Asikho Sodwa

1-2. (a) Xa sineengxaki kutheni sinokuthi asikho sodwa? (b) Siza kuthetha ngantoni kweli nqaku?

XA SINEENGXAKI ezinkulu, sisenokubona ngathi sisodwa kwihlathi elikhulu elimnyama thsu. Kodwa asikho sodwa. UTata wethu osezulwini osithandayo uyazibona iingxaki esinazo, uthembisa nokuba uza kusinceda. Nantsi into abathembisa yona uYehova abakhonzi bakhe abathembekileyo: ‘Ndiza kuninceda.’​—Isa. 41:10.

² Kweli nqaku siza kuthetha ngendlela uYehova (1) asikhokela ngayo, (2) asinika ngayo izinto esizidingayo, (3) asikhusela ngayo, (4) nasithuthuzela ngayo. UYehova uyasiqinisekisa ukuba nokuba sineziphi iingxaki, soze asilibale. Akasoze asishiye. Ngoko asikho sodwa.

UYEHOVA UYASIKHOKELA

3-4. UYehova usikhokela njani? (INdumiso 48:14)

³ Funda iNdumiso 48:14. UYehova uyazi ukuba asinakukwazi ukuzikhokela. Ubakhokela njani abakhonzi bakhe abathembekileyo namhlanje? Enye into ayisebenzisayo yiBhayibhile. (INdu. 119:105) NgeLizwi lakhe eliphefumlelweyo uYehova usinceda senze izigqibo ezifanelekileyo size sibe neempawu ezisenza sonwabe ngoku nangonaphakade.a Ngokomzekelo, usifundisa ukuba singabi nenzondo, sinyaniseke kuyo yonke into, size sibathande ngokusuka entliziyweni abantu. (INdu. 37:8; Heb. 13:18; 1 Pet. 1:22) Xa sinezi mpawu siba ngabazali, abayeni, amakhosikazi, nabahlobo abalungileyo.

⁴ KwiLizwi lakhe uYehova usixelela nangabantu ababeneengxaki ezifana nezethu nababeziva njengathi. (1 Kor. 10:13; Yak. 5:17) Xa sifunda ngobomi baba bantu size sisebenzise izinto esizifundayo kubo, sincedakala ngeendlela ezimbini. Okokuqala, siye sibone ukuba ayisithi sodwa abanezi ngxaki, bakhona nabanye ababenazo baza bakwazi ukuzinyamezela. (1 Pet. 5:9) Okwesibini, sifunda ngendlela esinokuzinyamezela ngayo.​—Roma 15:4.

5. Ngoobani abasebenzisayo uYehova ukuze asikhokelele kwindlela eya ebomini?

⁵ UYehova usebenzisa namanye amaKristu ukuze asikhokele.b Ngokomzekelo, abaveleli beziphaluka batyelela amabandla ukuze basikhuthaze. Iintetho abazinikelayo ziqinisa ukholo lwethu futhi zisinceda sihlale simanyene. (IZe. 15:40–16:5) Abadala basebenza nzima ukuze bancede umvakalisi ngamnye ahlale esondele kuYehova. (1 Pet. 5:​2, 3) Bona abazali bafundisa abantwana babo ukuthanda uYehova, ukwenza izigqibo ezifanelekileyo nokwenza izinto ezilungileyo. (IMize. 22:6) Noodade abakhulileyo banceda oodade abasebatsha ngokuziphatha ngendlela abanokuyilinganisa, babacebise baze babakhuthaze.​—Tito 2:​3-5.

6. Sinokwenza ntoni ukuze kusincede ukukhokelwa nguYehova?

⁶ UYehova usinike yonke into esiyidingayo ukuze sikwazi ukwenza izigqibo ezifanelekileyo size sonwabe. Sinokubonisa njani ukuba siyayibulela into asenzele yona? IMizekeliso 3:​5, 6 ithi: “Thembela ngoYehova ngayo yonke intliziyo yakho, ungathembeli kwindlela oziqonda ngayo izinto.” Xa sisenza loo nto, ‘uza kuyenza iphumelele indlela yethu,’ ngamany’ amazwi, uza kusinceda siziphephe iingxaki ezininzi size sonwabe. Simbulela nyhani uYehova ngokusithanda kangaka de asinike amacebiso anceda ngamnye wethu!​—INdu. 32:8.

