Iimbekiselo Zencwadi Yobomi BamaKristu Nomsebenzi Wokushumayela
JANUWARI 1-7
UBUTYEBI OBUPHUMA ELIZWINI LIKATHIXO | MATEYU 1-3
“UBukumkani Bamazulu Busondele.”
(Mateyu 3:1, 2) Ngaloo mihla kwafika uYohane umBhaptizi eshumayela entlango yelakwaYuda, 2 esithi: “Guqukani, kuba ubukumkani bamazulu busondele.”
Ingcaciso kaMateyu 3:1, 2
ukushumayela: Igama lesiGrike eliguqulelwe ngokuthi ukushumayela lithetha “ukuthetha nabantu ngezinto ozithunyiweyo.” Libethelela indlela ekufanele kushunyayelwe ngayo: esidlangalaleni kunokuba kushunyayelwa kwiqela labantu.
UBukumkani: Igama lesiGrike elithi, ba·si·leiʹa livela okokuqala, libhekisela kurhulumente wasebukhosini onommandla nabantu abalawulwa ngukumkani. Eli gama lesiGrike livela izihlandlo eziyi-162 kwiZibhalo ZamaKristu ZesiGrike, kwincwadi kaMateyu livela izihlandlo eziyi-55 ibe amaxesha amaninzi libhekisela kulawulo lukaThixo. Ngenxa yokuba uMateyu elisebenzisa kakhulu eli gama, iVangeli ayibhalileyo isenokubizwa ngokuba yiVangeli yoBukumkani.
UBukumkani bamazulu: Eli binzana livela izihlandlo ezimalunga neziyi-30 ibe lifumaneka kwiVangeli kaMateyu kuphela. KwiVangeli kaMarko nekaLuka, kusetyenziswa ibinzana elifanayo elithi, “uBukumkani bukaThixo” elibonisa ukuba “uBukumkani bukaThixo” bobasezulwini yaye bulawula busezulwini.—Mat 21:43; Mar 1:15; Luk 4:43; Dan 2:44; 2Ti 4:18.
busondele: apha kuboniswa ukuba uMlawuli woBukumkani bamazulu wayesele eza kufika.
(Mateyu 3:4) Ke uYohane lowo, isinxibo sakhe sasisesoboya benkamela, enombhinqo wethwathwa esinqeni sakhe; ukutya kwakhe nako kwakuziinkumbi nobusi basendle.
Umfanekiso
Isinxibo Nembonakalo KaYohane UmBhaptizi
UYohane wayenxiba impahla eyenzwe ngoboya benkamela, ebhinqa ibhanti lethwathwa. Wayenxiba ngendlela efanayo nomprofeti uEliya. (2Ku 1:8) Ilaphu elenziwe ngoboya benkamela laliqinile, linxitywa ngabantu abangamahlwempu. Zona iimpahla ezenzwe ngelaphu lesilika okanye elelinen zazinxitywa ngabantu abazizityebi. (Mat 11:7-9) Ngenxa yokuba uYohane wayengumNazarete, kusenokwenzeka ukuba iinwele zakhe azizange zichetywe. Iimpahla zakhe nendlela awayekhangeleka ngayo, kusenokwenzeka ukuba yayibonisa ukuba wayengenazinto zininzi ibe wayezinikele ngokupheleleyo kuThixo.
Iinkumbi
EBhayibhileni igama elithi “iinkumbi” libhekisela kulo naluphi na uhlobo lweentethe ezineempondo ezimfutshane, ngokukodwa ezo zihamba zingamaqela amakhulu. Ngokutsho kolunye uphando olwenziwe eYerusalem, iinkumbi zasentlango zine-75 pesenti yeproteni. Namhlanje ukuze zityiwe kufuneka kususwe intloko, imilenze, amaphiko nesisu. Isifuba sazo sityiwa sikrwada okanye siphekiwe. Xa uzitya ingathi utya imbaza okanye unonkala ibe zineproteni eninzi.
Ubusi Basendle
Lo mfanekiso ubonisa (1) indlwana yeenyosi zasendle ezibeka kuyo ubusi (2) nobusi beenyosi zasendle. Ubusi obabutyiwa nguYohane kusenokwenzeka ukuba babusenziwa ziinyosi zasendle ezibizwa ngokuba ziiApis mellifera syriaca. Ezi nyosi zinobungozi zihlala kwindawo eshushu neyomileyo entlango yakwaYuda kodwa azifuywa ngabantu. Kodwa ke, ngenkulungwane yesithoba abantu bakwaSirayeli ubusi beenyosi babebufaka kwingqayi eyenziwe ngodongwe. Kufunyenwe ezi ndlwana zakudala zeenyosi eTel Rehov, kwintlambo yakwaYuda. Ubusi obukwezi ndlwana babusenziwa ziinyosi ekusenokwenzeka zazisuka eTurkey.
Ukwemba Ubuncwane ObuseBhayibhileni
(Mateyu 1:3) UYuda wazala uPeretse noZera ngoTamare; uPeretse wazala uHetseron; uHetseron wazala uRam;
Ingcaciso kaMateyu 1:3
UTamare: Amabhinqa amahlanu okuqala akumnombo kaMesiya ekuthethwa ngawo kwincwadi kaMateyu. Amanye amane nguRahabhi noRute, omabini ayengengomaSirayeli (kwivesi 5); uBhatshebha ‘umfazi kaUriya’ (kwivesi 6) noMariya (kwivesi 16). La mabhinqa kudla ngokuthethwa ngawo kumnombo onamadoda odwa, kuba kukho into emangalisayo kwindlela ngamnye kuwo awaba ngukhokhokazi kaYesu ngayo.
(Mateyu 3:11) Mna ndinibhaptiza ngamanzi ngenxa yenguquko yenu; kodwa lowo uzayo emva kwam womelele kunam, ombadada zakhe ndingakufanelekelanga ukuzikhulula. Yena uya kunibhaptiza ngomoya oyingcwele nangomlilo.
Ingcaciso kaMateyu 3:11
ndinibhaptiza: Okanye ndinintywilisela. Igama lesiGrike elithi ba·ptiʹzo lithetha “ukutshonisa okanye ukuntywilisela.” Ezinye iiBhayibhile zibonisa ukuba ukubhaptiza kukuntywilisela ngokupheleleyo. UYohane wakha wabhaptiza kwintlambo yakwaYuda kufuphi naseSalim “kuba kwakukho amanzi amaninzi apho.” (Yoh 3:23) Xa uFilipu wabhaptiza ithenwa, bobabini “bangena emanzini.” (IZe 8:38) Kusetyenziswa igama lesiGrike elifanayo kwiSeptuagint xa kuthethwa ngeyesi-2Ku 5:14 xa uNahaman “wehla wangena eYordan izihlandlo ezisixhenxe.”
