Ninokuwulungiselela Njani Umtshato Oza Kuzukisa UYehova?

1-2. UYehova ufuna kube njani ngosuku lwenu lomtshato?

NGABA nithembisene ngomtshato? Ukuba kunjalo, sivuyisana nani! Inoba nixakekile ngoku nilungiselela wona. UYehova ufuna nilonwabele usuku lwenu lomtshato,a nihlale nonwabile nasemva kwalo.​—IMize. 5:18; INgoma 3:11.

² Kubaluleke kakhulu ukuba usuku lwenu lomtshato lumzukise uYehova. Kutheni sisitsho? Ninokuqiniseka njani ukuba luyamzukisa? Abona bantu lithetha ngabo eli nqaku, ngabantu abalungiselela ukutshata. Sekunjalo, imigaqo ekuthethwa ngayo inokusinceda sonke sizukise uYehova xa sicelwe ukuba sicebise kumalungiselelo omtshato okanye xa sisemtshatweni.

KUTHENI NIMELE NIZUKISE UYEHOVA?

3. Yintoni abafanele bacinge ngayo abantu abalungiselela umtshato? Kutheni?

³ Xa amaKristu elungiselela ukutshata, amele alandele imigaqo kaYehova ekwiLizwi lakhe. Kutheni? Kaloku umtshato wenziwa nguye. Abantu bokuqala, uAdam noEva batshatiswa nguye. (Gen. 1:28; 2:24) Ngoko abantu abalungiselela ukutshata bamele bacinge ngezinto eziza kubenza baqiniseke ukuba umtshato wabo uza kuzukisa uYehova.

4. Sesiphi isizathu esimele senze abantu abaza kutshata bafune ukuzukisa uYehova ngosuku lwabo lomtshato?

⁴ UYehova nguTata wenu osezulwini nomhlobo wenu enimthandayo. Eso sisizathu esivakalayo sokuzibuza ukuba izinto enifuna zenzeke ngosuku lwenu lomtshato ziza kumenza azive njani. (Heb. 12:9) Ngokuqinisekileyo nifuna ahlale enguTata noMhlobo wenu. Ngoko anizukufuna kwenzeke nantoni na ngolo suku okanye nangaluphi na olunye usuku eza kukhathaza uMhlobo wenu. (INdu. 25:14) Xa nicinga ngezinto anenzele zona naseza kunenzela zona, ngokuqinisekileyo niza kufuna umtshato wenu umzukise.​—INdu. 116:12.

NINOKUMZUKISA NJANI UYEHOVA?

5. IBhayibhile inokuwanceda njani amaKristu xa elungiselela umtshato?

⁵ IBhayibhile ayinayo imithetho yezinto emazenziwe nemazingenziwa xa kutshata amaKristu. Anokutshata ngokweemeko zawo, ngendlela ekwenziwa ngayo ekuhlaleni okanye ngendlela afuna ngayo. AmaKristu okwenene ayayihlonipha nemithetho karhulumente ngomtshato. (Mat. 22:21) Sekunjalo, umtshato olungiselelwe kucingwa ngemigaqo yeBhayibhile uza kuzukisa uYehova, umenze avuye. Ngoko, yeyiphi imigaqo enimele nicinge ngayo?

6. Kutheni kubalulekile ukuba abantu abaza kutshata bathobele imithetho karhulumente ngomtshato?

⁶ Thobelani imithetho karhulumente. (Roma 13:​1, 2) Kumazwe amaninzi, kukho imithetho yezinto abantu abamele bazenze ngaphambi kokuba batshate. Abantu abaza kutshata bamele bayazi eyelizwe labo. Ukuba anazi ukuba ningayifumana njani loo mithetho, celani abadala banincede.b

7. Umele ube njani umtshato wenu?

⁷ Qinisekani ukuba umtshato wenu uzukisa uYehova. (1 Kor. 10:​31, 32) Zamani ukuba emtshatweni wenu kwenzeke izinto ezibonisa iimpawu zesiqhamo somoya kaThixo kunezomoya wehlabathi. (Gal. 5:​19-26) Ekubeni iBhayibhile isithi umyeni uza kuba yintloko yentsapho, nguye omele aqiniseke ukuba emtshatweni kumnandi futhi kuzukiswa uYehova. Yintoni enokunceda kube njalo? Yintetho yomtshato enikelwa ngothando, ngobubele nangendlela ezukisa uYehova, eyenza abantu balixabise ilungiselelo likaThixo lomtshato. Inokunceda bonke abantu abamenyiweyo babone indlela elibaluleke ngayo eli theko. Ngenxa yaloo nto, amaKristu amaninzi aye akhethe ukutshatela kwiHolo YoBukumkani, ukuba kunokwenzeka. Ukuba nifuna ukuyisebenzisa, nifanele niyicele kubadala ngokubabhalela ileta kusengethuba.

