Iimbekiselo Zencwadi Yobomi BamaKristu Nomsebenzi Wokushumayela
SEPTEMBA 3-9
UBUTYEBI OBUPHUMA ELIZWINI LIKATHIXO | YOHANE 1-2
“UYesu Wenza Ummangaliso Wokuqala”
(Yohane 2:1-3) Ke kaloku ngomhla wesithathu kwabakho itheko lomtshato eKana yaseGalili, yaye unina kaYesu wayelapho. 2 UYesu nabafundi bakhe babemenyiwe nabo kwelo theko lomtshato. 3 Yathi yakunganeli iwayini unina kaYesu wathi kuye: “Abanawayini.”
UKristu—Amandla KaThixo
Ummangaliso kaYesu wokuqala wawenza emtshatweni kwidolophu yaseKana. Nangona singasazi isizathu, iwayini ayizange ibanele bonke abantu ababezile. Kusenokwenzeka ukuba abatshati babexakiwe noba bazifihle phi ziintloni, kuba yayiyimbopheleleko yabo ukulungisa into etyiwayo. UMariya, unina kaYesu, wayengomnye wabantu ababemenyiwe. Xa wayecela uYesu ukuba ancede, ngaba wayekholelwa ukuba unawo amandla okunceda? Kaloku uMariya umele ukuba wacamngca ngazo zonke iziprofeto ezazibhekisa kunyana wakhe, esazi nokuba wayeza kubizwa ngokuthi “nguNyana wOyena Uphakamileyo.” (Luka 1:30-32; 2:52) Eyona nto siqiniseke ngayo kukuba uMariya noYesu babefuna ukubanceda aba batshati. Ngoko uYesu wenza ummangaliso, wajika iilitha eziyi-380 zamanzi zaba ‘yiwayini entle.’ (Funda uYohane 2:3, 6-11.) Ngaba kwakunyanzelekile ukuba uYesu enze lo mmangaliso? Hayi. Wawenza ngenxa yokuba ebakhathalele abantu, kwaye wayexelisa uYise, onesisa.
(Yohane 2:4-11) Kodwa uYesu wathi kuye: “Ndinantoni yakwenza nawe, mfazi? Ilixa lam alikafiki.” 5 Unina wathi kwabo balungiselelayo: “Nakuphi na anixelela kona, kwenzeni.” 6 Kwakukho iingqayi zamanzi zelitye ezintandathu zihleli apho njengoko kwakufuneka ngokwemithetho yokusulungekiswa yamaYuda, nganye inokungena imilinganiselo emibini okanye emithathu yamanzi. 7 UYesu wathi kubo: “Zizaliseni ngamanzi iingqayi zamanzi.” Kwaye bazizalisa ukusa eludinini. 8 Waza wathi kubo: “Yikhani intwana ngoku nize niyithabathe niyise kumalathisi wetheko.” Ngoko bayithabatha. 9 Akuwangcamla umalathisi wetheko amanzi awayejikwe aba yiwayini kodwa engawazi umthombo wayo, nangona abo balungiselelayo ababewakhile amanzi babesazi, umalathisi wetheko wabiza umyeni 10 waza wathi kuye: “Wonke omnye umntu ukhupha iwayini entle kuqala, aze xa abantu beyotyiwe, ibe yenganeno. Wena uye wayibeka iwayini entle de kwangoku.” 11 UYesu wakwenza oku eKana yaseGalili njengokuqala kwemiqondiso yakhe, yaye walubonakalisa uzuko lwakhe; baza abafundi bakhe bakholwa kuye.
jy-E 41 ¶6
Ummangaliso Wokuqala Awawenzayo
Lo ngummangaliso wokuqala uYesu awenzayo. Xa abafundi bakhe bewubona, ukholo lwabo luyomelela. Emva koko, uYesu, uMariya kunye nabantakwabo baya kunxweme olukumntla-ntshona loLwandle LwaseGalili.
Ukwemba Ubuncwane ObuseBhayibhileni
(Yohane 1:1) Ekuqaleni wayekho uLizwi, uLizwi wayekunye noThixo, yaye uLizwi wayenguthixo.
Inyaniso NgoYise, UNyana, NoMoya Oyingcwele
Ngokomzekelo, khawukhe uhlolisise oko akubhalayo ngokubhekele phaya uYohane kwisahluko 1, indinyana 18: “Akukho namnye umntu owakha wambona uThixo [uSomandla].” Kodwa abantu bambonile uYesu, uNyana, kuba uYohane uthi: “ULizwi [uYesu] ke waba ngumntu, waza wahlala phakathi kwethu. Sabubukela ubungangamsha bakhe.” (Yohane 1:14, IBhayibhile yesiXhosa yowe-1996) Ngoko, ingenzeka njani into yokuba uNyana abe yinxalenye kaThixo uSomandla? Kwakhona uYohane uthi uLizwi “wayekunye noThixo.” Ngoko ingenzeka njani into yokuba umntu abe kunye nomnye umntu aze kwangaxeshanye abe nguloo mntu? Ngaphezu koko, njengoko kubhalwe kuYohane 17:3, uYesu uwuchaza ngokucacileyo umahluko okhoyo phakathi kwakhe noYise wasezulwini. Umbiza uYise ngokuthi “ukuphela koThixo oyinyaniso.” Yaye ngasekupheleni kwale ncwadi yeVangeli, uYohane ushwankathela ngokuthi: “Iye yabhalwa phantsi ukuze nikholwe ukuba uYesu unguye uKristu uNyana kaThixo.” (Yohane 20:31) Phawula ukuba akathi uYesu nguThixo, kodwa uthi nguNyana kaThixo. Le nkcazelo yongezelelekileyo ekwincwadi yeVangeli kaYohane ibonisa indlela afanele aqondwe ngayo uYohane 1:1. UYesu, uLizwi, “nguthixo” ngengqiqo yokuba unesigxina esiphakamileyo, kodwa akalingani noThixo uSomandla.
