‘Yiba Ngumlandeli Wam’
“Ukuba nabani na ufuna ukundilandela, makazincame, athabathe isibonda sakhe sentuthumbo imihla ngemihla aze aqhubeke endilandela.”—LUKA 9:23.
1, 2. (a) Sisiphi isimemo sobubele esadluliselwa nguYesu? (b) Wena uye wenza ntoni wakufumana esi isimemo sikaYesu?
XA BABUSELE buza kuphela ubulungiseleli bakhe, uYesu wayeshumayela ePereya, ummandla ongaphesheya kweYordan, kumntla-mpuma welakwaYuda. Mfana uthile weza kuye waza wambuza ngoko amele akwenze ukuze afumane ubomi obungunaphakade. Wathi emva kokufumanisa ukuba lo mfana wayewuthobela ngokunyanisekileyo uMthetho kaMoses, wammema ngokukhethekileyo. Wathi: “Hamba, uye kuthengisa izinto onazo, unike amahlwempu, yaye uya kuba nobuncwane ezulwini, uze ube ngumlandeli wam.” (Marko 10:21) Khawufan’ ucinge nje—ukumenyelwa ukulandela uYesu, uNyana okuphela kozelweyo woYena Thixo Uphakamileyo!
2 Loo mfana akazange asamkele esi simemo, kodwa abanye basamkela. Ngaphambilana, uYesu wayekhe wathi kuFilipu: “Yiba ngumlandeli wam.” (Yoh. 1:43) UFilipu wavuma yaye kamva waba ngumpostile. UYesu wamema noMateyu, ibe naye wavuma. (Mat. 9:9; 10:2-4) Eneneni, uYesu wabamema ngendlela efanayo bonke abathanda ubulungisa xa wathi: “Ukuba nabani na ufuna ukundilandela, makazincame, athabathe isibonda sakhe sentuthumbo imihla ngemihla aze aqhubeke endilandela.” (Luka 9:23) Kungenxa yoko nabani na enokuba ngumlandeli kaYesu ukuba ukufuna ngokwenene oko. Ngaba nawe uyafuna? Inkoliso yethu sele isamkele isimemo sikaYesu sobubele, yaye nasentsimini simema abanye.
3. Yintoni eya kusinceda singaphambuki ekulandeleni uYesu?
3 Noko ke, ilusizi into yokuba, abanye ababenomdla kwinyaniso yeBhayibhile bengasaqhubeki nokuyifunda. Kunoko, bayekelel’ umxakatho baza ekugqibeleni ‘bakhukuliseka’ bayeka ukulandela uYesu. (Heb. 2:1) Sinokukuphepha njani ukuwela kumgibe ofanayo? Kuya kusinceda ukuzibuza le mibuzo: ‘Yiyiphi eyona nto eyandenza ndakhetha ukulandela uYesu? Kuthetha ntoni ukumlandela?’ Ukukhumbula iimpendulo zale mibuzo mibini kuya kusinceda sibambelele kwisigqibo sokungayiyeki le ndlela intle sayikhethayo. Kanti oko kuya kusinceda sikhuthaze nabanye ukuba balandele uYesu.
Kutheni Ufanele Ulandele UYesu?
4, 5. Kutheni uYesu ekufanelekela ukusikhokela?
4 Umprofeti uYeremiya wathi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yer. 10:23) Imbali iye yawangqina eyinyaniso la mazwi kaYeremiya. Kuye kwabonakala ngakumbi ukuba abantu abangafezekanga abanakuze bakwazi ukuzilawula. Siye samkela isimemo sokulandela uYesu kuba siye sabona ukuba akakho omnye umntu okufanelekelayo ukuba yiNkokeli yethu njengaye. Nazi ezinye iimfaneleko zikaYesu.
