Ngamana UYehova Angayamkela Indlela Oziphendulela Ngayo
“Ndikhumbulele nangale nto, Thixo wam . . . Ndikhumbulele okulungileyo, Thixo wam.”—NEHEMIYA 13:22, 31.
1. Yintoni enceda abo bazahlulele kuThixo bakwazi ukuziphendulela kuYehova?
ABAKHONZI bakaYehova banezinto ezininzi ezinokubanceda bakwazi ukuziphendulela kuye. Ngoba? Ngenxa yokuba banolwalamano olusenyongweni noThixo njengenxalenye yentlangano yakhe yasemhlabeni. Ubatyhilele iinjongo zakhe, yaye ubanike uncedo nokukhanya kokomoya esebenzisa umoya wakhe oyingcwele. (INdumiso 51:11; 119:105; 1 Korinte 2:10-13) Xa sicinga ngezi meko zikhethekileyo, ngothando lwakhe uYehova ufuna abakhonzi bakhe basemhlabeni baziphendulele kuye ngobomi babo nangoko bakuphumezayo ngamandla noncedo lomoya wakhe oyingcwele.
2. (a) Kungaziphi iindlela awathi uNehemiya wakwazi ukuziphendulela kuThixo? (b) UNehemiya wayiqukumbela ngasiphi isibongozo incwadi yeBhayibhile ebizwa ngegama lakhe?
2 Omnye umntu owathi wakwazi ukuziphendulela kuThixo yayinguNehemiya, umngcamli wewayini kaKumkani uArtashashta (uLongimanus) wasePersi. (Nehemiya 2:1) UNehemiya waba ngumlawuli wamaYuda waza waphinda walwakha udonga lwaseYerusalem nangona wayejamelene neentshaba neengozi. Enenzondelelo ngonqulo lokwenyaniso, wakhuthaza ukuthotyelwa koMthetho kaThixo waza wabanyamekela abaxinezelekileyo. (Nehemiya 5:14-19) UNehemiya wabongoza abaLevi ukuba bazingcwalise rhoqo, balinde emasangweni baze bawungcwalise umhla weSabatha. Ngoko wayenokuthandaza athi: “Ndikhumbulele nangale nto, Thixo wam, ube nenceba kum ngokobuninzi benceba yakho.” Kwakhona, ngokufanelekileyo uNehemiya waqukumbela incwadi yakhe ephefumlelwe nguThixo ngesi sibongozo: “Ndikhumbulele okulungileyo, Thixo wam.”—Nehemiya 13:22, 31.
3. (a) Ubunokumchaza njani umntu owenza ubulungisa? (b) Ukucinga ngekhondo likaNehemiya kusenokusenza sizibuze yiphi imibuzo?
3 Umntu owenza ubulungisa ulilungisa yaye wenza izinto ezintle ukuze kungenelwe abanye. UNehemiya wayeyindoda enjalo. Wayemoyika yaye emhlonela uThixo ibe wayenenzondelelo ngonqulo lokwenyaniso. Ngaphezu koko, wayelixabisa ilungelo lokukhonza uThixo yaye wakwazi ukuziphendulela kuYehova. Ukucinga ngekhondo lakhe kusenokusenza sizibuze oku, ‘Ndiwagqala njani amalungelo neembopheleleko endizinikwe nguThixo? Ndinokuziphendulela njani kuYehova uThixo nakuYesu Kristu?’
Siya Kuphendula Ngenxa Yokuba Nolwazi
4. UYesu wabanika luphi uthumo abalandeli bakhe, yaye abo ‘babenotyekelo olufanelekileyo ngobomi obungunaphakade’ benza ntoni?
4 UYesu wabanika olu thumo abalandeli bakhe: “Hambani . . . nize nenze abafundi abantu beentlanga zonke, nibabhaptiza . . . , nibafundisa ukuba bagcine zonke izinto endiye ndaniyalela zona.” (Mateyu 28:19, 20) Abafundi babeza kwenziwa ngokuthi bafundiswe. Ngoko abo bafundisiweyo ‘nababenotyekelo olufanelekileyo ngobomi obungunaphakade’ babeza kubhaptizwa, njengokuba noYesu wenzayo. (IZenzo 13:48; Marko 1:9-11) Umnqweno wabo wokuthobela yonke imiyalelo yakhe wawuza kuphuma entliziyweni. Babeza kufikelela kwinqanaba lokuzahlulela ngokuzondla nangokusebenzisa ulwazi oluchanileyo lweLizwi likaThixo.—Yohane 17:3.
