Elona Phulo Likhulu Lokushumayela Kwawakha Enziwa Ehlabathini!
Sele kuyiminyaka engaphezu kwe-100 amaNgqina kaYehova eshumayela iindaba ezilungileyo. (1 Kor. 9:23) Kweli phulo lokushumayela lilelona likhulu kwakhe enziwa ehlabathini, sidlulisela esi sigidimi ngeelwimi ezininzi. Sishumayela kumazwe angaphezu kwama-230. (Mat. 24:14) Kutheni uyimfuneko nje lo msebenzi? Wenziwa njani kumazwe amaninzi ehlabathini?
Ividiyo ethi Jehovah’s Witnesses—Organized to Share the Good News iyayiphendula le mibuzo ngokubonisa iinkalo ezahlukeneyo zomsebenzi esiwenza kumazwe ngamazwe. Xa uyibukele, cinga ngale mibuzo: (1) Uhlengahlengiswa uze walathiswe njani umsebenzi wethu? (2) IWriting Department, iTranslation Services, iArt Department, neAudio/Video Services ziba negalelo njani ekushunyayelweni kweendaba ezilungileyo? (3) Iyintoni injongo yomsebenzi wethu omkhulu wokushicilela nowokuthumela uncwadi? (Yoh. 17:3) (4) Lungakanani uncwadi olushicilelwayo ngonyaka? (5) Yintoni eye yaphunyezwa luncwadi lwethu olusekelwe eBhayibhileni? (Heb. 4:12) (6) Yintoni eyenziwayo ukuze kuncedwe abantu abangaboniyo nabangevayo ngeendlebe? (7) Ivela phi imali yokuxhasa umsebenzi wethu? (8) Usinceda njani umsebenzi owenziwa yiHospital Information Services, liSebe Lenkonzo, neSebe Leendibano? (9) NjengeNgqina likaYehova, le vidiyo ikuncede njani (a) wawuqonda ngakumbi umzamo owenziwa yintlangano kaYehova ekushumayeleni iindaba ezilungileyo? (b) waziqonda ngakumbi iintsapho zaseBheteli ezingaphezu kwe-100 ehlabathini jikelele? (c) waqonda uqeqesho olufunyanwa ngabaveleli nabavangeli basemazweni? (d) waqonda ukubaluleka kokuqalisa usuku ngalunye ngokuhlola indinyana yeBhayibhile nokulungiselela iintlanganiso zebandla veki nganye? (e) waqonda iingenelo zokuya kwiintlanganiso nakwiindibano zamaKristu? (f) waqonda ukuba iza kuba njani iParadesi emhlabeni? (Isa. 11:9) (g) waqonda isizathu sokuba negalelo kumsebenzi oqhubekayo wokuvuna?—Yoh. 4:35.
Yintoni entle oye wayiphawula xa ububukele le vidiyo nezalamane, nabantu obaziyo, namabuyelo kunye nezifundo zeBhayibhile? Mus’ ukulibazisa ukuyibonisa abanye abantu uze ubachazele nangeendaba ezilungileyo.—Mat. 28:19, 20.