Ufundo LweBhayibhile
(Mateyu 1:1-17) Incwadi yembali kaYesu Kristu, unyana kaDavide, unyana ka-Abraham: 2 uAbraham wazala uIsake; uIsake wazala uYakobi; uYakobi wazala uYuda nabantakwabo; 3 uYuda wazala uPeretse noZera ngoTamare; uPeretse wazala uHetseron; uHetseron wazala uRam; 4 uRam wazala uAminadabhi; uAminadabhi wazala uNashon; uNashon wazala uSalmon; 5 uSalmon wazala uBhohazi ngoRahabhi; uBhohazi wazala uObhedi ngoRute; uObhedi wazala uYese; 6 uYese wazala uDavide ukumkani. UDavide wazala uSolomon ngomfazi kaUriya; 7 uSolomon wazala uRehobhoham; uRehobhoham wazala uAbhiya; uAbhiya wazala uAsa; 8 uAsa wazala uYehoshafati; uYehoshafati wazala uYehoram; uYehoram wazala u-Uziya; 9 u-Uziya wazala uYotham; uYotham wazala uAhazi; uAhazi wazala uHezekiya; 10 uHezekiya wazala uManase; uManase wazala uAmon; uAmon wazala uYosiya; 11 uYosiya wazala uYekoniya nabantakwabo ngexesha lokugxothelwa eBhabhiloni. 12 Emva kokugxothelwa eBhabhiloni uYekoniya wazala uShelatiyeliuShelatiyeli wazala uZerubhabheli; 13 uZerubhabheli wazala uAbhiwudi; uAbhiwudi wazala uEliyakim; uEliyakim wazala uAzore; 14 uAzore wazala uTsadoki; uTsadoki wazala uAkhim; uAkhim wazala uEliwudi; 15 uEliwudi wazala uEleyazare; uEleyazare wazala uMathan; uMathan wazala uYakobi; 16 uYakobi wazala uYosefu indoda kaMariya, awathi uYesu obizwa ngokuba nguKristu, wazalwa nguye. 17 Zonke izizukulwana, ngoko, ukususela kuAbraham kuse kuDavide yayizizizukulwana ezilishumi elinesine, yaye ukususela kuDavide kuse ekugxothelweni eBhabhiloni zizizukulwana ezilishumi elinesine, ukususela ekugxothelweni eBhabhiloni kuse kuKRISTU zizizukulwana ezilishumi elinesine.
JANUWARI 8-14
UBUTYEBI OBUPHUMA ELIZWINI LIKATHIXO | MATEYU 4–5
“Izinto Esizifunda Kwintshumayelo KaYesu YaseNtabeni”
(Mateyu 5:3) “Banoyolo abo bayiphapheleyo intswelo yabo yokomoya, kuba uBukumkani bamazulu bobabo.”
Ingcaciso kaMateyu 5:3
Banoyolo: Akuthethi nje ukuvuya komntu kuba enexesha elimnandi. Kunoko, xa kubhekiselwa ebantwini, kuthetha ukusikelelwa nguThixo nokuvuyiswa kukumkholisa. Eli gama likwachaza nokuba unjani uThixo noYesu kuzuko lwakhe lwasezulwini.—1Ti 1:11; 6:15.
abo bayiphapheleyo intswelo yabo yokomoya: Ibinzana lesiGrike elithi “abo bayiphapheleyo,” lithetha abantu abadingayo (abangenanto, abacelayo, abangqibayo), kwesi sibhalo libhekisela kwabo baqondayo ukuba bayadinga. Eli gama likwasetyenziswa ‘kumngqibi’ uLazaro okuLuka 16:20, 22. Ibinzana lesiGrike ezinye iinguqulelo ezidla ngokuliguqulela ngokuthi ‘intswelo yokomoya’ libhekisela ebantwini abaqondayo ukuba abanalwazi ngoThixo nabamfuna ngokunyanisekileyo.
(Mateyu 5:7) “Banoyolo abanenceba, kuba baya kwenzelwa inceba.
Ingcaciso kaMateyu 5:7
abanenceba: Ukusetyenziswa kwamagama eBhayibhileni athi, “abanenceba” nelithi “inceba” akuthethi nje ukuxolela okanye ukuba novelwano xa sigweba. La magama amaxesha amaninzi athetha ukuba nosizi nokuba novelwano ngabantu de senze okuthile ukuze sibancede.
(Mateyu 5:9) “Banoyolo abanoxolo, kuba baya kubizwa ngokuba ‘ngoonyana bakaThixo.
Ingcaciso kaMateyu 5:9
abanoxolo: Abo bangapheleli nje ekugcineni uxolo kodwa ababangela lubekhona apho lungekhoyo.
Fundisa Umntwana Wakho Ukuba Seluxolweni Nabanye
Abazali abangamaKristu banomdla wokwenene ekuqeqesheni abantwana babo ukuba ‘bafune uxolo, baluphuthume.’ (1 Petros 3:11) Ulonwabo olubakho xa umntu edala uxolo luwufanele umgudu ukuze loo mntu angarhaneli abanye, anxunguphale okanye abe nenzondo.
Ukwemba Ubuncwane ObuseBhayibhileni
(Mateyu 4:9) Wathi kuye: “Zonke ezi zinto ndokunika ukuba uthe wawa phantsi wanqula kum.”
Ingcaciso kaMateyu 4:9
wanqula kum: Isenzi sesiGrike esithi, “ukunqula” sasibonisa ukuba le nto yenzeka okwexeshana. Xa uSathana wathi ‘nqula kum’ kubonisa ukuba uMtyholi wayengafuni uYesu amnqule ngokuqhubekayo kodwa wayefuna ‘amnqule’ ngela xesha kuphela.
(Mateyu 4:23) Wandula ke walijikeleza lonke elaseGalili, efundisa kwizindlu zabo zesikhungu, eshumayela iindaba ezilungileyo zobukumkani kwaye ephilisa lonke uhlobo lwesifo nalo lonke uhlobo lobulwelwe ebantwini.
Ingcaciso kaMateyu 4:23
efundisa. . . eshumayela: Ukufundisa akufani nokushumayela kuba umntu ofundisayo akapheleli nje ekuxeleni izinto, uyayalela, uyacacisa, wenza umntu ayiqonde into ethile ibe uza nabo nobungqina.
