Uyakhumbula Na?

Ngaba uye wakuvuyela ukufunda iiMboniselo zakutshanje? Ukuba kunjalo, khawubone ukuba unokuyiphendula kusini na le mibuzo ilandelayo:

• Abavumisi ngeenkwenkwezi bamtyelela nini uYesu?

Enye inguqulelo yeBhayibhile ithi: “Abavumisi abazange bamtyelele ngobusuku awazalwa ngabo uYesu ngoxa wayesahleli emkhumbini njengokuba benzayo abelusi. Aba bavumisi bafika emva kweenyanga ezithile kamva.” Ngelo xesha uYesu wayesele ‘engumntwana oselula’ ehlala endlwini. (Mat. 2:7-11) Ukuba uYesu wayesele eyifumene igolide nezinye izipho zexabiso ngobo busuku bokuzalwa kwakhe, ngaba uMariya wayeya kunikela ngamahobe amabini kuphela etempileni kwiintsuku ezingama-40 kamva?—1/1, iphepha 31.

• Yintoni enokwenziwa ngabantu ukuze bonwabe?

Umntu unokuzibuza oku, ‘Ngaba andinakuhlengahlengisa iimeko zam ukuze ubomi bam bube lula?’ UAmy wenza njalo. Wayemi kakuhle epokothweni kodwa engonwabanga. Waqonda ukuba ngenxa yokusukelana nezikhundla zeli hlabathi waphantse waphulukana nokholo. Ngenxa yoko, wagqiba ekubeni abeke izilangazelelo zoBukumkani kuqala waza wanguvulindlela kangangethuba elithile. Uthi: “Ngoku ndaneliseke ngendlela endingazange ndaneliseke ngayo” ngoxa ndandisaqeshiwe.—1/15, iphepha 19.

• Yintoni enokunceda abanye oomama bafumane ulwaneliseko?

Oomama abaninzi basebenza ngaphandle kwekhaya. Abanye benjenjalo ukuze banyamekele iintsapho zabo, ngoxa abanye befuna nje ukuba nemali yabo baze bangaxhomekeki mntwini, okanye ukuze bathenge ubunewunewu ababufunayo. Kakade ke, abanye basebenza nje kuba bethanda umsebenzi wabo. Oomama abangamaKristu badlala indima ephambili ekhaya—ngakumbi xa abantwana besebancinane. Abanye baye bakhethe ukunciphisa ixesha lomsebenzi wempangelo okanye bawushiye ukuze banikele ingqalelo engakumbi kwintsapho yabo, nto leyo ebenza bonwabe.—2/1, iphepha 28-31.

• Sisiphi “isizukulwana” awayethetha ngaso uYesu kumazwi akhe akuMateyu 24:34?

Igama elithi “isizukulwana,” uYesu wayesoloko elisebenzisa xa ethetha kakubi okanye ebhekisela kwabangendawo. Kodwa, akazange athethe kakubi ngesizukulwana awayebhekisela kuso xa wayethetha nabafundi bakhe, ababesele beza kuthanjiswa ngomoya oyingcwele. Ngabo ababeza kuziqonda kakuhle izinto ezithethwa kuMateyu 24:32, 33. Ngoko kuyabonakala ukuba uYesu wayebhekisela kubalandeli bakhe abathanjisiweyo, abo benkulungwane yokuqala nabo banamhlanje.—2/15, iphepha 23-4.

• UMthetho wawungumkhapheli njani njengokuba isitsho eyabaseGalati 3:24?

Ngokufuthi umkhapheli wamandulo wayesiba likhoboka elithenjiweyo eliza kukwazi ukukhusela umntwana, lize liqinisekise ukuba iminqweno kayise iyaphunyezwa. Ngokufanayo, uMthetho wawakhusela amaYuda kwiimpembelelo ezonakalisayo, njengokutshata nabahedeni. Noko ke, kanye njengomkhapheli womntwana, uMthetho wawuyinto nje yethutyana, eza kusebenza de kufike uKristu.—3/1, iphepha 18-21.

• Ngokuvisisana noYakobi 3:17, ziziphi iimpawu esimele sibe nazo?

Ukuze sibe nyulu, kufuneka sizigatye ngokukhawuleza izinto ezimbi. (Gen. 39:7-9) Simele sibe noxolo, siphephe ukuba ngqwabalala okanye izenzo eziphazamisa uxolo. Ngamnye kuthi umele azibuze oku: ‘Ngaba ndaziwa njengomntu othanda uxolo okanye uphuma-silwe? Ngaba ndihlala ndiphikisana nabanye? Ngaba ndikhubeka msinya, okanye ndihlala ndikhubekisa abanye? Ngaba ndiyaxolela endaweni yokunyanzelisa iimbono zam?’—3/15, iphepha 24-5.

• Kwakutheni ukuze uYesu ayiphilise ngokuthe ngcembe indoda eyayiyimfama? (Marko 8:22-26)

IBhayibhile ayisiniki nkcukacha zingako ngalo mba. Kodwa kungenzeka ukuba oku wayekwenza ukuze le ndoda iqhelane kakuhle nokubona. Oku kubonisa indlela awayenenkxalabo ngayo uYesu ngale ndoda.—4/1, iphepha 30.