Iimbalasane Zonyaka Odluleyo

INTLANGANO kaYehova yasemhlabeni iye yaqhubeka isanda ebudeni bonyaka wenkonzo odluleyo. Intsikelelo kaThixo icaciswa sisibakala sokuba kumazwe angama-235, kukho amaNgqina kaYehova angaphezu kwezigidi ezithandathu abonisa ukuthembeka kwawo kuye kwanokholo lwawo kwisithembiso sakhe sokuzisa ihlabathi elitsha elinobulungisa. Ezi zigidi, azingobantu nje abazibanga bengabakhonzi bakaThixo, kodwa ngabo bavakalisa iindaba ezilungileyo zoBukumkani bukaThixo ngenkuthalo njengoko kwaxelwa kwangaphambili nguYesu kwaza kwabhalwa kuMateyu 24:14. Ngokuvisisana nomxholo wonyaka wama-2001, aqhubeka ‘emi ngokuqinileyo engahexi kuko konke ukuthanda kukaThixo.’—Kol. 4:12.

Zininzi izinto ezichulumancisayo eziye zenzeka kubantu bakaThixo kunyaka odluleyo. Ngoku makhe siqwalasele imbinana yezo zibe ziimbalasane.

Iindibano Zokufundisa Abafundisi Belizwi LikaThixo

Enye yezona mbalasane zonyaka zikhunjulwayo yaba yiNdibano YeSithili YamaNgqina KaYehova ‘Yabafundisi Belizwi LikaThixo’, eyaqhutywa kumakhulu eendawo ezisemhlabeni wonke ukususela phakathi kowama-2001 kuse ekuqaleni kowama-2002. Zizigidi zabantu ezazikho. Umxholo wendibano wacaciswa sisithethi kusuku lokuqala lwaloo ndibano yeentsuku ezintathu. Sathi: “UYesu wayengenamdla wokudlulisela ulwazi oluyintloko kuphela kwiqela elithile elikhethekileyo labafundi beZibhalo. Kunoko wathi kubafundi bakhe: ‘Oko ndinixelela kona ebumnyameni, kuthetheni ekukhanyeni; oko nikuva kusetyezwa, kushumayeleni phezu kwezindlu.’ UYesu wayenomnqweno omkhulu wokwabelana nabo bonke abantu ngolwazi lukaThixo. Wayefuna ukubona ulwazi lweZibhalo lusasazwa ngokubanzi, kungekhona ukuba lufihlwe.”

Ucwangciso lwendibano lwaluquka iintetho ezazinikel’ ingqalelo kwintsingiselo yesiprofeto seBhayibhile nakwindlela amaKristu afanele ayisebenzise ngayo imigaqo yeZibhalo kubomi bawo. NgeCawa kwakukho umdlalo onesinxibo samandulo owawunomxholo othi Lihlonele Igunya LikaYehova. Loo mdlalo wanikel’ ingqalelo kwingxelo yeBhayibhile ephathelele imvukelo kaKora entlango ngokwahlukileyo ekuthembekeni koonyana bakhe.

Zimbini iimpapasho ezakhululwa kuloo ndibano. Eyokuqala yaba yincwadi ethi Isiprofeto SikaIsaya—Ukhanyiselo Lwalo Lonke Uluntu, Umqulu Wesibini. Eyesibini yaba yincwadana enemifanekiso enomxholo othi A Satisfying Life—How to Attain It. Ukongezelela koko, kwakukho nephetshana elitsha elithi—Ngaba Unomphefumlo Ongafiyo?

Ebudeni benyanga ka-Agasti, kwaqhutywa iindibano ezikhethekileyo eFransi naseItali. EFransi, ezi ndibano zikhethekileyo zaqhutyelwa eParis, eLyons, naseBordeaux, incopho yabantu ababekho kuzo zonke ezo ndibano yayili-160 045. Ezi ndibano zabakhuthaza gqitha abazalwana baseFransi, ababezizinto nje zokugculelwa kumaphephandaba. Omnye umzalwana wathi: “Maxa wambi siye sizive ngathi sisedwa kulo mlo, kodwa emva kokuba sityelelwe ngamawaka abazalwana bethu abangamaKristu, siye sanikwa amandla okuba sityhalele phambili.”

EItali, kwaqhutywa iindibano ezikhethekileyo eRome, eMilan, eTurin, naseBari. Ezinye izixeko ezihlanu ezineendibano zanxityelelaniswa ngomnxeba kwiinxalenye ezithile zolo cwangciso. Isimbuku senani labo babekho kwezo ndibano zisithoba saba ngabantu abangama-289 133. Kuyo nganye yezi ndibano zaseFransi naseItali, kwadluliselwa isigqibo esichukumisayo kubaphulaphuli. Iindwendwe, ezazivela kumazwe ngamazwe, zavakalisa intsabelo yazo ngokutsho phandle zithi ewe! Esi sibhengezo salandelwa yintswahla yezandla.

Ukunikela Ubungqina Ehlabathini Lonke NgeKingdom News No. 36

Ngo-Oktobha nangoNovemba 2000, phantse ibe sisiqingatha sewaka lezigidi imibhalo yeKingdom News No. 36 eyasasazwa ehlabathini lonke ngeelwimi ezili-189. Isigidimi seZibhalo ngokuphathelele uLawulo LukaYesu Kristu Lwewaka Leminyaka kunye nemifanekiso emihle, zabangela ukuba abantu abaninzi batsaleleke kwiKingdom News. Ukuba ungomnye wamaNgqina kaYehova, usenokuba waba nesabelo kolo sasazo. Ezi zezinye zeengxelo eziphathelele elo phulo ezivela kwiindawo ezahlukeneyo zehlabathi.

Phezu kwayo ingqele eqhaqhazelis’ amazinyo yaseAlaska, amaNgqina alapho akazange ayeke ukunikela ubungqina. Umveleli owongamelayo kwiBandla laseNorth Pole wathi: “Nangona kusebusika, abanye abaninimzi bebesima kwiiyadi zabo baze bafunde iKingdom News No. 36. Isigidimi esilula esibonisa indlela ezahluke ngayo izinto namhlanje kwiintsikelelo eziza kufunyanwa luluntu sibangel’ umdla.”

EAlbania amabandla ali-15 akwizixeko ezikhulu ezimbalwa acelwa ukuba atyelele iidolophana ezisemaphandleni. Abazalwana noodade basamkela ngolangazelelo novuyo olukhulu eso simemo. Kwafikelelwa okokuqala kwiidolophana ezingama-56 ezinabemi abalinganiselwa kuma-50 000.

Isebe laseAngola linikela le ngxelo: “Ngenxa yenzondelelo nehlombe labavakalisi, iphulo leKingdom News No. 36 kwintsimi yethu laba yimpumelelo gqitha. Oku kwenzeka phezu kwazo nje iimeko ezinzima zoqoqosho nemfazwe eziqhubeka zichaphazela amabandla akulo lonke eli lizwe. Xa kwakusasazwa iKingdom News, abantu abaninzi bayamkela ngolangazelelo. Ngenxa yoko, ngoNovemba, eAngola kwabakho incopho entsha yezifundo zeBhayibhile zasekhaya ezingama-94 026, ulwando lwezifundo eziphantse zibe li-10 000 ngaphezu kwezo zenyanga engaphambi kwaleyo.”

