Hambisa Amaphephancwadi Angqinela Inyaniso
1. Yiyiphi indima ephunyezwa yiMboniselo noVukani!?
1 Iphephancwadi IMboniselo Evakalisa UBukumkani BukaThixo kunye noVukani! asengawona abalulekileyo kumsebenzi wokushumayela ngoBukumkani nowokwenza abafundi. (Mat. 24:14; 28:19, 20) Siyakuvuyela ukuhambisa la maphephancwadi mabini anenkcazelo efika ngexesha kwiinkalo ezahlukeneyo zenkonzo yoBukumkani.
2. Luluphi utshintsho oluye lwenziwa kwiMboniselo nakuVukani!, yaye belusenzelwa ntoni?
2 Kule minyaka idluleyo kuye kwabakho utshintsho kubukhulu nakwizinto eziqulethwe ngala maphephancwadi, ibe kutshintshe nendlela yokuwahambisa. Olu tshintsho lwenziwe ngenjongo yokuba la maphephancwadi abe nomtsalane kwaye abe luncedo ngakumbi, ukuze isigidimi soBukumkani sifikelele iintliziyo zazo ‘zonke iintlobo zabantu ukuze zisindiswe zize zifikelele elwazini oluchanileyo lwenyaniso.’—1 Tim. 2:4.
3. Aza kusetyenziswa njani amaphephancwadi entsimini?
3 Ukususela ngoJanuwari 2006, siye sasebenzisa iintshayelelo ezahlukeneyo zokuhambisa uVukani! ophuma kanye ngenyanga. Ngoku siza kwenjenjalo nangeMboniselo Evakalisa UBukumkani BukaYehova entsimini. Iphepha lokugqibela loBulungiseleli Bethu BoBukumkani lineentshayelelo zephephancwadi ngalinye. Ezi ntshayelelo zidla ngokuthi gqaba-gqaba ngamanqaku asekuqaleni ephephancwadi, kodwa maxa wambi kuye kufakwe namanye amanqaku abangel’ umdla. Ezi ntshayelelo ziya kuphumelela xa siqhelene nenqaku elo kwaye sisebenzisa amazwi ethu ukuze senze loo ntshayelelo ifanele intsimi yethu.
4. Kutheni kunokuba yingenelo ukusebenzisa ezinye iintshayelelo ngaphandle kwezo zicetyiswe kuBulungiseleli Bethu BoBukumkani?
4 Nangona UBulungiseleli Bethu BoBukumkani buza kuba neentshayelelo ezimbini ngephephancwadi ngalinye, ungayisebenzisa nenye eyahlukileyo kwezi. Isizathu sokuba sitsho kukuba kusenokubakho inqaku elibangel’ umdla kwintsimi yebandla lenu. Okanye usenokuzenzela intshayelelo ephumelela nangakumbi usebenzisa inqaku elibangel’ umdla kuwe.
5. Yintoni omele uyenze ngaphambi kokuba ulungiselele intshayelelo yephephancwadi elihanjiswayo?
5 Indlela Yokulungiselela Intshayelelo Yakho: Okokuqala, lazi kakuhle inqaku oza kuthetha ngalo. Mhlawumbi akuyi kukwazi ukusoloko ufunda onke amanqaku akwiphephancwadi ngaphambi kokuba ulihambise entsimini. Kodwa ke, yiba nehlombe kwaye uzimisele xa uthetha ngamanqaku owakhethileyo. Loo nto unokuyenza kuphela ukuba uye wayifunda inkcazelo oza kuthetha ngayo.
6. Sinokuzenzela njani ezethu iintshayelelo?
6 Okwesibini, yiba bhetyebhetye xa usenza intshayelelo. Unokuqalisa incoko ngokubuza umbuzo obangel’ umdla onento yokwenza nenqaku elo. Wathembe amandla eLizwi likaThixo ukuba aya kuzichukumisa iintliziyo zabantu. (Heb. 4:12) Khetha isibhalo esihambelana nombandela oza kuthetha ngawo, ukuba kunokwenzeka ibe sisibhalo esikwinqaku oza kuthetha ngalo. Cinga ngendlela oza kudibanisa ngayo eso sibhalo nenqaku elo.
7. Sinokuziphucula njani iintshayelelo zethu?
7 Ngawo Onke Amathuba Avelayo: Ukuze intshayelelo iphumelele, ifanele isetyenziswe. Hambisa amaphephancwadi kunye nebandla ngemiGqibelo. Wahambise kubantu ababekhe balwamkela uncwadi lwethu. Wanike izifundo zakho zeBhayibhile nabanye abantu ababa khona xa ubuyela. Unokuwahambisa kubantu othetha nabo xa uye kuthenga, xa useluhambweni, okanye xa ulinde ugqirha. Phucula iintshayelelo zakho njengoko uzisebenzisa ebudeni benyanga.
8. Yahluke njani IMboniselo noVukani!?
8 IMboniselo noVukani! ngamaphephancwadi ahlukileyo. Aphakamisa uYehova njengoMongami wendalo iphela. (IZe. 4:24) Ayabathuthuzela abantu ngeendaba ezilungileyo zoBukumkani bukaThixo aze akhuthaze ukuba nokholo kuYesu Kristu. (Mat. 24:14; IZe 10:43) Ukongezelela koko, asichazela ngeziganeko zehlabathi ezizalisekisa isiprofeto seBhayibhile. (Mat. 25:13) Nceda abantu abakwintsimi yebandla lakho ukuba bangenelwe kula maphephancwadi ngokuwahambisa ngawo onke amathuba avelayo!
9. Sinokuyihlahla njani indlela yokwenza ibuyelo?
9 Xa uye wakwazi ukuhambisa iphephancwadi, okanye kwanokuba niye nancokola kamnandi ngeBhayibhile nomninimzi, buza umbuzo omenza acinge noza kukuhlahlel’ indlela xa usenza ibuyelo. Ukuba siyakukhuthalela ukutyala imbewu yenyaniso, sinokuqiniseka ukuba uYehova uya kuzivula iintliziyo zabantu abakunqwenela ngokunyanisekileyo ukumazi nokumnqula.—1 Kor. 3:6.