Isilwanyana Esiphantse Singafi—IWater Bear
NGUMBHALI KAVUKANI! EJAPAN
◼ KHAWUKHANGELE naphi na kwindawo enamanzi ehlabathini—kubulembu, kumkhenkce, emifuleni, kwimithombo enamanzi ashushu, kumachibi, kwiilwandlekazi, mhlawumbi nangasemva kwiyadi yakho—usenokubona iwater bear, esinye sezona zilwanyana zincinane zomeleleyo. Incinane kangangokuba ayibonakali, inomzimba onamacandelo amane amafutshane anesikhumba esiqinileyo, inemilenze esibhozo, ngamnye uneenzipho. Imile okwebhere eleleyo, ilifumane ngaloo ndlela ke negama layo.
Iiwater bear zithi chu xa zihamba. Kukho iindidi eziliqela zesi silwanyana, yaye iimazi zizala iqanda elinye ukusa kwangama-30 ngexesha. Kusenokufumaneka amawaka angamashumi ezi zidalwa zincinane kumhlaba nje ongephi omanzi. Unokuzifumana zininzi kubulembu obukhula eluphahleni lwendlu.
Iiwater bear zinokuphila kwezona meko zinzima. IEncyclopædia Britannica ithi: “Ezi zilwanyana zafakwa kwindawo engenamoya iintsuku ezisibhozo, zakhutshwa zaza zafakwa kwigesi yehelium efudumeleyo iintsuku ezintathu, zaphinda zafakwa kwindawo ebandayo eneqondo lomkhenkce elingama-272 ngokukaCelsius kodwa zaphinda zaphila xa zazifakwe kwindawo nje eqhelekileyo.” Ziyaphila nasemva kokuba zibethwe yimitha ye-X-reyi enokumbulala umntu. Yaye kuthiwa, zisenokuphila nasemajukujukwini kangangexesha elithile!
Oku kubangelwa kukuba ziyakwazi ukuba ngathi zifile yaye umetyiso wazo usebenza kancinane ngaphantsi kwe-0,01 ekhulwini kunendlela eqhelekileyo—phantse ube ngathi awusebenzi. Ukuze zikwazi ukwenjenjalo, ziqoshel’ imilenze, zisebenzise iswekile ethile xa ziphelelwe ngamanzi emzimbeni zize zibe ngathi liququvana nje elincinane eligqunywe ngomthwebeba ekuthiwa yitun. Xa iimeko ziphinde zavuma, ezi zilwanyana ziphinda zidlamke emva kwemizuzu okanye iiyure ezimbalwa. Ngesinye isihlandlo, iiwater bear ezazingathi zifile kangangeminyaka eli-100 zaphinda zaphila!
Ewe, ngendlela yazo nemangalisayo, ezi “zinto zirhubuluzayo” zidumisa uYehova.—INdumiso 148:10, 13.
[Inkcazelo Ngomfanekiso okwiphepha 30]
© Diane Nelson/Visuals Unlimited