Ufundo LweBhayibhile
(Mateyu 5:31-48) “Ngaphezu koko kwathiwa, ‘Nabani na oqhawula umtshato nomfazi wakhe, makamnike isiqinisekiso soqhawulo-mtshato.’ 32 Noko ke, ndithi kuni wonk’ ubani oqhawula umtshato nomfazi wakhe, ngaphandle kwangenxa yohenyuzo, umenza isisulu sokrexezo, yaye nabani na otshata umfazi oqhawule umtshato uyakrexeza. 33 “Kwakhona neva ukuba kwathiwa kwabo bamaxesha amandulo, ‘Uze ungafungi ungenzi, kodwa uze uzifezekise izibhambathiso zakho kuYehova.’ 34 Noko ke, ndithi kuni: Ningafungi konke konke, ngezulu, ngokuba liyitrone kaThixo; 35 nangomhlaba, ngokuba usisihlalo seenyawo zakhe; nangeYerusalem, ngokuba isisixeko soKumkani omkhulu. 36 Uze ungafungi nangentloko yakho, ngokuba akunakujika nalunye unwele lube mhlophe okanye lube mnyama. 37 Ke uEwe makabe nguEwe, uHayi wenu, abe nguHayi; kuba okugqithe koko kuvela kongendawo. 38 “Nivile ukuba kwathiwa, ‘Iliso ngeliso nezinyo ngezinyo.’ 39 Ke mna, ndithi kuni: Musani ukumchasa lowo ungendawo; kodwa othe wakumpakaza esidleleni sakho sasekunene, mphethulele nesinye. 40 Kwaye ukuba umntu ufuna ukukusa enkundleni ukuze akuhluthe isambatho sakho sangaphantsi, mnike nesangaphezulu; 41 yaye ukuba uthile onegunya ukunyanzela ukuba wenze inkonzo yemayile enye, hamba naye iimayile zibe mbini. 42 Mphe lowo ucelayo, yaye ungamnikeli umva lowo ufuna ukuboleka kuwe ngaphandle kwenzala. 43 “Nivile ukuba kwathiwa, ‘Uze umthande ummelwane wakho, uluthiye utshaba lwakho.’ 44 Ke mna, ndithi kuni: Qhubekani nizithanda iintshaba zenu, nibathandazele abo banitshutshisayo, 45 ukuze nizingqine ningoonyana boYihlo osemazulwini, ekubeni elenza ilanga lakhe liphume kubantu abangendawo nabalungileyo nemvula eyinisa kubantu abangamalungisa nabangengomalungisa. 46 Kuba ukuba nithanda abo banithandayo, ninamvuzo mni na? Abenzi kwaloo nto na nabaqokeleli berhafu? 47 Yaye ukuba nibulisa abazalwana benu kuphela, yintoni na into engaqhelekanga eniyenzayo? Abenzi kwaloo nto na nabantu beentlanga? 48 Ngako oko nimele nigqibelele, njengoko uYihlo osemazulwini egqibelele.
JANUWARI 15-21
UBUTYEBI OBUPHUMA ELIZWINI LIKATHIXO | MATEYU 6-7
“Qhubekani Nifuna Kuqala UBukumkani”
(Mateyu 6:10) Mabufike ubukumkani bakho. Makwenzeke ukuthanda kwakho nasemhlabeni, njengasezulwini.
Sondela KuThixo Ngomthandazo
12 Okona kubalulekileyo kukuba siqale ngokuthandazela iimeko ezinokuthanani noYehova uThixo. Ngokuqinisekileyo sinezizathu zokumdumisa nokumbulela ngokusuk’ entliziyweni ngako konke ukulunga kwakhe. (1 Kronike 29:10-13) Kumthandazo wakhe obhalwe kuMateyu 6:9-13, uYesu wasifundisa ukuba sithandazele ukuba igama likaThixo lingcwaliswe, oko kukuthi, liphathwe njengelingcwele. (Yifunde.) Yaye sithandazele nokuba uBukumkani bukaThixo bufike, nokuthanda kwakhe kwenziwe emhlabeni njengasezulwini. Kuphela kusemva kokuba sithandazele ezi zinto zibalulekileyo ziphathelele uYehova, apho uYesu wathi sinokwandula ke silandelise ngeemeko zobuqu ezisixhalabisayo. Ngoko ukuba nathi sibalaselisa uThixo njengoyena ubalulekileyo kwimithandazo yethu, siya kuba sibonisa ukuba asinamdla nje kuphela kwiziqu zethu.
(Mateyu 6:24) “Akukho bani unokukhonza iinkosi ezimbini; kuba usenokuyithiya enye aze ayithande enye, okanye anamathele kwenye aze ayidele enye. Aninakukhonza uThixo nobuTyebi.
Ingcaciso kaMateyu 6:24
unokukhonza: Isenzi sesiGrike esikukusebenza njengekhoboka sibhekisela kumntu onenkosi enye kuphela. Apha uYesu wayebonisa ukuba umKristu akanakuzinikela ngokupheleleyo kuThixo, nto leyo emfaneleyo, aze kwangaxeshanye azinikele ekuqokeleleni ubunewunewu.
(Mateyu 6:33) “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.
Ingcaciso kaMateyu 6:33
Qhubekani. . . nifuna: Isenzi sesiGrike sibonisa ukuba kufuneka ibe yinto eqhubekayo le, ibe sinokubekwa ngolu hlobo “Funani ngokuqhubekayo.” Abalandeli bokwenene bakaYesu abafuni uBukumkani kangangexesha elithile baze emva koko baleqe ezinye izinto. Kunoko, ifanele isoloko iyeyona nto iphambili ebomini babo leyo.
uBukumkani: Eminye imibhalo-ngqangi yakudala yesiGrike ifundeka ngolu hlobo, “uBukumkani bukaThixo.”
bakhe: Kubhekiselwa kuThixo, “uYihlo osemazulwini” ekuthethwa ngaye kuMat 6:32.
nobulungisa: Abo bafuna ubulungisa bukaThixo sele besenza ukuthanda kwakhe ibe bayayithobela imithetho yakhe yezinto amabazenze nabangamele bazenze. Le mfundiso ayifani neyabaFarisi, bona abamisela obabo ubulungisa.—Mat 5:20.
