ISikolo Sobulungiseleli Sobuthixo Sowama-2002
1 Ubuchule bokuthetha buthatyathwa lula yinkoliso yabantu. Noko ke, ukuthetha sisipho esivela kuYehova. Kusenza sikwazi ukunxibelelana nabanye size sivakalise iingcinga neemvakalelo zethu. Okona kubalulekileyo kukuba, ngokuthetha singadumisa uThixo wethu.—INdu. 22:22; 1 Kor. 1:4-7.
2 Amadoda, amabhinqa nabantwana baqeqeshwa kwiSikolo Sobulungiseleli Sobuthixo ukuba bavakalise igama likaYehova. (INdu. 148:12, 13) Ucwangciso lwesikolo sowama-2002 lugubungela imixholo emininzi yeBhayibhile esinokungenelwa ngokobuqu kuyo size siyisebenzise nasentsimini. Ngokulungiselela isikolo nokuba nenxaxheba kuso, singalwandisa ulwazi nobuchule bethu njengabafundisi beLizwi likaThixo.—INdu. 45:1.
3 Funda IBhayibhile Yonke Imihla: Ukuba iBhayibhile isoloko ikufutshane, sinokusebenzisa naliphi na ithuba elivelayo ukuze siyifunde. Inkoliso yethu inemizuzu embalwa engayisebenzisiyo ebudeni bemini ebingayisebenzisela le njongo. Hayi indlela ekuyingenelo ngayo ukufunda iphepha elinye ubuncinane ngosuku, koko kuphela okufunekayo ukuze sihambisane nocwangciso lokufunda iBhayibhile olukucwangciso lwesikolo!—INdu. 1:1-3.
4 Ubuchule bokufunda iBhayibhile kakuhle bunokusinceda sifikelele iintliziyo zabo baphulaphuleyo size sibashukumisele ukuba badumise uYehova. Abazalwana abanikela iNtetho yesi-2 esikolweni bafanele baqhelisele, baqhelisele, baqhelisele ukuzifunda ngokuvakalayo iindinyana abazabelweyo. Umveleli wesikolo uya kuncoma aze acebise ngendlela onokuyiphucula ngayo indlela yakho yokufunda.
5 Sebenzisa Incwadi Ethi Ukuqiqa: INtetho yesi-3 neyesi-4 zisekelwe kwincwadi ethi Ukuqiqa. Inkoliso yethu ifanele ikuphaphele ukusebenzisa esi sixhobo siluncedo kubulungiseleli basentsimini. Oodade bafanele bayinikele ngendlela efanele intsimi yasekuhlaleni. Umveleli wesikolo ufanele anikele ingqalelo ngokukhethekileyo kwindlela abafundisa ngayo nabazisebenzisa ngayo iZibhalo.
6 Ngamana iSikolo Sobulungiseleli Sobuthixo singasinceda sonke siqhubeke sisebenzisa isipho sethu sokuthetha esisiphiwe nguThixo ukuze sivakalise iindaba ezilungileyo size sidumise uThixo wethu omkhulu, uYehova!—INdu. 34:1; Efe. 6:19.