Ungalibali Ukuthandazela Abanye

1. Sazi njani ukuba imithandazo yethu ibalulekile kuYehova?

UMTHANDAZO sisipho esimangalisayo. Khawuyicinge le nto: Eminye imisebenzi uYehova uyinike iingelosi. (INdu. 91:11) Kanti noNyana wakhe umnike imisebenzi ebalulekileyo. (Mat. 28:18) Kodwa wona owokumamela imithandazo uwunike bani? Lowo ngowakhe yedwa. NguYehova ngokwakhe ‘omamela imithandazo’ yethu.​—INdu. 65:2.

2. Yintoni esinokuyifunda kwimithandazo kaPawulos?

² Sinokumxelela ngokukhululekileyo uYehova ngezinto ezibalulekileyo kuthi, kodwa sifanele sibathandazele nabanye. Yiloo nto awayenzayo umpostile uPawulos. Ngokomzekelo, wabhalela ibandla lamaKristu ase-Efese esithi: “Ndihlala ndinibeka kwimithandazo yam.” (Efe. 1:16) UPawulos wayengapheleli nje ekuthandazeleni ibandla xa lilonke, kodwa wayemthandazela nomKristu nje omnye. Ngokomzekelo, wathi kuTimoti: “Ndiyambulela uThixo, . . . kuba ndingazange ndiyeke ukukukhumbula kwizikhungo zam ubusuku nemini.” (2 Tim. 1:​3, INguqulelo Yehlabathi Elitsha YeZibhalo Ezingcwele ka-1999) UPawulos wayenazo iingxaki zakhe ekwakufuneka azithandazele. (2 Kor. 11:23; 12:​7, 8) Sekunjalo, wazipha ixesha lokuthandazela abanye.

3. Yintoni enokusenza silibale ukubathandazela abanye?

³ Ngamanye amaxesha sisenokulibala ukubathandazela abanye. Yintoni enokusenza silibale? Udade onguSabrinaa uyicacisa kanje le nto: “Ubomi kweli hlabathi busenza sixakeke. Sisenokukhathazwa zezethu iingxaki de silibale ukubathandazela abanye.” Ngaba kukhe kube njalo nakuwe? Ukuba uthi ewe, eli nqaku lingakunceda. Liza kukubonisa ukuba (1) kutheni kubalulekile ukuthandazela abanye abantu lize (2) likucebise ngendlela onokuyenza ngayo le nto.

KUTHENI SIBATHANDAZELA ABANYE?

4-5. Imithandazo yethu ‘ingabanceda’ njani abanye? (Yakobi 5:16)

⁴ Imithandazo eyenzelwa abanye ‘inamandla, ibe ingabanceda nyhani abantu.’ (Funda uYakobi 5:16.) Ngaba ukuthandazela abanye kungayitshintsha imeko abakuyo? Ewe, kungayitshintsha. Esazi ukuba umpostile uPetros wayeza kumphika, uYesu wathi: “Ndiye ndamcenga uThixo ukuba akuncede ungaphelelwa lukholo.” (Luka 22:32) UPawulos wayesazi ukuba umthandazo ungawenza umahluko. Xa wavalelwa etrongweni eRoma ngokungekho semthethweni, wabhalela uFilemon wathi: “Ndinethemba lokuba ngenxa yemithandazo yenu ndiza kukhululwa ndibuyele kuni.” (Filem. 22; jonga nenkcazelo yendawo ethi “Ndinethemba lokuba ngenxa yemithandazo yenu.”) Kwenzeka kanye loo nto. UPawulos wakhululwa etrongweni waza wabuyela kumsebenzi wakhe wokushumayela.

⁵ Kodwa le nto ayithethi kuthi sinokumnyanzela uYehova ukuba enze loo nto siyithandazelayo. Uyalibona ixhala ababa nalo abakhonzi bakhe, aze ngamanye amaxesha azenze izinto abazicelayo. Ukwazi le nto kungasinceda sithandaze sinyanisekile kuYehova ngemeko yethu, size siyiyekele kuye.​—INdu. 37:5; jonga ama-2 Korinte 1:11.

