungelo ngokwenene ukukhonza nokudumisa uYehova njengomnye wamaNgqina akhe! (INdumiso 119:7) Ngaba ukhonza uThixo ngovuyo njengomvakalisi woBukumkani? Ukuba kunjalo, qiniseka ukuba uYehova uya kuqhubeka ekuxhasa yaye ekusikelela kulo msebenzi ulilungelo ukuba uhlala ukholose ngelizwi lakhe uze ulivumele likukhanyisele.
Unokuphendula Njani?
• Kutheni sifanele silithande ilizwi likaThixo?
• Ilizwi likaThixo lisomeleza njani?
• Izikhumbuzo zikaYehova zisinceda njani?
• Kutheni abantu bakaYehova benqabisekile yaye beseluxolweni?
[Umfanekiso okwiphepha 16]
Ilizwi likaThixo lingumthombo wokukhanya kokomoya
[Umfanekiso okwiphepha 17]
Ukuba siyazithanda izikhumbuzo zikaYehova, akasayi kuze asijonge “njengentlenge”
[Imifanekiso ekwiphepha 18]
Ukuba sifunda iBhayibhile yonk’ imihla, sinokuzikhumbula iindinyana eziluncedo xa sithandaza