ECameroon, ngoxa lalisiya kwenye idolophana, iqela lamaNgqina lawisa ngempazamo ipakethe eneKingdom News No. 36. Enye indoda eyayiwabonile amaNgqina xa esasaza iKingdom News yayisiya kwifama yayo xa yabona loo pakethe ecaleni kwendlela. Yayichola yaza nayo yaqalisa ukusasaza loo Kingdom News No. 36! Ekugqibeleni, yayisasaza yonke ngaphandle kwemibhalo nje emine. Xa abaninimzi bacela leyo mine, yala yaza yathi: “Andinakusebenzela ilize; Ezi ndiza kuzishiyela intsapho yam. Xa amaNgqina efika, aza kuninika eyenu imibhalo.”

EKholombiya, amaNgqina abuyela kwelinye ibhinqa elamkela umbhalo weKingdom News No. 36. Eli bhinqa lathi lalisoloko lingavumi ukuthetha namaNgqina kaYehova. Noko ke, emva kokufunda iKingdom News No. 36, laqonda ukuba beliphoswa yinto ethile elungileyo. Emva koko laguqa licela uThixo ukuba alixolele. Emva koko, laqhagamshelana namaNgqina, ibe ngoku lifunda iBhayibhile.

Kwenye idolophana eCongo (Kinshasa), ipolisa elalinxibe iyunifom lafunda iKingdom News No. 36 ngowona mdla mkhulu. Emva kwethuba elithile labona amaNgqina laza lawaxelela ukuba isigidimi sawo sinamandla yaye siyathuthuzela. Emva koko lathi pheselele umzuzwana laza labuya linxibe impahla eqhelekileyo liphethe neBhayibhile. Lathi: “Ndifuna ukunincedisa ekusasazeni esi sigidimi kuba sibalulekile yaye singxamisekile!” Ngobubele amaNgqina acacisa ukuba lifanele lifunde iBhayibhile kuqala. Loo ndoda yakwamkela oko, yaye isifundo sayo siqhubeka kakuhle.

Elinye ibhinqa eliselula elinguJoy lafumana umbhalo weKingdom News No. 36 ngaphantsi kocango kwikhaya lalo eGrisi. Emva kokulifunda, kwangoko latsalela umnxeba uninakazi ongomnye wamaNgqina kaYehova. Lamxelela ukuba eso sigidimi siye salichukumisa yaye lifuna ukubonana namaNgqina kaYehova. Uninakazi waqhagamshelana nomnye udade okhonza njengovulindlela okhethekileyo kuloo mmandla, ibe loo vulindlela waya kudibana nelo bhinqa liselula. Okwabothusayo kukuba, kwathi kanti bayazana. UJoy waxelela loo vulindlela ukuba nakuba wayenayo iBhayibhile, wayengakwazi ukufumana iZibhalo eziphathelele ezo ngxaki wayenazo. Kwangoko wavuma ukuqhutyelwa isifundo seBhayibhile sasekhaya.

Elinye iNgqina laseKorea lahambisa iKingdom News No. 36 kwelinye ibhinqa elalichasa unyana walo kuba eliNgqina likaYehova. Kwiintsuku ezintathu kamva elo Ngqina laphinda lalityelela laza lacacisa oko kuthethwa yiBhayibhile ngeParadesi. Elo bhinqa lasabela kakuhle, ibe kwaqaliswa isifundo seBhayibhile. Entywizisa iinyembezi, unyana walo wathi: “Andiyikholelwa into yokuba umama uqalise ukufunda iBhayibhile.” Lenza inkqubela entle.

Kumbindi waseLiberia, amanye amaNgqina ayehamba ngeenyawo kwiidolophana ngeedolophana esasaza iKingdom News xa alahlekwa yindlela azifumana sele ekwifama ekwanti phakathi ematyholweni. Xa loo maNgqina axelela abo bantu basefama ukuba alahlekile, omnye umfana wathi: “Ngumoya kaThixo onikhokelele kule ndlela ukuze nathi sifumane eyethu imibhalo.”

ENetherlands, abantu bayamkela ngolangazelelo iKingdom News No. 36. Ngokukhawuleza kwasasazwa imibhalo engaphezu kwezigidi ezibini. Isebe laseSelters, eJamani, lashicilela imibhalo engakumbi eli-100 000, ukanti amabandla acela engakumbi. Kwisixeko saseHelmond, elinye iNgqina laxelela umninimzi ukuba elo phecana lisasazwa ehlabathini lonke. Loo ndoda yathi: “Ncedani khe nime apha.” Yangena ngaphakathi yatsalela umnxeba kumhlobo wayo eFransi ukuze iqinisekise oko kuthethwa nguloo mvakalisi. Yathi kumhlobo wayo: “Kukho elinye lamaNgqina kaYehova apha emnyango lize nephecana elithi lisasazwa ehlabathini lonke. Ngaba uwufumene umbhalo walo?” Umhlobo wayo waphendula wathi: “Ewe, kwimizuzu elishumi edluleyo.” Loo ndoda yabeka umnxeba, yabuyela emnyango yaza yamkela owayo umbhalo.

Isebe laseRashiya lafumana ileta ebangel’ umdla yoselula okwibanga lesixhenxe. Wabhala wathi: “Molweni. Ndavuya gqitha ndakufumana iphecana elithetha ngewaka leminyaka kwiposi yethu! Eyona nto isivuyise gqitha kuwo wonke lo nyaka leli phecana nisinike lona! Ncedani nisithumelele inkcazelo engakumbi.”

Ngaphandle kokunceda abantu, iphulo leKingdom News No. 36 liye lanceda namaNgqina. Elinye iNgqina laseSaipan lathi: “Ndikunandiphe gqitha ukusasaza iKingdom News. Ndabhaptizwa ngowe-1998, ngoko ndandiqala ukuba nesabelo kolu hlobo lubalaseleyo lobulungiseleli. Kwandikhuthaza ukuba ndinikele ubungqina bangokuhlwa, nto leyo eye yandinceda ndathetha nabantu abangakumbi. Ngenxa yalo msebenzi, ukholo lwam luye lomelezwa, yaye ndiziva ndisondele kuYehova.”

