Ukugqala UMoses Omkhulu
“UYehova uThixo uya kunivelisela phakathi kwabazalwana benu umprofeti onjengam. Nimele nimphulaphule.”—IZE. 3:22.
1. UYesu Kristu uye waba nempembelelo njani kwimbali yoluntu?
KWIMINYAKA engama-2 000 eyadlulayo, xa kwakuzalwa umntwana oyinkwenkwe abalusi beva inkitha yeengelosi emazulwini idumisa uThixo. (Luka 2:8-14) Emva kweminyaka engama-30, waqalisa ubulungiseleli obathabatha iminyaka emithathu enesiqingatha kodwa obo bulungiseleli babangela utshintsho olukhulu kwimbali yabantu. Umbhali-mbali owaziwayo wenkulungwane ye-19, uPhilip Schaff wathetha la mazwi ngalo mfana: “Nangona yena engazange abhale ncwadi, waba nempembelelo enkulu kubabhali beentshumayelo, bemibongo, beencwadi, nakubazobi, ngaphezu kwakhe nabani na owakha waphila okanye ophilayo ngoku.” Umfana ekuthethwa ngaye apha nguYesu Kristu.
2. Wathini umpostile uYohane ngoYesu nangobulungiseleli bakhe?
2 Umpostile uYohane wabhala ingxelo ethetha ngobulungiseleli bukaYesu waza waqukumbela ngala mazwi: “Kukho, enyanisweni, nezinye izinto ezininzi uYesu awazenzayo, ezo, ukuba bezibhalwe ngokweenkcukacha ezipheleleyo, ndiba, ihlabathi ngokwalo belingenakuyiqulatha imisongo ebinokubhalwa.” (Yoh. 21:25) UYohane wayesazi ukuba unokubhala nje izinto ezimbalwa kwizinto ezathethwa nezenziwa nguYesu ngaloo minyaka mithathu inesiqingatha. Sekunjalo, loo ngxelo yabhalwa nguYohane kwiVangeli yakhe ibaluleke kakhulu.
3. Sinokuyiqonda njani indima kaYesu kwinjongo kaThixo?
3 Ngaphandle kweencwadi ezine zeVangeli ezibalulekileyo, zikho nezinye iincwadi zeBhayibhile ezithetha ngobomi bukaYesu nezomeleza ukholo lwethu. Ngokomzekelo, iingxelo zeBhayibhile ezithetha ngamadoda awayephila ngaphambi kokuzalwa kukaYesu zisinceda siyiqonde ngakumbi indima kaYesu kwinjongo kaThixo. Makhe sihlole ezinye zazo.
Amadoda Athembekileyo Amandulo Awayefanekisela UKristu
4, 5. Ngoobani ababefanekisela uYesu, yaye ngaziphi iindlela?
4 UYohane nabanye ababhali beVangeli abathathu bachaza uMoses, uDavide noSolomon njengamadoda awayefanekisela uYesu njengoMthanjiswa kaThixo noKumkani omiselweyo. Aba bakhonzi bakaThixo bamandulo bamfanekisela njani uYesu, yaye yintoni esinokuyifunda kwezi ngxelo?
5 IBhayibhile ithi uMoses wayengumprofeti, umlamli nomkhululi. Kwakunjalo nangoYesu. UDavide wayengumalusi nokumkani owoyisa iintshaba zikaSirayeli. NoYesu ungumalusi nokumkani owoyisayo. (Hez. 37:24, 25) Ngoxa uSolomon wayesathembekile, wayengumlawuli olumkileyo yaye ngelo xesha kwakukho uxolo kwaSirayeli. (1 Kum. 4:25, 29) NoYesu ulumke ngokupheleleyo yaye ubizwa ngokuba ‘yiNkosana yoXolo.’ (Isa. 9:6) Ngokucacileyo, indima kaKristu Yesu iyafana neyaloo madoda amandulo, kodwa indima kaYesu kwinjongo kaThixo ibalasele kakhulu. Okokuqala, makhe sithelekise Yesu noMoses size sibone indlela oko okuya kusinceda ngayo siyiqonde ngakumbi indima kaYesu kwinjongo kaThixo.