8. Ukuba kuza kubakho ireception, ziintoni eninokuzenza ukuze niqiniseke ukuba izukisa uYehova? (Roma 13:13)

⁸ Funda amaRoma 13:13. Ukuba kuza kubakho ireception, ninokwenza ntoni ukuze ingabonisi umoya wehlabathi? Igama lesiGrike eliguqulelwe ngokuthi “iipati ezingalawulekiyo” lithetha ngamatheko apho abantu basela kakhulu, badlale nomculo de kube sebusuku kakhulu. Ukuba nigqiba ekubeni bube khona utywala, cingani ngento eninokuyenza ukuze niqiniseke ukuba akuselwa kakhulu.c Ukuba kukho umculo, mawungangxoli de abantu bangakwazi ukuncokola. Wukhetheni kakuhle oza kudlalwa, nimamele namazwi awo, ukuze kungabikho mntu ukhubekayo.

9. Yintoni abamele bayikhumbule abantu abaza kutshata ngezinto eziza kuthethwa okanye eziza konwabisa abantu kwireception?

⁹ Kwezinye iindawo, kwireception abahlobo nabantu bakulomyeni nomtshakazi basenokufuna ukuthetha ngabatshati. Kanti kweminye imitshato, kuye kudlalwe iividiyo, kuboniswe neefoto zomtshakazi nomyeni okanye abantu bonwatyiswe nangezinye iindlela. Ezi zinto zinokwenza olu suku lungalibaleki ebantwini. Sekunjalo, qinisekani ukuba nantoni na eyenziwayo yenziwa ngesidima. (Fil. 4:8) Zibuze: ‘Ngaba iza kubonisa ukuba siyabahlonipha abantu? Ngaba iza kwenza abantu balihloniphe ilungiselelo likaThixo lomtshato?’ Owona mbuzo ubalulekileyo omele uzibuze wona ngulo: ‘Ngaba iza kumzukisa uYehova?’ Ngoxa kusenokungabikho ngxaki xa kukho umntu othetha izinto ezihlekisayo, ufanele angathethi nantoni na engafanelekanga nenokwenza abantu bacinge ngesondo. (Efe. 5:3) Ukuba kukho abantu bakowenu nabahlobo abaza kuthetha ngani, qinisekani ukuba bayaziqonda izinto eningafuni bazithethe.

10. Kutheni abantu abalungiselela ukutshata kufuneka bazame ukuba kungabikho into iza kubatsalela amehlo emtshatweni wabo? (1 Yohane 2:​15-17)

¹⁰ Sanukwenza izinto eziza kunitsalela amehlo. (Funda u-1 Yohane 2:​15-17.) UYehova uyavuya xa abantu bakhe bezama ukuzukisa yena kunokutsalela amehlo kubo. Ngoko xa elungiselela umtshato, amaKristu athobekileyo aza kukulumkela ukusebenzisa imali eninzi kakhulu “nokuqhayisa.” Kuza kuninceda njani ukungenzi umtshato omkhulu? Mhlawumbi kuza kuninceda ngendlela okwamnceda ngayo omnye umzalwana waseNorway, uMike. Uthi: “Zange sibe namatyala, ngoko sakwazi ukuqhubeka singoovulindlela. Umtshato wethu wawungekho mkhulu, kodwa wawumhle, futhi usakhumbuleka nangoku.” Yena udade waseIndia, uTabitha, uthi: “Zange sibe nestres kakhulu. Ngenxa yokuba umtshato wethu wawumncinci, zange kufuneke silungiselele izinto ezininzi, nezinto esasingavumelani ngazo zazimbalwa.”

11. Yintoni enokwenziwa ngumyeni nomtshakazi ukuze indlela abanxibe ngayo ingabatsaleli amehlo? (Jonga nemifanekiso.)

¹¹ Seniyicingile into eniza kuyinxiba? Siqinisekile ukuba nifuna ukuba bahle. Nangamaxesha okubhalwa kweBhayibhile, umyeni nomtshakazi babeqiniseka ukuba bazilungise kakuhle. (Isa. 61:10) Ewe kona, izinto enizinxiba emtshatweni wenu zisenokwahluka kwenizinxiba kwamanye amatheko, kodwa zimele zibe nesidima. (1 Tim. 2:9) Lumkelani ukuba indlela eniza kunxiba neniza kuzilungisa ngayo ibe yeyona nto ibalulekileyo emtshatweni wenu.​—1 Pet. 3:​3, 4.