6. Ukuthandazela abanye kusenza sizive njani ngabo? (1 Petros 3:8)

⁶ Ukuthandazela abanye kusinceda ‘sibe nenceba.’ (Funda u-1 Petros 3:8.) Ukuba nenceba kuthetha ukumqaphela umntu xa enengxaki uze ufune ukumnceda. (Marko 1:​40, 41) Umdala onguMichael uthi: “Xa ndithandazela abanye ngezinto abazidingayo, ndiya ndiziqonda iingxaki abanazo, ize loo nto indenze ndibathande kakhulu. Ndiziva ndisondele kakhulu kubo, nangona bona besenokungayazi loo nto.” Umdala onguRichard uchaza enye indlela okunceda ngayo ukuthandazela abanye. Uthi: “Xa sithandazela omnye umntu, siye sibe nomdla wokumnceda.” Uphinda athi: “Xa sinceda umntu ebesimthandazela, sincedisa kwimpendulo yaloo mthandazo.”

7. Ukuthandazela abanye kusinceda njani singacingi ngeengxaki esinazo kuphela? (Filipi 2:​3, 4) (Jonga nemifanekiso.)

⁷ Ukuthandazela abanye kusenza singacingi ukuba sithi sodwa abaneengxaki. (Funda amaFilipi 2:​3, 4.) Ngamnye kuthi ulwisana neengxaki ezenziwa kukuba siphila kwihlabathi elilawulwa nguMtyholi. (1 Yoh. 5:19; ISityhi. 12:12) Xa sihlala sibathandazela abanye, sitsho sikhumbule ukuba ‘behlelwa bubunzima obufanayo bonke abazalwana bethu emhlabeni wonke.’ (1 Pet. 5:9) UKatherine onguvulindlela uthi: “Ukuthandazela abanye kundenza ndingalibali ukuba nabo baneengxaki. Loo nto indenza ndingacingi ngeengxaki zam kuphela.”

BAYAYIDINGA IMITHANDAZO YETHU

8. Ngoobani abanye esinokubathandazela?

⁸ Ngoobani esinokubathandazela? Sinokuthandazela amaqela abantu. Ngokomzekelo, abo bakhathazwa yimpilo, abantwana abagezelwayo esikolweni nabo abantwana abafunda nabo babalingela ukuba benze izinto ezirongo, okanye abo baneengxaki ezenziwa kukwaluphala. AmaKristu amaninzi anyamezele ukuphathwa kakubi ziintsapho zawo, okanye ngabasemagunyeni ngenxa yokholo lwawo. (Mat. 10:​18, 36; IZe. 12:5) Abanye abazalwana noodade baye bashiya amakhaya abo ngenxa yezidubedube zepolitiki. Kanti abanye baphila nzima ngenxa yeentlekele zemvelo. Kusenokwenzeka ukuba zange sababona aba bazalwana noodade. Kodwa xa sibathandazela sibonisa ukuba senza into awasiyalela yona uYesu yokuba ‘sithandane.’​—Yoh. 13:34.

