Nxibelelanisa Amaphecana Nolunye Uncwadi
1 Kuwo onke amaphephancwadi apapashwayo namhlanje, kuphela yiMboniselo noVukani! abanokunceda abafundi abanyanisekileyo bafumane indlela eya ebomini obungunaphakade. Njengokuba uthetha nabantu ebudeni buka-Aprili noMeyi, bambi baya kubonakalisa umdla ocacileyo kwisigidimi soBukumkani, yaye usenokutsalela ingqalelo yabo ngokungqalileyo kumaphephancwadi akutshanje uze uhambise umrhumo. Abanye ekuqaleni basenokungabonakalisi mdla ungako. Kwiimeko ezinjalo, okokuqala usenokuxubusha ingongoma enye okanye ezimbini kwiphecana; wandule ke ukuba umninimzi ubonakalisa umdla ongakumbi, unxibelelanise iphecana nephephancwadi okanye nencwadana enemifanekiso oyihambisayo.
2 Usenokuthi:
◼ “Inkoliso yabantu ibiya kuvuma ukuba kwihlabathi lanamhlanje, kukho iingxaki ezininzi kunezicombululo. Ngaba ubusazi ukuba uninzi lwezona ngxaki zethu zinzulu zazixelwe kwangaphambili eBhayibhileni?” Unokwandula ke utyhile kwiphepha 4 nelesi-5 kwiphecana elithi Ngaba Eli Hlabathi Liya Kusinda? uze uxubushe ezinye zezi ngxaki.
3 Ukuba uhambisa IMboniselo ka-Aprili 1 yaye umninimzi ubonakalisa umdla koko ukufunde kwiphecana, usenokwalatha kwinqaku elinomxholo othi “Landela Ukhanyiselo Lwehlabathi” uze uchaze indlela uYesu Kristu aya kuzicombulula ngayo ekugqibeleni zonke iingxaki zoluntu. Yandula ke unikele umrhumo. Ukuba awamkelwa, shiya iphecana namaphephancwadi amabini kumninimzi uze uthembise ngokuphinda ubuye ngexesha elifanelekileyo ukuze uxubushe loo mbandela ngokubhekele phaya.
4 Ukuba ubalaselisa “uVukani!” ka-Aprili 8, unokusebenzisa intshayelelo eyandlalwe kwisiqendu 2 seli nqaku wandule wongezelele uthi:
◼ “Abantu abaninzi bayawathandabuza amandla onqulo nawezobupolitika ekucombululeni iingxaki zethu, kodwa bayazibuza enoba inzululwazi inaso kusini na isicombululo.” Yandula ke ufunde ingongoma efanelekileyo kwinqaku elithi “Ngaba Inzululwazi Inokuhlangabezana Nocelomngeni Lwenkulungwane Yama-21?” Kunokwenzeka ukuba eli nqaku libe nomtsalane kubantu abaselula abaninzi, ngokukodwa abantwana besikolo.
5 Xa ubalaselisa incwadana enemifanekiso ethi “Uyabona,” usenokusebenzisa intshayelelo eyahlukileyo:
◼ “Abantu abaninzi bayazibuza ngoko kwenzekayo kuthi xa sisifa. Bambi bathi sisenokuba siya ezulwini okanye esihogweni; abanye abaqinisekanga. Impendulo yeBhayibhile iyamangalisa yaye iyakhuthaza.” Unokwandula ke uchaze uze uxubushe iinxalenye zephecana elithi Liyintoni Ithemba Ngabafileyo Obathandayo? Emva koko unokubhekisela kwiphepha 16 nele-17 kule ncwadana inemifanekiso ukuba umninimzi ubonakalisa umdla kwiphecana.
6 Siya kufumana abantu abaninzi abaxhalatyiswe ngokunzulu ziimeko zehlabathi eziya zisiba mbi. Kutheni ungalathiseli ingqalelo yabo kumfanekiso okwiphecana elithi Ubomi Kwihlabathi Elitsha Elinoxolo? Unokumfundela umninimzi imibuzo emithathu enikelwe kwisiqendu sokuqala selo phecana. Emva kokuba ephendule, tsalela ingqalelo yakhe kwisiqendu sokuqala phantsi komxholwana othi “Ubomi Kwihlabathi Elitsha LikaThixo” kwiphepha 3. Wona walatha kuBukumkani bukaThixo njengobo buya kuzisa ihlabathi elitsha elinoxolo. Ukuba umninimzi ubonakalisa umdla ongakumbi, sebenzisa IMboniselo ka-Aprili 1 ngendlela ecetyiswe kwisiqendu 3 seli nqaku.
7 Ukuba ungumvakalisi osemtsha, ngokungathandabuzekiyo uya kukuxabisa ukusebenzisa intshayelelo elula. Kutheni ungazifumaneli iphecana elithi Ngaba Eli Hlabathi Liya Kusinda? uze ulandele amacebiso andlalwe ngasentla kwisiqendu 2?
8 Sinelungelo elikhethekileyo lokusa isigidimi sosindiso emakhayeni abantu. Ekufuneni kwethu abo ‘bafanelekileyo,’ masiwasebenzise kakuhle amaphecana size siwanxibelelanise nolunye uncwadi xa sifumene abantu abanomdla.—Mat. 10:13, NW.