Abasasoyiki Isiphelo
NGASEKUPHELENI kweminyaka yee-1970, uGary noKaren babeqinisekile ukuba isiphelo sehlabathi sikufutshane. Ngenxa yoko bayishiya idolophu ababehlala kuyo baza baya kuhlala emaphandleni ukuze bangaxhomekeki kurhulumente. Babefuna ukusinda.
Ukuze bafumane ulwazi ababecinga ukuba lwaluza kubanceda basinde, bathenga iincwadi, bangena kwiiklasi ezithile baza bathetha nabantu abaninzi kangangoko kwakunokwenzeka. Batyala isitiya nemithi yeziqhamo engama-50. Baqokelela iimbewu ezahlukahlukeneyo nezixhobo zokusebenza. Bafunda ukulima nokulondoloza ukutya. Omnye umhlobo wabo wabafundisa ukuxhela nokuqwayita inyama. UKaren wafunda imifuno yasendle ukuze batye yona xa ukutya kuphelile. UGary yena wafunda iindlela zasemaphandleni zokubasa, wazenzela isitovu seenkuni waza wakha indlu yakhe ngohlobo lokuba ikwazi ukumelana nemihla kaxakeka.
UKaren uthi: “Ndandicinga ukuba ihlabathi liza kutshabalala ngenxa yeemeko ezoyikekayo nezimaxongo ezazikho ngelo xesha.” UGary yena uthi: “Njengolunye ulutsha, ndandifuna kupheliswe ubuhlanga, imfazwe yaseVietnam kunye nobuqhetseba. Kodwa ke ndakhawuleza ndaphelelwa ngumdla. Kwakubonakala ngathi uluntu luza kuzitshabalalisa.”
UGary uthi: “Ngobunye ubusuku ndandingenanto yokwenza ndaza ndafunda iBhayibhile ukususela kuMateyu ukuya kwiSityhilelo. Ndayifunda qho ebusuku kangangeentsuku ezine. Ngosuku lwesihlanu ndathi kuKaren: ‘Siphila kwimihla yokugqibela. Kungekudala uThixo uza kuwucoca umhlaba. Kufuneka sifune abantu abaza kusinda.’” UGary noKaren baqalisa ukuya kwiicawa ezahlukeneyo bekhangela abantu ababefuna ukulungiselela ukusinda kwisiphelo.
Kungekudala, kwafika iNgqina likaYehova ekhayeni labo laza laqalisa ukubafundisa iBhayibhile. UKaren uthi: “Kwandichulumancisa gqitha ukucaciselwa iZibhalo. Kwakukudala ndifuna ukwazi inyaniso ngesiphelo. Kwakukho ithemba eliqinisekileyo ngekamva. Kodwa ke eyona nto ibalulekileyo kukuba ndakwazi ukuba nobuhlobo noBawo wam wasezulwini, onguMdali noThixo wendalo yonke.”
UGary uthi: “Ndatsho ndanenjongo ebomini. Andizange ndiphinde ndiyeke ukufunda iBhayibhile. Ndafunda isiprofeto seBhayibhile ndaza ndahlola ubungqina bokuba sasizaliseka yaza loo nto yandenza ndaqiniseka ukuba uThixo wayeza kuthabatha amanyathelo kungekudala. Ndathi entliziyweni yam: ‘Abantu bafanele balungiselele ubomi uThixo afuna sibuphile kungekhona intlekele.’” UGary noKaren baba nembono efanelekileyo ngekamva. Kunokuba bakhathazeke ngesiphelo sehlabathi, baqiniseka ukuba uThixo uza kuzisusa iingxaki zoluntu aze enze umhlaba ube yiparadesi.
Njengokuba ngoku sele kudlule iminyaka engama-25, uGary noKaren benza ntoni? UKaren uthi: “Ndiya ndimthanda nangakumbi uYehova yaye nokholo lwam luyakhula, ibe nam ndizama ukunceda abanye ukuba benze into efanayo. Mna noGary siyancedisana ukuze senze intsapho yethu yomelele ize ikhonze uThixo kunye. Sisoloko sizama ukungazixakekisi ngezinto ezininzi ukuze sibe nexesha lokunceda abanye abantu.”
UGary wongezelela athi: “Ndithandaza rhoqo ndicela ukuba uBukumkani bukaThixo bufike buze buncede izigidi zabantu. Ngalo lonke ixesha ndishumayeza abanye ngoBukumkani bukaThixo, ndiye ndithandazele ukuba ndikwazi ukuxelela nokuba ngumntu omnye ngethemba leBhayibhile. Ngoku sele kudlule iminyaka engama-25 uYehova ewuphendula loo mthandazo. Mna noKaren sikholelwa ukuba kungekudala uYehova uza kuyitshintsha imeko yomhlaba kodwa ke asisasoyiki isiphelo.”—Mateyu 6:9, 10; 2 Petros 3:11, 12.
[Umfanekiso okwiphepha 9]
Ngoku uGary noKaren banceda abanye babe nethemba ngokubafundisa iBhayibhile