(Yohane 1:29) Ngemini elandelayo wabona uYesu esiza ngakuye, waza wathi: “Yabonani, iMvana kaThixo esusa isono sehlabathi!”
ingcaciso kaYohane 1:29
iMvana kaThixo: Emva kokuba uYesu ebhaptiziwe waza wabuya ekulingweni nguMtyholi, uYohane umBhaptizi wambiza “iMvana kaThixo.” Ubizwa ngale ndlela kule vesi nakuYohane 1:36 kuphela. Kufanelekile ukuba uYesu afaniswe nemvana. Kuyo yonke iBhayibhile, izimvu zazisetyenziswa ukuze kuvunywe izono kwaye kufunyanwe nendlela yokusondela kuThixo. Le nto yayifuzisela umbingelelo owawuza kwenziwa nguYesu xa enikela ngobomi bakhe obufezekileyo ngenxa yabantu. Ibinzana elithi “iMvana kaThixo” lingabhekisa kwizicatshulwa ezininzi eziseBhayibhileni. Ngenxa yokuba uYohane umBhaptizi wayezazi iZibhalo ZesiHebhere, amazwi akhe asenokuba ayebhekise kwenye okanye kwezinye zezi zinto zilandelayo: inkunzi yegusha awanikela ngayo uAbraham kunokuba anikele ngonyana wakhe uIsake (Gen 22:13), imvana yePasika eyaxhelwa eYiputa ukuze kukhululwe amaSirayeli ebukhobokeni (Eks 12:1-13), okanye imvana eyinkunzi eyayinikelwa kwisibingelelo sikaThixo eYerusalem qho kusasa nangokuhlwa (Eks 29:38-42). Kusenokwenzeka ukuba uYohane wayecinga ngesiprofeto sikaIsaya, apho lowo uYehova ambiza ngokuthi “umkhonzi wam” kuthiwa “waziswa kanye njengemvu esiwa ekuxhelweni.” (Isa 52:13; 53:5, 7, 11) Xa umpostile uPawulos wabhala incwadi yakhe yokuqala eyayisiya kwabaseKorinte, wathi uYesu ‘yipasika yethu.’ (1Ko 5:7) Umpostile uPetros wathetha ‘ngegazi likaKristu elixabisekileyo, njengelo lemvana engenasiphako nengenabala.’ (1Pe 1:19) Ibe incwadi yeSityhilelo ichaza uYesu ozukisiweyo ‘njengeMvana’ amatyeli ayi-25.—Nantsi eminye imizekelo: ISi 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.
Ufundo LweBhayibhile
(Yohane 1:1-18) Ekuqaleni wayekho uLizwi, uLizwi wayekunye noThixo, yaye uLizwi wayenguthixo. 2 Ekuqaleni yena wayekunye noThixo. 3 Zonke izinto zabakho ngaye, yaye ngaphandle kwakhe akubangakho nanye into. Ngaye kuye kwabakho 4 ubomi, yaye ubomi babulukhanyiso lwabantu. 5 Ukhanyiso lukhanya ebumnyameni, kodwa ubumnyama abulongamelanga. 6 Kwavela umntu owayethunyiwe njengommeli kaThixo: igama lakhe yayinguYohane. 7 Lo mntu wezela ubungqina, ukuze anikele ubungqina ngalo ukhanyiso, ukuze abantu bazo zonke iintlobo bakholwe ngaye. 8 Yena wayengelulo olo khanyiso, kodwa wayemiselwe ukunikela ubungqina ngolo khanyiso. 9 Lowo ulukhanyiso lokwenyaniso olunikela ukukhanya kulo lonke uhlobo lomntu wayesele eza kuza ehlabathini. 10 Wayesehlabathini, yaye ihlabathi labakho ngaye, kodwa ihlabathi alizange limazi. 11 Weza kwikhaya lakhe, kodwa abantu bakowabo abamamkelanga. 12 Ke bonke abamamkelayo wabanika igunya lokuba ngabantwana bakaThixo, ngenxa yokuba babebonisa ukholo egameni lakhe; 13 yaye bazalwa, kungengagazi okanye ngakuthanda kwanyama okanye ngakuthanda kwandoda, kodwa nguThixo. 14 Ngoko uLizwi waba yinyama waza wahlala phakathi kwethu, yaye salubona uzuko lwakhe, uzuko olunjengolo lonyana okuphela kozelweyo nguyise; kwaye wayezele bububele obungasifanelanga nayinyaniso. 15 (UYohane wanikela ubungqina ngaye, ewe, okunene wadanduluka—lo ngulowo wakutshoyo oko—esithi: “Lowo uzayo emva kwam uye wadlulela phambi kwam, ngenxa yokuba wabakho ngaphambi kwam.”) 16 Kuba kuko ukuzala kwakhe sonke samkela, ububele obungasifanelanga phezu kobubele obungasifanelanga. 17 Ngenxa yokuba uMthetho wanikelwa ngoMoses, bona ububele obungasifanelanga nenyaniso zabakho ngoYesu Kristu. 18 Akukho mntu umbonileyo uThixo nangaliphi na ixesha; uthixo okuphela kozelweyo osesifubeni kuYise ngulowo umcacisileyo.
