Usukelo Olubalulekileyo Lonyaka Omtsha Wenkonzo
1. Luluphi usukelo esinokuzibekela lona kunyaka omtsha wenkonzo?
1 Simele sizibekele usukelo ukuba sifuna ukwenza inkqubela ngokomoya. Wena uzibekele luphi usukelo lonyaka omtsha wenkonzo? Usukelo olubalulekileyo onokuzibekela lona kukuba nguvulindlela ongumncedani kangangenyanga okanye ezingakumbi. Ekubeni lo msebenzi mnandi usoloko ufuna ukucetyelwa kusengaphambili, unokuqalisa kwangoku ukwenjenjalo. Kutheni sifanele sicinge ngokuba ngoovulindlela abangabancedani?
2. Kutheni sifanele sicinge ngokuba ngoovulindlela abangabancedani?
2 Izizathu Zokuba Ngoovulindlela Abangabancedani: Ukuba nguvulindlela ongumncedani kusenza sikholise uBawo wethu osezulwini “ngokuphelele ngakumbi” kuba sichitha ixesha elithe chatha entsimini. (1 Tes. 4:1) Njengoko sicingisisa ngazo zonke izinto uYehova asenzele zona, iintliziyo zethu zisishukumisela ukuba sixelele abanye ngaye. (INdu. 34:1, 2) UYehova uyakubona yaye uyakuxabisa ukuzincama kwethu ukuze senze okungakumbi entsimini. (Heb. 6:10) Ukwazi ukuba sikholisa uYehova xa sizibhokoxa kusivuyisa gqitha.—1 Kron. 29:9.
3, 4. Kusinceda njani ukuba ngoovulindlela abangabancedani?
3 Ngokuqhelekileyo, okukhona uyenza kakhulu into, kuya kusiba lula kuze kube mnandi ukuyenza. Ukuchitha ixesha elingakumbi entsimini kukwenza uzive ukhululekile ukushumayela kwindlu ngendlu. Uya kuba nobuchule bokuqalisa incoko nobokusebenzisa iBhayibhile. Okukhona uthetha ngezinto ozikholelwayo, kokukhona ziya kwendela nangakumbi. Abaninzi abebengenazo izifundo zeBhayibhile baye baziqalisa besakuba ngoovulindlela abangabancedani.
4 Ubuvulindlela bobuncedani bunokuba yenye indlela yokusikhuthaza ukuba singenzi inkonzo yokudlulisa usana kunina. Umzalwana owayesakuba nguvulindlela othe ngxi nowayevakalelwa kukuba uchitha ixesha elininzi empangelweni wagqiba kwelokuba abe nguvulindlela ongumncedani inyanga enye. Wathi: “Andiyikholelwa indlela loo nyanga inye eyandomeleza ngayo ngokomoya! Ndenza amalungiselelo okuba ndiqhubeke ndinguvulindlela ongumncedani, nto leyo eyabangela ukuba ndiphinde ndibe nguvulindlela othe ngxi.”
5. Yintoni esinokuyenza xa sivakalelwa kukuba asikwazi kushumayela?
5 Susa Imiqobo: Abanye basenokuba mathidala ukufaka izicelo ngenxa yokuba bevakalelwa kukuba abakwazi kushumayela. Ukuba lo ngumqobo okubambileyo, uYehova unokukunceda njengoko wenzayo kuYeremiya. (Yer. 1:6-10) Nangona uMoses ‘wayecotha ngomlomo, ekwacotha nangolwimi,’ uYehova wamsebenzisa ukuze aphumeze ukuthanda Kwakhe. (Eks. 4:10-12) Ukuba uvakalelwa kukuba akukwazi kushumayela, cela uYehova akunike inkalipho.
6. Unokukwazi njani ukuba nguvulindlela ongumncedani kwanaxa ukhathazwa yimpilo okanye uxakekile?
6 Ngaba umathidala ukufaka isicelo ngenxa yempilo enkenenkene okanye ukuxakeka? Ukuba ukhathazwa yimpilo, ukusebenza ngendlela ekulingeneyo kunokukunceda ukwazi ukuba nguvulindlela ongumncedani. Ukuba uxakekile, uya kufumanisa ukuba unokuzenza ngenye inyanga izinto ezingabalulekanga kangako. Abanye abaphangela ixesha elizeleyo baye bathenga ixesha lokuba ngoovulindlela abangabancedani ngokuthabatha ikhefu losuku olunye okanye ezimbini.—Kol. 4:5.