AmaNgqina aya kwindawo ekwanti eMalaita, kwiiSolomon Islands, ukuze asasaze iKingdom News No. 36. Emva kokuhamba ngeenyawo ngaphezu kweeyure ezintlanu, afika kweny’ idolophana amkelwa ngumfundisi walapho yaye wabonisa umdla omkhulu. Wathi ngaphezu kweminyaka esithoba, akukho mmeli wangaphandle kwicawa yakhe owakha wabatyelela okanye wabonisa umdla kubo. Ukanti, naku kukho iqela labantu abangabaziyo elenze imigudu lanqumla imilambo neentaba ukuze libancede baqonde isigidimi seBhayibhile. Kwaqaliswa izifundo zeBhayibhile nazo zonke iintsapho zaloo dolophana. Abazalwana babuyela apho rhoqo emva kweeveki ezimbini, ibe kungekudala izifundo ezilishumi zenza inkqubela entle. Loo mfundisi wathi ukuba kukho umntu onokuhlala nabo ukuze kuqaliswe iqela, icawa yaloo dolophana inokusetyenziselwa iintlanganiso. Ngoku kukho uvulindlela okhethekileyo otyelela elo qela rhoqo. Kwingxelo yokugqibela esayifumanayo, omnye ummeli waloo cawa watyelela apho waza wathembisa abantu balapho ngokutya xa benokuvuma ukuyeka ukufunda namaNgqina kaYehova. Noko ke, bonke bathi baza kuqhubeka nezifundo zabo zeBhayibhile.

Ngoxa ayekwikhefu kwindawo ekwanti eVenezuela, amanye amaNgqina ahambisa umbhalo weKingdom News No. 36 kulowo wayewakhenkethisa, umIndiya ongumPemón. Evuyiswa nguloo mbhalo, wawufunda ngokuphindaphindiweyo. Xa wanethwa yimvula, wawaneka phandle ukuze wome. Wacela imibhalo engakumbi ukuze ayiphathele abantu bakowabo.

Inkqubela Yomthetho Ebudeni Bonyaka Wenkonzo

Ngenxa yesazela, uIvailo Stefanov wala ukuya emkhosini eBulgaria. Ngenxa yoko, wagwetywa unyaka onesiqingatha entolongweni. UMzalwan’ uStefanov wabhenela kwiNkundla YaseYurophu Yamalungelo Oluntu ekhala ngokuphazanyiswa kwenkululeko yakhe yokunqula. Yathi loo nkundla yakuvuma ukuphulaphula elo tyala, abasemagunyeni eBulgaria bacela ukuba lithethwe ngobuhlobo ekhaya apho wakhululeka ngokupheleleyo uMzalwan’ uStefanov namanye amaNgqina awayejamelene nengxaki efanayo. NgoMeyi 3, 2001, inkundla yakwamkela ukuconjululwa koko ngobuhlobo. Njengenxalenye yesicombululo, abasemagunyeni eBulgaria bavuma nokunciphisa iinkonzo zoluntu ezinikwa abantu xa bengayi kusebenza emkhosini, ezazikade zinde ngokuphindwe kabini kunenkonzo yesinyanzelo yasemkhosini.

EQuebec, eKhanada, isixeko saseBlainville sawisa umthetho wokuba abantu abaya kwindlu ngendlu ngeenjongo zonqulo bamele bathenge iphepha-mvume kuqala. Elo phepha-mvume laligunyazisa ukuba loo matyelelo endlu ngendlu abe ngoMvulo ukusa ngoLwesihlanu kuphela, yaye asebenze iinyanga ezimbini kuphela, ibe emva koko ayengayi kuhlaziywa de kudlule iinyanga ezili-12. NgoAprili 17, 2001, ijaji yenkundla ephakamileyo eQuebec yakhupha umyalelo wokuba loo mthetho awusebenzi kubulungiseleli basesidlangalaleni bamaNgqina kaYehova. Loo jaji yathi amaNgqina kaYehova akuyi kufuneka abe nephepha-mvume engayi kuba nemiqathango yomlinganiselo weeyure, iintsuku, iinyanga okanye iminyaka kwimisebenzi yonqulo lwawo yendlu ngendlu. Yabhekisela kubulungiseleli bamaNgqina kaYehova ngokuthi “yinkonzo yoluntu yobuKristu” yaye yafumanisa ukuba iimpapasho zawo “luncwadi lwezinto ezibalulekileyo, oluxubusha ngemibandela ephathelele unqulo, iBhayibhile, iziyobisi, ukukhotyokiswa butywala, imfundo yolutsha, iingxaki zomtshato nezoqhawulo-mtshato.” Loo jaji yathi, ukuthelekisa amaNgqina nabathengisi belizwi “kusisithuko, kukuthob’ isidima, kukwenzakalisa ngokweemvakalelo nokunyelisa.”

NgoFebruwari 22, 2001, iNkundla Ephakamileyo yaseTbilisi, eGeorgia, yakhupha isigqibo sokuba ziyeke ukubhaliswa iintlangano ezimbini ezisemthethweni ezisetyenziswa ngamaNgqina kaYehova apho: IUnion of Jehovah’s Witnesses of Georgia neRepresentation of the Watch Tower Society in Georgia. Inkundla yacacisa phandle ukuba eso sigqibo asiwavali umlomo amaNgqina kaYehova. Ngokwahlukileyo, inkundla yathi amaNgqina kaYehova angaqhubeka nemisebenzi yawo yonqulo, kuquka ukuqhuba iintlanganiso, ukuthumela uncwadi nokuqesha okanye athenge imihlaba. Noko ke, amalungu onqulo agabadeleyo aye akayikhathalela inkundla aqhubeka nothotho lokuhlasela kakubi oluchazwa yenye intlangano yamalungelo abantu njengokuba “lulawulo olunogonyamelo.” NgoJuni 29, 2001, amaNgqina kaYehova afaka isicelo kwiNkundla YaseYurophu Yamalungelo Oluntu ekhalazela ukungathabathi manyathelo kukarhulumente kolo gonyamelo lunganyamezelekiyo, ibe ngoJulayi 2 loo nkundla yakhupha umyalelo wokuba eso sicelo siqwalaselwe njengesona singxamisekileyo. Imiphumo emihle yoko yaba kukuba, ngoMeyi 30, 2001, iSebe Lokuhlola Izinto Ezithengwa Ngaphandle kwelo laseGeorgia lakhulula uncwadi lweBhayibhile lwethu olumalunga neetoni ezingama-20, olwaluthinjwe ngokungekho mthethweni ngoMatshi 14, 2001. Olo ncwadi lwasasazwa ngokukhawuleza kumabandla akwelo laseGeorgia.

Ngowe-1997 iNkundla Yolawulo LukaRhulumente yaseBerlin, eJamani, yala ukunika amaNgqina kaYehova imvume yokuba abe nombutho osemthethweni. Ukwala kwayo kwakusekelwe kwibango lokuba amaNgqina kaYehova akathembekanga ngokwaneleyo kuRhulumente kuba engenanxaxheba kunyulo lwezobupolitika. AmaNgqina abhena. NgoDisemba 19, 2000, iNkundla Yomgaqo-siseko KaRhulumente yaseJamani yakhupha isigwebo sokuba akukho kuthembeka kunjalo kuyimfuneko. Noko ke, elo tyala labuyiselwa kwiinkundla zolawulo ukuze ziphinde ziqwalasele eso sicelo sokugqalwa ngokusemthethweni, kwesi isihlandlo kuqwalaselwa isibakala sokuba amaNgqina kaYehova onakalisa amalungelo abantu abathile kusini na. Iinkolelo nezenzo eziphathelele igazi, ukukhulisa abantwana, ukususa kubudlelane, nolwalamano lwentsapho, ezo iye yaba zizinto ezintsha ekunikelwa ingqalelo kuzo kwelo tyala.