SEPTEMBA 10-16
UBUTYEBI OBUPHUMA ELIZWINI LIKATHIXO | YOHANE 3-4
“UYesu Ushumayeza UmSamariyakazi”
(Yohane 4:6, 7) Enyanisweni, umthombo kaYakobi wawulapho. Akuba uYesu ediniwe luhambo, wahlala enjalo ngasemthonjeni lowo. Kwakumalunga nelixa lesithandathu. 7 Umfazi waseSamariya weza kukha amanzi. UYesu wathi kuye: “Ndiphe ndisele.”
ingcaciso kaYohane 4:6
ediniwe: Kukule ndawo kuphela eBhayibhileni apho uYesu kuthiwa ‘udiniwe.’ Kwakumalunga no-12:00 emini, ibe kusenokwenzeka ukuba ngaloo ntsasa, uhambo lwakhe lwasuka kwiNtlambo YeYordan kwelakwaYuda, lwaya eSikare, eSamariya, ibe wayenyuke iqhina eliziimitha eziyi-900 nangaphezulu ukuphakama.—Yoh 4:3-5.
(Yohane 4:21-24) UYesu wathi kuye: “Ndikholelwe, mfazindini, Liyeza ilixa ekuya kuthi ngalo ningamnquli uBawo kule ntaba okanye eYerusalem. 22 Nina ninqula eningakwaziyo; thina sinqula esikwaziyo, kuba usindiso luphuma kumaYuda. 23 Noko ke, liyeza ilixa, nangoku selikho, xa abanquli bokwenyaniso baya kumnqula uBawo ngomoya nenyaniso, kuba, eneneni, uBawo ufuna abanjalo ukumnqula. 24 UThixo unguMoya, nabo bamnqulayo bamele banqule ngomoya nenyaniso.”
(Yohane 4:39-41) Ke kaloku abaninzi kumaSamariya eso sixeko bakholwa kuye ngenxa yelizwi lomfazi owangqina esithi: “Undixelele zonke izinto endizenzileyo.” 40 Akufika ke kuye amaSamariya, amcela ukuba ahlale nawo; waza wahlala apho iintsuku ezimbini. 41 Ngenxa yoko abaninzi ngakumbi bakholwa ngenxa yoko wakuthethayo,
Ukwemba Ubuncwane ObuseBhayibhileni
(Yohane 3:29) Lowo unomtshakazi ngumyeni. Noko ke, umhlobo womyeni, xa emile aze amve, uba novuyo olukhulu ngenxa yelizwi lomyeni. Ngoko ke olu vuyo lwam luzalisiwe.
ingcaciso kaYohane 3:29
umhlobo womyeni: Ngexesha lokubhalwa kweBhayibhile, umhlobo osondeleyo womyeni wayesiba ngummeli wakhe kwezomthetho kwaye wayenendima ebalulekileyo kumalungiselelo omtshato. Wayejongwa njengoyena mntu udibanise umtshakazi nomyeni. Ngosuku lomtshato, abantu bakulomtshakazi babesiya kulomyeni okanye kwindlu yomyeni, apho laliza kuqhutyelwa khona itheko lomtshato. Ebudeni besi sidlo, umhlobo womyeni wayevuya xa esiva ilizwi lomyeni encokola nomtshakazi wakhe, kuba wayevakalelwa kukuba uwenze kakuhle umsebenzi wakhe. UYohane umBhaptizi wazifanisa ‘nomhlobo womyeni.’ UYesu wayefuzisela umyeni, abafundi bakhe njengeqela bona befuzisela umtshakazi wakhe. NguYohane umBhaptizi owadibanisa amalungu okuqala ‘omtshakazi’ noYesu Kristu, evulela uMesiya indlela. (Yoh 1:29, 35; 2Ko 11:2; Efe 5:22-27; ISi 21:2, 9) Xa “umhlobo womyeni” emdibanise nomtshakazi wakhe, wayewugqibile owakhe umsebenzi; emva koko wayerhoxa aze ayekele kwabo batshatayo. NoYohane ke wathi ngaye noYesu: “Lowo umele aqhubeke esanda kodwa mna ndimele ndiqhubeke ndincipha.”—Yoh 3:30.
(Yohane 4:10) Ekuphenduleni uYesu wathi kuye: “Ukuba ubusazi isipho sesisa sikaThixo nokuba ngubani na lo uthi kuwe, ‘Ndiphe ndisele,’ unge ucele kuye wena, wakupha amanzi aphilayo.”
ingcaciso kaYohane 4:10
amanzi aphilayo: Igama lesiGrike eliguqulelwe apha ngokoqobo lithetha amanzi aqukuqelayo, amanzi omthombo, okanye amanzi equla avela emithonjeni. Ahlukile kumanzi agcinwe etankini. KwiLevitikus 14:5, ibinzana lesiHebhere eliguqulelwe ngokuthi “kwamanzi aqukuqelayo” ngokoqobo lithetha “amanzi aphilayo.” KuYeremiya 2:13 nakwisahluko 17:13, uYehova uchazwa ‘njengomthombo wamanzi aphilayo,’ ngamany’ amazwi, amanzi omfuziselo anika ubomi. Xa uYesu wayethetha nomSamariyakazi, wasebenzisa ibinzana elithi “amanzi aphilayo” ngelifuziselayo, kodwa kubonakala ngathi umSamariyakazi wayecinga ukuba ngamanzi okoqobo.—Yoh 4:11.