UYEHOVA USINIKA IZINTO ESIZIDINGAYO

7. UYehova usinceda njani ukuze sifumane izinto esizidingayo? (Filipi 4:19)

⁷ Funda amaFilipi 4:19. UYehova akapheleli nje ekusikhokeleni, kodwa uyazisikelela neenzame zethu zokufumana ukutya, impahla, nendawo yokuhlala. (Mat. 6:33; 2 Tes. 3:12) Ngoxa kuqhelekile ukuba nexhala lokuba siza kuzifumana njani izinto esizidingayo, uYehova usikhuthaza ukuba singabi nexhala kakhulu. Kutheni? Kuba siyazi ukuba uTata wethu akasoze abalahle abakhonzi bakhe abathembekileyo ngexesha abamdinga ngalo. (Mat. 6:8; Heb. 13:5) Sinokumthemba nyhani xa esithi uza kusinika izinto esizidingayo.

8. UYehova wamenzela ntoni uDavide?

⁸ Khawucinge ngendlela uYehova awamnceda ngayo uDavide. Kwiminyaka eyayinzima kuDavide, ebaleka uKumkani uSawule, uYehova wanika yena namadoda awayekunye naye izinto ababezidinga ukuze baqhubeke bephila. Xa ecinga ngendlela uYehova awamkhathalela ngayo kuloo minyaka, uDavide uthi: “Ndakha ndangumfana, ngoku ndimdala, kodwa andikamboni umntu olilungisa elahliwe, okanye abantwana bakhe bedinga isonka.” (INdu. 37:25) Kusenokwenzeka ukuba nawe umbonile uYehova ebanceda ngezinto abazidingayo abakhonzi bakhe abazinikeleyo.

9. Namhlanje uYehova ubanika njani abantu bakhe izinto abazidingayo xa kukho intlekele? (Jonga nemifanekiso.)

⁹ Naxa kwenzeke intlekele, uYehova uyabanika izinto abazidingayo abantu bakhe. Ngokomzekelo, xa kwabakho indlala eYerusalem ngexesha lamaKristu okuqala, abazalwana noodade bezinye iindawo bawathumelela izinto awayezidinga. (IZe. 11:​27-30; Roma 15:​25, 26) Nanamhlanje, abazalwana noodade basenawo loo moya wokupha. Xa kukho intlekele, uYehova wenza abantu bakhe banikele ngezinto ezidingwa ngabazalwana abahlala kwezo ndawo, ezinjengokutya, amanzi, impahla namayeza. Amaqela akha izakhiwo zentlangano aye alungise amakhaya abo neeHolo ZoBukumkani. Abakhonzi bakaYehova baye bakhawuleze babathuthuzele, baze babakhuthaze ngeZibhalo abo bamoshakalelwe ngamakhaya okanye abaswelekelwe ngabantu ababathandayo.c

10-11. Njengoko sesiyivile into eyenzeka kuBorys, ikufundisa ntoni wena?

¹⁰ UYehova uyabanika izinto abazidingayo nabantu abangekabi ngawo amaNgqina. Nathi sikhangela amathuba okubonisa ububele kwabo bangekabi ngawo. (Gal. 6:10) Xa sisenza loo nto sinokukwazi ukubanceda basazi bhetele baze bafunde ngoYehova. Khawuve into eyenzeka komnye umphathi wesikolo ohlala eUkraine, uBorys. Nangona engeloNgqina, wayesoloko esiba nobubele kubantwana abangamaNgqina abasesikolweni sakhe, ezihlonipha nezinto abakholelwa kuzo. Ngenxa yemfazwe, uBorys wagqiba ekubeni ayishiye ilali yakhe, abalekele kwindawo ekhuselekileyo nekwakwilizwe lakhe, baza abazalwana bamnceda. Ekuhambeni kwexesha waya kwiSikhumbuzo sokufa kukaKristu. Xa ecinga ngazo zonke izinto abamenzela zona abazalwana uthi: “AmaNgqina ayenobubele kakhulu kum, endikhathalele. Ndiwabulela kakhulu.”