Funa UBukumkani, Kungekhona Izinto
18 Funda uMateyu 6:33. Abafundi bakaKristu bamele ngalo lonke ixesha babeke uBukumkani kwindawo yokuqala ebomini babo. Xa sisenza oko, “zonke ezinye izinto ziya kongezelelwa” kuthi, kanye njengoko uYesu watshoyo. Kutheni sisitsho nje? Wachaza wathi kwivesi engaphambili: “UYihlo osemazulwini uyazi ukuba ziyimfuneko kuni zonke ezi zinto,” oko kukuthi, izinto esizidingayo ebomini. UYehova ubona kusengaphambili xa siza kudinga ukutya, impahla okanye ikhusi, nkqu nangaphambi kokuba thina sikuqonde oko. (Fil. 4:19) Uyazi nokuba yiyiphi impahla yethu eza kuguga kungekudala. Uyazi ukuba kukuphi ukutya okunesondlo esikudingayo, kunye nendawo yokuhlala efanelekileyo enokulingana intsapho yethu. UYehova uya kuqinisekisa ukuba siyakufumana oko sikudinga ngokwenene.
Ukwemba Ubuncwane ObuseBhayibhileni
(Mateyu 7:12) “Zonke izinto, ngoko, enifuna abantu bazenze kuni, yenzani ngokunjalo nani kubo; oku, enyanisweni, koko kuthethwa nguMthetho nabaProfeti.
w14 5/15 iphe. 14-15 ¶isiqe. 14-16
Sebenzisa UMthetho Omkhulu Xa Ushumayela
14 Masithi ufowunelwa ngumntu ongamaziyo aze akubuze ngokutya okuthandayo. Uyazibuza ukuba ngubani lo ukufowunelayo, iyintoni kanye ayifunayo. Akufuni kuba krwada ngoko uthetha naye kangangexeshana uze uyiphelise loo ncoko. Kwelinye icala, masithi lo mntu uyazazisa ukuba ungubani nokuba umsebenzi wakhe kukunceda abantu batye ukutya okusempilweni. Ngokuqinisekileyo ubuya kummamela. Kaloku, sithanda ukuthetha nabantu abangqalayo xa bethetha nathi. Sinokukwenza njani oku kubantu esidibana nabo entsimini?
15 Kwiindawo ezininzi, kufuneka siyenze icace kumninimzi into esiyizeleyo. Liyinyaniso elokuba, sinenkcazelo eluncedo angenayo umninimzi, kodwa khawube nombono wethu, singazazisanga sisuke nje sibuze umninimzi: “Ukuba ubukwazi ukusombulula nayiphi na ingxaki emhlabeni, ubunokuqala ngayiphi?” Siyazi ukuba siwubuza lo mbuzo kuba sifuna ukwazi oko akucingayo size ke sibhekise incoko eBhayibhileni. Noko ke, umninimzi usenokuzibuza ukuba: ‘Ngubani lo mntu, ibe kutheni endibuza lo mbuzo? Kuqhubeka ntoni?’ Ngoko kufuneka simthobe ixhala umninimzi. (Fil. 2:3, 4) Singakwenza njani oku?
16 Omnye umveleli ohambahambayo wenza oku kulandelayo: Emva kokubulisa umninimzi, umnika ikopi yephecana elithi Ngaba Ungathanda Ukwazi Eyona Nyaniso? aze athi: “Sinika wonke umntu kule ngingqi namhlanje. Liphendula imibuzo emithandathu edla ngokubuzwa ngabantu. Nali elakho.” Lo mzalwana uthi abantu bayakhululeka xa besazi ukuba sizele ntoni na. Oko kwenza kube lula nokuqalisa incoko. Lo mzalwana uphinda ambuze athi umninimzi: “Ngaba wakha wazibuza omnye wale mibuzo?” Ukuba umninimzi uthi ewe, lo mzalwana uvula eli phecana aze achaze oko iBhayibhile ikutshoyo ngalo mbuzo. Ukuba uthi hayi, lo mzalwana ukhetha umbuzo aze aqhubeke nencoko engakhange amfake ekoneni umninimzi. Kakade ke, zininzi iindlela zokuqalisa incoko. Kwezinye iindawo, kufuneka silandele amasiko alapho xa sibulisa abantu ngaphambi kokuba sibachazele ngoko sikuzeleyo. Kufuneka siqonde ukuba kubalulekile ukulungisa indlela esisibeka ngayo isigidimi sethu ukuze sifanele abantu bendawo esishumayela kuyo.
(Mateyu 7:28, 29) Ke kaloku akuwagqiba uYesu la mazwi, zathi khamnqa izihlwele yindlela yakhe yokufundisa; 29 kuba wayefundisa njengomntu onegunya, kungekhona njengababhali bazo.
Ingcaciso kaMateyu 7:28, 29
zathi khamnqa: Isenzi sesiGrike esisetyenzisiweyo apha sinokuchazwa ngolu hlobo, “ukumangaliswa kakhulu ude uthi andiwuvali umlomo.” Esi senzi sikwimo eqhubekayo, sibonisa ukuba amazwi akhe ahlala kwisihlwele.
yindlela yakhe yokufundisa: Eli binzana libhekisela kwindlela uYesu awayefundisa ngayo, nto leyo equka oko wayekufundisa nendlela iNtshumayelo YaseNtabeni eyayenziwe ngayo.
kungekhona njengababhali bazo: Kunokuba acaphule koko kwakuthethwa ngoorabhi abahlonitshwayo, njengokuba babesenza ababhali, uYesu wayethetha njengommeli kaYehova, njengomntu onegunya, iimfundiso zakhe ezisekela kwiLizwi likaThixo.—Joh 7:16.