5, 6. Sifanele simqonde njani uYakobi 4:17? Zekelisa ngendlela asebenza ngayo.
5 Okukhona sisiba nolwazi olunzulu ngeZibhalo, kokukhona ukholo lwethu luya kuba nesiseko esihle ngakumbi. Kwangaxeshanye, oko kuya kusiphendulisa ngakumbi kuThixo. UYakobi 4:17 uthi: “Ukuba ubani uyakwazi ukwenza oko kulungileyo ukanti akakwenzi, kusisono kuye.” Kubonakala ukuba la mazwi abethelela oko umfundi uYakobi wayesandul’ ukukuthetha ngokuqhayisa kunokuxhomekeka kuThixo ngokupheleleyo. Ukuba umntu uyaqonda ukuba akukho nto anokuyiphumeza ngaphandle koncedo lukaYehova, kodwa angaluceli olo ncedo, oko kusisono. Kodwa amazwi kaYakobi anokubhekisela kwizono ezibangelwa kukungakhathali. Ngokomzekelo, kumzekeliso kaYesu wezimvu neebhokhwe, iibhokhwe azigwetywa ngenxa yezenzo ezingendawo, kodwa ngenxa yokungabancedi abazalwana bakaKristu.—Mateyu 25:41-46.
6 Enye indoda eyayiqhutyelwa isifundo seBhayibhile ngamaNgqina kaYehova yayingenzi nkqubela ingako ngokomoya, mhlawumbi ngenxa yokuba yayingayeki ukutshaya, nangona yayisazi ukuba yayifanele yenjenjalo. Omnye umdala wayicela ukuba ifunde uYakobi 4:17. Emva kokuyichazela ngentsingiselo yesi sibhalo, lo mdala wathi: “Nangona ungekabhaptizwa, uya kuphendula yaye umele ukwazi ukusimela isigqibo osenzayo.” Okuvuyisayo kukuba le ndoda yasabela, yayeka ukutshaya, yaye kungekudala yakufanelekela ukubhaptizwa ifuzisela uzahlulelo lwayo kuYehova uThixo.
Siya Kuphendula Ngobulungiseleli Bethu
7. Yiyiphi enye indlela yokubonakalisa uxabiso ‘ngokumazi uThixo’?
7 Umnqweno wethu osuk’ entliziyweni ufanele ube kukukholisa uMdali wethu. Enye indlela esinokuwubonakalisa ngayo umbulelo wethu ‘ngokumazi uThixo,’ kungokuphumeza uthumo lokwenza abafundi boNyana wakhe, uYesu Kristu. Le yenye indlela yokubonakalisa uthando ngoThixo nangabamelwane bethu. (IMizekeliso 2:1-5; Mateyu 22:35-40) Ewe, ulwazi lwethu ngoThixo luya kusiphendulisa kuye, yaye abanye abantu sifanele sibagqale njengabafundi bangomso.
8. Kutheni sinokuthi uPawulos wayenemvo yokuba wayeya kuphendula kuThixo ngobulungiseleli bakhe?
8 Umpostile uPawulos wayesazi ukuba ukuzamkela ngentliziyo epheleleyo nokuzithobela iindaba ezilungileyo kukhokelela elusindisweni, ngoxa ukuzigatya kunokukhokelela kwintshabalalo. (2 Tesalonika 1:6-8) Ngoko wayenemvo yokuba wayeza kuphendula kuYehova ngobulungiseleli bakhe. Eneneni, uPawulos nezinxulumani zakhe babebuxabisa ubulungiseleli babo kangangokuba babekuphepha ukuba kubonakale ngathi kwakukho imali abayizuzayo ngabo. Ngaphezu koko, intliziyo kaPawulos yamshukumisela ekubeni athi: “Ukuba, ngoku, ndivakalisa iindaba ezilungileyo, eso asisosizathu sakuqhayisa kum, kuba kubekwe imfuneko phezu kwam. Ngokwenene, yeha ke mna ukuba andizivakalisanga iindaba ezilungileyo!”—1 Korinte 9:11-16.