Ufundo LweBhayibhile
(Yohane 4:1-15) Ke kaloku xa iNkosi yaqondayo ukuba abaFarisi bavile ukuba uYesu wayesenza aze abhaptize abafundi abangakumbi kunoYohane— 2 nangona, eneneni, uYesu wayengabhaptizi kodwa ngabafundi bakhe ababesenjenjalo— 3 yalishiya elakwaYuda yaza yemka kwakhona isiya eGalili. 4 Kodwa kwakuyimfuneko ngayo ukuba idlule eSamariya. 5 Ngako oko yafika kwisixeko saseSamariya esibizwa ngokuba yiSikare kufuphi nentsimi kaYakobi awayinika uYosefu unyana wakhe. 6 Enyanisweni, umthombo kaYakobi wawulapho. Akuba uYesu ediniwe luhambo, wahlala enjalo ngasemthonjeni lowo. Kwakumalunga nelixa lesithandathu. 7 Umfazi waseSamariya weza kukha amanzi. UYesu wathi kuye: “Ndiphe ndisele.” 8 (Kuba abafundi bakhe babeye esixekweni ukuya kuthenga into etyiwayo.) 9 Ngoko ke umfazi ongumSamariya wathi kuye: “Kwenzeka njani ukuba wena, phezu kwako nje ukuba ungumYuda, ucele kum into eselwayo, ndakuba mna ndingumfazi ongumSamariya?” (Kuba amaYuda akanazinkqubano namaSamariya.) 10 Ekuphenduleni uYesu wathi kuye: “Ukuba ubusazi isipho sesisa sikaThixo nokuba ngubani na lo uthi kuwe, ‘Ndiphe ndisele,’ unge ucele kuye wena, wakupha amanzi aphilayo.” 11 Wathi kuye: “Mnumzana, akunayo ne-emele le yokukha amanzi, nequla linzulu. Asuka kuwuphi umthombo, ke ngoko, la manzi aphilayo onawo? 12 Akukho mkhulu ngakumbi kunokhokho wethu uYakobi, owasinika eli qula awayesela kulo yena noonyana bakhe neenkomo zakhe, andibi kunjalo?” 13 Ekuphenduleni uYesu wathi kuye: “Wonk’ ubani osela kula manzi uya kunxanwa kwakhona. 14 Nabani na osela kumanzi endiza kumpha wona akasayi kuze anxanwe konke konke, kodwa kuye amanzi endiya kumnika wona aya kuba ngumthombo wamanzi ampompozayo anika ubomi obungunaphakade.” 15 Lo mfazi wathi kuye: “Mnumzana, ndinike la manzi, khon’ ukuze ndinganxanwa yaye ndingahlali ndisiza kule ndawo ukuza kukha amanzi.”
SEPTEMBA 17-23
UBUTYEBI OBUPHUMA ELIZWINI LIKATHIXO | YOHANE 5-6
“Landela UYesu Unenjongo Entle”
(Yohane 6:9-11) “Kukho inkwenkwana apha enezonka ezihlanu zerhasi neentlanzi ezimbini ezincinane. Kodwa ziyintoni na ezi phakathi kwabaninzi kangaka?” 10 UYesu wathi: “Bangqendeviseni abantu njengasesidlweni.” Ke kaloku kwakukho ingca eninzi kuloo ndawo. Angqendeva ke ngoko amadoda, emalunga namawaka amahlanu ngenani. 11 Ngoko uYesu wazithabatha izonka waza, emva kokubulela, wazabela abo babengqendevile, kwangokunjalo neentlanzi ezincinane kangangoko babefuna.
ingcaciso kaYohane 6:10
Angqendeva ke ngoko amadoda, emalunga namawaka amahlanu ngenani: NguMateyu yedwa owongeza amazwi athi “ngaphandle kwabafazi nabantwana abaselula” xa ebalisa ngalo mmangaliso. (Mat 14:21) Kungenzeka ukuba bebonke abantu abondliwa ngommangaliso babengaphaya kwe-15 000.
(Yohane 6:14) Ngoko ke abantu bakubona imiqondiso ayenzileyo, bathi: “Lo ngokuqinisekileyo ngumprofeti owayeza kuza ehlabathini.”
(Yohane 6:24) Ngoko isihlwele, sakubona ukuba uYesu akakho apho bengekho nabafundi bakhe, sakhwela izikhephe zaso ezincinane saya eKapernahum ukuya kufuna uYesu.
ingcaciso kaYohane 6:14
ngumprofeti: AmaYuda amaninzi exesha likaYesu ayelindele ukuba lo mprofeti onjengoMoses, ekuthethwe ngaye kwiDuteronomi 18:15, 18, wayeza kuba nguMesiya. Ngoko ibinzana elithi owayeza kuza ehlabathini kubonakala ngathi lithetha ngokubonakala kukaMesiya okwakulindelwe ngelo xesha. NguYohane yedwa owabhala ngeziganeko ekuthethwa ngazo kule vesi.
(Yohane 6:25-27) Ngoko sakumfumana phesheya kolwandle sathi kuye: “Rabhi, ufike nini apha?” 26 UYesu wasiphendula waza wathi: “Inene, inene, ndithi kuni, Nindifuna, kungekhona ngenxa yokuba nabona imiqondiso, kodwa ngenxa yokuba nadla ezonkeni naza nanela. 27 Sebenzelani, kungekhona ukutya okutshabalalayo, kodwa ukutya okuhlala kuse ebomini obungunaphakade, aya kuninika kona uNyana womntu; kuba uBawo, uThixo kanye, ubeke kuye lo itywina lakhe lenkoliseko.”
(Yohane 6:54) Lowo utya inyama yam aze asele igazi lam unobomi obungunaphakade, yaye ndiya kumvusa ngomhla wokugqibela;
(Yohane 6:60) Ngoko ke abaninzi kubafundi bakhe, bakukuva oku, bathi: “Le ntetho iyothusa; ngubani na onako ukuyiphulaphula?”