9. Kutheni sifanele sibathandazele abazalwana abakhokelayo kwintlangano kaYehova namakhosikazi abo?

⁹ Sinokuthandazela nabazalwana abakhokelayo kwintlangano kaYehova: Abazalwana abakwiQumrhu Elilawulayo nabo babancedisayo, abakwiiKomiti zamaSebe, abaveleli abakwiiofisi zamasebe, abaveleli beziphaluka, abadala bamabandla nezicaka zolungiselelo. Abaninzi kwaba bazalwana balwisana nezabo iingxaki. Sekunjalo basebenza nzima ukuze basincede. (2 Kor. 12:15) Ngokomzekelo, uMark ongumveleli wesiphaluka uthi: “Enye yezona ngxaki zam zinkulu kukuba kude nabazali bam abasele bebadala. Bobabini bakhathazwa yimpilo. Ngoxa behoywe ngudadewethu nomyeni wakhe, ndiba buhlungu xa ndicinga ukuba andinakukwazi ukubanceda ngendlela ebendingathanda ngayo.” Nokuba siyazazi okanye asizazi iingxaki zaba bazalwana basebenza nzima, senza kakuhle xa sihlala sibathandazela. (1 Tes. 5:​12, 13) Sinokuthandazela namakhosikazi abo kuba ayabanceda aba bazalwana bakwazi ukuqhubeka nomsebenzi wokukhathalela ibandla.

10-11. Ngaba uYehova uyavuya xa sithandazela nje bonke abazalwana noodade? Cacisa.

¹⁰ Njengoko sekutshiwo, sidla ngokuthandazela amaqela abazalwana noodade. Ngokomzekelo, sisenokuthandaza kuYehova simcela ukuba ancede abo bavalelwe ezitrongweni okanye athuthuzele abo baswelekelweyo, singenamntu sicinga ngaye engqondweni. Omnye umdala onguDonald uthi, “Baninzi abazalwana noodade abaneengxaki, kangangokuba ngamanye amaxesha siye sicele uYehova ukuba ancede nje bonke abazalwana abaneengxaki.”

¹¹ Ngaba imithandazo enjalo iyamvuyisa uYehova? Ewe! Kaloku, ngoxa sizazi ezinye izinto ezidingwa ngabazalwana noodadewethu, asizazi ezabanye. Ngoko kufanelekile ukubacelela nje xa bebonke. (Yoh. 17:20; Efe. 6:18) Le mithandazo ibonisa ukuba ‘sibathanda bonke abazalwana.’​—1 Pet. 2:17.

XA SITHANDAZELA UMNTU NJE OMNYE

12. Ukuqaphela kunokusinceda njani sikwazi ukuthandazela ingxaki yomntu ngamnye?

¹² Qaphela. Ngaphandle kokuthandazela iqela labazalwana noodade, sifanele sithandazele umzalwana okanye udade ngamnye, simbize ngegama. Ngaba ebandleni lakho kukho umntu onesigulo esinganyangekiyo? Ngaba kukho umntu osemtsha otyhafileyo, mhlawumbi ngenxa yezinto ezirongo abafuna azenze abantwana afunda nabo? Ngaba kukho umzali oyedwa ozama ngamandla akhe onke ukukhulisa umntwana ‘ngokumqeqesha nokumfundisa ngendlela kaYehova’? (Efe. 6:4) Xa uqaphela, uza kubavela kakhulu abanye, ize loo nto ikwenze ukufune nyhani ukubathandazela.b​—Roma 12:15.

13. Yintoni esinokuyenza ukuze sikwazi ukuthandazela abo singazange sadibana nabo?

¹³ Mbize ngegama loo mntu umthandazelayo. Singayenza loo nto nakwabo singazange sadibana nabo. Ngokomzekelo, khawucinge ngabazalwana noodade abavalelwe kumazwe anjengeCrimea, iEritrea, iRashiya neSingapore. Ungawafumana kujw.org/xh amagama abo bazalwana noodade bavalelweyo.c UBrian ongumveleli wesiphaluka uthi: “Ndifumanise ukuba ukulibhala phantsi igama lomzalwana okanye udade obanjiweyo, kundinceda ndimkhumbule ndize ndithethe ngaye kwimithandazo yam.”

14-15. Sinokwenza ntoni ukuze sazi ezinye izinto esinokuzithandazela?