Ufundo LweBhayibhile
(Mateyu 6:1-18) “Lumkani ukuba ubulungisa benu ningabenzi phambi kwabantu ukuze nibonwe ngabo; kungenjalo aniyi kuba namvuzo kuYihlo osemazulwini. 2 Ngoko ke xa usenza izipho zenceba, musa ukuvuthela ixilongo phambi kwakho, kanye njengoko besenza abahanahanisi kwizindlu zesikhungu nasezitratweni, ukuze bazukiswe ngabantu. Inene ndithi kuni, Sebewufumene ngokupheleleyo umvuzo wabo. 3 Kodwa wena, xa usenza izipho zenceba, masingakwazi isandla sakho sasekhohlo okwenziwa sisandla sakho sasekunene, 4 ukuze izipho zakho zenceba zibe semfihlekweni; yaye uYihlo okhangela emfihlekweni uya kukubuyekeza. 5 “Xa nithandaza, nize ningabi njengabahanahanisi; ngokuba bathanda ukuthandaza bemi kwizindlu zesikhungu nakwiimbombo zeendlela eziphangaleleyo ukuze babonakale ebantwini. Inene ndithi kuni, Sebewufumene ngokupheleleyo umvuzo wabo. 6 Noko ke, wena, xa uthandaza, ngena egumbini lakho langasese uze, wakuba uluvalile ucango lwakho, uthandaze kuYihlo osemfihlekweni; yaye uYihlo okhangela emfihlekweni uya kukubuyekeza. 7 Kodwa xa uthandaza, ungaphindaphindani nento enye, njengokuba besenza abantu beentlanga, kuba becinga ukuba baya kuviwa ngenxa yokusebenzisa kwabo amazwi amaninzi. 8 Ngoko, ze ningafani nabo, kuba uThixo uYihlo uyakwazi enikusweleyo ningekamceli. 9 “Ngoko ke, nina nize nithandaze ngale ndlela: “‘Bawo wethu osemazulwini, malingcwaliswe igama lakho. 10 Mabufike ubukumkani bakho. Makwenzeke ukuthanda kwakho nasemhlabeni, njengasezulwini. 11 Siphe namhlanje isonka sethu sale mini; 12 uze usixolele amatyala ethu, njengokuba nathi sibaxolele abanamatyala kuthi. 13 Ungasingenisi ekuhendweni, kodwa sihlangule kulowo ungendawo.’ 14 “Kuba ukuba niyabaxolela abantu izigqitho zabo, noYihlo osemazulwini uya kunixolela; 15 kanti ukuba anibaxoleli abantu izigqitho zabo, noYihlo akayi kunixolela ezenu izigqitho. 16 “Xa nizila ukutya, musani ukuba lusizi ebusweni njengabahanahanisi, kuba bajika imbonakalo yobuso babo ukuze babonakale ebantwini ukuba bazile ukutya. Inene ndithi kuni, Sebewufumene ngokupheleleyo umvuzo wabo. 17 Kodwa wena, xa uzila ukutya, thambisa intloko yakho uze uhlambe ubuso bakho, 18 ukuze ubonakale uzile ukutya, kungekhona ebantwini, kodwa kuYihlo osemfihlekweni; aze uYihlo okhangela emfihlekweni akubuyekeze.
JANUWARI 22-28
UBUTYEBI OBUPHUMA ELIZWINI LIKATHIXO | MATEYU 8-9
“UYesu Wayebathanda Abantu”
(Mateyu 8:1-3) Akuba ehlile entabeni izihlwele ezikhulu zamlandela. 2 Kwaye, khangela! kweza umntu oneqhenqa waza waqubuda kuye, esithi: “Nkosi, ukuba nje uyathanda, unako ukundenza ndihlambuluke.” 3 Wasolula isandla sakhe, wamchukumisa, esithi: “Ndiyathanda. Hlambuluka.” Lahlambuluka ngoko nangoko iqhenqa lakhe.
Ingcaciso kaMateyu 8:3
wamchukumisa: UMthetho kaMoses wawusithi abantu abaneqhenqa bamele bahlale bodwa ukuze bangosuleli abanye abantu. (Lev 13:45, 46; Num 5:1-4) Sekunjalo, iinkokeli zonqulo zamaYuda zongeza eminye imithetho. Ngokomzekelo, kwakungekho mntu wayevumelekile ukuba asondele kumntu oneqhenqa kangangeemitha eziyi-1.8, kodwa xa kukho umoya, yayisiba ziimitha eziyi-45. Le mithetho yabangela ukuba baphathwe kabuhlungu abantu abaneqhenqa. Kudla ngokubaliswa ngorabhi owazimela abantu abaneqhenqa nangomnye owabagibisela ngamatye ukuze bangasondeli kuye. Ngokungafaniyo nabo, uYesu wayebasizela abantu abaneqhenqa nto leyo eyambangela wenza into amaYuda awayecinga ukuba ayisoze yenzeke—wamchukumisa. Wenza oko nangona wayenokumphilisa ngelizwi nje.—Mat 8:5-12.
Ndiyathanda: UYesu akazange aphelele nje ekusimameleni eso sicelo kodwa wayenza yacaca into yokuba ukufuna ngokunyanisekileyo ukunceda, nto leyo ebonisa ukuba wayengakujongi njengomsebenzi afanele kukuwenza nje qha ukunceda.
(Mateyu 9:9-13) Ngoxa wayedlula esuka apho, uYesu wabona indoda egama linguMateyu ihleli kwiofisi yerhafu, wathi kuyo: “Yiba ngumlandeli wam.” Wasuka ke waphakama wamlandela. 10 Kamva, ngoxa wayengqendeve etafileni endlwini, khangela! kwafika abaqokeleli berhafu naboni abaninzi baza bangqendeva noYesu nabafundi bakhe. 11 Kodwa bakubona oku abaFarisi bathi kubafundi bakhe: “Kutheni le nto umfundisi wenu esidla nabaqokeleli berhafu naboni?” 12 Ebeva, wathi: “Kubantu abasempilweni akufuneki gqirha, kodwa kwabagulayo uyafuneka. 13 Hambani, ngoko, nize nifunde okuthethwa koku, ‘Ndifuna inceba, kungekhona umbingelelo.’ Kuba ndize kubiza, kungekhona amalungisa, kodwa aboni.”
Ingcaciso kaMateyu 9:10
wayengqendeve etafileni: Okanye “wayehleli etafileni.” Ukuhlala nomntu etafileni kwakubonisa ukuba nisondelelene nalo mntu. Ngenxa yoko, amaYuda emihla kaYesu ayengasoze ahlale etafileni okanye atye nomntu ongengomYuda.
abaqokeleli berhafu: AmaYuda amaninzi ayeqokelelela abasemagunyeni baseRoma irhafu. Abantu babengawathandi la maYuda kuba ayengasebenzisani negunya lelinye ilizwe elingathandwayo nje kuphela kodwa ayeqokelela nerhafu engaphezu kwefunekayo. Abaqokeleli berhafu babengafunwa ngamaYuda, kuwo babefana naboni nonoongongo.—Mat 11:19; 21:32.
