‘Ukunikela Ubungqina Obucokisekileyo’ Ngenkuthalo
1, 2. Yintoni ekuchukumisayo kwindlela uPawulos awayekujonga ngayo ukushumayela iindaba ezilungileyo, yaye sinokuwuxelisa njani umzekelo wakhe ‘wokunikela ubungqina obucokisekileyo’?
1 NjengoYesu nabanye abakhonzi abathembekileyo bamandulo, umpostile uPawulos wayengumshumayeli weendaba ezilungileyo onenzondelelo, ‘enikela ubungqina obucokisekileyo’ enokuba kuphi na. Kwanaxa wayeseluvalelweni endlwini, “wayebamkela ngobubele bonke ababesiza kuye, eshumayela kubo ubukumkani bukaThixo yaye efundisa ngezinto eziphathelele iNkosi uYesu Kristu ngeyona nkululeko yokuthetha.”—IZe. 28:16-31.
2 Nathi ‘sinokunikela ubungqina obucokisekileyo’ ngenkuthalo ngamaxesha onke. Oko kuquka ukushumayela kubantu esidibana nabo ezivenkileni, emsebenzini, esikolweni, naxa sisiya okanye sibuya kwiindibano ezincinane nezinkulu.—IZe. 28:23; INdu. 145:10-13.
3. Sinokukuphepha njani ukuba indlela esinikela ubungqina obungacwangciswanga ngayo ibonakale iyintshumayelo eyenzeka nje ngebhaqo?
3 Ngaba Bubungqina Obungacwangciswanga Okanye Bobebhaqo? Ngaba ukho umahluko? Ewe ukho. Into yebhaqo yenzeka ngamabonandenzile okanye ngaphandle kwenjongo, ngokungathi yinto engacetywanga okanye engabalulekanga kangako. Ngokuqinisekileyo ubulungiseleli bethu abunjalo. Njengoko kwakunjalo ngoPawulos, kubalulekile kuthi ukuzukisa uThixo ngokunikela ubungqina, yaye sifanele sizimisele ukunikela ubungqina kuyo yonke indawo efanelekileyo. Noko ke, indlela esithetha ngayo nabantu inokuchazwa ngokuchanileyo ngokuthi yindlela engacwangciswanga—ngamany’ amazwi, sithetha nabo ngokukhululekileyo, sinobuhlobo yaye ngendlela nje eqhelekileyo. Le ndlela inokuba nemiphumo emihle.
4. Yintoni eyabangela ukuba uPawulos anikele ubungqina kwindawo awayehlala kuyo?
4 Lungiselela Ukunikela Ubungqina: UPawulos kwakufuneka azame ukushumayela ngoxa wayeseluvalelweni endlwini eRoma. Nguye owamema iinkokeli zasekuhlaleni zamaYuda ukuba zize endlwini yakhe. (IZe. 28:17) Nangona lalikho ibandla lamaKristu eRoma, uPawulos wafumanisa ukuba amaYuda awayehlala kweso sixeko awanalwazi kangako ngonqulo lwamaKristu. (IZe. 28:22; Roma 1:7) Akazange ayeke ‘ukunikela ubungqina obungacwangciswanga’ ngoYesu Kristu nangoBukumkani bukaThixo.
5, 6. Ngawaphi amathuba esinokuwasebenzisa ukuze sinikele ubungqina obungacwangciswanga, yaye ngawaphi amalungiselelo esinokuwenza ukuze siphumelele koku?
5 Cinga ngabo bonke onokudibana nabo ngoxa useluhambeni abangawazi kangako amaNgqina kaYehova. Basenokuba abazi nokuba siqhubela abantu isifundo seBhayibhile ngesisa. Waphaphele amathuba owafumanayo okunikela ubungqina kwabo udibana nabo eluhambeni, kwiindawo zokuphumla, xa usitha amafutha, ezivenkileni, kwiihotele, kwiindawo zokutyela, kwisithuthi sikawonke-wonke, njalo njalo. Yicebe kusengaphambili indlela oza kuqalisa ngayo incoko ukuze wenze intshumayelo emfutshane. Mhlawumbi ngaphambi kokuba uhambe unokuqhelisela ngokunikela ubungqina obungacwangciswanga kubamelwane, kwizalamane, kwabo usebenza nabo nakwabanye obaziyo.