9. Liliphi ityala elikhulu afanele alihlawule onke amaKristu?
9 Ekubeni singabakhonzi bakaYehova abazahluleleyo, ‘kubekwe imfuneko yokuvakalisa iindaba ezilungileyo phezu kwethu.’ Sifumene uthumo lokushumayela isigidimi soBukumkani. Sayamkela loo mbopheleleko xa sazahlulela kuThixo. (Thelekisa uLuka 9:23, 24.) Ukongezelela, sinetyala esifanele silihlawule. UPawulos wathi: “Kokubini kumaGrike nakumaBharbhari, kokubini kwizilumko nakwabo bangenangqiqo ndingonetyala: ngoko kukho intumekelelo kum yokuzivakalisa iindaba ezilungileyo nakuni apho eRoma.” (Roma 1:14, 15) UPawulos wayenetyala kuba wayesazi ukuba ngumsebenzi wakhe ukushumayela ukuze abantu bazive iindaba ezilungileyo baze basindiswe. (1 Timoti 1:12-16; 2:3, 4) Ngoko ke wazibhokoxa ukuze aphumeze uthumo lwakhe nokuhlawula ityala lakhe kwabanye abantu. NjengamaKristu, sinetyala elifanayo esifanele silihlawule. Ukushumayela ngoBukumkani kukwayindlela ephambili yokubonakalisa uthando ngoThixo, uNyana wakhe nangabamelwane bethu.—Luka 10:25-28.
10. Baye benza ntoni abanye ukwandisa ubulungiseleli babo?
10 Enye into enokusenza sikwazi ukuziphendulela kuThixo kungokusebenzisa ubuchule bethu size sandise ubulungiseleli bethu. Ngokomzekelo: Kukho abantu abaninzi beentlanga ezahlukeneyo abaye bafudukela eBritani kwiminyaka yakutshanje. Ukufikelela abantu abanjalo ngeendaba ezilungileyo, oovulindlela (abavakalisi boBukumkani bexesha elizeleyo) abangaphezu kwama-800 namanye amaNgqina amaninzi afunda iilwimi ezahlukahlukeneyo. Oku kuye kongeza ifuthe kubulungiseleli. Omnye uvulindlela ofundisa isiTshayina wathi: “Andizange ndicinge ukuba ndingaze ndifundise amanye amaNgqina ulwimi lwam, ukuze abelane nabanye ngenyaniso. Kubangela ulwaneliseko ngokwenene!” Ngaba unokwenza okufanayo ukwandisa ubulungiseleli bakho?
11. Waba yintoni umphumo xa omnye umKristu wanikela ubungqina ngokungacwangciswanga?
11 Ewe, ngamnye wethu angenza konke okusemandleni akhe ukusindisa umntu orhaxwayo. Ngokufanayo abakhonzi bakaYehova bakulungele ukusebenzisa ubuchule babo ukunikela ubungqina ngalo naliphi na ithuba elivelayo. Kutshanje elinye iNgqina lahlala ecaleni kwelinye ibhinqa kuduladula laza lathetha nalo ngeZibhalo. Lichukunyiswe koko lalikuva, eli bhinqa labuza imibuzo emininzi. Xa eli Ngqina laliza kuhla kuloo duladula, eli bhinqa lalibongoza ukuba ligoduke kunye nalo, ekubeni lalisenemibuzo emininzi. Elo Ngqina lavuma. Waba yintoni umphumo? Baqalisa isifundo seBhayibhile, yaye emva kweenyanga ezintandathu eli bhinqa laba ngumvakalisi woBukumkani ongabhaptizwanga. Kungekudala laliqhuba izifundo zeBhayibhile zamakhaya ezintandathu. Onjani ukuchulumancisa umvuzo wokusebenzisa ubuchule kwinkonzo yoBukumkani!