¹⁴ Mxelele uYehova ezona zinto ubacelela zona. UMichael ekuthethwe ngaye kwisiqendu 6 uthi: “Xa ndifunda amanqaku akujw.org/xh athetha ngabazalwana noodade abavalelwe etrongweni, ndiye ndizame ukuzifaka ezihlangwini zabo. Ndiyazi ukuba bendiza kuba nexhala ngenkosikazi yam, ndize ndifune ukuqiniseka ukuba inayo yonke into eyidingayo. Loo nto indenza ndicinge ngeyona nto ndinokubacelela yona kuYehova abazalwana abatshatileyo abasejele.”​—Heb. 13:​3, umbhalo osemazantsi.

¹⁵ Xa sizama ukuba nombono wendlela abaphila ngayo suku ngalunye abazalwana abasejele, sinokucinga nangezinye izinto esinokuzithandazela. Ngokomzekelo, sinokuthandazela ukuba oonogada babe nobubele kubo, nokuba bavunyelwe ukuba bakhonze uYehova ngoxa besetrongweni. (1 Tim. 2:​1, 2) Sinokuthandazela nokuba ibandla likhuthazwe kukubona indlela abathembeke ngayo, okanye abo bangakholwayo babone indlela abaziphethe ngayo, baze bawumamele umyalezo esibaxelela wona. (1 Pet. 2:12) Kwale migaqo iza kusinceda naxa sithandazela abazalwana noodade abanyamezele ukuphathwa kakubi ngezinye iindlela. Xa siqaphela, sibabize ngamagama abantu esibathandazelayo, size sibe nezinto esibacelela zona kuYehova, sibonisa ukuba ‘sithandana kakhulu.’​—1 Tes. 3:12.

MASIYIJONGE NGENDLELA EFANELEKILEYO IMITHANDAZO YETHU

16. Sinokuyijonga njani ngendlela efanelekileyo imithandazo yethu? (Mateyu 6:8)

¹⁶ Njengoko sesivile, imithandazo yethu isenokuyitshintsha imeko yomntu. Sekunjalo, simele siyijonge ngendlela efanelekileyo. Xa sithandaza, asimxeleli into angayaziyo uYehova; asimcebisi nokuba enze ntoni ngaloo nto siyithandazelayo. UYehova uyazi ngaphambi kokuba bayazi into abayidingayo abakhonzi bakhe, uyazi singekayazi nathi. (Funda uMateyu 6:8.) Xa kunjalo ke, kutheni sifanele sithandazele abanye abantu? Ngaphandle kwezizathu esele zichaziwe kweli nqaku, ukubathandazela yindlela esibonisa ngayo ukuba sibakhathalele. Uthando lusenza sibathandazele. NoYehova uyavuya xa ebona abakhonzi bakhe benothando njengaye.

17-18. Ukuthandazela kwethu abazalwana noodade sinokukuzekelisa njani?

¹⁷ Nokuba izinto azenzekanga ngendlela esithandaze ngayo, imithandazo yethu ibonisa ukuba siyabathanda abazalwana noodade, noYehova uyayibona loo nto. Nanku umzekelo: Cinga ngentsapho enabantwana ababini, inkwenkwe nentombazana. Inkwenkwe isebhedini iyagula. Intombazana icenga utata wayo isithi: “Tata ndicela umncede ubhuti, ugula nyhani!” Utata akamyekanga nje unyana wakhe, ikhona into ayenzayo kuba uyamthanda futhi umkhathalele. Sekunjalo, umele ukuba uvuya nyhani xa ebona intombazana yakhe imkhathalele kangaka ubhuti wayo, de imcenge ukuba amncede.

¹⁸ UYehova usikhuthaza ukuba senze loo nto nathi, sikhathalelane, size sithandazelane. Xa siyenza le nto sibonisa ukuba asicingeli iziqu zethu nje kuphela, siyabacingela nabanye, futhi uYehova uyayibona loo nto. (2 Tes. 1:3; Heb. 6:10) Enye into, njengokuba sekutshiwo, imithandazo yethu inokwenza iimeko zaloo mntu simthandazelayo zitshintshe. Ngoko, ngandlela zonke masingalibali ukuthandazelana.