(Mateyu 9:35-38) Kwaye uYesu wanduluka wakhenketha zonke izixeko needolophana, efundisa kwizindlu zabo zesikhungu, eshumayela iindaba ezilungileyo zobukumkani yaye ephilisa lonke uhlobo lwesifo nalo lonke uhlobo lobulwelwe. 36 Akubona izihlwele wazisizela, ngenxa yokuba zazihlinzekile, zilahliwe njengezimvu ezingenamalusi. 37 Wandula ke wathi kubafundi bakhe: “Ewe, isivuno sikhulu, kodwa abasebenzi bambalwa. 38 Ngoko ke, bongozani iNkosi yesivuno ukuba ikhuphe abasebenzi baye esivunweni sayo.”
Ingcaciso kaMateyu 9:36
wazisizela: Isenzi sesiGrike esithi, khniʹzo·mai esisetyenziswa xa kuthethwa ngeli gama siyahambisana negama elithi, “amathumbu” (splagʹkhna), igama elichaza indlela umntu aziva ngayo ngaphakathi. Lelona gama linamandla lidla ngokusetyenziswayo kwisiGrike xa kuthethwa ngokuba novelwano.
Ukwemba Ubuncwane ObuseBhayibhileni
(Mateyu 8:8-10) Ekuphenduleni igosa lomkhosi lathi: “Mnumzana, andikufanelekelanga ukuba ungene phantsi kophahla lwam, kodwa yitsho nje ilizwi kwaye isicaka sam siya kuphiliswa. 9 Kuba nam ndinikwe igunya, ndinamajoni phantsi kwam, yaye ndithi kweli, ‘Hamba!’ lihambe, ndithi kwelinye, ‘Yiza!’ lize, ndithi kwikhoboka lam, ‘Yenza oku!’ likwenze.” 10 Akuva oko, uYesu wathi manga waza wathi kwabo babemlandela: “Inene ndithi kuni, Andifumananga lukholo lukhulu kangaka nakubani na kwaSirayeli.
w02 8/15 iphe. 13 ¶isiqe 16
“Ndinibekela Umzekelo”
16 Ngokufanayo, xa igosa lasemkhosini—mhlawumbi umntu weeNtlanga, umRoma—laya kuYesu laza lamcela ukuba aphilise ikhoboka lalo elaligula, uYesu wayesazi ukuba elo joni lalineziphoso. Kunokwenzeka ukuba igosa lasemkhosini ngezo mini lalikhe layindlobongela, laphalaza igazi yaye lakunqulo lobuxoki. Sekunjalo, uYesu wanikel’ ingqalelo kuphawu oluhle—ukholo lwale ndoda olubalaseleyo. (Mateyu 8:5-13) Kamva, xa uYesu wathetha nomenzi wobubi owayebethelelwe kumthi wentuthumbo ecaleni kwakhe, uYesu akazange ayikhalimele le ndoda ngenxa yobundlobongela bayo bangaphambili kodwa wayikhuthaza ngokuyithembisa ngekamva. (Luka 23:43) UYesu wayesazi kakuhle ukuba ukuhlaba amadlala, nokubagweba abanye kwakuza kubadimaza. Alithandabuzeki elokuba ukuzama ukukhangela iimpawu ezintle kwabanye kwakhuthaza abaninzi ukuba benze kakuhle nangakumbi.
(Mateyu 9:16, 17) Akukho bani uthungela isiziba selaphu elingarhwaqelanga phezu kwesambatho sangaphezulu esidala; kuba amandla aso apheleleyo aya kusitsala sisuke kwisambatho sangaphezulu yaye ukukrazuka kuya kuba kubi ngakumbi. 17 Nabantu abayifaki iwayini entsha kwiintsuba zewayini ezindala; kodwa ukuba benjenjalo, zandula ke iintsuba zewayini zigqabhuke ize iwayini iphalale neentsuba zewayini zonakale. Kodwa abantu bafaka iwayini entsha kwiintsuba zewayini ezintsha, kwaye zombini ezo zinto ziyagcinakala.”
jy-E 70 ¶6
Kutheni Abalandeli BakaYesu Bengakuzili Ukutya?
UYesu unceda abafundi bakaYohane umBhaptizi baqonde ukuba akukho mntu ufanele alindele ukuba abalandeli bakaYesu benze izinto ngendlela ezazisenziwa ngayo ngamaYuda akudala, njengokuzila ukutya. UYesu wayengazelanga kuyandisa indlela yakudala yokukhonza eyayisele iza kuyekwa. Indlela yokukhonza uYesu awayeyikhuthaza yayingeyiyo indlela esekelwe kwizithethe zamaYuda. UYesu akazami kupetsha impahla endala okanye ukugalela iwayini kwintsuba endala.
Ufundo lweBhayibhile
(Mateyu 8:1-17) Akuba ehlile entabeni izihlwele ezikhulu zamlandela. 2 Kwaye, khangela! kweza umntu oneqhenqa waza waqubuda kuye, esithi: “Nkosi, ukuba nje uyathanda, unako ukundenza ndihlambuluke.” 3 Wasolula isandla sakhe, wamchukumisa, esithi: “Ndiyathanda. Hlambuluka.” Lahlambuluka ngoko nangoko iqhenqa lakhe. 4 Wandula ke uYesu wathi kuye: “Qiniseka ukuba akuxeleli nabani na, kodwa hamba, uye kuzibonakalisa kumbingeleli, uze unikele isipho uMoses awasimiselayo, ngenjongo yokuba kube bubungqina kubo.” 5 Wathi akungena eKapernahum, kweza kuye igosa lomkhosi, limbongoza 6 lisithi: “Mnumzana, isicaka sam silele endlwini sife umzimba, sithuthunjiswa kanobom.” 7 Wathi kulo: “Xa ndifika apho ndiza kusiphilisa.” 8 Ekuphenduleni igosa lomkhosi lathi: “Mnumzana, andikufanelekelanga ukuba ungene phantsi kophahla lwam, kodwa yitsho nje ilizwi kwaye isicaka sam siya kuphiliswa. 9 Kuba nam ndinikwe igunya, ndinamajoni phantsi kwam, yaye ndithi kweli, ‘Hamba!’ lihambe, ndithi kwelinye, ‘Yiza!’ lize, ndithi kwikhoboka lam, ‘Yenza oku!’ likwenze.” 10 Akuva oko, uYesu wathi manga waza wathi kwabo babemlandela: “Inene ndithi kuni, Andifumananga lukholo lukhulu kangaka nakubani na kwaSirayeli. 11 Kodwa ndithi kuni baninzi abaya kuza bevela kwimimandla yasempumalanga nakwimimandla yasentshonalanga, bangqendeve etafileni noAbraham noIsake noYakobi ebukumkanini bamazulu; 12 kodwa bona oonyana bobukumkani baya kuphoselwa phandle ebumnyameni. Apho kuya kubakho ukulila nokutshixiza kwamazinyo abo.” 13 Wandula ke uYesu wathi kwigosa lomkhosi: “Hamba. Makwenzeke kuwe ngokokholo lwakho.” Kwaye isicaka saphiliswa kwangalo elo lixa. 14 Waza uYesu, akufika endlwini kaPetros, wabona umkhwekazi wakhe elele egula ngumkhuhlane. 15 Wachukumisa isandla sakhe, waphela umkhuhlane, waza wasukuma, wamlungiselela. 16 Kuthe ke kwakuhlwa, kwaziswa kuye abantu abaninzi abaneedemon; wabakhupha oomoya abo ngelizwi, waza wabaphilisa bonke ababephatheke kakubi, 17 ukuze kuzaliseke oko kwathethwa ngoIsaya umprofeti, esithi: “Yena wazithabathela kuye izigulo zethu, wathwala izifo zethu.”