De kube kutshanje, amaNgqina angaphezu kwama-3 500 aseGrisi bekusoloko kukho iingxelo eziwachaza njengezaphuli-mthetho kuba ebesoloko ebanjelwa ubundilele bawo. Ekubeni ayenezo ngxelo zolwaphulo-mthetho la maNgqina ayengaqeshwa kwizikhundla ezithile kwiinkonzo zoluntu, kwiintlangano zentlalo-ntle, nasezibhankini. Amanye ayengavunyelwa ukuba asebenze kwiindawo ezifuna ubuchule obuthile. Ngoku umthetho okhutshwe eGrisi ubethelela ukuba loo maNgqina angagqalwa njengabo babesakuba zizaphuli-mthetho. Akuthandabuzeki ukuba, sisigqibo esihle seNkundla YaseYurophu Yamalungelo Oluntu kwiThlimmenos v. Greece ngelungelo likabani lokwala inkonzo yesinyanzelo yasemkhosini ngenxa yesazela esabeka isiseko salo mthetho mtsha.

INkundla YeSithili saseKobe eJapan yawisa isigwebo esihle ngoMatshi 30, 2001, kwityala elalibandakanya elinye lamaNgqina kaYehova. Loo dade waqweqwediswa waza wavalelwa ngenkani iintsuku ezili-17 ukuze “alahle” iinkolelo zonqulo lwakhe. Loo nkundla yathi ummangalelwa—umfundisi wamaBhaptizi—ekunye nowayesakuba ngumyeni waloo dade namalungu entsapho yakhe benza iyelenqe lokumvalela oko bekwenza nxamnye nomnqweno wakhe. Ummangalelwa wayalelwa ukuba ahlawule iiyen ezingama-400 000 (R33 000) njengembuyekezo.

Kwizigwebo ezibini iNkundla Ephakamileyo yaseRomania iye yatsho phandle ukuba iNtlangano Yonqulo YamaNgqina KaYehova lunqulo olusemthethweni yaye imele ixhamle onke amalungelo asemthethweni afunyanwa ziinkonzo. IQumrhu Loonobhala Beenkonzo BakaRhulumente lazama ukulwa ezo zigqibo kodwa latsho phantsi. NgoAprili 2, 2001, iNkundla Ephakamileyo yema kwizigqibo zayo zangaphambili. Ukuza kuthi ga ngoku, eli Qumrhu Loonobhala BeeNkonzo BakaRhulumente alikalamkeli ngokupheleleyo njengelisemthethweni eli lungelo lamaNgqina kaYehova, phezu kwayo nje imiyalelo yeNkundla Ephakamileyo yokuba lenjenjalo.

NgoFebruwari 23, 2001, ijaji yada yalichitha ngokupheleleyo ityala lokuvalwa umlomo kwamaNgqina kaYehova eMoscow, eRashiya, phantse emva konyaka wesithandathu wenkqubo yomthetho neminyaka emithathu lisenkundleni. Noko ke, abazalwana bafumana isiqabu sexeshana kuba ngoMeyi 30, 2001, iNkundla YesiXeko saseMoscow yasikhaba eso sigqibo senkundla ephantsi yayalela ukuba elo tyala liphinde liqale phantsi. Esi iya kuba sisihlandlo sesithandathu ukususela kowe-1996 ukuba amaNgqina kaYehova kufuneke azikhusele nxamnye nezo zityholo zingenasihlahla.

NgoFebruwari 21, 2001, iNkundla Ephakamileyo yasePennsylvania eUnited States, yawisa isigwebo esivuma ilungelo lomguli lokuzenzela isigqibo ngomzimba wakhe negunya lokuzikhethela lowo uza kuba ngummeli ekunyamekeleni impilo yakhe. Esi sigqibo sasibandakanya uMaria Duran, owayesoloko echaza ngokwala kwakhe utofelo-gazi engaguquki. Phezu kwayo nje imiqathango eyabekwa nguMaria, umyeni wakhe ongeloNgqina, exhaswa ngoogqirha bakaMaria nesibhedlele, wafumana umyalelo wenkundla ommisela njengalowo umnyamekelayo kwiimeko zongxamiseko, nakuba uMaria wayechaze omnye akholwa naye njengommeli wakhe kwezonyango. Inkundla ephakamileyo yawuchitha loo myalelo wongxamiseko yathi nkqu phezu kwayo nje inkcaso yeqabane lomguli, izalamane, noogqirha, imiyalelo yakhe ecacileyo yokunyanyekelwa kwempilo nokuzikhethela ummeli kwimeko yongxamiseko ifanele ihlonelwe.

Bekufuneka—IiHolo ZoBukumkani Ezingakumbi

Kumazwe amaninzi, ukwakha iiHolo zoBukumkani bekulucelo-mngeni ibe bekudla ngokuthabatha ixesha elide. Amanye amabandla ayedla ngokuhlanganisana kwizakhiwo eziqeshiweyo kangangeenyanga—okanye iminyaka—ngoxa kusakhiwa. Kwenye iHolo yoBukumkani engekagqitywa kwilizwe laseAfrika, isikhwenene sasendle sazakhela indlwana eluphahleni. Kungekudala eso sikhwenene sasilandela xa kuculwa iingoma zoBukumkani, nto leyo ekwakungekho bani imkhathazayo. Loo msebenzi wawucotha kangangokuba eso sikhwenene safunda ukulinganisa umqhubi weSifundo seMboniselo, de sibize abazalwana noodade ngamagama! Ekugqibeleni, loo Holo yoBukumkani yagqitywa, ngoko eso sikhwenene kwafuneka sizifunele enye indawo yokuhlala.

Namhlanje, ngenxa yenkqubo entsha echulumancisayo, iiHolo zoBukumkani zigqitywa ngesantya esimangalisayo. Kumazwe amaninzi asakhulayo, ngoku iiHolo zoBukumkani zakhiwa zize zinikezelwe kwiiveki nje ezintathu okanye ezine! EAfrika kuphela, zili-1 074 iiHolo zoBukumkani eziye zakhiwa ebudeni bonyaka wenkonzo odluleyo—phantse umlinganiselo wezi-4 ngosuku lomsebenzi!

Injongo yolu cwangciso lutsha lokwakhiwa kweeHolo zoBukumkani intlu-mbini. Eyokuqala, kukuze simelane nentswelo ekhoyo. Isebe laseMzantsi Afrika labhala lathi: “Olu luphuhliso oluvuyisayo esiqinisekileyo ukuba luya kwenza kwakhiwe iiHolo zoBukumkani ezininzi kumazwe ezifuneka ngokwenene kuwo.” Eyesibini, kukuze kuqinisekiswe ukuba siya kumelana nentswelo engaphambili ngokulungiselela umsebenzi wokwakha sisebenzisa amaNgqina asekuhlaleni anobuchule. Ngokomzekelo, eBenin, ngoku inkqubo yokwakha ilungiselelwa ngokupheleleyo apho ekuhlaleni yaye banokukwazi ukunyamekela iintswelo zexesha elizayo zeeHolo zoBukumkani.