(Yohane 6:66-69) Ngenxa yoko abaninzi kubafundi bakhe baphindela kwizinto ezisemva baza ababi sahamba naye. 67 Ngoko ke uYesu wathi kwabalishumi elinesibini: “Ngaba nani nifuna ukumka?” 68 USimon Petros wamphendula wathi: “Nkosi, siya kumka siye kubani na? Nguwe onamazwi obomi obungunaphakade; 69 yaye sikholiwe saza safikelela ekwazini ukuba wena unguLowo Ungcwele kaThixo.”
iingcaciso zikaYohane 6:27, 54
ukutya okutshabalalayo . . . ukutya okuhlala kuse ebomini obungunaphakade: UYesu wayesazi ukuba abanye abantu babezisondeza kuye nakubafundi bakhe kuba bencwase amaqithiqithi athile. Ewe kona ukutya kokoqobo kubagcina bephila abantu imihla ngemihla, kodwa ‘kukutya’ okuphuma kwiLizwi LikaThixo okuya kwenza abantu baphile ngonaphakade. UYesu ucenga isihlwele esithi masisebenzele “ukutya okuhlala kuse ebomini obungunaphakade,” ngamany’ amazwi, sizame ngamandla ukusondela kuThixo nokuba nokholo kwizinto esizifundayo.—Mat 4:4; 5:3; Yoh 6:28-39.
utya inyama yam aze asele igazi lam: Ingcombolo yala mazwi ibonisa ukuba le nto abantu babeza kuyenza ngokufuziselayo ngokuthi babe nokholo kuYesu Kristu. (Yoh 6:35, 40) UYesu wawathetha la mazwi ngo-32 C.E., ngoko akanakuba wayethetha ngeSidlo SeNkosi Sangokuhlwa, awasisungula ngonyaka olandelayo. Wawathetha ngaphambili nje kokuba kufike “ipasika, umthendeleko wamaYuda” (Yoh 6:4), ngoko kusenokwenzeka ukuba abantu ababemmamele batsho bawukhumbula lo mthendeleko ukuba usondele bakhumbula nokuba igazi lemvana lalibalulekile ukuze kusindiswe ubomi babantu ngobusuku amaSirayeli awemka ngabo eYiputa (Eks 12:24-27). UYesu wayebethelela into yokuba nelakhe igazi laliza kubaluleka kakhulu ukuze abafundi bakhe bafumane ubomi obungunaphakade.
Siza Kuhamba Egameni LikaYehova UThixo Wethu
Noko ke, isihlwele samlandela uYesu saza samfumana “phesheya kolwandle,” ngokutsho kwengxelo kaYohane. Kwakutheni ukuze simlandele emva kokwala kwakhe ukwenziwa ukumkani? Abaninzi babenembono yokwenyama, bebalaselisa ukuvelisa kukaYehova ukutya entlango ngomhla kaMoses. Babenomdla wokuba uYesu aqhubeke ebanika ukutya. Ekubeni uYesu wayeziqonda iintshukumisa zabo eziphosakeleyo, waqalisa ukubafundisa inyaniso eyayiza kubanceda balungise indlela ababecinga ngayo. (Yohane 6:17, 24, 25, 30, 31, 35-40) Abanye abazange bakuthande oko, ingakumbi xa wenza umzekeliso othi: “Inene, inene, ndithi kuni, Ngaphandle kokuba nitya inyama yoNyana womntu nize nisele igazi lakhe, aninabo ubomi kuni. Lowo utya inyama yam aze asele igazi lam unobomi obungunaphakade, yaye ndiya kumvusa ngomhla wokugqibela.”—Yohane 6:53, 54.
Imizekeliso kaYesu yayidla ngokushukumisela abantu ukuba babonise enoba babenomdla wokuhamba noThixo kusini na. Kwakunjalo nangalo umzekeliso. Wabacaphukisa gqitha abanye. Sifunda oku: “Abaninzi kubafundi bakhe, bakukuva oku, bathi: ‘Le ntetho iyothusa; ngubani na onako ukuyiphulaphula?’” UYesu wabachazela ukuba babefanele bafune intsingiselo yokomoya yamazwi akhe. Wathi: “Ngumoya onika ubomi; inyama ayisebenzi nto konke konke. Amazwi endiwathethileyo kuni angumoya yaye abubomi.” Sekunjalo, abaninzi abazange baphulaphule, njengokuba ingxelo ibonisa isithi: “Ngenxa yoko abaninzi kubafundi bakhe baphindela kwizinto ezisemva baza ababi sahamba naye.”—Yohane 6:60, 63, 66.
Ukwemba Ubuncwane ObuseBhayibhileni
(Yohane 6:44) Akukho mntu unako ukuza kum ngaphandle kokuba uBawo, owandithumayo, amtsale; yaye ndiza kumvusa ngomhla wokugqibela.
ingcaciso kaYohane 6:44
amtsale: Nangona isenzi sesiGrike esithi “tsala” sisetyenziswa naxa kuthethwa ngokutsala umnatha oneentlanzi (Yoh 21:6, 11), loo nto ayithethi kuthi uThixo ubatsala ngenkani abantu bengafuni. Esi senzi sikwathetha “ukuba nomtsalane,” ibe kusenokwenzeka ukuba uYesu wayecinga ngoYeremiya 31:3, apho uYehova wayesithi kuSirayeli: “Ndikutsalile ngobubele bothando.” (NeSeptuagint isebenzisa isenzi esifanayo sesiGrike.) UYohane 12:32 ubonisa ukuba noYesu utsala abantu bazo zonke iintlobo. IZibhalo zibonisa ukuba uYehova unike abantu inkululeko yokuzikhethela. Wonke umntu uyazikhethela ukumkhonza. (Dut 30:19, 20) UThixo ubatsala ngobunono abantu abanotyekelo olufanelekileyo. (Nd 11:5; IMi 21:2; IZe 13:48) Ubatsala ngomyalezo weBhayibhile nangomoya wakhe oyingcwele. Isiprofeto esikuIsaya 54:13, esicatshulwe kuYohane 6:45, sisebenza kubantu abatsalwe nguBawo.—Thelekisa noYohane 6:65.
