Imbono YeBhayibhile
Xa Izalamane Zinonqulo Olwahlukileyo Kolwakho
NGOKUTSHO kolunye uqikelelo, zingaphezu kwe-10 000 iinkonzo neecawa ezisehlabathini. Kwelinye ilizwe bamalunga ne-16 ekhulwini abantu abadala abakhe batshintsha-tshintsha iicawa. Siyaqondakala ke isizathu sokuba kukho ukungaboni ngasonye ngokuphathelele iinkolelo zonqulo phakathi kwezalamane nabahlobo. Maxa wambi oku kugqibela ngokonakalisa ulwalwamano. Ngoko umbuzo ophakamayo ngulo, AmaKristu afanele aziphathe njani izalamane zawo ezinonqulo olwahlukileyo?
Ulwalamano Olukhethekileyo
Ngokomzekelo, qwalasela oko kuthethwa yiBhayibhile ngolwalamano olukhethekileyo lwabazali nabantwana babo. Awumele utyeshelwe nanini na umyalelo we-Eksodus 20:12 othi “beka uyihlo nonyoko.” Enyanisweni, xa uYesu wayexubusha ngalo myalelo kwingxelo ekuMateyu 15:4-6, kuyacaca ukuba wayethetha ngentlonelo eyayiza kuboniswa ngabantwana abadala kubazali babo.
Incwadi yeBhayibhile yeMizekeliso isilumkisa nxamnye nokungabi nantlonelo kubazali bethu. IMizekeliso 23:22 icebisa ithi “ungamdeleli unyoko ngenxa nje yokuba emdala.” Igxininisa oku, IMizekeliso 19:26 ilumkisa ukuba umntu “odlakazelisa uyise nogxotha unina ungunyana owenza okuziintloni nokulihlazo.”
IZibhalo zibonisa ngokucacileyo ukuba asimele sibatyeshele abazali bethu. Isibakala sokuba abazali bethu bengalwamkeli unqulo lwethu asiluphelisi ulwalamano lwethu nabo. Le migaqo yeBhayibhile isebenza ngendlela efanayo nakwezinye izalamane nakwiqabane likabani lomtshato. Kucacile ukuba, ngokobuntu nangokweZibhalo amaKristu ahlala enembopheleleko yokuthanda izalamane zawo.
Kubalulekile Ukusebenzisa Ingqiqo
Kakade ke, iBhayibhile isilumkisa ngonxulumano olubi, yaye le mpembelelo isenokuvela kwizalamane ezisondeleyo. (1 Korinte 15:33) Abakhonzi bakaThixo abanyanisekileyo abaninzi bakudala bakumela ngokuqinileyo okulungileyo nangona abazali babo babengavumelani nabo. Kuyacaca ukuba kwenzeka oku koonyana bakaKora. (Numeri 16:32, 33; 26:10, 11) AmaKristu okwenyaniso akamele alalanise ukholo lwawo kuba efuna ukwanelisa abanye, nkqu nezalamane zawo.—IZenzo 5:29.
Kwezinye iimeko abazali nezalamane baye bazichase ngokuqatha iinkolelo zomKristu. Abanye basenokude babe ziintshaba zamaKristu okwenyaniso. Kwiimeko ezinjalo amaKristu kufuneka athabathe amanyathelo asengqiqweni ukuze azikhusele ngokomoya. UYesu wayechanile xa esithi: “Iintshaba zomntu ziya kuba ngabantu bendlu yakhe. Lowo unomsa omkhulu ngakumbi ngoyise okanye ngonina kunam akandifanele mna; nalowo unomsa kakhulu ngakumbi ngonyana okanye ngentombi kunam akandifanele mna.”—Mateyu 10:36, 37.
Noko ke, kwiimeko ezininzi amaKristu akadli ngokutshutshiswa ngokuqatha zizalamane zawo. Ekuphela nje kwento eyenzekayo kukuba izalamane zawo aziziqondi ngendlela efanayo iimfundiso zeBhayibhile. IZibhalo Ezingcwele zikhuthaza abalandeli bakaKristu ukuba baphathe abantu abangakholwayo “ngobulali” “nentlonelo enzulu.” (2 Timoti 2:25; 1 Petros 3:15) IBhayibhile inikela isiluleko esifanelekileyo: “Ikhoboka leNkosi akufuneki lilwe, kunoko kufuneka lithantamise kubo bonke.” (2 Timoti 2:24) Nompostile uPawulos waluleka amaKristu ukuba ‘angathethi kakubi nangabani na, angabi ngabathanda ukulwa, abe ngabanengqiqo, ebonisa ubulali kubantu bonke.’—Tito 3:2.
Hlala Unxibelelana Nazo Uze Ubonise Uthando
Kweyoku-1 kaPetros 2:12, amaKristu akhuthazwa oku: “Ihambo yenu mayibe ntle phakathi kweentlanga [abantu abangakholwayo], ukuze . . . zithi ngokubona imisebenzi yenu emihle, zimzukise uThixo.” Izihlobo ezingavumelaniyo neenkolelo zethu zidla ngokuziphawula iinguqu ezibangelwa yimigaqo yeBhayibhile kubomi bethu. Khumbula ukuba abaninzi ababengenamdla kwinyaniso yeBhayibhile okanye ababechasa baye batshintsha. Komnye umntu kusenokuthabatha iminyaka ondele ihambo entle yeqabane lakhe lomtshato okanye umntwana wakhe ngaphambi kokuba asiqonde isizathu sokuba aziphathe ngaloo ndlela. Qinisekisa ukuba abantu abayityesheli inyaniso yeBhayibhile, ngenxa yokuba bengakhange bakhathalelwe sisalamane sabo esingumKristu.
Kuyavunywa ukuba, iimeko ziyahluka yaye amanye amaKristu angamaNgqina ahlala kude nabazali bawo. Asenokungakwazi ukusoloko ebatyelela njengokuba enqwenela. Sinokuziqinisekisa ukuba siyazithanda izalamane zethu ngokuzibhalela iileta, ngokuzitsalela umnxeba, okanye ngokusoloko sinxibelelana nazo ngezinye iindlela. Abantu abaninzi abangengomaKristu okwenyaniso bayabathanda abazali babo nezinye izalamane yaye basoloko benxibelelana nabo kungakhathaliseki ukuba zinjani na iinkolelo zonqulo lwabo. Ngaba amaKristu angamaNgqina akamele enze okufanayo?
[Umfanekiso okwiphepha 22]
Ukusoloko unxibelelana nezalamane zakho kuya kuziqinisekisa ukuba uyazithanda