Zikunye neOfisi Yokuyila/Nokwakha eBrooklyn, iiOfisi Zokwakhiwa KweeHolo ZoBukumkani Zenqila ezintlanu zinikela uncedo lokulungelelanisa kumasebe aseMpuma Yurophu, eAfrika, eAsiya, kwiZiqithi Zolwandle, kuMbindi noMzantsi Merika, nakwiziqithi zeCaribbean. Ezi ofisi zisebenzisana ngokusondeleyo neeKomiti zamaSebe ukuze ziwancede ayisebenzise kakuhle imiyalelo namalungiselelo afumanekayo ngoku. Ngokomzekelo, kwisebe ngalinye kumiswe iofisi yoLawulo Lokwakhiwa KweeHolo ZoBukumkani ukuze yalathise umsebenzi wokwakha kuloo ntsimi. Le ofisi ikwanceda amabandla xa ekhangela inxuwa lokwakha yaye ivelisa iiplani ezisemgangathweni ngokusekelwe kwizinto neendlela zokwakha zasekuhlaleni.

Kumazwe angama-92 apho ukunqongophala kwemali nabasebenzi abangamagcisa kwakukade kuthintela imigudu yokwakha, afikelela kuma-4 000 amatsha-ntliziyo exesha elide nawethutyana ngoku abumba amaQela Okwakhiwa KweeHolo ZoBukumkani exesha elizeleyo angama-352. Oyena ndoqo wokuphumelela kwala maqela kukufika kwezicaka zamazwe ngamazwe zokwakhiwa kweeHolo zoBukumkani, uhlobo olutsha lwenkonzo yexesha elizeleyo ekhethekileyo yabazalwana abafanelekayo bamazwe athile. Ukongezelela koko, kukho izicaka zamazwe ngamazwe ezili-152 eziqeqesha abazalwana basekuhlaleni ukuze bafeze indima ephambili kwinkqubo yokwakha. Kakade ke, ukwakhiwa kweHolo yoBukumkani ngumsebenzi webandla, ngoko ngokuzithandela amalungu ebandla enza owona msebenzi mkhulu ufuna amandla.

Basabela njani abantu kule nkqubo intsha yokwakha? Kutshanje, eTrujillo, eVenezuela, kuye kwakhiwa iHolo yoBukumkani yokuqala eSara Linda. Kusihla iinyembezi zovuyo, omnye umvakalisi wathi: “Ichukumisa gqitha into yokuba uYehova esikhumbule. Idolophu yethu ayiveli nokuvela kwimaphu!”

Omnye udade waseRio de Janeiro, eBrazil, wachukumiseka wabhala oku: “Kangangeminyaka elishumi bendihamba ngeenyawo iikhilomitha ezine xa ndisiya kwiintlanganiso, ndinqumla ibhulorho yeenyawo nkqu naxa ndandikhulelwe. Ekugqibeleni, lide lazaliseka iphupha lam. IHolo yoBukumkani kummandla wethu! Zininzi izifundo zeBhayibhile esele ziqalise ukuya kwiintlanganiso. Utata, owayefunda ngaphambili kodwa kamva wandichasa, akakaphoswa ntlanganiso ukususela ekunikezelweni kwayo. Kule veki uphinde waqalisa ukufunda kwakhona.” Omnye ongeloNgqina owayebukele uthi: “Ndineminyaka engama-60 ubudala ibe andizange ndiyibone into enje ngale! AmaNgqina asebenza ngokukhawuleza nangovuyo kunye. Ndingumakhi wezitena kwibhunga ledolophu, ibe nanini na xa umsebenzi uthabatha ixesha elide, uya kuva omnye umntu esithi: ‘Ndicinga ukuba kufuneka sibize amaNgqina kaYehova aze kusinceda!’”

Omnye umdala waseUkraine ugqabaza athi: “Sakwazi ukwakha iHolo yoBukumkani esemgangathweni ngenyanga enye nje kuphela, ngoko ke asizange siphazamiseke ixesha elide kwiimbopheleleko zentsapho namabandla ethu.” Omnye udade walapho wongezelela athi: “Sivuya gqitha. Siyibone ngamehlo ethu indlela uYehova abanceda ngayo abantu bakhe. Ngenxa yemeko yethu yezoqoqosho, ngaphambili sasingenalo ithemba lokuba neyethu iHolo yoBukumkani.”

Abantu abanomdla eMalawi bazimisela ngokukhethekileyo ukunxulumana nathi xa kukho indawo efanelekileyo yeentlanganiso. IBandla laseNafisi linikela le ngxelo: “Ekubeni ngoku sineHolo yoBukumkani entle, enikela ubungqina obuhle. Ngenxa yoko, kulula ukuqalisa izifundo zeBhayibhile xa ushumayela. Abantu beendawo ngeendawo bayakhwankqiswa. Enoba basesikolweni, emsebenzini, okanye emakhayeni abo, iHolo yoBukumkani yethu iye yaba ngundaba-mlonyeni.”

Iinkokeli zasekuhlaleni eMozambique nazo zichukumiseka gqitha yile nkqubo yokwakhiwa kweeHolo zoBukumkani. Enye inkosi yemveli kwacelwa kuyo inxuwa lokwakha iHolo yoBukumkani. Xa yayikhupha imvume yaphendula yathi: “Ndivile ngokwakhiwa kweeHolo zoBukumkani kwezinye iindawo ibe ndiye ndaxhalaba, ekubeni kungekho nanye kweyam indawo. Ndiyabulela kuni, maNgqina kaYehova ngokuceba ukwakha eyethu iHolo yoBukumkani!”

Yiyiphi impembelelo enayo le misebenzi ilungelelanisiweyo kumoya wokuzinikela emabandleni? Elinye ilungu leqela lokwakha eZimbabwe libalisa oku: “Emva kokuhamba emvuleni kangangeeyure, saya kufika kwesinye isakhiwo seHolo yoBukumkani yasemaphandleni. Abazalwana noodade bethu ababelindile babeziqhusheke phantsi kwemithi bebase umlilwana. Phezu kwabo nje obo bumanzi, basibulisa ngoncumo. Belungiselela ukuza kwethu, abangama-60 kwelo bandla bemba imisele yesiseko. Baqalisa ngentsimbi yesine kwintsasa engaphambi kwaleyo baza bagqiba ngeyesithandathu kwangolo rhatya.”

Kwakwelo lizwe, iBandla laseZongoro lalingenayo iHolo yoBukumkani. UNathan Muchinguri uye wakhonza apho ukususela ekubhaptizweni kwakhe ngowe-1924. Kangangeminyaka emininzi, uye waguqulela iimpapasho zeBhayibhile ngesiShona. Ekubeni wayehlala ngaphandle kweBheteli, iofisi yesebe yathembisa ukumnceda kwindleko zendawo yokuhlala, kodwa wala ukuba anikwe olo ncedo. Noko ke, wavakalisa umnqweno wakhe wokungenela kwiHolo yoBukumkani ngaphambi kokuba agqibe ikhondo lakhe lasemhlabeni. NgoAprili 8, 2001, uMzalwan’ uMuchinguri oneminyaka engama-93 ubudala wazaliseka umnqweno wakhe. IBandla laseZongoro lahlanganisana okokuqala kwiHolo yoBukumkani yalo entsha. Eso sihlandlo yayisesokukhunjulwa kweSidlo seNkosi Sangokuhlwa.

