Ngaba Ufumana Uvuyo ‘Kwilungelo Lokunikela Ngobubele’?
AMAKRISTU enkulungwane yokuqala eFilipi ayesaziwa ngokuxhasa unqulo olunyulu. Kwileta yakhe ephefumlelweyo eyayisiya kuwo, umpostile uPawulos wathi: “Ndisoloko ndimbulela uThixo wam ngalo lonke ixesha ndinikhumbula nangalo lonke ixesha ndikhunga ngenxa yenu nonke, njengoko ndikhunga ngovuyo, ngenxa yegalelo enibe nalo kwiindaba ezilungileyo ukususela kwimini yokuqala de kube ngawo lo mzuzu.” (Fil. 1:3-5) UPawulos wayekhumbula kakuhle xa uLidiya nendlu yakhe bathi babhaptizwa waza ngomoya wokubuk’ iindwendwe wabongoza lo mpostile namahlakani akhe ukuba bahlale kwakhe.—IZe. 16:14, 15.
Kungekudala emva koko, eli bandla litsha laseFilipi lathumela izinto eziyimfuneko kwada kwakabini kuPawulos, ngoxa wayeseTesalonika iiveki eziliqela ekunye namanye amakholwa, umgama ophantse ube ziikhilomitha ezili-160. (Fil. 4:15, 16) Emva nje kweminyaka embalwa, ngoxa amaKristu aseFilipi nabanye abazalwana baseMakedoni babetyhubela inkxwaleko ‘nobuhlwempu obunzulu,’ beva ngentswelo yamaKristu atshutshiswayo eYerusalem baza bafuna ukuwanceda. UPawulos wangqina ukuba oku bakwenza “ngaphezu kwamandla abo.” Sekunjalo, wathi: “basibongoza ngokubongoza okukhulu ukuba babe nelungelo lokunikela ngobubele.”—2 Kor. 8:1-4; Roma 15:26.
Malunga neminyaka elishumi emva kokuba amaFilipi amkele ubuKristu, ayesawubonisa umoya wokupha. Xa evayo ukuba uPawulos uvalelwe entolongweni eRoma, athumela uEpafrodito owahamba umgama oziikhilomitha ezili-1 287 endleleni naselwandle, ephethe izinto eziyimfuneko eziya kulo mpostile. Kucacile ukuba, amaFilipi afuna ukumxhasa uPawulos ukuze akwazi ukuqhubeka esomeleza abazalwana aze ashumayele kwanangexesha awayevalelwe ngalo entolongweni.—Fil. 1:12-14; 2:25-30; 4:18.
Namhlanje, amaKristu enene akugqala njengelungelo ukuxhasa umsebenzi wokushumayela ngoBukumkani nowokwenza abafundi. (Mat. 28:19, 20) Abangela ukuba izilangazelelo zoBukumkani zihambele phambili ngokunikela ngexesha, ngamandla nangemali. Kule bhokisi ihamba neli nqaku kukho ezinye iindlela onokunikela ngazo ukuze ube nenxaxheba ekuxhaseni lo msebenzi siwunikwe nguThixo.
[Ibhokisi ekwiphepha 22, 23]
IINDLELA ABANYE ABAKHETHA UKUNIKELA NGAZO
IMINIKELO EYA KUMSEBENZI OWENZIWA EHLABATHINI LONKE
Abaninzi babekela bucala imali ethile yomnikelo baze bayifake kwibhokisi ebhalwe “Umsebenzi Owenziwa Ehlabathini Lonke.”
Nyanga nganye amabandla athumela le mali kwiofisi yamaNgqina kaYehova enyamekela ilizwe lawo. Iminikelo yokuzithandela inokuthunyelwa ngokungqalileyo kwiWatch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, okanye kwiofisi yamaNgqina kaYehova enyamekela ilizwe ohlala kulo. (Iminikelo yokuzithandela echazwe ngezantsi inokuthunyelwa kwiofisi yesebe lamaNgqina kaYehova ekwilizwe ohlala kulo.) Iitsheki ezithunyelwa kule adresi ingasentla zimele zibhalwe “Watch Tower Society.” Unokunikela ngezacholo nezinye izinto ezixabisekileyo. Ufanele ubhale ileta echaza ngokucacileyo ukuba ezo zinto zisisipho.
UKUNIKELA OKUCETYIWEYO
Ukongezelela kwiminikelo yemali, zikho nezinye iindlela zokunikela kumsebenzi woBukumkani owenziwa ehlabathini lonke. Ezi ziquka:
I-Inshorensi: IWatch Tower Bible and Tract Society of South Africa inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.
Iiakhawunti Zebhanki: Iiakhawunti zebhanki, izatifiketi zedipozithi, okanye iimali zomhlala-phantsi zinokushiyelwa okanye zihlawulwe kwiWatch Tower Bible and Tract Society of South Africa xa umntu esweleka ngokuvisisana nemithetho yeebhanki zasekuhlaleni.
Imali Eselugcinweni Neebond: Kunokunikelwa ngemali eselugcinweni neebond kwiWatch Tower Bible and Tract Society of South Africa njengesipho okanye iWatch Tower Bible and Tract Society of South Africa inokubhaliswa njengefanele ifumane imali xa usifa (Transfer on Death)
Izindlu Nemihlaba: Izindlu nemihlaba enokuthengiswa inokunikelwa njengesipho, kanti yona indawo yokuhlala, inokugcinwa ikwilungelo lalowo wenze umnikelo, onokuqhubeka ehlala kuyo ngethuba esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.
Amafa: Izinto ofuna ukunikela ngazo okanye imali unokuzishiyela kwiWatch Tower Bible and Tract Society of South Africa njengelifa elisemthethweni okanye iWatch Tower Bible and Tract Society of South Africa inokubhalwa njengemele ifumane imali ekuvunyelwene ngayo. Kusenokungatsalwa rhafu ingako kwimali eya kwintlangano yonqulo.
Ukuze ufumane inkcazelo engakumbi, unokubhalela okanye ufowunele iAccounting Office, kwiadresi ebhalwe apha okanye kwiofisi yesebe enyamekela ilizwe ohlala kulo.
Accounting Office
Watch Tower Bible and Tract Society of South Africa
Private Bag X2067
Krugersdorp 1740 South Africa
Inombolo Yefowuni: 011 761 1323