Uvuyo Lokuhamba Engqibelelweni
“Intsikelelo kaYehova—yiyo etyebisayo, yaye akongezi ntlungu kuyo.”—IMIZEKELISO 10:22.
1, 2. Kutheni sifanele sikuphephe ukucamngca ngokugqithiseleyo ngekamva?
“UKUCAMNGCA ngokugqithiseleyo ngekamva . . . kwenza singabunandiphi ubomi esibuphilayo ngoku,” satsho njalo esinye isazi sefilosofi saseMerika. Koko kanye okwenzekayo kubantwana abacamngca ngokugqithiseleyo ngobomi babo xa bebadala bade balibale ukucinga ngeengenelo zobutsha, de bashiywe lixesha.
2 Kwanabanquli bakaYehova bayachaphazeleka koku. Makhe sihlolisise umzekelo wendlela esisenokuchaphazeleka ngayo. Sikhangele phambili ngolangazelelo ekuzalisekeni kwesithembiso sikaThixo sokuzisa iparadesi emhlabeni. Sikulangazelela ngamandla ukuphila ubomi obungenakugula, ukwaluphala, iintlungu nokubandezeleka. Nangona kukuhle ukulangazelela ezo zinto, kuthekani ukuba sicamngca ngokugqithiseleyo ngeentsikelelo zokwenyama zexesha elizayo side silibale ngeentsikelelo zokomoya esizinandiphayo ngoku? Hayi indlela ebekuya kuba lusizi ngayo oko! Sisenokudimazeka msinyane okanye ‘intliziyo igule xa ulindelo lwethu’ lungazaliseki ngexesha esicinga ngalo. (IMizekeliso 13:12) Iingxaki neenzima zobu bomi zisenokusenza siphelelwe lithemba okanye sizisizele. Sisenokungabi nawo amandla okujamelana nazo, size sibe nesimo sengqondo sokukhalaza. Sinokukuphepha konke oku ngokuthi sicamngce ngeentsikelelo esizinandiphayo ngoku.
3. Yintoni esiza kunikel’ ingqalelo kuyo kweli nqaku?
3 “Intsikelelo kaYehova—yiyo etyebisayo, yaye akongezi ntlungu kuyo,” itsho njalo iMizekeliso 10:22. Ngaba ukuchuma ngokomoya kwabakhonzi bakaYehova namhlanje akuyontsikelelo esimele siyivuyele? Makhe sihlolisise ezinye iinkalo zokuchuma kwethu ngokomoya size sibone indlela esichaphazeleka ngayo. Ukucamngca ngeentsikelelo uYehova aye wazithululela ‘amalungisa ahamba engqibelelweni’ ngokuqinisekileyo kuya kusikhuthaza ukuba siqhubeke simkhonza ngovuyo uBawo wethu wasezulwini.—IMizekeliso 20:7.
‘Iintsikelelo Ezisityebisayo’ Ngoku
4, 5. Yiyiphi imfundiso yeBhayibhile oyixabisa ngokukhethekileyo, yaye ngoba?
4 Ulwazi oluchanileyo lweemfundiso zeBhayibhile. Iinkonzo zeNgqobhoko zithi ziyakholelwa eBhayibhileni. Kodwa azivumelani noko ikufundisayo. Kwanamalungu ecawa enye ngokufuthi aba neembono ezahlukeneyo ngoko kufundiswa ziZibhalo. Yahluke gqitha yona imeko yabakhonzi bakaYehova! Lingakhathaliseki ilizwe esihlala kulo, okanye imvelaphi yethu, sinqula uThixo esimazi ngegama. Akangothixo ongubathathu emnye oyimfihlelo. (Duteronomi 6:4; INdumiso 83:18; Marko 12:29) Kwakhona siyazi ukuba imbambano eyintloko yolongamo lukaThixo lwendalo iphela sele iza kuzinziswa, yaye ngokugcina kwethu ingqibelelo kuye, ngamnye wethu ubandakanyekile kuloo mbambano. Siyayazi inyaniso ngemeko yabafileyo yaye asisenalo uloyiko lokuba uThixo uthuthumbisa abantu emlilweni wesihogo okanye abase kwindawo yentlambululo-miphefumlo.—INtshumayeli 9:5, 10.