UMoses—Owayesandulela UYesu
6. Umpostile uPetros wathini xa echaza ukubaluleka kokuphulaphula uYesu?
6 Emva kwePentekoste yowama-33 C.E., umpostile uPetros wacaphula isiprofeto esithetha ngoMoses esazaliseka kuYesu Kristu. UPetros wayemi phambi kwesihlwele sabanquli ababesetempileni. Abantu ‘bathi thwanga kukumangaliseka’ xa uPetros noYohane bephilisa indoda eyazalwa isisiqhwala, bagxalathelana bonke befuna ukuzibonela. UPetros wachaza ukuba lo mmangaliso ubangelwe ngumoya oyingcwele kaYehova osebenza kuYesu Kristu. Ecaphula iZibhalo ZesiHebhere, wathi: “Enyanisweni, uMoses wathi, ‘UYehova uThixo uya kunivelisela phakathi kwabazalwana benu umprofeti onjengam. Nimele nimphulaphule ngokuvumelana nezinto zonke azithethayo kuni.’”—IZe. 3:11, 22, 23; funda iDuteronomi 18:15, 18, 19.
7. Kutheni abantu ababephulaphule uPetros babenokumqonda umprofeti omkhulu kunoMoses awayethetha ngaye?
7 Abantu ababephulaphule uPetros kusenokwenzeka ukuba babewazi loo mazwi kaMoses. Babemxabise kakhulu uMoses kuba babengamaYuda. (Dut. 34:10) Babekhangele phambili ekufikeni komprofeti omkhulu kunoMoses. Lo mprofeti wayengazukuba ngumthanjiswa nje kaThixo njengoMoses, kodwa wayeza kuba nguMesiya ‘uKristu kaThixo, Lowo Unyuliweyo,’ kaYehova.—Luka 23:35; Heb. 11:26.
Izinto UYesu NoMoses Abafana Ngazo
8. Ziziphi izinto abafana ngazo uMoses noYesu?
8 Ezinye izinto ezenzeka kuYesu ngoxa wayelapha emhlabeni ziyafana nezo zenzeka kuMoses. Ngokomzekelo, xa uMoses noYesu babeziintsana, basinda ekubulaweni ngabalawuli abakhohlakeleyo. (Eks. 1:22–2:10; Mat. 2:7-14) Ngaphezulu, bobabini ‘babizwa ukuba baphume eYiputa.’ Umprofeti uHoseya wathi: “Xa uSirayeli wayeyinkwenkwe, ndamthanda, yaye ndambiza unyana wam ukuba aphume eYiputa.” (Hos. 11:1) UHoseya wayebhekisela ekukhutshweni eYiputa kohlanga lwakwaSirayeli, olwalukhokelwa nguMoses owayemiselwe nguThixo. (Eks. 4:22, 23; 12:29-37) Noko ke, uHoseya wayengabhekiseli kuphela kwiziganeko zexesha elidluleyo kodwa wayebhekisela nakwixesha elizayo. Izinto awaprofeta ngazo zazaliseka xa uYosefu noMariya babuyela eYiputa noYesu emva kokufa kukaKumkani uHerode.—Mat. 2:15, 19-23.
9. (a) Yiyiphi imimangaliso eyenziwa nguMoses noYesu? (b) Chaza ezinye zezinto abafana ngazo uYesu noMoses. (Funda ibhokisi ethi “Ezinye Iindlela Afana Ngazo UYesu NoMoses,” kwiphepha 26.)
9 UMoses noYesu benza imimangaliso eyayibonisa ukuba baxhaswa nguYehova. Enyanisweni, uMoses ngumntu wokuqala ngqa ukwenza imimangaliso. (Eks. 4:1-9) Ngokomzekelo, uMoses wenza imimangaliso, xa wajika amanzi omNayile namachibi awo aba ligazi, wahlukanisa uLwandle Olubomvu, wakhupha namanzi entlango. (Eks. 7:19-21; 14:21; 17:5-7) NoYesu wenza imimangaliso ngamanzi. Wenza ummangaliso wokuqala emtshatweni xa wajika amanzi aba yiwayini. (Yoh. 2:1-11) Kamva, wazolisa uLwandle lwaseGalili. Kanti ngesinye isihlandlo wada wahamba phezu kwamanzi! (Mat. 8:23-27; 14:23-25) Ezinye izinto abafana ngazo uMoses noYesu, onguMoses Omkhulu, zikwibhokisi ekwiphepha 26.