Kususela ekuqaliseni kolu cwangciso lokwakha ngoNovemba 1999, zingama-2 097 iiHolo zoBukumkani ezintsha eziye zakhiwa kumazwe angama-92—umlinganiselo wezingama-22 ngeveki! Iminikelo yothando yabazalwana bethu bazwenibanzi yenza kubekho “ukulingana,” ukuze ‘ibandla elinokuninzi lingaze libe nokuninzi gqitha, lize ibandla elinokuncinane lingaze libe nokuncinane gqitha.’ (2 Kor. 8:14, 15) Ngaba uYehova uyakusikelela oku kuzimisela kwehlabathi lonke? Qwalasela oku: Kwinyanga nje enye yokwakhiwa kweHolo yoBukumkani efanelekileyo kwiindawo ezininzi kwezi, inani labo bezayo lidla ngokuphindeka kabini.

Utyando Nonyango Ngaphandle Kwegazi—Iividiyo Ezintathu

Kuye kwaveliswa ungcelele lweevidiyo ezintathu ziiNkonzo Zesandi/Zeevidiyo, zikunye nabazalwana baseJamani nabamanye amazwe, zichaza ngendlela esengqiqweni ukusebenza kotyando olwenziwa ngaphandle kwegazi. Kuzo zontathu ezi vidiyo, iingcali zotyando ezaziwayo zithelekisa impumelelo yokusetyenziswa kweendlela ezingasebenzisi gazi neenkqubo ezisebenzisa igazi. Ividiyo yokuqala kolu ngcelele inomxholo othi Transfusion-Alternative Strategies—Simple, Safe, Effective. Yenzelwa ngokukhethekileyo oogqirha nabafundi bezonyango. Kusetyenziswa imifanekiso eshukumayo yekhompyutha ukwenza imizekelo yokusebenza kwemixube yegazi.

Loo vidiyo yokuqala yagqitywa ngexesha elifanelekileyo ukuze ilungele ukungenelela uMnyhadala Wezizwe Ngezizwe Wemifanekiso Eshukumayo Neevidiyo WaseUnited States wama-34 owenziwa ngonyaka. Xa zizonke zazili-1 500 ezangenelela zivela kumazwe angama-33. Ividiyo ethi Transfusion Alternatives yafakwa kwizintlu ezintathu. Kwizintlu ezimbini kwezo—kwiResearch Documentation neProfessional-Educational—le vidiyo yawongwa kwindawo yesibini yaza yafumana iSilver Screen Award. Kuluhlu lwesithathu, iCurrent Issues, le vidiyo yaphumelela kwindawo yokuqala yazuza iGold Camera Award. Ezo ndebe zibonisa ukuba iingcali kwishishini lokuvelisa imifanekiso eshukumayo ziyakuvuma ukuba semgangathweni, ukuchana nobuchwepheshe bevidiyo, ngaloo ndlela, oko kusongezelela ekubalulekeni kwesigidimi sayo.

Ividiyo yesibini inomxholo othi Transfusion-Alternative Health Care—Meeting Patient Needs and Rights. Yenzelwa ngokukhethekileyo iintatheli zonyango, amagosa ezempilo, oonontlalo-ntle, neejaji. Njengoko umxholo wayo ubonisa, le nkqubo iqwalasela indlela yokunyamekela iimfuno zonyango zabaguli ngoxa kuhlonelwa amalungelo abo asemthethweni. Ukongezelela koko, ubugcisa botyando ngaphandle kwegazi buboniswa njengobona bungenazindleko zinkulu.

Ividiyo yesithathu kolu ngcelele inomxholo othi No Blood—Medicine Meets the Challenge. Yenzelwe ngokuyintloko abantu ngokubanzi, le vidiyo sele isasaziwe koomabonwakude baseUnited States. Akuthandabuzeki ukuba, amagqabaza amahle ezo ngcali zingengomaNgqina kwakudliwanw’ iindlebe nazo kule vidiyo aya kuba negalelo elikhulu ekufundiseni abantu ngokubaluleka kotyando ngaphandle kwegazi aze aphelise intiyo ebangelwa kukungazi.

Izakhiwo Zamasebe Ezitsha Zizukisa UThixo

Ezi ngxelo zilandelayo zivela kumasebe amahlanu aye anikezelwa ebudeni bonyaka wenkonzo odluleyo. Makhe sikhenkethe ngeliso lengqondo senjenjeya, siqale eMzantsi Merika apho kuye kwanikezelwa izakhiwo zesebe ezitsha eVenezuela naseUruguay. Sandule siye eUkraine, kwiMpuma Yurophu, apho umsebenzi wamaNgqina kaYehova wavalwa ixesha elingaphezu kweminyaka engama-50. Emva koko, siphethulel’ ingqalelo yethu eMalawi, kumazantsi eAfrika, apho amaNgqina aye anyamezela iminyaka emininzi yokuvalwa umlomo nentshutshiso. Ekugqibeleni, siza kuqwalasela iBarbados, isiqithi esihle esikwiiCaribbean.

EVENEZUELA: NgoMatshi 3, 2001, zimalunga ne-1 600 iindwendwe ezazivela kumazwe angama-22 zithe nqwadalala kuloo yadi intle gqitha yezo zakhiwo kumgama weekhilomitha ezingama-80 ngakwintshona yedolophu elikomkhulu, iCaracas, zize kunikezelo lwezo zakhiwo zitsha zesebe. UMatshi lixesha lembalela, yaye iiNtaba zaseAragua zazomile zimbatshile, kodwa ngoncedo lwamanzi okunkcenkceshela avela kumaqula alapho kweso siza, ingca nemithi yesundu engqonge ezo zakhiwo zesebe zaziyokozela yaye ziluhlaza. Ezo ndwendwe—ezazinxibe eziva zona, ezininzi ziphethe iikhamera—zihamba-hamba kuloo mabala yaye ziphuma zingena kwezo zakhiwo, zibonakala zimangalisiwe yaye zivuya.

Iofisi yokuqala yesebe laseVenezuela yavulwa ngoSeptemba 1946, kusekho abavakalisi abali-19 kuphela ababeshumayela iindaba ezilungileyo kwelo lizwe. Kwisiqingatha senkulungwane esilandelayo, kwabakho izakhiwo ezahlukeneyo zesebe ngenxa yeemfuno zokwandisa. Isebe elitsha elikhoyo ngoku linyamekela abavakalisi beendaba ezilungileyo abangama-88 541 eVenezuela.