12. Kutheni abantu abaza kutshata kufuneka baqiniseke ukuba emtshatweni wabo akwenziwa nantoni na eqhele ukwenziwa ekuhlaleni engavumelaniyo neZibhalo?

¹² Ningazenzi izinto eziphikisana neZibhalo eziqhele ukwenziwa ekuhlaleni. (ISityhi. 18:4) Eli hlabathi likaSathana liye langcolisa amatheko omtshato ngokuwadibanisa neecawa zobuxoki, iidemon neenkolelo. UYehova usixelela ngokucacileyo ukuba singazidibanisi tu nezinto ezingcole ngolo hlobo. (2 Kor. 6:​14-17) Ukuba kwindawo enihlala kuyo kuqhele ukwenziwa izinto eningaziqondiyo xa kutshatwa, zamani ukuqonda imvelaphi yazo nemigaqo yeBhayibhile enokuninceda nenze isigqibo esifanelekileyo.

13. Xa becinga ngezinto abaza kuziphiwa, abantu abaza kutshata banokumlinganisa njani uYehova?

¹³ Ngaba kuqhelekile kwindawo enihlala kuyo ukuba abantu banike abatshati izipho? Abanye banokubapha ngokweepokotho zabo. Kaloku amaKristu akhuthazwa ukuba aphe, futhi iyawavuyisa loo nto. (IMize. 11:25; IZe. 20:35) Sekunjalo, asinokuthanda ukuba abantu bazive benyanzelekile ukuba basinike izipho, okanye bacinge ukuba isipho esincinci asizukusixabisa. Silinganisa uYehova, ngokuzama ukujonga izipho ngendlela azijonga ngayo ngokuvumela abantu baphe ngokweepokotho zabo nangokusuka entliziyweni.​—2 Kor. 9:7.

UKUPHEPHA IINGXAKI NOKUMELANA NAZO

14. Zeziphi iingxaki ababa nazo abanye abantu abaza kutshata?

¹⁴ Xa nilungiselela umtshato oza kuzukisa uYehova, nisenokuba neengxaki. Ngokomzekelo, kusenokuba nzima ukulungiselela umtshato nje omncinci. UCharlie, wakwiiSolomon Islands uthi: “Kwakunzima kakhulu ukukhetha abantu esiza kubamema kwireception. Sinabahlobo abaninzi, futhi apho sihlala khona wonke umntu ulindele ukumenywa.” Yena uTabitha, ekukhe kwathethwa ngaye uthi: “Apho ndihlala khona kubakho abantu abaninzi kwireception. Kwabathatha ixesha abazali bethu ukwamkela isigqibo sethu sokumema nje abantu abamalunga nabayi-100.” USarah waseIndia uthi: “Abantu abaninzi bazikhathaza kakhulu ngokuba baza kuthini abantu. Abazala bam babenemitshato emikhulu, ngoko ndandicinga ukuba kunyanzelekile ndibe nomtshato omkhulu kuneyabo.” Yintoni enokuninceda nimelane nezi ngxaki nezinye?

15. Kutheni kubalulekile ukuthandaza qho niza kulungiselela umtshato?

¹⁵ Thandazani qho xa nilungiselela umtshato. Ninokuxelela uYehova ngayo nayiphi na ingxaki eninayo nendlela eniziva ngayo. (Fil. 4:​6, 7) Ninokumcela anincede nenze izigqibo ezifanelekileyo, nihlale nizolile xa niziva ninexhala futhi nibe nesibindi xa kufuneka nibe naso. (1 Pet. 5:7) Xa nibona uYehova ephendula imithandazo yenu, niza kuya nimthemba kakhulu. UTabitha, ekukhe kwathethwa ngaye uthi: “Mna nesithandwa sam sasinexhala lokuba zisenokuba khona izinto esingazukuvumelana ngazo, nesisenokungavumelani ngazo nabantu basekhaya. Ngoko ngalo lonke ixesha siza kulungiselela umtshato, sasiqala ngokuthandaza. Sayibona indlela uYehova asinceda ngayo, saza sasebenzisana ngoxolo thina nabantu basekhaya.”

16-17. Ukuncokola kakuhle kunokunceda njani xa nilungiselela umtshato?