Ukugqala UKristu Njengomprofeti
10. Umsebenzi womprofeti wokwenene ubandakanya ntoni, yaye kutheni sinokuthi uMoses wayengumprofeti wokwenene?
10 Abantu abaninzi bacinga ukuba umprofeti ngumntu ochaza izinto eziza kwenzeka kwikamva, kodwa lowo asikuphela komsebenzi womprofeti. Umprofeti wokwenene sisithethi sikaYehova esiphefumlelweyo, esichaza “izinto zobungangamela zikaThixo.” (IZe. 2:11, 16, 17) Usenokuprofeta ngezinto eziseza kwenzeka, achaze iinjongo zikaYehova okanye avakalise imigwebo kaThixo. UMoses wenza kanye oko. Waxela kwangaphambili iZibetho Ezilishumi ezehlela amaYiputa. Wachaza umnqophiso woMthetho eSinayi. Yaye wafundisa uhlanga lwakwaSirayeli ukuthanda kukaThixo. Noko ke, ekugqibeleni kwakuza kufika umprofeti omkhulu kunoMoses.
11. UYesu wayizalisekisa njani indima yomprofeti omkhulu kunoMoses?
11 Kamva kwinkulungwane yokuqala, uZekariya waprofeta xa wayechaza injongo kaThixo ngonyana wakhe, uYohane. (Luka 1:76) Lo nyana wakhe waba nguYohane umBhaptizi, owachaza ukuza komprofeti omkhulu kunoMoses ekwakukudala elindelwe—uYesu Kristu. (Yoh. 1:23-36) NoYesu waprofeta ngezinto ezininzi. Ngokomzekelo, waprofeta ngokufa kwakhe, echaza indlela awayeza kufa ngayo, indawo awayeza kufela kuyo, nabantu ababeza kumbulala. (Mat. 20:17-19) Abo babephulaphule bothuka xa uYesu echaza ukuba iYerusalem netempile yayo iza kutshatyalaliswa. (Marko 13:1, 2) Iziprofeto zakhe ziyazaliseka nakumhla wethu.—Mat. 24:3-41.
12. (a) UYesu wasibeka njani isiseko somsebenzi wokushumayela ehlabathini lonke? (b) Kutheni silandela umzekelo kaYesu namhlanje?
12 UYesu wayengaprofeti nje kuphela, kodwa wayeshumayela yaye efundisa. Washumayela iindaba ezilungileyo zoBukumkani bukaThixo, yaye akukho mntu wayethetha ngenkalipho njengaye. (Luka 4:16-21, 43) Wayengoyena mfundisi ubalaseleyo. Abanye ababemphulaphule bathi: “Akuzange kubekho omnye umntu othetha njengalo.” (Yoh. 7:46) UYesu wayekhuthele kumsebenzi wokushumayela iindaba ezilungileyo, yaye wakhuthaza abalandeli bakhe ukuba bakhuthale ngendlela efanayo ekushumayeleni ngoBukumkani. Ngaloo ndlela, waqalisa umsebenzi wokushumayela nokufundisa ehlabathini lonke osenziwayo nanamhlanje. (Mat. 28:18-20; IZe. 5:42) Kunyaka ophelileyo, abalandeli bakaKristu abamalunga nezigidi ezisixhenxe bachithe iiyure ezili-1 500 000 000 kumsebenzi wokushumayela iindaba ezilungileyo zoBukumkani nokufundisa abantu abanomdla inyaniso yeBhayibhile. Ngaba wenza konke okusemandleni akho ukuze uxhase lo msebenzi?
13. Yintoni eya kusinceda ‘sihlale siphaphile’?
13 Alithandabuzeki elokuba uYehova wazalisekisa isiprofeto sokuvelisa umprofeti ofana noMoses. Ukwazi loo nto kukuchaphazela njani? Ngaba kukwenza uqiniseke ukuba iziprofeto eziphefumlelweyo ezichaphazela ikamva lethu ziza kuzaliseka? Enyanisweni, ukucingisisa ngomzekelo kaMoses Omkhulu kusinceda ‘sihlale siphaphile, sithe qwa,’ ukuze sibone izinto eziza kwenziwa nguThixo kungekudala.—1 Tes. 5:2, 6.
