Xelisa Ukunyaniseka KukaItayi
“MIKHULU kwaye iyamangalisa imisebenzi yakho, Yehova, Thixo Somandla. Zibubulungisa yaye ziyinyaniso iindlela zakho, Kumkani kanaphakade. Ngubani na ongayi kukoyika ngokwenene wena, Yehova, aze azukise igama lakho, ngenxa yokuba inguwe wedwa onyanisekileyo?” Le ngoma iculwa emazulwini ‘ngabo baphumelela boyisile kwirhamncwa nakumfanekiso walo,’ isenza sibone indlela anyaniseke ngayo uThixo. (ISityhi. 15:2-4) UYehova ufuna ukuba abakhonzi bakhe bamxelise ekuboniseni olu phawu luthandekayo.—Efe. 4:24.
Kwelinye icala uSathana uMtyholi, wenza konke anokukwenza ukubangela ukuba abakhonzi bakaThixo abasemhlabeni bayeke ukumthanda nokumnqula. Sekunjalo, abaninzi baye baqhubeka benyanisekile kuThixo kwanaphantsi kwezona meko ziqatha. Sinombulelo ongazenzisiyo ngenxa yendlela uYehova akuxabisa ngayo ukuzinikela okulolo hlobo! Enyanisweni, sinesi siqinisekiso: “UYehova ngumthandi wokusesikweni, yaye akayi kubashiya abanyanisekileyo bakhe.” (INdu. 37:28) Ngelokusinceda sihlale sinyanisekile, uye wabhala kwiLizwi lakhe ingxelo ephathelele izinto ezenziwa ngabakhonzi bakhe abaninzi abanyanisekileyo. Enye yezo ngxelo iphathelele uItayi umGati.
‘Umntu Wasemzini Nembacu’
Kuqikelelwa ukuba uItayi wayeyinzalelwane yesixeko samaFilisti esidumileyo esiyiGati, ikhaya lengxilimbela enguGoliyati kwanezinye iintshaba eziyingozi zamaSirayeli. Ukuqala kwethu ukuva ngeli joni liphum’ izandla kwingxelo yeBhayibhile, kuxa uAbhisalom wayevukela uKumkani uDavide. Ngelo xesha, uItayi namadoda angama-600 angamaFilisti awayemlandela babeselubhacweni kummandla waseYerusalem.
Kusenokwenzeka ukuba imeko kaItayi namadoda akhe yakhumbuza uDavide ngexesha apho yena namadoda akhe angamaSirayeli angama-600 babeselubhacweni baza babalekela kummandla wamaFilisti baya kungena apho kwakuhlala khona uAkishe waseGati. (1 Sam. 27:2, 3) UItayi namadoda akhe babeza kwenza ntoni njengoko uDavide namadoda akhe babejamelene nemvukelo yonyana wakhe uAbhisalom? Ngaba babeya kuma noAbhisalom, okanye bangathabathi cala, okanye beme noDavide namadoda akhe?
Yiba nomfanekiso-ngqondweni kaDavide, njengoko ebaleka esiya eYerusalem, aze amise kwindawo ekuthiwa yiBhete-meraki, gama elo elithetha “Indlu Ekude.” Mhlawumbi yindlu yokugqibela eYerusalem xa usiya ngakwiNtaba Yeminquma ungekayiweli iNtlambo yeKidron. (2 Sam. 15:17) Apha uDavide ufika ahlole imikhosi yakhe. Ufumanisa ukuba kule mikhosi, akukho maSirayeli anyanisekileyo kuphela kodwa kukho onke amaKereti namaPeleti. Ngaphezu koko, kukho namaGati—uItayi namadoda akhe angama-600.—2 Sam. 15:18.
Enovelwano, uDavide uthi kuItayi: “Kutheni na ukuba nawe uhambe nathi? Buya uze uhlale nokumkani [ngokuqinisekileyo ebhekisela kuAbhisalom]; kuba wena ungowasemzini yaye, ngapha koko, ubhacile endaweni yakho. Ufike izolo eli, ndikubhadulise na nathi namhlanje, uhambe xa ndisiya naphi na apho ndiya khona? Buya, ubuyise nabantakwenu, yaye ngamana uYehova angakubonakalisela ububele bothando nokukholoseka!”—2 Sam. 15:19, 20.