Abaninzi kwabo babe kolo nikezelo babenenxaxheba kolo lwakhiwo lweminyaka emithandathu lwezo zakhiwo. Esinye isicaka sezizwe ngezizwe sathi: “Kwakukhuthaza gqitha ukubona abazalwana bekulungele ukuhamba iiyure ukuze bafak’ isandla kuloo msebenzi wokwakha. Ngokomzekelo, iqela elalivela kwelinye ibandla laqesha ibhasi, landuluka ngentsimbi ye-11:00 ebusuku, lahamba ubusuku bonke laza kufika ngentsimbi ye-6:00 kusasa, lafumana isidlo sakusasa, lasebenza nathi imini yonke, laza emva koko labuyela ebhasini, lahamba ezinye iiyure ezisixhenxe ukugoduka.” Unxulumano olwalukho ebudeni bolo lwakhiwo lwalumyoli gqitha, njengoko abazalwana babesebenza kunye ngomanyano.—INdu. 133:1.

UGerrit Lösch weQumrhu Elilawulayo wanikela intetho yokunikezela ethi, “Ukwandisa Okuzisa Indumiso KuYehova.” Kusuku olulandelayo kwabakho abaphulaphuli abafikelela kwi-113 260, abangamaNgqina nabo banomdla abavela kuzo zonke iindawo zelo bethontelene kweso sixeko saseValencia beze kuphulaphula olunye ucwangciso olubangel’ imincili, kuquka ushwankathelo locwangciso lokunikezelwa.a

EURUGUAY: “Hayi indlela abamangalisa ngayo aba bantu! Ngokwenene kuluvuyo ukubona abantu abaninzi kangaka, amadoda nabafazi, besebenza nzima yaye benovuyo olungathethekiyo. Oku kunokufezwa kuphela xa nineentshukumisa ezilungileyo yaye ningazifuneli inzuzo yezinto eziphathekayo. Sinothulel’ umnqwazi, yaye qhubekani nomsebenzi omhle!” La ngamanye nje kuthotho lwamagqabaza abantu ababukeleyo abatyelela kuloo msebenzi wokwakha wesebe laseUruguay.

Inzondelelo nentsebenziswano eboniswa ngamaNgqina kaYehova ebudeni baloo msebenzi wokwakha iye yabonakaliswa kangangeminyaka ngabantu bakaYehova nasekuphumezeni umsebenzi wabo wokufundisa. Kwiminyaka engama-60 eyadlulayo, kwakukho amaNgqina ambalwa eUruguay, kuquka oovulindlela abathandathu baseJamani, ababetyhutyha kwelo lizwe ngeebhayisekile. Ngoku amaNgqina kaYehova eUruguay ayintlangano eluqilima, eyaziwayo nehlonelwayo enomlinganiselo womvakalisi om-1 kubemi abangama-287 nomlinganiselo wabadala abahlanu kwibandla ngalinye. Kakade ke, ngenxa yolo lwando kwavela imfuneko yezakhiwo zesebe ezingakumbi.

Ebudeni bocwangciso lokunikezelwa ngoMatshi 31, 2001, kwavakaliswa umbulelo kuloo maNgqina maninzi anikela ngamava nobuchule bawo kuloo msebenzi. Olu cwangciso lwaluquka nodliwano-ndlebe nabavangeli basemazweni abaninzi ababekhonza eUruguay. Babevela kumazwe akude ukuze babekho koko kunikezelwa. Intetho yokunikezela yayinikelwa nguMzalwan’ uLösch. Wabethelela ukuba esona sizathu siyintloko somsebenzi wokushumayela kukuzukisa nokudumisa uYehova.b

EUKRAINE: Ngaphezu kweminyaka eli-110, bekusoloko kukho abashumayeli beendaba ezilungileyo eUkraine. Noko ke, kwiminyaka elishumi edluleyo kuye kwakho ulwando olukhawuleza ngokukhethekileyo. Ukubakho kolwando lwama-530 ekhulwini kwinani labavakalisi ebudeni beyee-1990 kwabangela imfuneko engxamisekileyo yezakhiwo ezitsha zesebe. Ukuze kuhlangatyezwe loo mfuno, kwakhethwa indawo entle esemaphandleni malunga neekhilomitha ezintlanu kumantla eLvov njengendawo yokwakha isebe. Eso sakhiwo siquka indawo yokuhlala enamagumbi ali-104, iiofisi zale mihla, ikhitshi, indawo yokuhlamba iimpahla, igaraji nendawo yokugcina uncwadi.

Kwiminyaka emibini neenyanga ezintathu emva kokuba befumene imvume yokwakha, abazalwana baguqula loo ndawo lwaluzonwabisa kuyo ulutsha yaba zizakhiwo ezihle zesebe. Ikwelo hlathi lalikade lisetyenziswa ngabazalwana ukuqhuba iintlanganiso ebudeni beminyaka yokuvalwa komsebenzi.

Abasemagunyeni apho bafuna ukuba kwakhiwe indlela eya kwelo sebe. Abazalwana baqesha inkampani yokwakha yalapho ukwenza loo msebenzi, besithi loo ndlela, iziimitha ezili-1 200 ubude, kufuneka ibe sele igqityiwe ekupheleni kukaOktobha 2000. Oku kwakungenxa yokuba ngokuqhelekileyo ikhephu liqalisa ukuwa ngoNovemba. Loo nkampani ayizange ikwazi ukugqiba ngaloo mhla kwakuvunyelwene ngawo. Noko ke, ekubeni imozulu yayisavuma ukuba kwakhiwe loo ndlela, abazalwana bagqiba ekubeni bancedise ukuze kugqitywe loo msebenzi. Wonk’ ubani wasebenza nzima apho, yaye ekugqibeleni ngoMgqibelo, umhla kaDisemba 16, 2000, loo ndlela yagqitywa. Kobo busuku yonke loo ndawo yagutyungelwa likhephu. Ukuba ubuza abantu baloo mmandla isizathu sokuba ukwindla lowama-2000 lutsale kangako ngendlela engaqhelekanga, baya kuphendula bathi: “Kungenxa yokuba kwakufuneka amaNgqina kaYehova aqale agqibe ukwakha indlela.”

Ucwangciso lokunikezelwa lwaqhutywa ngoMeyi 19, 2001. Kwakukho abazalwana noodade abavela kumazwe angama-35 kolo cwangciso, olwaba neentetho eziziimbalasane zinikelwa nguTheodore Jaracz noGerrit Lösch beQumrhu Elilawulayo. Kusuku olulandelayo kwahlanganisana isihlwele sabantu abangama-72 023 kucwangciso olukhethekileyo olwaluqhutywa kwelona bala likhulu laseLvov naseKiev. Abaninzi abakhonza kangangamashumi eminyaka ngaphantsi kokuvalwa umlomo babekho. Babevuyiswa gqitha kukubona elo sebe lihle kangako, eliza kusa uzuko nendumiso enkulu kuYehova.c

EMALAWI: Xa kuza kuphela imva kwemini yangoMgqibelo ngoMeyi 19, 2001, angaphezu kwama-2 200 amaNgqina aseMalawi neendwendwe ezingama-200 ezivela kumazwe angama-21 ezahlanganisana ngaphantsi komthunzi owenziwe ngeepali ezinde zemithi yomgamtriya, ibamboo, nengca eyomileyo. Koko kukhanya kwakuluzizi, kwakunzima ukubona amagama kwincwadi yamaculo xa kwakuculwa ingoma yokugqibela. Kwelo qonga linomtsalane, umbhexeshi waloo ngoma wakhokela abaphulaphuli ekuvumeni iNgoma 56 ngendlela yaseAfrika—engasebenzisi zixhobo zomculo. Abo baphulaphuli babengawafuni nganto amaculo; babewazi ngentloko loo mazwi. Iindwendwe zamanye amazwe zachukumiseka gqitha njengoko zaziphulaphule abo bakhonzi bathembekileyo bakaYehova, inkoliso yabo eyabhaptizwa kwiminyaka engama-40 okanye ngaphezulu yaza yabandezeleka gqitha ngenxa yokholo lwayo.