5 Ngaphezu koko, sikuvuyela gqitha ukwazi ukuba asivelanga ngendaleko engenamkhondo! Kunoko, siyindalo kaThixo yaye senziwe ngokomfanekiso wakhe. (Genesis 1:26; Malaki 2:10) Umdumisi waculela uThixo wakhe wathi: “Ndiya kukubonga ngenxa yokuba ngendlela eyoyikekayo ndenziwe ngokumangalisayo. Imisebenzi yakho iyamangalisa, njengoko umphefumlo wam uqonda kakuhle.”—INdumiso 139:14.
6, 7. Luluphi utshintsho oye walwenza okanye lwenziwa ngabanye obaziyo oluye lwaba yintsikelelo?
6 Sikhululekile kwimikhwa nakuqheliselo oluyingozi. Amajelo osasazo akhupha izilumkiso ezininzi ngokuphathelele ubungozi bokutshaya, ukusela ngokugqithiseleyo nokuziphatha kakubi ngokwesini. Ubukhulu becala, ezi zilumkiso azithotyelwa. Kodwa kuthekani ukuba umntu onyanisekileyo ufunda ukuba uThixo wenyaniso uyazigatya ezi zinto yaye uba buhlungu xa sizenza? Kaloku, oko kumshukumisela ekubeni aziyeke! (Isaya 63:10; 1 Korinte 6:9, 10; 2 Korinte 7:1; Efese 4:30) Nangona eziyeka ngokuyintloko ukuze akholise uYehova uThixo, naye uyangenelwa—impilo yakhe iyaphucuka yaye uba noxolo lwengqondo.
7 Abaninzi bakufumanisa kunzima kakhulu ukuyeka imikhwa emibi. Sekunjalo, minyaka le abangamashumi amawaka bayayiyeka. Bazahlulela kuYehova baze babhaptizwe emanzini, ngaloo ndlela bebonisa esidlangalaleni ukuba baluyekile uqheliselo olungamkholisiyo uThixo. Hayi indlela okusikhuthaza ngayo sonke oko! Kuyaluqinisa uzimiselo lwethu lokuphepha uqheliselo lwesono oluyingozi.
8. Sisiphi isiluleko esiseBhayibhileni esiphumela ekubeni nentsapho eyonwabileyo?
8 Ubomi bentsapho obonwabisayo. Kumazwe amaninzi iintsapho azonwabanga. Imitshato emininzi iphelela kuqhawulo-mtshato, nto leyo edla ngokuzisa intlungu engathethekiyo kubantwana. Kwamanye amazwe aseYurophu, zingama-20 ekhulwini iintsapho ezinomzali omnye. Uye wasinceda njani uYehova ukuba sihambe engqibelelweni kule nkalo? Nceda ufunde eyabase-Efese 5:22–6:4, uze uphawule isiluleko esihle iLizwi likaThixo elisinika amadoda, abafazi nabantwana. Ngokuqinisekileyo ukusisebenzisa esi siluleko seZibhalo kuyawomeleza umtshato, kunceda abazali bakhulise abantwana ngendlela efanelekileyo, yaye kuphumela ekubeni nentsapho eyonwabileyo. Ngaba asiyontsikelelo esimele siyivuyele leyo?
9, 10. Imbono yethu ngekamva yahluke njani kuleyo yehlabathi?
9 Isiqinisekiso sokuba iingxaki zehlabathi ziza kuconjululwa kungekudala. Nangona kukho ulwazi oluninzi lwenzululwazi nobugcisa kwaneenkokeli ezithile ezenza imigudu enyanisekileyo, iingxaki ezinkulu zale mihla azikaconjululwa. UKlaus Schwab ongumseki weWorld Economic Forum, uye wathi kutshanje “iingxaki zehlabathi ziqhubeka zisanda yaye ixesha lokuzicombulula liyancipha.” Uthethe “ngeengozi ezichaphazela zonke iintlanga njengobugrogrisi, ukonakaliswa kwendalo nokuwohloka kwemeko yezoqoqosho.” Lo kaSchwab uqukumbele ngokuthi: “Ngoku kubaluleke ngakumbi kunangaphambili ukuba abantu babambisane ekulweni iingxaki zeli hlabathi.” Iziganeko zale nkulungwane yama-21 zenza libonakale limfiliba ikamva loluntu.
