Ukumenywa Kwabamelwane Kwikhaya LaseBheteli
“KWENZIWA ntoni apha?” Lo ngumbuzo obuzwa ngabantu abaninzi abadlula kwisakhiwo esikhulu samaNgqina kaYehova esikwisiXeko saseMogale (eKrugersdorp), kufutshane naseJohannesburg, eMzantsi Afrika. Ngomhla we-12 nowe-13 kaOktobha, 2007 amaNgqina amema abamelwane ukuba baze kubona esi sakhiwo sesebe. Injongo yayintlumbini—ukuphelisa amarhe nokubonisa abantu izinto ezenziwa lisebe ukuze lixhase umsebenzi owayalelwa nguYesu Kristu.—Mateyu 28:19, 20.
Kwabekwa imiqondiso emikhulu eyamkela abantu esangweni, kwaza kwanikwa abamelwane izimemo. Kwakumenywe oosomashishini neentsapho zabo. Basabela njani abantu? Kweza iindwendwe ezingaphezu kwama-500.
Iindwendwe zaba nomdla kakhulu kumatshini wokushicilela oyiMAN Roland Lithoman, oshicilela amaphepha angama-90 000 ngeyure. Zaba nomdla kumatshini wokudibanisa iincwadi nakwisebe elipakisha lize lithumele uncwadi oluziitoni ezili-14 ngosuku. AmaNgqina akumasebe awahlukahlukeneyo azoba imifanekiso emihle kuquka naleyo ibonisa imbali yokushicilela, ukususela kumatshini obizwa ngokuba yiGutenberg ukusa koomatshini bokushicilela bala maxesha. Omnye umfanekiso ubonisa indlela isebe eliyinyamekela ngayo imeko-bume. Ngokomzekelo, kukho umatshini ococa imichiza eyingozi notsala ivumba elibi elikhutshwa ngumatshini nemibhobho eqokelela inkunkuma yamaphepha.
Iphepha-ndaba lasekuhlaleni lathi amatsha-ntliziyo angama-700 ahlala kwesi sakhiwo “ngabalungiseleli abanikele ubomi babo kuYehova.” Lathetha “nangococeko olukumgangatho ophezulu kunye noomatshini bokushicilela bala maxesha.” Kwakuze nenye indoda eyayingafuni nokuwabona amaNgqina kaYehova. Emva koko yabhala le leta: “Ndivuyisana nani. Kunqabile ukuba umntu abone indawo enkulu kangaka nenocwangco ngolu hlobo.”
Iindwendwe ezininzi zazingawuval’ umlomo emva kokubona isakhiwo yaye zothuka gqitha zakubon’ ukuba kweli sebe kukho uncwadi lweBhayibhile oluguqulelwe ngeelwimi ezili-151 yaye kushicilelwa uncwadi lwamazwe ali-18 akumzantsi nombindi Afrika. Ungatyelela kwizakhiwo zamasebe amaNgqina kaYehova ezisehlabathini lonke ngexesha lomsebenzi. Kutheni ungabhaleli isebe elikwindawo ohlala kuyo uze ubuze ixesha onokutyelela ngalo?
[Umfanekiso okwiphepha 14]
Abantu abaze kutyelela isebe
[Umfanekiso okwiphepha 14]
Isimemo
[Imifanekiso ekwiphepha 15]
Isakhiwo sesebe laseMzantsi Afrika kwisiXeko saseMogale
[Umfanekiso okwiphepha 15]
Umatshini wokushicilela iMAN Roland Lithoman
[Umfanekiso okwiphepha 15]
Umatshini wokudibanisa iincwadi
[Umfanekiso okwiphepha 15]
Isebe lokuthumela