Ukugqala UKristu Njengomlamli
14. UMoses wayenguye njani umlamli phakathi kwamaSirayeli noThixo?
14 Ngokufanayo noMoses, noYesu wayengumlamli. Umlamli ngumntu odibanisa amaqela amabini. UYehova wasebenzisa uMoses xa wayesenza umnqophiso woMthetho phakathi kwakhe namaSirayeli. Ukuba oonyana bakaYakobi babewuthobela umthetho kaThixo, babeya kuhlala beyinqobo kuye, belibandla lakhe. (Eks. 19:3-8) Loo mnqophiso wasebenza ukususela ngowe-1513 B.C.E. de kwaba yinkulungwane yokuqala yeXesha Eliqhelekileyo.
15. UYesu unguye njani umlamli omkhulu?
15 Ngowama-33 C.E., uYehova wenza omnye umnqophiso noSirayeli omtsha, “uSirayeli kaThixo,” obunjwa libandla lamaKristu athanjisiweyo asehlabathini lonke. (Gal. 6:16) Ngoxa umnqophiso owadluliselwa nguMoses wawuquka imithetho eyayibhalwe nguThixo ematyeni, umnqophiso uYesu angumlamli wawo, ubalasele. Imithetho yalo mnqophiso ibhalwe nguThixo ezintliziyweni zabantu. (Funda eyoku-1 kuTimoti 2:5 namaHebhere 8:10.) Ngoko ke, “uSirayeli kaThixo” ngoku uyinqobo kaThixo, “uhlanga oluvelisa iziqhamo” zoBukumkani bukaMesiya. (Mat. 21:43) Lo mnqophiso mtsha usebenza kumalungu olo hlanga lokomoya. Sekunjalo, asingawo kuphela angenelwayo kulo mnqophiso. Izihlwele zabantu, kuquka abo bafileyo, ziya kufumana iintsikelelo ezingunaphakade ngenxa yaloo mnqophiso ubalaseleyo.
Ukuxabisa UKristu Njengomhlanguli
16. (a) UYehova wamsebenzisa njani uMoses ekuhlanguleni amaSirayeli? (b) Ngokutsho kwe-Eksodus 14:13, ngubani oyena Mhlanguli?
16 Ngobusuku bokugqibela ngaphambi kweMfuduko yamaSirayeli, amanye awo ayesengozini. Ingelosi kaThixo yayiza kudlula kwilizwe laseYiputa ize ibulale onke amazibulo. UYehova waxelela uMoses ukuba amazibulo amaSirayeli ayeya kusinda ukuba amaSirayeli ayenokufefa imigubasi yeengcango zawo ngegazi lemvana yePasika. (Eks. 12:1-13, 21-23) Ngokwenene wawasindisa. Kamva, olo hlanga luphela lwaba sengozini embi. Lwaluvaleleke phakathi koLwandle Olubomvu neenqwelo zomkhosi wamaYiputa. Kwakhona uYehova wawahlangula esebenzisa uMoses, owahlula olo lwandle ngokungummangaliso.—Eks. 14:13, 21.
17, 18. UYesu unguye njani umkhululi omkhulu kunoMoses?
17 Nangona loo mmangaliso wokuhlangulwa kolo hlanga wawubalasele, indlela uYehova awahlangula ngayo abantu esebenzisa uYesu, ibalasele nangakumbi. Wasebenzisa uYesu ekukhululeni abantu abathobelayo ebukhobokeni besono. (Roma 5:12, 18) Leyo ‘yintlangulo engunaphakade.’ (Heb. 9:11, 12) Igama elithi Yesu lithetha ukuba “uYehova uLusindiso.” UYesu njengoMhlanguli okanye uMsindisi wethu, akasikhululi ezonweni zangaphambili kuphela kodwa usivulela indlela esa kwikamva eliqaqambileyo. Xa ebakhulula esonweni, uYesu usindisa abalandeli bakhe kwingqumbo kaThixo aze abenze babe nolwalamano oluhle noYehova.—Mat. 1:21.