5 Okokuqala, uYesu wakhethwa nguYehova ngokwakhe ukuba abe yiNkokeli enguMesiya. Ngubani omnye ngaphandle koMdali wethu obenokukwazi ukusikhethela iNkokeli? Okwesibini, uYesu uneempawu ezithandekayo esinokuzixelisa. (Funda uIsaya 11:2, 3.) Ungumzekelo ogqibeleleyo. (1 Pet. 2:21) Okwesithathu, uYesu ubakhathalele ngokwenene abo bamlandelayo, ibe oko wakubonisa ngokubafela. (Funda uYohane 10:14, 15.) Usibonisile ukuba ungumalusi onenkathalo ngokusikhokelela kubomi obunolonwabo ngoku nakwikamva elingunaphakade nelizukileyo. (Yoh. 10:10, 11; ISityhi. 7:16, 17) Ngenxa yezi zizathu nezinye, senze isigqibo sobulumko ngokukhetha ukumlandela. Noko ke, kuquka ntoni ukulandela uYesu?
6. Yintoni ebandakanyekileyo ekulandeleni uYesu?
6 Ukuba ngumlandeli kaKristu akuthethi nje ukuzibiza ngokuba singamaKristu. Abantu abamalunga namawaka amabini ezigidi bathi bangamaKristu namhlanje, kodwa imisebenzi yabo intama ukuba ‘bangabenzi bokuchasene nomthetho.’ (Funda uMateyu 7:21-23.) Xa abantu besiba nomdla kwisimemo sokulandela uYesu, siyabaxelela ukuba amaKristu okwenyaniso asekela bonke ubomi bawo kwiimfundiso nakumzekelo kaYesu—yaye akwenza oko suku ngalunye lokuphila kwawo. Ukuze ubone ukuba kuthetha ntoni oku, makhe sihlolisise ezinye izinto esizaziyo ngoYesu.
Xelisa Umzekelo KaYesu Wobulumko
7, 8. (a) Buyintoni ubulumko, ibe kutheni uYesu wayebalasele ngobulumko? (b) UYesu wabubonisa njani ubulumko, ibe thina sinokumxelisa njani?
7 UYesu wabonisa iimpawu ezininzi ezibalaseleyo, kodwa siza kuhlolisisa nje ezine kuzo: ubulumko, ukuthobeka, inzondelelo nothando. Okokuqala, cinga nje ngobulumko bakhe—ubuchule awayenabo bokulusebenzisa kakuhle ulwazi nokuqonda. Umpostile uPawulos wathi: “[NguYesu] uvimba wabo bonke ubuncwane bobulumko nolwazi.” (Kol. 2:3) Wabufumana phi obu bulumko? Yena ngokwakhe wathi: “Ndizithetha ezi zinto kanye njengoko uBawo wandifundisayo.” (Yoh. 8:28) NguYehova owamnika ubulumko, ngoko ayisimangalisi into yokuba uYesu enze izigqibo ezinokuthenjwa.
8 Ngokomzekelo, uYesu wayikhetha ngobulumko indlela yokuphila. Wagqiba kwelokuba aphile ubomi obulula, egxininise kwinto enye nje kuphela: ukwenza ukuthanda kukaThixo. Ngobulumko wanikela ngexesha namandla akhe ekufuneni kuqala uBukumkani. Silandela umzekelo kaYesu ngokuzama ukugcina ‘iliso lethu lingenakumbi’ size sikuphephe ukuziqoba ngezinto ezingeyomfuneko ezifuna amandla nengqalelo yethu. (Mat. 6:22) AmaKristu amaninzi aye enza okuthile ukuze aphile ubomi obulula aza anikela ixesha elingakumbi kubulungiseleli. Amanye aye aba ngoovulindlela. Ukuba nawe uye wenjenjalo, sikuncoma kakhulu. ‘Ukufuna kuqala ubukumkani’ kuyonwabisa yaye kwanelisa gqitha.—Mat. 6:33.
Thobeka NjengoYesu
9, 10. UYesu wakubonisa njani ukuthobeka?