¹⁶ Yibani nobubele xa nincokola kunye naxa nincokola nabantu bakowenu ngezinto enifuna ukuzenza. (IMize. 15:22) Zininzi izigqibo ekuza kufuneka nizenze ngomtshato wenu. Ezinye zazo lusuku lomtshato, imali eniza kuyisebenzisa nabantu eniza kubamema. Ngaphambi kokuba nenze isigqibo ngayo nantoni na, ncokolani ngeyona ndlela ifanelekileyo eninokuyenza ngayo, ngemigaqo yeBhayibhile enokuninceda nangamacebiso eniwafumana kumaKristu aqolileyo. Xa nincokola kunye ngezinto ngamnye wenu anokuthanda zenziwe, yibani nobubele, ingqiqo, nize nibe bhetyebhetye. Nimele nibe njalo ke naxa nincokola nabantu bakowenu. Ukuba abantu bakowenu, njengabazali benu, bacela nenze into ebonakala ifanelekile emtshatweni wenu, zamani ukuyenza loo nto bayicelayo. Kaloku olu suku lubalulekile nakubo. Ukuba anizukwazi ukuyenza, bacaciseleni isizathu, nithethe ngembeko. (Kol. 4:6) Yenzeni icace kubo into yokuba eyona nto niyifunayo kukuba abantu bonwabe, kuzukiswe noYehova.

¹⁷ Ukucacisela abazali benu ngezinto enifuna ukuzenza kusenokuba nzima, ngokukodwa xa bengengomaNgqina, kodwa banokude bayibone le nto niyithethayo. Omnye umzalwana waseIndia, uSanthosh uthi: “Abantu basekhaya babefuna emtshatweni wethu kwenziwe izinto zenkolo yamaHindu. Kwathatha ixesha ukuba mna nesithandwa sam sibacacisele ngezigqibo esiye sazenza. Sazivuma ezinye izinto ababefuna sizenze, esasibona ukuba azizukumkhathaza uYehova. Ngokomzekelo, sakutshintsha ukutya esasifuna kutyiwe ereception, kwatyiwa okwakuthandwa ngabo. Sagqiba nasekubeni kungaculwa okanye kudaniswe, kuba babengaqhelananga nezo zinto.”

18. Yintoni enokuninceda niqiniseke ukuba yonke into yenzeka kakuhle ngosuku lomtshato? (1 Korinte 14:40) (Jonga nomfanekiso.)

¹⁸ Lungiselelani kakuhle. Xa nilungiselele kakuhle, zimbalwa izinto eziza kunenza nibe nestres ngosuku lomtshato. (Funda ama-1 Korinte 14:40.) UWayne, waseTaiwan uthi: “Kwiintsuku ezimbalwa ngaphambi kokuba sitshate, saba nentlanganiso nabo babeza kuncedisa emtshatweni. Sathetha ngezinto ezaziza kwenziwa, ezinye saziprekthiza ukuze siqiniseke ukuba izinto ziza kuhamba kakuhle.” Ubonisa ukuba uyabahlonipha abantu abeze emtshatweni wakho ngokulibamba ixesha.

19. Yintoni eninokuyenza ukuze niqiniseke ukuba yonke into eyenziwa ereception izukisa uYehova?

¹⁹ Zininzi iingxaki eninokuziphepha xa nicinga ngezinto ezisenokwenzeka. (IMize. 22:3) Ngokomzekelo, ukuba kwindawo enihlala kuyo iqhelekile into yokuba abantu beze ereception bengamenywanga, cingani ngento eninokuyenza ukuze ingenzeki loo nto. Qinisekani ukuba bonke abantu enizalana nabo abangengomaNgqina bayayazi into abanokuyilindela, nize nibacacisele ngendlela enizijonga ngayo ezinye izinto ezenziwa emitshatweni. Ninokude nibabonise inqaku elithi “Kwenzeka Ntoni Kumtshato WamaNgqina KaYehova?” elikujw.org/xh. Ukuze niqiniseke ukuba zonke izinto zenzeka ngendlela enifuna ngayo emtshatweni wenu, ninokucela umzalwana oqolileyo ukuba abe ‘ngumphathi wetheko.’ (Yoh. 2:8) Ukuba nimcacisela kakuhle ngezinto enifuna zenziwe, unokuqiniseka ukuba yonke into eyenzekayo izukisa uYehova, futhi yenzeka ngendlela ebenilungiselele ngayo.

20. Abantu abaza kutshata yintoni abamele bangayilibali ngetheko lomtshato wabo?

²⁰ Nisenokuba nestres xa nicinga ngawo onke amalungiselelo omtshato. Kodwa khumbulani ukuba itheko lomtshato yinto nje yosuku olunye. Lusenokuba sisiqalo sobomi benu obumnandi nikhonza kunye uYehova. Zamani ngamandla enu onke ukuba umtshato wenu ungabi mkhulu, futhi umzukise. Mthembeni uYehova. Xa nizenza izinto anicebisa zona, niza kukwazi ukulungiselela umtshato eniza kuthi xa nicinga ngawo nivuye, kungabikho nto nizisolayo ngayo.​—INdu. 37:​3, 4.