18 Ekuhambeni kwexesha, uYesu uya kukhulula abantu kwimiphumo ebuhlungu yesono—ukugula kwanokufa. Ukuze ube nomfanekiso-ngqondweni woko, cinga ngoko kwenzekayo xa uYesu waya kwikhaya lendoda egama linguYayiro, eyayifelwe yintombi yayo eneminyaka eli-12 ubudala. UYesu wamqinisekisa uYayiro, wathi: “Musa ukoyika, kuphela yiba nokholo, yaye iya kusindiswa.” (Luka 8:41, 42, 49, 50) Ngokwenene, uYesu wayivusa loo ntombi! Ngaba unokuyithelekelela indlela abavuya ngayo abazali bayo? Ngoko ke, unokuyithelekelela indlela esiya kuvuya ngayo xa ‘bonke abo bakumangcwaba enkumbulo besiva ilizwi likaYesu baze baphume,’ xa bevuswa. (Yoh. 5:28, 29) Eneneni, uYesu unguMsindisi noMkhululi wethu!—Funda IZenzo 5:31; Tito 1:4; ISityhi. 7:10.
19, 20. (a) Ukucingisisa ngendima kaYesu njengoMoses Omkhulu kusichaphazela njani? (b) Yintoni eza kuxutyushwa kwinqaku elilandelayo?
19 Ukwazi ukuba sinokunceda abantu bangenelwe kwizenzo zikaYesu zokusindisa kusenza sikhuthale kumsebenzi wokushumayela nowokufundisa. (Isa. 61:1-3) Ngapha koko, ukucingisisa ngendima kaYesu njengoMoses Omkhulu kusenza siqiniseke ukuba uya kubahlangula abalandeli bakhe xa eze kugweba abangendawo.—Mat. 25:31-34, 41, 46; ISityhi. 7:9, 14.
20 Ngokwenene, uYesu unguMoses Omkhulu. Wenza izinto ezininzi uMoses awayengenakukwazi ukuzenza. Izinto uYesu awaprofeta ngazo nawazenzayo njengomlamli, zichaphazela bonke abantu. NjengoMhlanguli, uYesu uya kubahlangula ngonaphakade abantu. Ukanti, zininzi izinto esinokuzifunda kumadoda athembekileyo amandulo ezifanayo nezo zenziwa nguYesu. Kwinqaku elilandelayo kuza kuxutyushwa indima yakhe njengoDavide Omkhulu noSolomon Omkhulu.
Ngaba Unokuchaza?
UYesu ubalasele njani kunoMoses
• njengomprofeti?
• njengomlamli?
• njengomhlanguli?
[Ibhokisi/Umfanekiso okwiphepha 26]
Ezinye Iindlela Afana Ngazo UYesu NoMoses
◻ Bobabini bashiya izikhundla eziphakamileyo ukuze bakhonze uYehova nabantu bakhe.—2 Kor. 8:9; Fil. 2:5-8; Heb. 11:24-26.
◻ Bobabini babengabathanjiswa okanye ‘ookristu.’—Marko 14:61, 62; Yoh. 4:25, 26; Heb. 11:26.
◻ Bobabini babengabameli begama likaYehova.—Eks. 3:13-16; Yoh. 5:43; 17:4, 6, 26.
◻ Bobabini babelulamile.—Num. 12:3; Mat. 11:28-30.
◻ Bobabini bondla izihlwele.—Eks. 16:12; Yoh. 6:48-51.
◻ Bobabini babengabagwebi nabaniki-mthetho.—Eks. 18:13; Mal. 4:4; Yoh. 5:22, 23; 15:10.
◻ Bobabini babephathiswe indlu kaThixo.—Num. 12:7; Heb. 3:2-6.
◻ Bobabini babengamangqina athembekileyo kaYehova.—Heb. 11:24-29; 12:1; ISityhi. 1:5.
◻ Emva kokufa kwabo, uThixo wayenza yanyamalala imizimba yabo.—Dut. 34:5, 6; Luka 24:1-3; IZe. 2:31; 1 Kor. 15:50; Yude 9.