9 Inkalo yesibini yobuntu bukaYesu esiza kuthetha ngayo kukuthobeka. Xa abantu abangafezekanga benikwa igunya, badla ngokukhukhumala. UYesu wayengenjalo kwaphela! Nangona wayenomsebenzi omkhulu ekuzalisekiseni injongo kaYehova, uYesu wayengenayo nentwana yekratshi. Nathi siyakhuthazwa ukuba sixelise umzekelo wakhe. Umpostile uPawulos wathi: “Hlalani ninesi simo sengqondo wayenaso noKristu Yesu, owathi, nangona wayekubume bukaThixo, akacinga ngokurhwaphiliza, ukuze azenze alingane noThixo. Hayi khona, kodwa waziqongqotha waza wathabatha ubume bekhoboka, wafana nabantu.” (Fil. 2:5-7) Kwakuquka ntoni oko?
10 UYesu wayenelungelo elizukileyo lokuhlala noYise ezulwini, kodwa wakulungela ‘ukuziqongqotha.’ Ubomi bakhe bafuduselwa kwisibeleko sentombi enyulu engumYuda, wakhula apho kangangeenyanga ezisithoba de wazalwa elusana olungenakuzenzela nto, kwikhaya lomchweli ongathathi ntweni. UYesu wakhulela kwaYosefu, waqingqa, wayinkwenkwana de wakwishumi elivisayo. Wayengenasono. Sekunjalo, ngalo lonke ixesha lobutsha bakhe waqhubeka ezithobe kubazali ababengafezekanga nabanesono. (Luka 2:51, 52) Ngokwenene wayethobeke ngendlela engathethekiyo!
11. Ziziphi iindlela esinokukuxelisa ngazo ukuthobeka kukaYesu?
11 Xa sizamkela ngovuyo izabelo ezibonakala ziphantsi, sixelisa umzekelo kaYesu wokuthobeka. Ngokomzekelo, cinga ngesabelo sokushumayela iindaba ezilungileyo. Lo msebenzi usenokubonakala uphantsi, ingakumbi xa abantu besichasa, besinyelisa okanye besithiyile. Noko ke, xa siqhubeka sishumayela, sinceda abanye ukuba basamkele isimemo sikaYesu baze bamlandele. Ngaloo ndlela siyancedisa ekusindiseni ubomi. (Funda eyesi-2 kuTimoti 4:1-5.) Omnye umzekelo kukunyamekela iHolo yoBukumkani. Oku kunokuquka izinto ezinjengokuchitha imigqomo yenkunkuma, ukukorobha nokucoca izindlu zangasese—yonke loo misebenzi iphantsi! Sekunjalo siyaqonda ukuba ukunyamekela iHolo yethu yoBukumkani—iziko lonqulo olunyulu kwindawo esihlala kuyo—kuyinxalenye yenkonzo yethu engcwele. Ngokuyenza ngovuyo imisebenzi ebonakala iphantsi, sibonisa ukuba sithobekile yaye ngaloo ndlela silandela emanyathelweni kaKristu.
Yiba Nenzondelelo NjengoYesu
12, 13. (a) UYesu wayibonisa njani inzondelelo, yaye wakhuthazwa yintoni? (b) Yintoni eya kusikhuthazela ukuba sibe nenzondelelo kubulungiseleli?
12 Cinga ngenzondelelo kaYesu kubulungiseleli. UYesu wenza izinto ezininzi xa wayesemhlabeni. Xa wayeselula, kusenokwenzeka ukuba wayesebenza noyise owayemkhulisa uYosefu njengomchweli. Kubulungiseleli bakhe, uYesu wayesenza imimangaliso kuquka ukuphilisa nokuvusa abafileyo. Kodwa owona msebenzi wakhe uphambili yayikukushumayela iindaba ezilungileyo nokufundisa abo babephulaphula. (Mat. 4:23) Njengabalandeli bakhe, nathi kufuneka senze loo msebenzi. Sinokuwulandela njani umzekelo wakhe? Phakathi kwezinye izinto, sinokwenza lo msebenzi sineenjongo ezifana nezikaYesu.
