Ucwangciso Olutsha Lwendibano Ekhethekileyo

Umxholo wocwangciso lwendibano ekhethekileyo yonyaka wenkonzo wama-2009 othi “Hlala Ubuphaphele Ubulungiseleli . . . , Ukuze Ubuzalisekise,” usekelwe kweyabaseKolose 4:17. NjengamaKristu sisijonga njengesibalulekileyo esi sibongozo. Injongo yethu kukuzalisekisa ubulungiseleli bethu ngokuthembeka kanye njengoYesu. (Yoh. 17:4) Umpostile uPawulos wamisela umzekelo omhle kulo mba. Wayezimisele ukuligqiba ikhondo lakhe lobulungiseleli.—IZe. 20:24.

Intetho yomveleli wesiphaluka iza kubonisa indlela abavakalisi abahlukeneyo abazoyisa ngayo iingxaki abajamelana nazo kubulungiseleli. Emva koko intetho ethi “Kuhlakulele Oko Ukutyalileyo” iza kuthetha ngendlela esinokubanceda ngayo abo ‘banotyekelo olufanelekileyo ngobomi obungunaphakade.’ (IZe. 13:48) Isithethi esityeleleyo siza kuqala sixubushe indinyana nganye kweyesi-2 kwabaseKorinte 6:1-10, kwintetho ethi “Indlela Esizincomela Ngayo Njengabalungiseleli.” Emva kwemini, siya kunikela intetho ethi “Buxabise Ubulungiseleli Bakho.” Ngokuqinisekileyo uya kukhuthazwa yintetho ethi “Abaselula Nabakhulileyo Bayabuthanda Ubulungiseleli” nethi “Ulutsha Olubufezayo Ubulungiseleli Balo.” Abo bafuna ukufuzisela ukuzahlulela kwabo ngokubhaptizwa emanzini kwindibano ezizayo mabaxelele umveleli owongamelayo ngokukhawuleza. Kuzo zonke iindibano zethu kuye kuxutyushwe IMboniselo. Sicela uze neyakho eza kufundwa kuloo veki yendibano ekhethekileyo.

Ukuze siqiniseke ukuba siyabuzalisekisa ubulungiseleli bethu, asivumeli ukuba ezinye izinto ziphazamisane nezinto esiziphathiswe nguYehova. Ukhuthazo lweZibhalo esiza kulufumana kule ndibano ekhethekileyo lufanele lusincede sonke siqonde into esifanele siyenze ukuze sibe nembono efanelekileyo size sizame ukubuzalisekisa ngokupheleleyo ubulungiseleli bethu.