12. Sinokubusebenzisa njani ubuchule bethu njengabalungiseleli kwinkonzo yasentsimini?
12 Sinokubusebenzisa ngempumelelo ubuchule bethu njengabalungiseleli entsimini ngokusebenzisa iimpapasho ezinjengencwadi enamaphepha ali-192 ethi Ulwazi Olukhokelela Kubomi Obungunaphakade. NgoAprili we-1996, iKomiti Yokubhala yeQumrhu Elilawulayo lamaNgqina kaYehova yakuncomela ukupapashwa kwencwadi ethi Ulwazi ngeelwimi ezingaphezu kwe-140, yaye ngelo xesha kwakusele kupapashwe imibhalo yayo ezizi-30 500 000 ngeelwimi ezili-111. Le ncwadi yabhalwa ngenjongo yokunceda abafundi beBhayibhile bafumane ulwazi olwaneleyo lweLizwi neenjongo zikaThixo ukuze bazahlulele kuYehova baze babhaptizwe. Ekubeni abavakalisi boBukumkani bengayi kuqhuba isifundo seBhayibhile sekhaya nomfundi omnye kangangeminyaka emininzi, banokuqhuba izifundo nabantu abangakumbi okanye babe nesabelo ngakumbi kumsebenzi wendlu ngendlu nakwezinye iinxalenye zobulungiseleli. (IZenzo 5:42; 20:20, 21) Beqonda ukuba baya kuphendula kuThixo, badlulisela izilumkiso zikaThixo kwabanye. (Hezekile 33:7-9) Kodwa injongo yabo ephambili kukuhlonela uYehova nokunceda abantu abaninzi kangangoko kunokwenzeka bazazi iindaba ezilungileyo kwixeshana elisaseleyo kule nkqubo yezinto ingendawo.
Ukukwazi Ukuziphendulela Njengeentsapho
13. Kutheni iintsapho ezihlonel’ uThixo zifanele zibe nesifundo sentsapho seBhayibhile esiqhutywa rhoqo?
13 Umntu nentsapho nganye eyamkela ubuKristu bokwenyaniso iya kuphendula kuThixo yaye ngoko ifanele ‘ixhinele ekuqoleni’ ize ‘iqine elukholweni.’ (Hebhere 6:1-3; 1 Petros 5:8, 9) Ngokomzekelo, abo bafundisise incwadi ethi Ulwazi baza babhaptizwa kufuneka balutyebise ulwazi lwabo lweZibhalo ngokuya rhoqo kwiintlanganiso nangokufunda iBhayibhile nezinye iimpapasho zamaKristu. Neentsapho ezihlonel’ uThixo zifanele zibe nesifundo sentsapho esiqhutywa rhoqo, kuba oko kubalulekile ukuze ‘zihlale zivukile, zime ziqinile elukholweni, ziqhubeke ngokwamadoda, zikhule zibe namandla.’ (1 Korinte 16:13) Ukuba uyintloko-ntsapho, uya kuphendula ngokukodwa kuThixo kuba ufanele uqiniseke ukuba intsapho yakho yondleke kakuhle ngokomoya. Njengoko ukuba sempilweni kubangelwa kukutya okunesondlo, ngoko intabalala yokutya kokomoya okufumaneka rhoqo kwenza wena nentsapho yakho nihlale ‘niphilile elukholweni.’—Tito 1:13.
