Buyela Ukuze Uncede Abantu Bafunde Ngoko Banokukwenza Ukuze Baphile Ngonaphakade
1 Ukususela ekukhululweni kwayo incwadi ethi Unokuphila Ngonaphakade, kuye kwaveliswa imibhalo ezizigidi ezingaphezu kwama-65 ngeelwimi ezili-115. Abaninzi abangabakhonzi bakaYehova ngoku bafunda iinyaniso ezisisiseko zeBhayibhile ngoncedo lwesi sixhobo sihle. Kule nyanga nakule ilandelayo, sisenokuba nethuba lokuhambisa le ncwadi yokufunda iBhayibhile, okanye sisenokudibana nabantu entsimini abasele benayo.
2 Ukubuyela Kwabo Banale Ncwadi: Bambi abavakalisi baye baba nemiphumo emihle ngokutsalela ingqalelo kuludwe lweziqulatho baze babuze umntu onomdla umxholo anomdla ngokukhethekileyo kuwo. Xa umninimzi ewukhethile umxholo, cebisa ukuba afunde eso sahluko ngaphambi kotyelelo olulandelayo.
3 Ukuba kunokwenzeka, sifanele sibeke ixesha elingqalileyo lokubuyela. Ngaphambi kokubuyela simele silungiselele ukuxubusha iziqendu ezimbalwa zesahluko ebesikhethwe ngumninimzi. Ukuba akakhange akhethe, sinokuqalisa ukuxubusha isahluko 1. Emva kokuqwalasela iziqendu ezimbalwa, sifanele siphakamise imibuzo eya kugutyungelwa kwiziqendu ezimbalwa ezilandelayo. Oko kuya kuba ngumchankcatho wolunye utyelelo lokubuyela, esinokuthi kulo siqhubeke sifunda incwadi ethi Unokuphila Ngonaphakade.
4 Kambe ke, ukuba umninimzi unemibuzo, kuhle ukuqala ngayo. Ubukhulu becala imibuzo yakhe isenokuba iyaphendulwa kwakule ncwadi. Ngokuqhelana nemibandela yale ncwadi, sisenokukwazi ukubhekisela kwiziqendu ezifanelekileyo size sisebenzise loo mbandela ukuphendula imibuzo ayibuzileyo.
5 Ukubuyela Kwabo Besibashiyele Iphecana: Mhlawumbi umninimzi besimshiyele iphecana elithi Ubomi Kwihlabathi Elitsha Elinoxolo. Xa sibuyela, sisenokuxubusha iziqendu zokuqala zeli phecana.
Xa sifika ekupheleni kwesiqendu sokuqala esikwiphepha 3, apho kucatshulwe INdumiso 37:29, sisenokuthi:
◼ “Loo mazwi abalaselisa oko kuxutyushwa kule mpapasho ethi, Unokuphila Ngonaphakade KwiParadisi Esemhlabeni. Phawula ingongoma ekwisiqendu 3 sesahluko 1 phantsi komxholo othi ‘Isizathu Sokuba Sikukholelwe.’” Sinokwandula sifunde isiqendu 3, sibuze umbuzo obhalwe kule ncwadi, size siqhubeke nesiqendu 4 nesesi-5 kwangendlela efanayo. Sisenokwandula sithi: “Kutheni iimeko ezikhoyo zingavisisani neenjongo zikaThixo? Iziqendu ezilandelayo ziyakucacisa oko, yaye ndingathanda ukubuya kwiveki ezayo kwangeli xesha ndize ndikuphendulele lo mbuzo.”
6 Xa sihambisa incwadi “Unokuphila Ngonaphakade,” sisenokuthi:
◼ “Ndiqinisekile ungakuvuyela ukuba nowakho umbhalo wale mpapasho. Yaye ungakwazi ukufunda ngokubhekele phaya uze ngaloo ndlela ungenelwe ngakumbi kwingxubusho yethu elandelayo.” Mazise umninimzi ukuba uya kukuvuyela ukumshiyela le ncwadi ngomnikelo wee-R9,00 (encinane ngee-R4,50).
7 Ukubuyela ukuze uncede abantu bafunde indlela abanokuphila ngayo ngonaphakade ngumsebenzi obalulekileyo. UYesu wafundisa abalandeli bakhe ukuba bafundise abanye izinto abazifundisiweyo. Sithandazela ukuba uYehova akhuphe abasebenzi abangakumbi. Ngoko ke, masenze indima yethu ekufumaneni abanomdla size sibafundise basebenze kunye nathi esivunweni.—Mat. 9:37; 28:19, 20.