Ukuhlakulela Umdla Kumabuyelo
1 Ngokufanelekileyo ubulungiseleli buye bafaniswa nokulima, kwaza ukubuyela kwafaniswa nokuhlakula nokunkcenkceshela. (Mat. 13:23; Luka 10:2; 2 Kor. 9:10) ‘Njengabasebenza noThixo,’ sinembopheleleko yokunceda nayiphi na imbewu esandul’ ukuntshula ikhule ize ivelise isiqhamo. (1 Kor. 3:6, 9, NW) Yiyiphi eyona ndlela intle esinokukuphumeza ngayo oku?
2 Buyela ngokukhawuleza kwabo babonisa umdla. Hlola iingxelo zakho zendlu ngendlu, uze ugqibe ngabo uza kubatyelela noza kukuxubusha. Ngokuqhelekileyo umbandela eniza kuwuxubusha uxhomekeke koko benikuxubusha kutyelelo lokuqala. Yiba bhetyebhetye, ucinge nangezinye iingcamango zeZibhalo osenokuzivelisa. Kusoloko kukuhle ukusebenzisa iBhayibhile, uqonda amandla ayo okufikelela intliziyo.—Heb. 4:12.
3 Ukuba ubushiye incwadana enemifanekiso ethi “Ngaba Ngokwenene UThixo Usikhathalele?,” usenokuqalisa ngokuthetha okufana noku:
◼ “Abantu abaninzi abanyanisekileyo bakholelwa kwelokuba uThixo uza kutshabalalisa umhlaba, ngoxa abanye besoyika ukuba umntu uza kukwenza ngokwakhe oko. Ucinga ntoni wena? [Vumela impendulo.] IBhayibhile isixelela ukuba endaweni yokutshabalalisa umhlaba, uThixo uza kuwucoca asuse ukungalungisi, ewenza ube yindawo yoxolo nonqabiseko.” Tsalela ingqalelo kwiphepha 22, uze ufunde IMizekeliso 2:21, 22, ecatshuliweyo kwalapho. Ukuba ubonakalisa umdla, mcacisele ngelungiselelo lesifundo seBhayibhile sekhaya okanye uhambise amaphephancwadi akutshanje, uze wenze ilungiselelo lokubuyela ukuze uxubushe okungakumbi ngedinga likaThixo lehlabathi elitsha.
4 Ukuba ubuhambise incwadana enemifanekiso ethi “Uyabona,” usenokuthi:
◼ “Kutyelelo lwam oludluleyo, sifunde eBhayibhileni ngedinga likaThixo lokwenza umhlaba ube yiparadisi, ufane nalo ukulo mfanekiso ungaphandle kule ncwadana inemifanekiso ndikushiyele yona. Sinokuyinandipha le ntsikelelo ngokufunda okungakumbi ngokuthanda kukaThixo nendlela okusichaphazela ngayo.” Funda uYohane 17:3, wandule utyhile kwisiqendu 52 nesama-53 kwiphepha 27. Xubusha ngokufutshane ngesizathu sokuba kufuneke singenise ulwazi oluchanileyo ngeLizwi likaThixo.
5 Xa ubuyela apho ubuhambise incwadana enemifanekiso ethi “Injongo Yobomi” kumntu othanda unqulo, usenokukufumanisa kufanelekile ukuthi:
◼ “Mhlawumbi uwenze kaninzi uMthandazo weNkosi. Xa ucela ukuba uBukumkani bukaThixo bufike yintoni ethi qatha engqondweni yakho?” Emva kokuba umninimzi ekuphendule, tyhila kwisiqendu 8 nesesi-9 kwiphepha 26, uze ufunde uDaniyeli 2:44. Mhlawumbi unokuqhubeka nencoko ngokucacisa ukuba uBukumkani bukaThixo buya kuthetha ukuphela kobungendawo nokubandezeleka. Phuhlisa nelokuba ukuba singamalungisa phambi koThixo, sinokunandipha ubomi obungunaphakade kwiParadisi ekulo mhlaba.
6 Khumbula ukuba sinokubuyela kuye nabani na obekulungele ukuphulaphula, enoba besihambise uncwadi okanye asiluhambisanga. Zama ukubekela ecaleni veki nganye ixesha lokubuyela. UYehova uya kuwusikelela umgudu wakho onenkuthalo wokuhlakulela umdla owufumanayo. Ngamana ungavelisa isiqhamo ukuze adunyiswe.—Yoh. 15:8.