10 Kuvuyisa gqitha ukwazi ukuba uYehova wenze ilungiselelo lokuzicombulula zonke iingxaki zoluntu—uBukumkani bukaThixo obungoMesiya! Ngabo uThixo wenyaniso uza ‘kuphelisa iimfazwe,’ azise ‘uxolo oluninzi.’ (INdumiso 46:9; 72:7) UKumkani othanjisiweyo, uYesu Kristu, ‘uya kumhlangula kwingcinezelo lowo ulihlwempu, lowo uxhwalekileyo, nalowo unosizi.’ (INdumiso 72:12-14) Ngaphantsi kolawulo loBukumkani akuyi kubakho ukunqongophala kokutya. (INdumiso 72:16) UYehova “uya kuzisula zonke iinyembezi emehlweni [ethu], kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” (ISityhilelo 21:4) UBukumkani sele bumiselwe ezulwini yaye kungekudala buza kucombulula zonke iingxaki ezikhoyo emhlabeni.—Daniyeli 2:44; ISityhilelo 11:15.
11, 12. (a) Ngaba ukusukela uyolo kuzisa ulonwabo oluhlala luhleli? Cacisa. (b) Yintoni ezisa ulonwabo lokwenene?
11 Ukwazi umthombo wolonwabo lokwenene. Yintoni ezisa ulonwabo lokwenene? Esinye isazi ngengqondo sathi kukho iinkalo ezintathu ezingunobangela wolonwabo—uyolo, ukusebenza (empangelweni okanye entsatsheni), nokuba nosukelo (lokufikelela injongo ethile okanye lokunceda abanye). Kwezi nkalo zintathu, uluchaze uyolo njengolubaluleke kancinane kunezinye waza wathi: “Kuyamangalisa oku kuba abantu abaninzi bachitha ubomi babo befuna uyolo.” Ithini iBhayibhile kule nkalo?
12 UKumkani uSolomon wakwaSirayeli wamandulo wathi: “Ndathi mna entliziyweni yam: ‘Yiza, ke ndikulinge ngemihlali. Bona okulungileyo.’ Yaye, khangela! kwanaloo nto ingamampunge. Ndathi kohlekayo: ‘Akunangqondo!’ nakonemihlali: ‘Wenza ntoni na lo?’” (INtshumayeli 2:1, 2) Ngokutsho kweZibhalo, naluphi na ulonwabo oluziswa ziziyolo lolokwexeshana. Kuthekani ngokusebenza? Sibandakanyeke kowona msebenzi wanelisayo—umsebenzi wokushumayela ngoBukumkani nowokwenza abafundi. (Mateyu 24:14; 28:19, 20) Ngokwabelana nabanye ngesigidimi sosindiso esiseBhayibhileni, senza umsebenzi onokusisindisa thina nabo basiphulaphulayo. (1 Timoti 4:16) ‘Njengabasebenzi abangamadlelane kaThixo,’ siye sazibonela ukuba “kunoyolo ngakumbi ukupha kunokwamkela.” (1 Korinte 3:9; IZenzo 20:35) Lo msebenzi wenza sibe nenjongo ebomini yaye unika uMdali impendulo nxamnye nomgculeli wakhe, uSathana uMtyholi. (IMizekeliso 27:11) Ngokwenene, uYehova usibonisile ukuba uzinikelo lobuthixo luzisa ulonwabo lokwenene noluhlala luhleli.—1 Timoti 4:8.
13. (a) Kutheni iSikolo Sobulungiseleli Sobuthixo siyintsikelelo esimele siyivuyele? (b) Uye wangenelwa njani kwiSikolo Sobulungiseleli Sobuthixo?