(Yohane 6:64) Kodwa kukho abathile kuni abangakholwayo.” Kuba ukususela ekuqaleni uYesu wayesazi ukuba ngoobani na abo babengakholwa nokuba ngubani na lowo wayeya kumngcatsha.
iingcaciso zikaYohane 6:64
uYesu wayesazi ukuba . . . ngubani na lowo wayeya kumngcatsha: UYesu wayethetha ngoYudas Skariyoti. UYesu wachitha ubusuku bonke ethandaza kuYise ngaphambi kokukhetha abapostile bakhe abayi-12. (Luk 6:12-16) Ekuqaleni, uYudas wayethembekile kuThixo. Kodwa uYesu wayeve kwiziprofeto ezikwiZibhalo ZesiHebhere ukuba wayeza kungcatshwa ngumntu osondeleyo kuye. (Nd 41:9; 109:8; Yoh 13:18, 19) Xa uYudas waqalisa ukuphuma endleleni, uYesu wambona, kuba wayekwazi ukubona izinto ezisezintliziyweni nasezingqondweni zabantu. (Mat 9:4) UThixo wasebenzisa amandla akhe okwazi izinto kwangaphambili ukuze abone ukuba uYesu wayeza kungcatshwa ngumntu amthembileyo. Kodwa xa sijonga ubuntu bukaThixo nendlela awayeqhubana ngayo nabantu asinakukwazi ukucinga ukuba wayigqiba kwangaphambili into yokuba ibe nguYudas oba ngumngcatshi.
ukususela ekuqaleni: Apha akuthethwa ngokuzalwa kukaYudas okanye ngexesha uYesu awammisela ngalo ukuba abe ngumpostile emva kokuba ethandaze ubusuku bonke. (Luk 6:12-16) Kunoko, kuthethwa ngexesha awaqalisa ngalo ukwenza izinto ezimbi, waza uYesu wambona ngoko nangoko. (Yoh 2:24, 25; ISi 1:1; 2:23) Le nto ibonisa ukuba uYudas wayezicingile waza waziceba izinto awayezenza, akazange avele atshintshe nje. Igama eliguqulelwe ngokuthi “ekuqaleni” (ngesiGrike, ar·kheʹ), kwiZibhalo ZamaKristu ZesiGrike lixhomekeka kuloo nto kuthethwa ngayo. Ngokomzekelo, kweyesi-2 kaPetros 3:4, igama elithi “njengasekuqaleni” lithetha ngokuqala kwendalo. Kodwa kumaxesha amaninzi, lisetyenziswa ngenye indlela. Ngokomzekelo, uPetros wathi umoya oyingcwele wawela phezu kwabeeNtlanga “kanye njengoko wawenjenjalo naphezu kwethu ekuqaleni.” (IZe 11:15) UPetros wayengathethi ngexesha awazalwa ngalo okanye ngexesha awaba ngumpostile ngalo. Kunoko, wayethetha ngomhla wePentekoste ka-33 C.E., xa umoya oyingcwele ‘wawuqala’ ukuthululwa ngenjongo ethile. (IZe 2:1-4) Eminye imizekelo yendlela igama elithi “ekuqaleni” elisetyenziswa ngayo ngokuxhomekeka kuloo nto kuthethwa ngayo ifumaneka kuLuka 1:2; kuYohane 15:27; nakweyoku-1 kaYohane 2:7.
Ufundo LweBhayibhile
(Yohane 6:41-59) Ngoko ke amaYuda ambombozela ngenxa yokuba ethe: “Ndim isonka esehla sivela ezulwini”; 42 aza athi: “Lo asinguye na uYesu unyana kaYosefu, oyise nonina esibaziyo? Kwenzeka njani ke ngoku ukuba athi, ‘Ndihle ndivela ezulwini’?” 43 Ekuphenduleni uYesu wathi kuwo: “Musani ukumbombozela. 44 Akukho mntu unako ukuza kum ngaphandle kokuba uBawo, owandithumayo, amtsale; yaye ndiza kumvusa ngomhla wokugqibela. 45 Kubhaliwe ebaProfetini kwathiwa, ‘Kwaye bonke baya kufundiswa nguYehova.’ Wonk’ ubani omvileyo uBawo waza wafunda uyeza kum. 46 Akukho mntu umbonileyo uBawo, ngaphandle kwalowo uvela kuThixo; lowo yena umbonile uBawo. 47 Inene, inene, ndithi kuni, Lowo ukholwayo unobomi obungunaphakade. 48 “Ndim isonka sobomi. 49 Ookhokho benu batya imana entlango ukanti bafa. 50 Siso esi isonka esihla sivela ezulwini, ukuze nabani na atye kuso aze angafi. 51 Ndim isonka esiphilayo esehla sivela ezulwini; ukuba nabani na utya kwesi sonka uya kuphila ngonaphakade; yaye, enyanisweni, isonka endiya kusinikela yinyama yam ngenxa yobomi behlabathi.” 52 Ngoko ke amaYuda asukuzana, esithi: “Angathini na lo mntu ukusinika inyama yakhe ukuba siyidle?” 53 Ngako oko uYesu wathi kuwo: “Inene, inene, ndithi kuni, Ngaphandle kokuba nitya inyama yoNyana womntu nize nisele igazi lakhe, aninabo ubomi kuni. 54 Lowo utya inyama yam aze asele igazi lam unobomi obungunaphakade, yaye ndiya kumvusa ngomhla wokugqibela; 55 kuba inyama yam ikukutya kokwenyaniso, negazi lam lisisiselo sokwenyaniso. 56 Lowo utya inyama yam aze asele igazi lam uhleli emanyene nam, nam ndimanyene naye. 57 Kanye njengoko uBawo ophilayo endithumile yaye nam ndiphila ngenxa kaBawo, nalowo undityayo, uya kuphila ngenxa yam. 58 Siso esi isonka esehla sivela ezulwini. Akukho njengaxa ookhokho benu batyayo ukanti bafa. Lowo usityayo esi sonka uya kuphila ngonaphakade.” 59 Ezi zinto wazitsho njengoko wayefundisa kwindibano kawonke-wonke eKapernahum.