14. Waba yintoni umphumo wobungqina obanikelwa yintombazana yomSirayeli eqeqeshwe kakuhle?
14 Ukuba unabantwana, uThixo uya kuyamkela indlela oziphendulela ngayo ukuba ubanika uqeqesho lokomoya olufanelekileyo. Loo ngqeqesho iya kubanceda, njengoko yanceda intombazana encinane yomSirayeli eyayithinjwe ngama-Aram ngemihla yomprofeti kaThixo uElisha. Yaba sisicakakazi somfazi womphathi-mkhosi wama-Aram owayeneqhenqe, uNahaman. Nangona yayiselula le ntombazana, yamxelela oku umqeshikazi wayo: “Akwaba inkosi yam le ibiphambi komprofeti okwaSamari! Ubeya kuyiphilisa eqhenqeni layo.” Ngenxa yokunikela kwayo ubungqina, uNahaman waya kwaSirayeli, ekugqibeleni waluthobela ulwalathiso lukaElisha lokuhlamba izihlandlo ezisixhenxe kuMlambo iYordan, waza wahlambuluka kwelo qhenqe. Ngaphezu koko, uNahaman waba ngumnquli kaYehova. Hayi indlela emele ukuba yachulumanca ngayo loo ntombazana incinane ngenxa yoko!—2 Kumkani 5:1-3, 13-19.
15. Kutheni kubalulekile ukuba abazali babaqeqeshe kakuhle abantwana babo ngokomoya? Zekelisa.
15 Akukho lula ukukhulisa abantwana aboyik’ uThixo kweli hlabathi linemilinganiselo ephantsi nelilele emandleni kaSathana. (1 Yohane 5:19) Noko ke, ngoxa wayeselusana uTimoti, uninakhulu uLoyisi nonina, uYunike, baphumelela ekumfundiseni iZibhalo. (2 Timoti 1:5; 3:14, 15) Ukufundisisa iBhayibhile nabantwana bakho, ukuya nabo rhoqo kwiintlanganiso zamaKristu, nokuhamba nabo xa usiya kubulungiseleli kuyinxalenye yoqeqesho oya kuphendula ngenxa yalo kuThixo. Omnye umKristu waseWales, okubudala beminyaka engama-80 ngoku, ukhumbula ukuba ebutsheni beminyaka yee-1920, uyise wayedla ngokuhamba naye iikhilomitha ezili-10 benqumla intaba (uhambo lweekhilomitha ezingama-20 ukuya nokubuya) ukuze bahambise amaphecana eBhayibhile kubantu ababehlala kwintlambo eyayikufutshane apho. Ezele ngumbulelo uthi: “Utata wayesebenzisa elo thuba laxa siseluhambeni ukufaka inyaniso entliziyweni yam.”
Abadala Baya Kuphendula—Njani?
16, 17. (a) Ngawaphi amalungelo awayefunyanwa ngamadoda akhulileyo ngokomoya kuSirayeli wamandulo? (b) Ngokwahlukileyo kwimeko yoSirayeli wamandulo, kutheni kufuneka okungakumbi kubadala abangamaKristu namhlanje?
16 Indoda esisilumko uSolomon yathi: “Isithsaba sokuhomba zizimvi, sifunyanwa endleleni yobulungisa.” (IMizekeliso 16:31) Kodwa asibobudala kuphela obenza indoda ifanelekele iimbopheleleko kwibandla labantu bakaThixo. KuSirayeli wamandulo amadoda akhulileyo ngokomoya ayekhonza njengabagwebi nababhali ukuze baphumeze okusesikweni yaye bagcine uxolo, ucwangco nempilo yokomoya. (Duteronomi 16:18-20) Nangona kukwanjalo nakwibandla lamaKristu, kufuneka okungakumbi kubadala njengoko isiphelo sale nkqubo yezinto sisondela. Ngoba?
17 AmaSirayeli ‘ayengabantu abanyuliweyo’ abahlangulwa nguThixo kwiYiputa yamandulo. Ekubeni ayefumene uMthetho ngomlamleli wawo, uMoses, inzala yawo yayivela njengohlanga oluzahluleleyo yaye yayiyazi imithetho kaYehova. (Duteronomi 7:6, 11) Noko ke, namhlanje akukho mntu uzalwa sele eyinxalenye yolo hlanga luzahluleleyo, yaye ngokwesilinganiso bambalwa abakhulela kwiintsapho ezihlonel’ uThixo neziyaziyo inyaniso yeZibhalo. Abo basandul’ ukuqalisa ‘ukuhamba enyanisweni’ bakufuna ngokukhethekileyo ukufundiswa indlela yokuphila ngokwemigaqo yeZibhalo. (3 Yohane 4) Ngoko ke, hayi indlela omkhulu ngayo umthwalo osemagxeni wabadala abathembekileyo njengoko ‘bebambe isizekelo samazwi aphilileyo’ yaye benceda abantu bakaYehova!—2 Timoti 1:13, 14.