13 Ucwangciso olubalulekileyo noluphumelelayo lokuqeqesha. UGerhard ungumdala kwibandla lamaNgqina kaYehova. Ekhumbula ixesha lobutsha bakhe, uthi: “Ekukhuleni kwam ndandinengxaki enkulu yokuthintitha. Xa ndixinezelekile, ndandingakwazi ukuphimisela kakuhle amagama ndize ndiqalise ukuthintitha. Ndaziva ndingabalulekanga ndaza ndadandatheka. Abazali bam bandisa kwisikolo sokufunda ukuthetha kodwa asizange sincede. Ingxaki yam yayisengqondweni, kungekhona emlonyeni. Kodwa lalikho ilungiselelo elimangalisayo elivela kuYehova—iSikolo Sobulungiseleli Sobuthixo. Ukubhalisa kwesi sikolo kwandenza ndaba nenkalipho. Ndazama ngamandla ukukusebenzisa oko ndikufundayo. Yaye kwandinceda oko! Ndathetha ngokutyibilikayo, kwaphela ukudandatheka, ndaza ndaba nenkalipho ngakumbi entsimini. Ngoku ndinikela neentetho zesidlangalala. Ndimbulela ngokwenene uYehova ngokundinika ubomi obutsha ngesi sikolo.” Ngaba ayisiniki isizathu sokuvuya indlela uYehova asiqeqesha ngayo ukwenza umsebenzi wakhe?
14, 15. Ngexesha lokubandezeleka, luluphi uncedo esinokulufumana? Zekelisa.
14 Ulwalamano lobuqu noYehova nenkxaso yabazalwana abasehlabathini lonke. UKatrin ohlala eJamani wakhathazeka gqitha akuva ngeenyikima zomhlaba ezinkulu ezaba ngunozala wetsunami kumzantsi-mpuma weAsia. Intombi yakhe yayityelele eThailand ekufikeni kwaloo ntlekele. Kangangeeyure ezingama-32 lo mama wayengazi enoba intombi yakhe yayisaphila okanye yayiphakathi kwamaxhoba elalisanda inani lawo yure nganye. Hayi indlela awavuya ngayo uKatrin xa ekugqibeleni wafumana umnxeba owawumqinisekisa ukuba intombi yakhe ikhuselekile!
15 Yintoni eyamncedayo uKatrin ebudeni bezo yure zokubandezeleka? Ubhala athi: “Phantse lonke eli xesha bendithandaza kuYehova. Ndiye ndaphawula ngokuphindaphindiweyo indlela okwakundinceda ngayo oko ukuba ndomelele yaye ndibe noxolo lwengqondo. Ngaphezu koko, ndatyelelwa ngabazalwana bokomoya baza bandikhuthaza.” (Filipi 4:6, 7) Ngeyayimbi gqitha imeko yakhe ukuba kwakuza kufuneka achithe ezo yure zentlungu ngaphandle kokuthandaza kuYehova nokuthuthuzelwa ngothando ngabazalwana bakhe bokomoya! Ulwalamano lwethu olunzulu noYehova noNyana wakhe kunye nokunxulumana kwethu nabazalwana abangamaKristu kuyintsikelelo ekhethekileyo, exabiseke gqitha ukuba ingathatyathwa njengento engenamsebenzi.
