“Olona Suku Lubalaseleyo Ebomini Bam”
UMBUTHO waseOstreliya oxhaswa ngurhulumente iBeyondblue uthi: “Ukudandatheka sesona sigulo sengqondo sixhaphakileyo kubantu abaselula.” Uphando oluye lwenziwa lubonisa ukuba bamalunga ne-100 000 abantu abaselula ababa ngamaxhoba okudandatheka nyaka ngamnye.
Oku kuchaphazela namaKristu aselula. Noko ke, ukuba nokholo kwawo kuYehova, kuye kwawanceda akwazi ukumelana nokudandatheka nokulisebenzisa kakuhle ixesha lobutsha bawo. Oko kuye, kwabachukumisa abanye. Njani?
Khawuve amava kaClaire oneminyaka eli-18 ubudala. Yena nonina baya kwiintlanganiso zamaNgqina kaYehova kwibandla eliseMelbourne. Wathi uyise kaClaire akuyishiya kwesinomhlwa intsapho yakhe, uClaire waqala ukudandatheka. Kodwa ukholo lwakhe, kuYise wasezulwini uYehova lwaqhubeka lungahexi. Ngenye imini uLydia, ongugqirha wabo, wabatyelela ekhayeni labo eze kubona umama kaClaire owayengaphilanga. Emva koko, wacela uClaire ukuba ampheleke baye evenkileni. Njengoko babehamba, wambuza enoba uyathandana kusini na. UClaire wamchazela ukuba ekubeni eliNgqina likaYehova, akanakusuke athandane nje engenanjongo zakutshata. Le mpendulo yamshiya ebamb’ ongezantsi lo gqirha. UClaire wamchazela indlela eye yamnceda ngayo iBhayibhile wakwazi ukwenza izigqibo zobulumko ebomini. Ekugqibeleni, wacela ukumhambisela incwadi esekelwe eBhayibhileni eyamncedayo wenza izigqibo zobulumko. Le ncwadi yayinomxholo othi Imibuzo Yabantu Abaselula—Iimpendulo Eziluncedo.
Emva kweentsuku ezintathu eyifumene le ncwadi, uLydia watsalela unina kaClaire umnxeba emchazela indlela ayinandiphe ngayo. Emva koko wacela ukuba amnike iincwadi ezintandathu ukuze azinike oogxa bakhe. Xa uClaire wayese ezo ncwadi, lo gqirha wamchazela indlela achukunyiswe ngayo lukholo lwakhe. UClaire wacela ukumqhubela isifundo seBhayibhile, ibe lo gqirha wavuma.
Kwadlula iqela leenyanga, uClaire emqhubela isifundo ngexesha lekhefu lasemini. Emva koko uLyidia wacela uClaire ukuba athethe kwingqungquthela eyayixubusha ngokudandatheka kolutsha. Nangona wayemathidala wavuma. Kuloo ngqungquthela kwakukho abantu abangaphezu kwama-60. Izithethi zaloo ngqungquthela yayiziingcali zengqondo ezine—zonke ingabantu abadala. Emva koko kwafika ixesha lokuba uClaire athethe. Wachaza indlela ekubaluleke ngayo ukuba abantu abaselula babe nobuhlobo noThixo. Wachaza ukuba uYehova uThixo ubakhathalele abantu abaselula kwaye uyabanceda bonke abo bafuna inkxaso nentuthuzelo. Wolek’ umsundulo echaza ukholo lwakhe lokuba uYehova uza kuphelisa zonke iintlobo zezigulo. (Isaya 33:24) Waba yintoni umphumo wokunikelwa kobo bungqina?
UClaire uthi: “Abantu abaninzi beza kum emva kolo cwangciso bendichazela indlela ababechukumiseke ngayo kukuva umntu oselula ethetha ngoThixo. Apho ndahambisa iincwadi ezingama-23 ezinomxholo othi Abantu Abaselula Bayabuza. Amantombazana amathathu awayelapho andinika iinombolo zeminxeba yawo. Enye yaloo mantombazana ngoku iqhutyelwa isifundo seBhayibhile. Olo yaba lolona suku lubalaseleyo ebomini bam.”