6 Kufuneka uxhobe ngeempapasho eziliqela oza kuzisebenzisa xa unikela ubungqina obungacwangciswanga. Ziziphi iimpapasho omele uzisebenzise? Usenokusebenzisa iphecana elithi Ngaba Ungathanda Ukwazi Ngakumbi NgeBhayibhile? Balaselisa iziqendu zokuqala ezihlanu, apho sixelelwa ngezizathu ezihlanu ezahlukahlukeneyo ezibangela ukuba sifunde iBhayibhile. Mbonise ibhokisana engasemva kweli phecana apho ubani azalisa khona xa ecela ukuqhutyelwa isifundo seBhayibhile sesisa. Xa udibana nomntu onomdla, mnike incwadana enemifanekiso ethi Okufunwa NguThixo. Xa ulungiselela abantu oza kudibana nabo abathetha olunye ulwimi, thabatha incwadana enemifanekiso ethi Good News for All Nations. Iphepha 2 lichaza indlela onokuyisebenzisa ngayo xa unikela ubungqina. Ukuba uhamba ngenqwelo-mafutha, usenokuthabatha iimpapasho ezimbalwa ukuze unike abo banomdla wokwenene kwisigidimi soBukumkani.
7, 8. Simele sithobele siphi isilumkiso ngenkangeleko nehambo yethu xa siseluhambeni nangamaxesha esizipholele ngawo?
7 Nikela Ingqalelo Kwinkangeleko Nakwihambo Yakho: Simele siqiniseke ukuba ihambo yethu nendlela esinxibe nesizilungise ngayo ayibenzi abanye bacinge phosakeleyo ngathi okanye ayibenzi ‘bayichase’ intlangano kaYehova. (IZe. 28:22) Oku asikwenzi kuphela xa sisiya kwiintlanganiso, kwiindibano ezincinane nezinkulu, kodwa kwanaxa siseluhambeni okanye ngamaxesha esizipholele ngawo. IMboniselo ka-Agasti 1, 2002, iphepha 18, isiqendu 14, ilumkisa ngelithi: “Inkangeleko yethu ayifanele ibe kukucel’ injezu , engaqhelekanga, evusa inkanuko, ebonisa umzimba okanye yesimbo sezi mini. Ukongezelela, sifanele sinxibe ngendlela ebonakalisa ‘ukuhlonela uThixo.’ Oku kusenza sicinge nzulu ngalo mbandela, akunjalo? Lo asingombandela nje wokunxiba ngokufanelekileyo xa sisiya kwiintlanganiso zebandla [okanye ezindibanweni] size singakhathali ngamanye amaxesha. Ngamaxesha onke inkangeleko yethu ifanele ibonise intlonelo, sikhumbula ukuba singamaKristu nabalungiseleli ngalo lonke ixesha.”—1 Tim. 2:9, 10.
8 Sifanele sinxibe ngendlela efanelekileyo nenesidima. Ukuba imbonakalo nehambo yethu zisoloko zibonisa ukuba siyakholwa kuThixo, asisoze siyeke ukunikela ubungqina obungacwangciswanga ngenxa yokuba inkangeleko yethu ingabufanelekelanga ubulungiseleli.—1 Pet. 3:15.