Xa abazalwana noodade babekhenketha kwezo zakhiwo zitsha zesebe ngaloo ntsasa, basuke baduma bevuma iingoma zoBukumkani bewangazelisa izandla kuye wonk’ ubani abadibana naye endleleni. Ngaphambi kweso sihlandlo, abasemagunyeni kwisikhululo seenqwelo-moya bavuma ukudlala iKingdom Melodies Umqulu 1 kwiinkqubo zikawonke-wonke kweso sikhululo ukuze bamkele iindwendwe ezivela kwamanye amazwe. Enjani yona ukufudumala indlela yobuthixo abamkelwa ngayo! Loo mculo usadlalwa nangoku kweso sikhululo.

“Ngaba Uzibonakalisa Unombulelo Kwinkonzo KaYehova?” lowo ngumbuzo owaphakanyiswa nguSébastien Johnson, owayetyelele eMalawi njengomveleli wecandelo. Njengoko wayeqwalasela uMika 6:6-8, uMzalwan’ uJohnson wabonisa ukuba uYehova akafuni okuninzi kuthi. Eso sithethi sakhuthaza ukufundwa kweBhayibhile yonk’ imihla kuze kusetyenziswe imigaqo yayo eluncedo. UGuy Pierce, weQumrhu Elilawulayo wanikela intetho yokunikezela enomxholo othi “Gcobani Nibe Nemihlali Koko UYehova Akudalayo.” UMzalwan’ uPierce wathi: “Umsebenzi wenu nembali ende yenkonzo yokuthembeka uye wabeka isiseko solu lwando luqhubekayo namhlanje. Qhubekani nisenza konke okusemandleni enu kwinkonzo engcwele eniyinikela kOyena Uphakamileyo uThixo, uYehova.”

NgeCawa umhla kaMeyi 20, kwibala lemidlalo laseLilongwe, kwakukho abantu abali-17 378 abakhunjuzwa ukuba inani labavakalisi baseMalawi lalimalunga nama-30 000 xa kwakuvulwa umsebenzi wabo ngowe-1993. Namhlanje, phantse kukho amaNgqina angama-50 000 eMalawi! Ewe, ukunikezelwa kwezo zakhiwo zitsha zaseBheteli kwakulixesha lokukhumbula oko ngokwenene, umhla woloyiso lukaYehova!d

EBARBADOS: Isebe elitsha laseBarbados kunye neHolo yoBukumkani emelene nalo zikwithafa elityalwe ingca nemithana yeentyatyambo, kwindawo engangehektare nethe ncothu yaza yatsho ngobuhle obungayiwayo boLwandle lweCaribbean olukufutshane. Ezo zakhiwo zihle, zakhiwa ngeenyanga ezili-18, zikwisithili esizolileyo saseProspect, eSt. James, malunga neekhilomitha ezi-4 ukusuka eBridgetown, idolophu elikomkhulu laseBarbados.

Eso sakhiwo sitsha selo sebe sihlala amalungu alishumi entsapho yaseBheteli. Sinamagumbi asibhozo okuhlala, iiofisi nelokutyela. Kukho neHolo yoBukumkani ehlala abantu abangama-275. Ezi zakhiwo zingena endaweni yesakhiwo sangaphambili esikumgama wemizuzu elishumi xa uhamba ngenqwelo-mafutha ukusuka apho phakathi kumbindi weBridgetown. Xa ezo zakhiwo zangaphambili—ezimi phantse kumbindi wehlomela-dolophu kuloo dolophu ilikomkhulu laseBarbados—zaqalisa ukusetyenziswa ngowe-1969, isimbuku senani labavakalisi kwiziqithi ezikhulu ezithandathu neqela lezinye ezincinane zelo sebe sasimalunga ne-1 200. Ngonyaka wama-2000, elo nani lanyuka laya kutsho kubavakalisi abangama-2 390 kumabandla angama-25 nelinye iqela elikwanti. Ngelo xesha izakhiwo zelo sebe zaye azakwazi ukunyamekela inani elandayo lamabandla, ibe elo hlomela-dolophu lalisakuba yindawo ezolileyo laba ngummandla worhwebo onengxolo.

NgoMgqibelo, Juni 2, 2001, zaba ngama-676 iindwendwe ezamenywa zivela kwiziqithi zelo sebe laseBarbados nezili-15 zamanye amazwe zinandipha olo cwangciso lokunikezela, olwaluquka imbali yomsebenzi eBarbados. Imbalasane yolo cwangciso yaba yintetho ethi “Ukwenza Intliziyo KaYehova Ivuye,” eyanikelwa ngehlombe nguJohn E. Barr weQumrhu Elilawulayo. Ukuze kungenelwe nabo bangazange bakwazi ukubakho apho kolo cwangciso, kwaqhutywa intlanganiso ekhethekileyo kusuku olulandelayo. Kuyo kwabakho abantu abangama-3 332.e

Sifikelela kuma-20 133 isimbuku sabalungiseleli abamiselweyo abasebenza kwizakhiwo zamasebe anjalo ehlabathini lonke. Bonke ngamalungu eNkqubo Yabakhonzi Abakwinkonzo Ekhethekileyo Yexesha Elizeleyo.

[Imibhalo esemazantsi]

[Imifanekiso ekwiphepha 6]

IiNdibano ZeSithili ‘Zabafundisi Belizwi LikaThixo’ zaquka ukukhululwa “kweNguqulelo Yehlabathi Elitsha” ngesiTshayina sakudala nesenziwe lula, eHong Kong

[Imifanekiso ekwiphepha 11]

Phantse ibe sisiqingatha sewaka lezigidi imibhalo yephecana “iKingdom News” No. 36 eyasasazwa ehlabathini lonke

[Umfanekiso okwiphepha 13]

INkundla YaseYurophu Yamalungelo Oluntu, eStrasbourg, eFransi

[Umfanekiso okwiphepha 21]

UMzalwana noDade Muchinguri ngaphambi kweHolo yoBukumkani entsha

[Umfanekiso okwiphepha 22]

Iimbasa ezintathu ezafunyanwa ngenxa yevidiyo ethi “Transfusion-Alternative Strategies—Simple, Safe, Effective”

[Imifanekiso ekwiphepha 28, 29]

Izakhiwo zesebe ezisandul’ ukunikezelwa

(1) EMalawi

(2) EBarbados

(3) EUruguay

(4) EVenezuela

(5) EUkraine