¹¹ Nathi sinokulinganisa uTata wethu osezulwini onenceba ngokubabonisa ukuba siyabathanda abo badingayo, nokuba ngamaNgqina okanye ayingawo. (Luka 6:​31, 36) Sinethemba lokuba xa sizama ukubabonisa ukuba siyabathanda, baza kutsho bafune ukuba ngabalandeli bakaKristu. (1 Pet. 2:12) Nokuba abadanga bangabo ke, siza kuvuya kuba kuvuyisa kakhulu ukupha.​—IZe. 20:35.

UYEHOVA UYASIKHUSELA

12. UYehova uthembisa ukuba uza kubakhusela njani abantu bakhe xa bebonke? (INdumiso 91:​1, 2, 14)

¹² Funda iNdumiso 91:​1, 2, 14. Namhlanje, uYehova usithembisa ukuba uza kusikhusela kuyo nantoni na enokusenza siyeke ukuba ngabahlobo bakhe. Akasoze avumele uSathana asiyekise ukumkhonza ngendlela ayifunayo. (Yoh. 17:15) Ngexesha “lentlungu engathethekiyo” sinokuqiniseka nyhani ukuba uYehova uza kuyenza into asithembise yona, yokuba uza kusinceda sihlale sinokholo oluqinileyo, aze asisindise.​—ISityhi. 7:​9, 14.

13. UYehova umkhusela njani umntu ngamnye kuthi?

¹³ UYehova umkhusela njani umntu ngamnye kuthi? Usebenzisa iZibhalo ukuze asincede sikwazi ukwahlula into elungileyo kwembi. (Heb. 5:14) Xa sizenza izinto esizifunda kwiLizwi LikaThixo, ubuhlobo bethu noYehova buza kukhuseleka, senze nezigqibo eziza kusinceda sonwabe, size sibe sempilweni. (INdu. 91:4) UYehova uyalisebenzisa nebandla ukuze asikhusele. (Isa. 32:​1, 2) Ukuba sisoloko sikunye nabantu abathanda uYehova nabaphila ngendlela ayifunayo, siyakhuthazeka, sitsho singazenzi izinto ezimbi.​—IMize. 13:20.

14. (a) Kutheni uThixo esenokungasikhuseli kwezinye iingxaki? (b) Isiqinisekisa ngantoni iNdumiso 9:10? (Jonga nombhalo osemazantsi.)

¹⁴ Kudala, uYehova wayebakhusela abakhonzi bakhe kwizinto ezazinokubenzakalisa okanye zibabulale. Kodwa wayengayenzi qho loo nto. Ngamanye amaxesha sehlelwa ‘ziziganeko ezingalindelekanga.’ (INtshu. 9:11) UYehova ebevumela nokuba abakhonzi bakhe batshutshiswe, abanye bade babulawe ukuze abonise ukuba uSathana ulixoki. (Yobhi 2:​4-6; Mat. 23:34) Kunjalo ke nanamhlanje. Ngoxa uYehova esenokungaziphelisi iingxaki esinazo, simele siqiniseke ukuba akasoze abalahle abantu abamthandayo.d​—INdu. 9:10.

UYEHOVA UYASITHUTHUZELA

15. Ukuthandaza, ukufunda iLizwi LikaThixo nokuba kunye namanye amaKristu kusithuthuzela njani? (2 Korinte 1:​3, 4)

¹⁵ Funda ama-2 Korinte 1:​3, 4. Ngamanye amaxesha siba sezintlungwini okanye sibe namaxhala. Mhlawumbi nangoku usentlungwini ekwenza uzive ngathi uwedwa. Ngaba ukhona umntu oyaziyo indlela oziva ngayo? UYehova uyayazi. Akapheleli nje ekuyiqondeni intlungu esikuyo, kodwa ‘usithuthuzela kubo bonke ubunzima esijongene nabo.’ Njani? Xa sithandaza kuye simcenga, usinika “uxolo lukaThixo oluyodlulayo indlela yabantu yokucinga.” (Fil. 4:​6, 7) Sithuthuzelwa nakukufunda amazwi kaYehova aseBhayibhileni. Kuyo, usixelela indlela asithanda ngayo, usifundisa indlela esinokuba zizilumko ngayo, usinika nethemba. Kwiintlanganiso sithuthuzelwa kukuba kunye nabazalwana noodade abasithandayo nakukukhuthazwa ngeZibhalo.