13 Ngaphezu kwako konke, uYesu washumayela waza wafundisa abantu ngenxa yokuba wayethanda uThixo. Kodwa wayeyithanda nenyaniso awayeyifundisa abantu. Loo nyaniso yayixabiseke gqitha kuye, ibe wayekulangazelela ukuyifundisa abanye. Nathi njengabafundisi okanye ‘abayaleli basesidlangalaleni,’ sivakalelwa kanye ngaloo ndlela. Cinga nje ngenyaniso exabisekileyo esiye sayifunda kwiLizwi likaThixo! Siyayazi imbambano yolongamo lwendalo yonke nendlela eya kuzinziswa ngayo. Sikuqonda kakuhle oko kufundiswa ziZibhalo ngabafileyo neentsikelelo esiza kuzifumana kwihlabathi elitsha likaThixo. Enoba loo nyaniso sisandul’ ukuyiva okanye sayiva kudala, ayisayi kuze iphelelwe, iya kuhlala ixabisekile. (Funda uMateyu 13:52.) Ngokushumayela ngenzondelelo, sibonisa abanye ukuba siyakuthanda oko sikufundiswe nguYehova.
14. Sinokuyixelisa njani indlela kaYesu yokufundisa?
14 Kwakhona, phawula indlela uYesu awayefundisa ngayo. Wayesoloko ebhekisela eZibhalweni xa ethetha nabantu. Xa etshayelela ingongoma ebalulekileyo wayedla ngokuthi: “Kubhaliwe kwathiwa.” (Mat. 4:4; 21:13) Kumazwi akhe, wayebhekisela ngokungqalileyo nangokungangqalanga kwiincwadi ezinokuba ngaphezu kwesiqingatha zeZibhalo zesiHebhere. NjengoYesu, kubulungiseleli bethu sisoloko sifundisa oko kuthethwa yiBhayibhile ibe nanini na kunokwenzeka sicaphula iZibhalo. Ngaloo ndlela, sinceda abo baneentliziyo ezinyanisekileyo bazibonele ukuba sifundisa iingcamango zikaThixo, kungekhona ezethu. Sivuya gqitha xa abantu bevuma ukufunda iBhayibhile nokuxubusha ngendlela elixabiseke nelinentsingiselo ngayo iLizwi likaThixo! Xa abo bantu besamkela isimemo sokulandela uYesu, siba novuyo olungathethekiyo.
Ukulandela UYesu Kuthetha Ukuthanda Abantu
15. Luluphi uphawu awayebalasele ngalo uYesu, yaye ukucinga ngalo kusichaphazela njani?
15 Inkalo yokugqibela yobuntu bukaYesu esiza kuxubusha ngayo ithandeka gqitha—yindlela awayebathanda ngayo abantu. Umpostile uPawulos wathi: “Uthando analo uKristu luyasinyanzela.” (2 Kor. 5:14) Xa sicinga ngendlela uYesu abathanda ngayo abantu xa bebonke kuquka ngamnye wethu, sichukumiseka gqitha yaye siziva sinyanzelekile ukuba silandele umzekelo wakhe.
16, 17. Ziziphi iindlela uYesu awabathanda ngazo abantu?
16 UYesu wabathanda njani abantu? Ukukulungela kwakhe ukufela abantu kwaba yindlela egqibeleleyo yokubonisa uthando lwakhe. (Yoh. 15:13) Noko ke, kubulungiseleli bakhe, uYesu wabonisa uthando nangezinye iindlela. Ngokomzekelo, wayenemfesane kwabo babebandezelekile. Xa wabona uMariya nabo babelilela ukufa kukaLazaro, naye wakhathazeka gqitha. Nangona wayeza kumvusa uLazaro, uYesu waba buhlungu kangangokude nakuye ‘zithi waxa iinyembezi.’—Yoh. 11:32-35.
17 Ebutsheni bobulungiseleli bukaYesu, kweza kuye umntu oneqhenqa waza wathi: “Ukuba nje uyathanda, unako ukundenza ndihlambuluke.” Wenza ntoni uYesu? Ingxelo ithi: “Waba nosizi.” Emva koko wenza into engaqhelekanga. “Wasolula isandla sakhe wamchukumisa, wathi kuye: ‘Ndiyathanda. Hlambuluka.’ Lathi shwaka ngoko nangoko iqhenqa kuye, wahlambuluka.” KuMthetho kaMoses, abantu abaneqhenqa babengahlambulukanga, ibe uYesu ngewayeyinyangile le ndoda ngaphandle kokuyichukumisa. Sekunjalo, njengoko uYesu wayephilisa le ndoda, wayefuna ukuba ive ukuba kunjani ukubanjwa ngomnye umntu, kuba kusenokwenzeka ukuba kwakusele kuyiminyaka ingasabanjwa. Wayenemfesane ngokwenene!—Marko 1:40-42.