JANUWARI 29–FEBRUWARI 4
UBUTYEBI OBUPHUMA ELIZWINI LIKATHIXO | MATEYU 10–11
“UYesu Wayebahlaziya Abantu”
(Mateyu 10:29, 30) Ngaba oongqatyana ababini abathengiswa ngengqekembe exabiso lincinane na? Kanti akukho namnye kubo oya kuwela emhlabeni ngaphandle kolwazi lukaYihlo. 30 Nina ke, kwaneenwele ezi zentloko yenu zibaliwe zonke.
Ingcaciso kaMateyu 10:29, 30
oongqatyana: Igama lesiGrike elithi strou·thiʹon libhekisela kuyo nayiphi na intaka encinane kodwa lisoloko libhekisela koongqatyana, eyona ntaka ithengiswa ngemali encinci ukuze ityiwe.
ngengqekembe exabiso lincinane: ingqekembe ekuthiwa yiassarion ilingana nomvuzo wemizuzu eyi-45. (Funda isihlomelo kuB14.) Kutyelelo lwakhe lwesithathu eGalili, uYesu uthi oongqatyana ababini balingana nengqekembe ekuthiwa yiassarion. Emva konyaka xa wayeyokushumayela kwaYuda, uYesu uthi oongqatyana abahlanu babeliphinda kabini eli xabiso. (Luk 12:6) Xa sithelekisa ezi Zibhalo, sifumanisa ukuba oongqatyana babengabizi mali ingako kangangokuba owesihlanu wawuwuphiwa.
kwaneenwele ezi zentloko yenu zibaliwe zonke: Inani leenwele entlokweni yomntu kuthiwa lingaphaya ko-100 000. Ukwazi kukaYehova ezo nkcukacha zincinci zinjalo kubonisa ukuba unomdla kumlandeli ngamnye kaKristu.
umfanekiso
Ungqatyana
Oongqatyana zezona ntaka zazithengiswa ngemali encinci ukuze zityiwe. Ababini kubo wawunokubathenga ngomvuzo womntu osebenze imizuzu eyi-45. Ibinzana lesiGrike libhekisela kuzo zonke iintaka ezincinane, kuquka ungqatyana oqhelekileyo ekuthiwa (yiPasser domesticus biblicus) nowaseSpeyin ekuthiwa (yiPasser hispaniolensis), abasebaninzi eIsrael.
(Mateyu 11:28) Yizani kum, nonke nina nibulalekayo nenisindwa ngumthwalo, yaye ndiza kunihlaziya.
Ingcaciso kaMateyu 11:28
nibulalekayo: Abo uYesu wathi mabeze ‘babesindwa ngumthwalo’ ongamaxhala nobunzima. Ukunqula uYehova kwakunzima ngenxa yezithethe zabantu ezazongezelelwe nguMthetho kaMoses, (Mat 23:4) KwaneSabatha, eyayifanele ihlaziye, yayiluxanduva.—Eks 23:12; Mar 2:23-28; Luk 6:1-11
ndiza kunihlaziya: Igama lesiGrike elithi ‘ukuhlaziya’ likwathetha ukuphumla (Mat 26:45; Mar 6:31) nokufumana isiqabu kubunzima ukuze uphinde ufumane amandla (2Ko 7:13; Flm 7) Apha ukuthabatha “idyokhwe” kaYesu (Mat 11:29) kuthetha ukukhonza kungekhona ukuphumla. Isenzi sesiGrike sisenza sibone ukuba uYesu uyabahlaziya abantu abasebunzimeni ukuze bakunqwenele ukuthabatha idyokhwe yakhe elula neyobubele.
(Mateyu 11:29, 30) Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu. 30 Kuba idyokhwe yam yeyobubele nomthwalo wam ukhaphukhaphu.”
Ingcaciso kaMateyu 11:29
Thabathani idyokhwe yam: Efuzisela, uYesu usebenzisa “idyokhwe” xa ethetha ngokuthobela igunya nokhokelo. Ukuba wayecinga ngokuba phantsi kwedyokhwe, njengoko naye wayephantsi kwedyokhwe kaThixo, loo nto ithetha ukuthi umema abafundi bakhe ukuba babe phantsi kwedyokhwe yakhe ibe wayeza kubanceda. Ngenxa yoko, eli binzana linokubekwa ngolu hlobo: “Yiba phantsi kwedyokhwe yam kunye nam.” Ukuba uYesu uthi abantu mababe phantsi kwedyokhwe yakhe, loo nto ithetha ukuba bafanele bathobele igunya nokhokelo lukaKristu njengabafundi bakhe.
Ukwemba Ubuncwane ObuseBhayibhileni
(Mateyu 11:2, 3) Kodwa uYohane, akuba evile esentolongweni ngemisebenzi kaKristu, wathumela ngabafundi bakhe 3 waza wathi kuye: “UnguLowo Uzayo na, okanye ngaba simele silindele omnye owahlukileyo na?”
jy-E 96 ¶2-3
UYohane Ufuna Ukuva KuYesu
Ngaba lo ngumbuzo ongafanele ubuzwe? UYohane yindoda ezinikeleyo, kuba xa wayebhaptiza uYesu kwiminyaka emibini edlulileyo wabona umoya kaThixo usihlela kuYesu ibe waliva ilizwi likaThixo elithi uyakholiswa nguye. Asinaso isizathu sokucinga ukuba uYohane wayenokholo olungomelelanga. Ukuba bekunjalo, uYesu ebengazi kuthetha kakuhle ngoYohane njengoko esenza kwesi sihlandlo. Kodwa ukuba uYohane uqinisekile, kutheni ebuza lo mbuzo?