UItayi uvakalisa ukunyaniseka kwakhe okungagungqiyo. Uphendula athi: “Ephila nje uYehova nenkosi yam ukumkani iphila nje, kwindawo esenokuthi ibe kuyo inkosi yam ukumkani, nokuba kusekufeni nokuba kusebomini, uya kuba lapho umkhonzi wakho!” (2 Sam. 15:21) Kusenokwenzeka ukuba oku kukhumbuza uDavide amazwi afana nalawo athethwa ngukhokho wakhe uRute. (Rute 1:16, 17) Echukunyiswe ngamazwi kaItayi, uDavide umxelela oku: “Hamba uze uwele” iNtlambo iKidron. Kwangoko, “wawela uItayi umGati, nawo onke amadoda akhe nabantwana bakhe bonke ababenaye.”—2 Sam. 15:22.
‘Yabhalelwa Ukuyalela Thina’
EyabaseRoma 15:4 ithi: “Zonke izinto ezabhalwa kwixesha langaphambili zabhalelwa ukuyalela thina.” Ngoko kuya kuba kuhle ukuzibuza oku, Sifunda ntoni thina kumzekelo kaItayi? Khawucinge ngoko kusenokuba kwaba ngunobangela wokunyaniseka kwakhe kuDavide. Kwanokuba wayengumntu wasemzini nembacu evela kwelamaFilisti, uItayi wamgqala uYehova njengoThixo ophilayo noDavide njengomthanjiswa kaYehova. UItayi akazange aphenjelelwe bubutshaba obabuphakathi kwamaSirayeli namaFilisti. Wayengamjongi nje kuphela uDavide njengowabulala intshatsheli yamaFilisti uGoliyati namanye amadoda amaninzi elizwe lakowabo. (1 Sam. 18:6, 7) UItayi wajonga uDavide njengendoda ethanda uYehova yaye asiyithandabuzi into yokuba waziphawula iimpawu ezintle zikaDavide. Naye uDavide wamxabisa uItayi. Kaloku uDavide wada wafaka inxalenye yesithathu yomkhosi wakhe “phantsi kwesandla sikaItayi” kwidabi elalinzima nxamnye nemikhosi ka-Abhisalom!—2 Sam. 18:2.
Nathi sifanele sizame ukungajongi abantu ngokweenkcubeko nobuhlanga babo, sisuse nabuphi na ubuhlanga nocalucalulo esisenokuba nalo, size sijonge iimpawu ezintle kwabanye. Umanyano olwakheka phakathi kukaDavide noItayi lubonisa ukuba ukwazi nokuthanda kwethu uYehova kunokusinceda siyoyise imiqobo elolo hlobo.
Njengoko sicinga ngomzekelo kaItayi, sinokuzibuza oku: ‘Ngaba simthanda ngokunyaniseke ngolo hlobo uDavide Omkhulu, uKristu Yesu? Ngaba ndibonisa indlela endinyaniseke ngayo ngokushumayela ngoBukumkani ndize ndenze abafundi ngenzondelelo?’ (Mat. 24:14; 28:19, 20) ‘Ndikulungele kangakanani ukunyamezela ukuze ndibonise ukuba ndinyanisekile?’
Neentloko-ntsapho zinokungenelwa xa zicamngca ngomzekelo wokunyaniseka kaItayi. Ukuzithoba kwakhe kuDavide nesigqibo awasenzayo sokuhamba nokumkani othanjiswe nguThixo, sawachaphazela amadoda kaItayi. Ngokufanayo, izigqibo ezenziwa ziintloko-ntsapho ukuze zixhase unqulo lokwenyaniso, zinokuzichaphazela iintsapho zazo ibe zinokubangela ukuba kube nzima kangangethuba elithile. Kodwa, siqinisekiswa ngolu hlobo: “Kulowo unyanisekileyo [uYehova] uya kwenza ngokunyaniseka.”—INdu. 18:25.
Emva kokulwa kukaDavide noAbhisalom, ayikho enye into eziyithethayo iZibhalo ngoItayi. Noko ke, inkcazelo engephi ephathelele yena kwiLizwi likaThixo, isenza sibone kakuhle ukuba wamnceda njani uDavide ngexesha elalinzima ebomini bakhe. Ukufakwa kwegama lakhe kwingxelo ephefumlelweyo kububungqina bokuba uYehova uyakubona aze akuvuze ukunyaniseka okulolo hlobo.—Heb. 6:10.