SEPTEMBA 24-30
UBUTYEBI OBUPHUMA ELIZWINI LIKATHIXO | YOHANE 7-8
“UYesu Wamzukisa UYise”
(Yohane 7:15-18) Ngoko ke amaYuda amangaliswa, esithi: “Kwenzeka njani ukuba lo mntu abe nolwazi ngemibhalo, engakhange afundisise nje ezikolweni?” 16 UYesu, wawaphendula wathi: “Oko ndikufundisayo asikokwam, kodwa kokwalowo wandithumayo. 17 Ukuba nabani na unqwenela ukwenza ukuthanda Kwakhe, uya kwazi ngokuphathelele le mfundiso enoba ivela kuThixo okanye ndithetha ngokuphuma kum kusini na. 18 Lowo uthetha ngokuphuma kuye ufuna uzuko lwakhe; kodwa lowo ufuna uzuko lwalowo umthumileyo, yena unyanisile, yaye akukho ntswela-bulungisa kuye.
“Kubhaliwe Kwathiwa”
UYesu wayefuna abantu bawazi umthombo wesigidimi sakhe. Wathi: “Oko ndikufundisayo asikokwam, kodwa kokwalowo wandithumayo.” (Yohane 7:16) Ngesinye isihlandlo wathi: “Andenzi nto ngokwam; kodwa ndizithetha ezi zinto kanye njengoko uBawo wandifundisayo.” (Yohane 8:28) Kwakhona wathi: “Izinto endizithethayo kuni andizithethi ngokuphuma kum; kodwa uBawo omanyene nam wenza imisebenzi yakhe.” (Yohane 14:10) Enye indlela uYesu awakungqina ngayo ukuchana kwaloo mazwi yaba kukucaphula ngokuphindaphindiweyo eLizwini likaThixo.
Xa siwahlolisisa ngokunzulu amazwi kaYesu siphawula ukuba wacaphula ngokungqalileyo okanye ngokungangqalanga ngaphezu kwesiqingatha seZibhalo zesiHebhere. Ekuqaleni, kusenokungabonakali kuhlab’ umxhelo oko. Usenokuzibuza ukuba, kutheni kule minyaka mithathu enesiqingatha yokufundisa nokushumayela kwakhe esidlangalaleni engazange azicaphule zonke izibhalo eziphefumlelweyo ezazikho ngelo xesha? Enyanisweni, kusenokwenzeka ukuba wakwenza oko. Khumbula ukuba, yinxalenye encinane kuphela yamazwi nezenzo zikaYesu ebhaliweyo. (Yohane 21:25) Unokuwafunda onke amazwi kaYesu abhaliweyo ngeeyure nje ezimbalwa. Ngoko, khawuzithelekelele uthetha ngoThixo nangoBukumkani bakhe kangangeeyure nje ezimbalwa kodwa ukwazi ukucaphula kangangesiqingatha seZibhalo zesiHebhere! Ngokubhekele phaya, uYesu wayengenayo imisongo ebhaliweyo. Xa wayenikela iNtshumayelo edumileyo yaseNtabeni, wacaphula kaninzi kwiZibhalo zesiHebhere, ngokungqalileyo nangokungangqalanga—ezicaphula zonke ngentloko!
(Yohane 7:28, 29) Ngoko ke uYesu wadanduluka njengoko wayefundisa etempileni wathi: “Niyandazi mna, nisazi nalapho ndivela khona. Kanjalo, andizizelanga ngokwam, kodwa lowo undithumileyo uyinene, yaye nina animazi. 29 Mna ndiyamazi, ngenxa yokuba ndingummeli ovela kuye, yaye Yena undithumile.”
(Yohane 8:29) Yaye lowo undithumileyo ukunye nam; akandishiyanga ndedwa, ngenxa yokuba ndisoloko ndisenza izinto ezikholekileyo kuye.”
Yamkela Umoya KaThixo, Kungekhona Owehlabathi
19 Mthobele ngokupheleleyo uYehova. UYesu wayesoloko esenza izinto ezimkholisayo uYise. Ngesinye isihlandlo, indlela uYesu awayefuna ukujamelana ngayo nemeko ethile yakha yahluka kuleyo yayifunwa nguYise. Sekunjalo, eqinisekile wathi kuYise: “Makwenzeke kungekhona ukuthanda kwam, kodwa okwakho.” (Luka 22:42) Zibuze, ‘Ngaba ndimthobela uThixo nokuba sekunzima?’ Ukuthobela uThixo kubalulekile ukuze siphile. Sifanele simthobele ngokupheleleyo njengoMenzi wethu, uMthombo noMlondolozi wobomi bethu. (INdu. 95:6, 7) Akukho nto ebaluleke njengokuthobela. Asinakuze simkholise uThixo ukuba asimthobeli.
Ukwemba Ubuncwane ObuseBhayibhileni
(Yohane 7:8-10) Nyukani niye emthendelekweni; mna andikazi kunyuka ndiye kulo mthendeleko, ngenxa yokuba ixesha lam elililo alikafiki ngokupheleleyo.” 9 Ngoko emva kokubaxelela ezi zinto, wahlala eGalili. 10 Kodwa bakuba abantakwabo benyukile ukuya emthendelekweni, wandula ke naye wanyuka, kungekhona ekuhleni kodwa emfihlekweni.
Kutheni Simele Sithethe Inyaniso?
Nguwuphi umzekelo owamiselwa nguYesu Kristu kule nkalo? Ngesinye isihlandlo, uYesu wayencokola nabantu ababengengabo abafundi bakhe ababenomdla wokwazi ngohambo lwakhe. Bambongoza bathi: “Mka apha uye kwelakwaYuda.” Yathini impendulo kaYesu? “Nyukani niye emthendelekweni [eYerusalem]; mna andikazi kunyuka ndiye kulo mthendeleko, ngenxa yokuba ixesha lam elililo alikafiki ngokupheleleyo.” Ngemva koko, uYesu, waya emthendelekweni eYerusalem. Kwakutheni ukuze abaphendule ngaloo ndlela? Babengenalo ilungelo lokwazi iinkcukacha ngohambo lwakhe. Ngoxa engazange athethe ubuxoki uYesu, wabanika impendulo ebafaneleyo ukuze bangamenzakalisi okanye benzakalise abafundi bakhe. Obu yayingebobuxoki kuba umpostile uPetros wabhala wathi ngoKristu: “Akazange enze sono, kungazange kufunyanwe nankohliso emlonyeni wakhe.”—Yohane 7:1-13; 1 Petros 2:22.