Kusenokwenzeka ukuba uYohane wayefuna nje isiqinisekiso kuYesu sokuba unguMesiya. Oku kwakuza kumomeleza uYohane ekubeni wayesentolongweni. Phofu umbuzo kaYohane wawusengqiqweni. Wayeqhelene neziprofeto zeBhayibhile ezibonisa ukuba uMthanjiswa kaThixo wayeza kuba ngukumkani nomhlanguli. Kodwa kwiinyanga eziliqela emva kokuba uYesu wabhaptizwayo, uYohane usentolongweni. Ngoko uYohane wayebuza enoba kwakuza kubakho omnye umntu owayeza kuza, owayeza kungena ezihlangwini zikaYesu nowayeza kuzalisekisa konke oko kwakuthwe uMesiya uza kukuphumeza.
(Mateyu 11:16-19) “Ndiya kusithelekisa nabani na esi sizukulwana? Sinjengabantwana abaselula abahleli kwiindawo zemarike abadanduluka kubalingane babo abadlala nabo, 17 besithi, ‘Sanidlalela imbande, kodwa anizange ningqungqe; senza isijwili, kodwa anizange nizimbambazele nisentlungwini.’ 18 Ngokukwanjalo, uYohane weza engadli, engaseli, kanti abantu bathi, ‘Unedemon’; 19 uNyana womntu weza esidla, esela, ukanti abantu bathi, ‘Khangela! Umntu olidla-kudla nozinikela ekuseleni iwayini, umhlobo wabaqokeleli berhafu naboni.’ Noko kunjalo, ubulumko bungqineka bububulungisa ngemisebenzi yabo.”
jy-E 98 ¶1-2
Yeha Kwisizukulwana Esingenzi Nto
UYesu uthetha kakuhle ngoYohane umBhaptizi, kodwa abantu abaninzi bamjonga njani? UYesu uthi: “Esi sizukulwana sinjengabantwana abaselula abahleli kwiindawo zemarike abadanduluka kubalingane babo abadlala nabo, besithi, ‘Sanidlalela imbande, kodwa anizange ningqungqe; senza isijwili, kodwa anizange nizimbambazele nisentlungwini.’”—Mateyu 11:16, 17.
Utheth’ ukuthini uYesu? Ecacisa uthi: “UYohane weza engadli, engaseli, kanti abantu bathi, ‘Unedemon.’ UNyana womntu weza esidla, esela, ukanti abantu bathi, ‘Khangela! Umntu olidla-kudla nozinikela ekuseleni iwayini, umhlobo wabaqokeleli berhafu naboni.’” (Mateyu 11:18, 19) UYohane wayengenazinto zininzi njengomNaziri, engaseli newayini, sekunjalo esi sizukulwana sithi uneedemon. (Numeri 6:2, 3; Luka 1:15) Kwelinye icala, uYesu wayephila njengabanye abantu. Utya aze asele kakuhle, kodwa utyholwa ngokuba lidlaku-kudla. Kunzima ukukholisa abantu.
Ufundo LweBhayibhile
(Mateyu 11:1-19) Ke kaloku uYesu akugqiba ukunikela imiyalelo kubafundi bakhe abalishumi elinesibini, wanduluka apho ukuze afundise yaye ashumayele ezixekweni zabo. 2 Kodwa uYohane, akuba evile esentolongweni ngemisebenzi kaKristu, wathumela ngabafundi bakhe 3 waza wathi kuye: “UnguLowo Uzayo na, okanye ngaba simele silindele omnye owahlukileyo na?” 4 Ekuphenduleni uYesu wathi kubo: “Hambani nize nixele kuYohane oko nikuvayo noko nikubonayo: 5 Iimfama ziyabona kwakhona, neziqhwala ziyahambahamba, abaneqhenqa bayahlanjululwa nezithulu ziyeva, nabafileyo bayavuswa, nabangamahlwempu kuvakaliswa iindaba ezilungileyo kubo; 6 yaye unoyolo lowo ungakhubekiyo kum.” 7 Ngoxa bona babesendleleni, uYesu wathi kwizihlwele ngokuphathelele uYohane: “Naphuma nisiya kubona ntoni na entlango? Ingcongolo ilatyuziswa ngumoya? 8 Naphuma, ngoko, nisiya kubona ntoni na? Umntu owambethe izambatho ezimfumamfuma? Kaloku, abo banxiba izambatho ezimfumamfuma bakwizindlu zookumkani. 9 Ngokwenene, ngoko, kutheni naphumayo nje? Ukuya kubona umprofeti? Ewe, ndithi kuni, nokungaphezulu lee kunomprofeti. 10 Lo ngulowo kubhaliweyo ngaye kwathiwa, ‘Khangela! mna ndithumela umthunywa wam phambi kobuso bakho, oya kulungisa indlela yakho phambi kwakho!’ 11 Inene ndithi kuni, Phakathi kwabo bazelwe ngabafazi akuveliswanga omkhulu kunoYohane umBhaptizi; kodwa umntu omncinane ebukumkanini bamazulu mkhulu kunaye. 12 Kodwa ukususela kwimihla kaYohane umBhaptizi de kube ngoku abantu banosukelo lobukumkani bamazulu, yaye abo banolo sukelo bayabufumana. 13 Kuba bonke, abaProfeti noMthetho, baprofeta de yanguYohane; 14 yaye ukuba niyafuna ukukwamkela oko, Yena ngokwakhe ‘unguEliya omiselwe ukuza.’ 15 Lowo uneendlebe makaphulaphule. 16 “Ndiya kusithelekisa nabani na esi sizukulwana? Sinjengabantwana abaselula abahleli kwiindawo zemarike abadanduluka kubalingane babo abadlala nabo, 17 besithi, ‘Sanidlalela imbande, kodwa anizange ningqungqe; senza isijwili, kodwa anizange nizimbambazele nisentlungwini.’ 18 Ngokukwanjalo, uYohane weza engadli, engaseli, kanti abantu bathi, ‘Unedemon’; 19 uNyana womntu weza esidla, esela, ukanti abantu bathi, ‘Khangela! Umntu olidla-kudla nozinikela ekuseleni iwayini, umhlobo wabaqokeleli berhafu naboni.’ Noko kunjalo, ubulumko bungqineka bububulungisa ngemisebenzi yabo.”