7. Kutheni kunceda nje ukuthandazela ukuba nguvulindlela ongumncedani?
7 Into Onokuyenza: Wuthandazele umnqweno wakho. Cela uYehova ukuba ayisikelele imigudu yakho yokwandisa umsebenzi owenza entsimini. (Roma 12:11, 12) Unokukunceda wenze izigqibo zobulumko ngokuphathelele ukuhlengahlengisa ucwangciso lwakho. (Yak. 1:5) Ukuba akunawo lo mnqweno, cela uYehova akuncede uyoliswe ngumsebenzi wokushumayela.—Luka 10:1, 17.
8. Ukusebenzisa IMizekeliso 15:22 kunokukunceda njani ube nguvulindlela ongumncedani?
8 Luxubusheni njengentsapho usukelo lokuba ngoovulindlela abangabancedani. (IMize. 15:22) Mhlawumbi ilungu elinye lentsapho linganguvulindlela ongumncedani lize lixhaswe ngamanye. Wuxubushe nabanye ebandleni umnqweno onawo wokuba nguvulindlela, ingakumbi abo baneemeko ezifana nezakho. Oku kunokubenza babe nehlombe ngobuvulindlela bobuncedani.
9. Ziziphi iinyanga onokukhetha ukuba nguvulindlela ongumncedani ngazo?
9 Njengoko uhlolisisa ikhalenda yakho yonyaka omtsha wenkonzo, ucinga ukuba unganguye nini uvulindlela ongumncedani? Ukuba uphangela ixesha elizeleyo okanye uhamba isikolo, unokucinga ngeenyanga ezineeholide okanye ezo zineMigqibelo okanye iiCawa ezintlanu. Ngokomzekelo, uSeptemba, uDisemba, uMatshi noAgasti baneeveki ezintlanu ezipheleleyo. Inyanga kaMeyi ineMigqibelo emihlanu ize ekaJuni ibe neeCawa ezintlanu. Ukuba ukhathazwa yimpilo, ceba ukuba nguvulindlela ngeenyanga ezinemozulu entle. Unokucinga ngokuba nguvulindlela kwiinyanga zotyelelo lomveleli wesiphaluka kwibandla lenu. Ebudeni botyelelo lwakhe, uya kuba nelungelo elingakumbi lokubakho kwinxalenye yokuqala yentlanganiso eqhutywa noovulindlela abathe ngxi. Ekubeni iSikhumbuzo siza kuba ngoMatshi 22 kulo nyaka uzayo, uMatshi, uAprili noMeyi baziinyanga ezintle kakhulu. Usakuba ukhethe inyanga okanye iinyanga oza kuba nguvulindlela ongumncedani ngazo, qala ukubhala phantsi ucwangciso oluza kukunceda ufikelele isisikelo sakho seeyure.
10. Yintoni onokuyenza xa ungakwazi ukuba nguvulindlela ongumncedani?
10 Kwanokuba uvakalelwa kukuba akunakukwazi ukuba nguvulindlela ongumncedani kulo nyaka uzayo wenkonzo, unokuqhubeka unomoya wobuvulindlela. Qhubeka usenza konke okusemandleni akho kumsebenzi wokushumayela, uqinisekile ukuba uYehova uyakholiswa yinkonzo yakho yomphefumlo uphela oyinikela kuye. (Gal. 6:4) Baxhase uze ubakhuthaze abo bakwaziyo ukuba ngoovulindlela abangabancedani. Mhlawumbi unokuluhlengahlengisa ucwangciso lwakho ukuze ushumayele usuku lube lunye evekini nabo bangoovulindlela.
11. Kutheni sifanele siqonde ukuba ixesha lihambile?
11 Abantu bakaYehova bayaqonda ukuba ixesha lihambile. Kukho umsebenzi omele wenziwe—ukushunyayelwa kweendaba ezilungileyo. Kubandakanyeke ubomi, yaye ixesha eliseleyo lincinane. (1 Kor. 7:29-31) Ukuthanda uThixo nommelwane kuya kusikhuthaza ukuba sizibhokoxe ekushumayeleni. Xa sisenza umgudu size sicebe kakuhle, sinokukwazi ukuba ngoovulindlela abangabancedani ubuncinane inyanga enye ebudeni bonyaka wenkonzo omtsha—usukelo olubaluleke ngokwenene!