(Yohane 8:58) UYesu wathi kuwo: “Inene, inene, ndithi kuni, Ngaphambi kokuba uAbraham abekho, bendikho.”
ingcaciso kaYohane 8:58
bendikho: AmaYuda afuna ukumxuluba ngamatye uYesu kuba ethe “umbonile uAbraham,” esithi ‘wayengekabi nawo namashumi amahlanu eminyaka ubudala.’ (Yohane 8:57) UYesu wawaphendula ngokuwaxelela ukuba wayekhe waphila ezulwini eyingelosi enamandla ngaphambi kokuba uAbraham azalwe. Abanye bathi le vesi ibonisa ukuba uYesu unguThixo. Bathi ibinzana lesiGrike elisetyenziswe apha, elithi e·goʹ ei·miʹ (eliguqulelwe ngokuthi “ndikho” kwezinye iiBhayibhile), lisusela kwindlela iSeptuagint eguqulele ngayo iEksodus 3:14, ibe zombini ezi vesi zimele ziguqulelwe ngendlela efanayo. Kodwa ke kule meko, into echazwa sisenzi sesiGrike esithi ei·miʹ yaqalisa “ngaphambi kokuba uAbraham abekho” ibe yayisaqhubeka. Ngoko kufanelekile ukuba siguqulelwe ngokuthi “bendikho” kunokuba kuthiwe “ndikho,” kwaye iinguqulelo ezininzi zakudala nezangoku zisebenzisa amagama afanayo nelithi “bendikho.” NakuYohane 14:9, esi senzi sinye sesiGrike esithi ei·miʹ siyasetyenziswa kumazwi kaYesu athi: “Bendikunye nani ixesha elide kangaka, ukanti, Filipu, akukandazi na?” Uninzi lweenguqulelo lusebenzisa amagama afanayo, ibe loo nto ibonisa ukuba igrama iyavuma ukuba kuguqulelwe isenzi esithi ei·miʹ ngokuthi “bendikho” kuxhomekeka kuloo nto kuthethwa ngayo. (Eminye imizekelo yokuguqulelwa kwesenzi sesiGrike esikwixesha langoku kusetyenziswa isenzi sexesha ebelidlula ifumaneka kuLuka 2:48; 13:7; 15:29; kuYohane 1:9; 5:6; 15:27; kwiZenzo 15:21; kweyesi-2 kwabaseKorinte 12:19; kweyoku-1 kaYohane 3:8.) Enye into, amazwi kaYesu akuYohane 8:54, 55 abonisa ukuba wayengazami ukuzenza uYise.
Ufundo LweBhayibhile
(Yohane 8:31-47) Yaye ngoko uYesu wathi kumaYuda awayekholiwe kuye: “Ukuba nithe nahlala kulo izwi lam, ngokwenene ningabafundi bam, 32 niya kuyazi inyaniso, yaye inyaniso iya kunikhulula.” 33 Aphendula athi kuye: “Siyinzala ka-Abraham kwaye asizange sibe ngamakhoboka kuye nabani na. Kwenzeka njani ukuba uthi, ‘Niya kukhululeka’?” 34 UYesu wawaphendula wathi: “Inene, inene, ndithi kuni, Wonke umenzi wesono ulikhoboka lesono. 35 Ngaphezu koko, ikhoboka alihlali endlwini ngonaphakade; unyana yena uhlala ngonaphakade. 36 Ngoko ke ukuba uNyana uyanikhulula, okunene niya kukhululeka. 37 Ndiyazi ukuba niyinzala ka-Abraham; kodwa nifuna ukundibulala, kuba alingeni kuni ilizwi lam. 38 Izinto endizibone kuBawo, zizo endizithethayo; nani, ke ngoko, nenza izinto enizive kuyihlo.” 39 Ekuphenduleni athi kuye: “Ubawo wethu nguAbraham.” UYesu wathi kuwo: “Ukuba ningabantwana baka-Abraham, yenzani imisebenzi ka-Abraham. 40 Kodwa naku nifuna ukundibulala, mna mntu onixelele inyaniso endiyive kuThixo. UAbraham akazange akwenze oku. 41 Nenza imisebenzi kayihlo.” Athi kuye: “Asizange sizalwe ngohenyuzo; sinoBawo omnye, uThixo.” 42 Wathi uYesu kuwo: “Ukuba uThixo ebenguYihlo, ngenindithanda, kuba ndilapha nje ndiphuma kuThixo. Andizizelanga ngokwam, kodwa ndithunywe Nguye. 43 Kutheni ningakwazi nje oko ndikuthethayo? Kungenxa yokuba aninakuliphulaphula ilizwi lam. 44 Nina niphuma kuyihlo uMtyholi, yaye nithanda ukwenza ngokweminqweno kayihlo. Yena wayesisibulala-mntu kwasekuqaleni, yaye akemi enyanisweni, kuba inyaniso ayikho kuye. Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki. 45 Mna ke, ngenxa yokuba ndinixelela inyaniso, anindikholelwa. 46 Ngubani na kuni ondifumanisa ndinetyala lesono? Ukuba ndithetha inyaniso, kutheni ningandikholelwa nje? 47 Lowo uphuma kuThixo uyawaphulaphula amazwi kaThixo. Kungenxa yoko le nto ningaphulaphuli, kuba aniphumi kuThixo.”