18. Luluphi uncedo abafanele bakulungele ukulunikela abadala bebandla, yaye ngoba?
18 Umntwana osafunda ukuhamba usenokugxadazela aze awe. Uye azive enganqabisekanga yaye efuna uncedo nokukhuthazwa ngumzali wakhe. Ngokufanayo umntu ozahlulele kuYehova unokugxadazela okanye awe ngokomoya. Nompostile uPawulos wakufumanisa kuyimfuneko ukuzama ngamandla ukwenza oko kulungileyo okanye kuhle emehlweni kaThixo. (Roma 7:21-25) Abalusi bomhlambi kaThixo kufuneka bawancede ngokunothando amaKristu aye anxaxha kodwa aguquke ngokwenene. Ngoxa umyeni walo wayekho, elinye ibhinqa elalenze impazamo enzulu lathi xa lalityelelwe ngabadala: “Ndiyazi ukuba niza kundisusa kubudlelane!” Kodwa alizange likwazi ukuzibamba iinyembezi xa laxelelwa ukuba abadala babefuna indlela yokunceda intsapho yalo ngokomoya. Ekubeni beqonda ukuba baya kuphendula, abadala bakuvuyela ukunceda elo kholwa lalibonakalisa inguquko.—Hebhere 13:17.
Hlala Ukulungele Ukuziphendulela
19. Sinokuhlala njani sikulungele ukuziphendulela kuThixo?
19 Abadala bebandla nabo bonke abanye abakhonzi bakaThixo kufuneka bahlale bekulungele ukuziphendulela kuYehova. Sinokukwenza oku ukuba sinamathela kwiLizwi likaThixo size senze ukuthanda kwakhe. (IMizekeliso 3:5, 6; Roma 12:1, 2, 9) Sifanele sibenzele ubulungisa ngokukhethekileyo abo bakunye nathi elukholweni. (Galati 6:10) Noko ke, isivuno sisesikhulu, yaye abasebenzi basembalwa. (Mateyu 9:37, 38) Ngoko masibenzele ubulungisa abanye ngokuvakalisa isigidimi soBukumkani ngenkuthalo. UYehova uya kuyamkela indlela esiziphendulela ngayo ukuba siyaluzalisekisa uzahlulelo lwethu, senze ukuthanda kwakhe size sizivakalise ngokuthembeka iindaba ezilungileyo.
20. Sifunda ntoni ngokuhlolisisa ikhondo likaNehemiya?
20 Ngoko ke masiqhubeke sinokuninzi esinokukwenza emsebenzini weNkosi. (1 Korinte 15:58) Yaye sifanele sikhumbule uNehemiya, owaphinda walwakha udonga lweYerusalem, wakhuthaza ukuthotyelwa koMthetho kaThixo, waza ngenzondelelo wahambisela phambili unqulo lokwenyaniso. Wathandaza ecela uYehova uThixo ukuba amkhumbule ngobulungisa awayebenzile. Ngamana ungangqineka uzinikele kuYehova njengaye, yaye ngamana angayamkela indlela oziphendulela ngayo.
Zithini Iimpendulo Zakho?
◻ Nguwuphi umzekelo owamiselwa nguNehemiya?
◻ Kutheni siya kuphendula kuThixo ngenxa yokuba nolwazi?
◻ Sinokwenza njani ukuze sikwazi ukuziphendulela kuYehova ngobulungiseleli bethu?
◻ Zinokwenza ntoni iintsapho ukuze zikwazi ukuziphendulela kuThixo?
◻ Banokukwazi njani ukuziphendulela abadala abangamaKristu?
[Imifanekiso ekwiphepha 18]
NjengoPawulos, sinokukwazi ukuziphendulela kuThixo njengabavakalisi boBukumkani
[Umfanekiso okwiphepha 19]
Ngaba ukholo lwabantwana bakho lomelele njengolwentombazana yomSirayeli eyayisebenza ekhayeni likaNahaman?