9. Yiyiphi impumelelo awaba nayo uPawulos xa wayenikela ubungqina eRoma?
9 Ubungqina Obungacwangciswanga Bunomvuzo: Kwiminyaka emibini uPawulos eseluvalelweni kwindlu yaseRoma, wabona imiphumo emihle kwimigudu awayeyenza yokushumayela. ULuka uthi bambi baqalisa ‘ukuzikholelwa izinto awayezitsho.’ (IZe. 28:24) UPawulos wayihlola impumelelo awayenayo ‘ekunikeleni ubungqina obucokisekileyo’ waza wabhala wenjenje: “Izinto ezandihlelayo ziye zaphumela ekuhanjiselweni phambili kweendaba ezilungileyo kunangenye indlela, kangangokuba imixokelelwane yam iye yaziwa esidlangalaleni ngokunxulumene noKristu phakathi kwalo lonke iQela Labalindi Bakomkhulu nabo bonke abanye; yaye inkoliso yabazalwana eNkosini, ekubeni iziva inentembelo ngenxa yemixokelelwane yam yentolongo, ibonisa isibindi ngokungakumbi ekulithetheni ilizwi likaThixo ngokungenaloyiko.”—Fil. 1:12-14.
10. Yiyiphi impumelelo esinye isibini esaba nayo xa sasinikela ubungqina kunyaka ophelileyo?
10 Kulo nyaka uphelileyo, emva kokuchitha usuku kwindibano yesithili, esinye isibini sanikela ubungqina obungacwangciswanga obaba nemiphumo emihle kwelinye inenekazi elalihambisa ukutya elasibuza ngeebheji zaso zendibano. Salibalisela ngendibano saza salixelela ngethemba elichazwa yiBhayibhile ngekamva loluntu. Salinika iphecana elithi Ngaba Ungathanda Ukwazi Ngakumbi NgeBhayibhile? saza salicacisela ngelungiselelo lesifundo seBhayibhile esiqhutywa ngesisa. Eli nenekazi lathi lifuna umntu oza kulityelela, laza lazalisa igama nedilesi yalo kwibhokisana engasemva kwelo phecana, emva koko lacela esi sibini ukuba sizame ukuba lifundelwe. Yiyiphi impumelelo onokuyinandipha xa ‘unikela ubungqina obucokisekileyo’ ngenkuthalo?
11. Ziziphi iimpawu esifanele sibe nazo ukuze sishumayele iindaba ezilungileyo ‘ngokunikela ubungqina obucokisekileyo’?
11 Shumayela Iindaba Ezilungileyo Ngokucokisekileyo: Khawuthelekelele indlela uPawulos awavuya ngayo xa weva ukuba amanye amaKristu akunye naye ayelandela umzekelo wakhe wokuba nenzondelelo! Ngamana singenza konke okusemandleni ethu ukuze sihambisele phambili iindaba ezilungileyo ngokunikela ubungqina obungacwangciswanga ngeenkolelo zethu ezisekelwe eBhayibhileni.
[Ibhokisi ekwiphepha 3]
Iimpapasho Ezifunekayo Xa Unikela Ubungqina Obungacwangciswanga
■ Ngaba Ungathanda Ukwazi Okungakumbi NgeBhayibhile? (iphecana)
■ Yintoni UThixo Ayifunayo Kuthi? (incwadana enemifanekiso)
■ Good News for All Nations (incwadana)
■ Ezinye iimpapasho
[Ibhokisi ekwiphepha 4]
Ungabalibali!
Oobani? Bonke abanomdla abebekho kwiSikhumbuzo sokufa kukaKristu nakwintetho ekhethekileyo. Ngaba sele ubamemele kwiintlanganiso eHolweni YoBukumkani? Kusenokwenzeka ukuba abaninzi kubo baza kuza ukuba baye bakhuthazwa ngobubele. Njengoko benandipha unxulumano olwakhayo kwiintlanganiso nocwangciso lokomoya olukhuthazayo, baya kusondela kuYehova nentlangano yakhe. Kutheni ungabamemi uze ubone enoba baza kuza kusini na? Banike zonke iinkcukacha ezifunekayo, kuquka amaxesha eentlanganiso nendlela eziqhutywa ngayo iintlanganiso ezahlukeneyo.