18. Sinokulubonisa njani ‘uvelwano’?
18 Njengabalandeli bakaKristu, siyalelwa ukuba sithande abantu ngokuba ‘novelwano.’ (1 Pet. 3:8) Kusenokungabi lula ukuqonda indlela avakalelwa ngayo umKristu onesifo esinganyangekiyo okanye oxinezelekileyo—ingakumbi ukuba asizange sehlelwe zezo zinto thina. Sekunjalo, uYesu wayevelana nabantu abagulayo nangona yena engazange agule. Thina sinokulubonisa njani olo velwano? Ngokuphulaphula kakuhle njengoko abo babandezelekileyo bekhuphela imbilini yabo kuthi. Sisenokuzibuza, ‘Ukuba nam bendinengxaki efanayo bendiya kuvakalelwa njani?’ Ukuba siyikhathalele indlela abavakalelwa ngayo abanye, siya kukwazi ‘ukuyithuthuzela imiphefumlo edandathekileyo.’ (1 Tes. 5:14) Ngaloo ndlela siya kuba silandela uYesu.
19. Ziziphi iindlela osichaphazela ngazo umzekelo kaYesu?
19 Sibaluleke gqitha isifundo esisifumana kumazwi nakwizenzo zikaYesu Kristu! Njengoko sifunda ngaye, siya kufuna ngakumbi ukufana naye—ibe siya kufuna ngakumbi ukunceda abanye bafane naye. Ngoko, masenze konke okusemandleni ethu ukuze sikuvuyele ukulandela uKumkani onguMesiya—ngoku nangonaphakade!
Ngaba Unokuchaza?
• Sinokububonisa njani ubulumko njengoYesu?
• Ziziphi iindlela esinokukubonisa ngazo ukuthobeka?
• Sinokuyibonisa njani inzondelelo kubulungiseleli?
• Ziziphi iindlela esinokumxelisa ngazo uYesu ekuthandeni abantu?
[Ibhokisi/Umfanekiso okwiphepha 5]
INCWADI ESINCEDA SIXELISE UKRISTU
Kwindibano yesithili yowama-2007, kwakhululwa incwadi enamaphepha ali-192 enomxholo othi ‘Yiba Ngumlandeli Wam.’ Le ncwadi ilungiselelwe ukunceda amaKristu anikel’ ingqalelo kuYesu, ingakumbi kwiimpawu zakhe nezinto awayezenza. Emva kwezahluko ezibini ezitshayelelayo, icandelo lokuqala ligubungela iimpawu ezibalaseleyo zikaYesu—ukuthobeka, inkalipho, ubulumko, ukuthobela nokunyamezela kwakhe.
Emva koko kukho amacandelo athetha ngomsebenzi kaYesu njengomfundisi nomshumayeli weendaba ezilungileyo kuquka nezinye iindlela awalubonisa ngazo uthando lwakhe olubalaseleyo. Kuyo yonke le ncwadi, kukho inkcazelo enokunceda umKristu axelise uYesu.
Siqinisekile ukuba le mpapasho iya kusenza sonke sizihlolisise size sizibuze: ‘Ngaba ngokwenene ndiyamlandela uYesu? Ndinokumlandela njani ngokusondeleyo?’ Le ncwadi iya kunceda ‘bonke abo banotyekelo olufanelekileyo ngobomi obungunaphakade’ ukuba babe ngabalandeli bakaKristu.—IZe. 13:48.
[Umfanekiso okwiphepha 4]
UYesu wavuma ukuza emhlabeni waza wazalwa njengosana. Luluphi uphawu olwalufuneka ukuze umntu enze loo nto?
[Umfanekiso okwiphepha 6]
Yintoni eya kusenza sibe nenzondelelo kubulungiseleli?