16. Chaza amava abonisa ukubaluleka kwethemba lovuko.
16 Ithemba lokuphinda sibabone abafileyo esibathandayo. (Yohane 5:28, 29) Umfana ogama linguMatthias wakhula eliNgqina likaYehova. Noko ke, akazange ayiqonde indlela awayesikeleleke ngayo, waza walishiya ibandla lamaKristu xa wayengaphezulwana kweminyaka elishumi ubudala. Ngoku ubhala athi: “Andizange ndikhe ndixoxe ngokunzulu notata. Kangangeminyaka sasisoloko sixambulisana. Sekunjalo, utata wayesoloko endinqwenelela okuhle. Wayendithanda kakhulu, nto leyo ndandingayiqondi ngelo xesha. Ngowe-1996, ngoxa ndandihleli ebhedini yakhe ndimbambe ngesandla yaye ndikhala kalusizi, ndamxelela indlela endandizisola ngayo ngazo zonke izinto endandizenza, ndaza ndamxelela nokuba ndandimthanda kakhulu. Kodwa wayegula gqitha kangangokuba wayengandiva. Emva kwethutyana wafa. Ukuba ndiqhubeka ndiphila ndize ndimbone utata eluvukweni, ndiza kumbonisa indlela endimthanda ngayo. Yaye ngokuqinisekileyo uya kukuvuyela ukwazi ukuba ngoku ndingumdala yaye mna nenkosikazi yam sikhonza njengoovulindlela.” Hayi indlela eliyintsikelelo ngayo kuthi ithemba lovuko!
“Akongezi Ntlungu Kuyo”
17. Kufanele kusincede njani ukucamngca ngeentsikelelo zikaYehova?
17 UYesu Kristu wathi ngoYise wasezulwini: ‘Ulenza ilanga lakhe liphume kubantu abangendawo nabalungileyo nemvula uyinisa kubantu abangamalungisa nabangengomalungisa.’ (Mateyu 5:45) Ukuba uYehova uThixo usikelela kwanabantu abangengomalungisa nabangendawo, kubekise phi ke kwabo bahamba engqibelelweni! INdumiso 84:11 ithi: “UYehova akayi kubandeza nantoni na elungileyo kwabo bahamba ngokungenamposiso.” Xa sicamngca ngenyameko ekhethekileyo ayibonisayo kwabo bamthandayo, iintliziyo zethu zizaliswa luvuyo!
18. (a) Sisiphi isizathu sokuba kuthiwe uYehova akongezi ntlungu kwintsikelelo yakhe? (b) Kutheni bebandezeleka nje abakhonzi abaninzi abanyanisekileyo bakaThixo?
18 “Intsikelelo kaYehova”—yiyo ebenze bachuma ngokomoya abantu bakhe. Yaye siqinisekile ukuba “akongezi ntlungu kuyo.” (IMizekeliso 10:22) Ngoko kutheni bebandezelwa luvavanyo nezilingo ezibuhlungu abakhonzi abanyanisekileyo bakaThixo? Ubunzima nokubandezeleka kubangelwa zizizathu ezithathu eziyintloko. (1) Lutyekelo lwethu lwesono. (Genesis 6:5; 8:21; Yakobi 1:14, 15) (2) NguSathana needemon zakhe. (Efese 6:11, 12) (3) Lihlabathi elingendawo. (Yohane 15:19) Nangona uYehova evumela ukuba sehlelwe zizinto ezimbi, azibangelwa nguye. Eneneni “sonke isipho esilungileyo naso sonke isipho esigqibeleleyo sivela phezulu, kuba sihla sivela kuYise wezikhanyiso zesibhakabhaka.” (Yakobi 1:17) Iintsikelelo zikaYehova azibangeli ntlungu.
19. Yintoni abanethemba layo abo baqhubeka behamba engqibelelweni?
19 Ukuchuma ngokomoya kusoloko kubandakanya ukusondela kuThixo. Xa sihlakulela ulwalamano olunzulu kunye naye, ‘siziqwebela isiseko esihle nesikhuselekileyo sekamva, esikhokelela kubomi benene’—ubomi obungunaphakade. (1 Timoti 6:12, 17-19) Kwihlabathi elitsha elizayo likaThixo siza kuba nobutyebi bokomoya kunye neentsikelelo zokwenyama. Bonke abo ‘baliphulaphulayo ilizwi likaYehova’ baya kunandipha ubomi bokwenene. (Duteronomi 28:2) Masizimisele ngakumbi ukuqhubeka ngovuyo sihamba engqibelelweni.
Ufunde Ntoni?
• Kutheni kungebobulumko ukucamngca ngokugqithiseleyo ngekamva?
• Ziziphi iintsikelelo esizinandiphayo ngoku?
• Kutheni bebandezeleka nje abakhonzi abathembekileyo bakaThixo?