16. Njengoko ulivile ibali likaNathan noPriscilla, likufundisa ntoni wena?

¹⁶ Ukuze siyibone indlela uYehova asithuthuzela nasikhuthaza ngayo ngeLizwi lakhe, makhe sive ukuba kwenzeka ntoni kuNathan noPriscilla baseUnited States. Kwiminyaka embalwa edlulileyo, bagqiba ekubeni baye kuhlala kwindawo ekufuneka abavakalisi abaninzi boBukumkani kuyo. UNathan uthi: “Sasimthemba uYehova ukuba wayeza kusisikelela.” Kodwa ukufika kwabo kuloo ndawo baba neengxaki zempilo nezemali bengalindelanga. Bagqiba ekubeni babuyele ekhaya, kodwa iingxaki zemali zange ziphele. UNathan uthi: “Ndazibuza ukuba kutheni uThixo engasisikelelanga ngendlela ebesilindele ngayo. Ndaqalisa nokuzibuza ukuba ikhona na into engalunganga endiyenzileyo.” Kodwa ekuhambeni kwexesha uNathan noPriscilla baqonda ukuba uThixo akazange abalahle xa babemdinga. UNathan uthi: “Ngaloo maxesha ayenzima, iBhayibhile yaba ngathi ngumhlobo wethu olumkileyo, osithuthuzelayo nosikhokelayo. Ukujonga indlela uYehova awayesinceda ngayo sikwazi ukunyamezela iingxaki esasinazo kunokujonga ezo ngxaki, kwasinceda sanokholo lokumelana neengxaki esasiseza kuba nazo.”

17. Wathuthuzelwa njani uHelga? (Jonga nomfanekiso.)

¹⁷ UYehova uyasithuthuzela nangabazalwana noodadewethu. Njani? Khawuve indlela awamthuthuzela ngayo uHelga ohlala eHungary. Kangangeminyaka, wayeneengxaki ezazimenza azive enexhala futhi kungekho yakhe. Kodwa xa ecinga ngaloo minyaka, uyayibona indlela uYehova awayemthuthuzela ngayo esebenzisa abazalwana noodade. Uthi: “UYehova ebesoloko endinceda xa endibona ndiphelelwa ngamandla ngenxa yomsebenzi wam, ukuhoya umntwana wam ogulayo, nangenxa yezinye iingxaki. Kule minyaka iyi-30 idlulileyo, akukho nolunye usuku angazange ayenze ngalo into ayithembisileyo yokuba uza kundithuthuzela. Usoloko endomeleza ngezinto ezikhuthazayo ezithethwa ngabazalwana noodade. Badla ngokundithumelela imiyalezo ngefowuni, amakhadi, okanye bandincome xa kanye ndidinga loo nto.”

18. Sinokubathuthuzela njani abanye abantu?

¹⁸ Sinenyhweba yokulinganisa uThixo wethu ngokuthuthuzela abanye. Sinokuyenza njani loo nto? Sinokuba nomonde xa sibamamele, sibathuthuzele, sibenzele nezinto abazidingayo. (IMize. 3:27) Sizama ukuthuthuzela bonke abantu, nabo bangengomaNgqina. Xa abamelwane bethu besentlungwini, begula okanye benamaxhala, siyaya kubo, sibamamele, size sibakhuthaze ngeZibhalo. Xa silinganisa uYehova, ‘uThixo wayo yonke intuthuzelo,’ sisenokuba asincedi nje abazalwana noodade banyamezele iingxaki, kodwa sinceda nabantu abangamkhonziyo bafune ukufunda ngaye.​—Mat. 5:16.

UYEHOVA UZA KUHLALA ENATHI

19. Ziintoni uYehova asenzela zona? Sinokumlinganisa njani?

¹⁹ UYehova ubakhathalele kakhulu bonke abantu abamthandayo. Akasilahli xa sineengxaki. Njengokuba umzali emkhathalela umntwana wakhe amthandayo, noYehova uyabakhathalela abakhonzi bakhe abathembekileyo. Uyasikhokela, usinika izinto esizidingayo, uyasikhusela aze asithuthuzele. Xa sinceda abantu size sibakhuthaze xa beneengxaki, silinganisa uTata wethu osezulwini osithandayo. Ngoxa kusenokuba nzima futhi sibe buhlungu, sinokuqiniseka ukuba uYehova ukunye nathi. Kaloku usithembisile esithi: “Sukoyika, kuba ndinawe.” (Isa. 41:10) Le nto isenza siqiniseke nyhani ukuba asikho sodwa.