Ukuzenzela Ixesha Lezinto Ezibalulekileyo

“Ixesha eliseleyo lifinyele.”—1 Korinte 7:29.

“KWINCWADI yakhe ethi Working Smart uMichael LeBoeuf uthi: “Ukutsibatsiba nokudlala emanzini akuthethi ukuba uyaquba.”

Ngamanye amazwi, kunokubakho umahluko omkhulu phakathi kokuba sisinxadanxada nokwenza into ebonakalayo. Khawukhe uhlole izinto ezenzeke kwiveki ephelileyo. Yintoni oyenzileyo ngexesha obunalo? Yintoni obuzixakekise ngayo? Ngaba kuye kwayimfuneko ukuba uzinike ixesha elingakumbi lokwenza izinto ezibaluleke ngokwenene kuwe?

Makhe sihlole oko kwathethwa nguYesu ngamaxesha ethu axakekileyo. Wathi njengoko le nkqubo isondela esiphelweni nehlabathi elitsha likaThixo lobulungisa likufuphi, abafundi bakhe baya kuxakeka. Yintoni le yayiza kubaxakekisa? Babeza kube beshumayela “ezi ndaba zilungileyo zobukumkani [bukaThixo].” Kwakhona uYesu wathi uninzi lwabantu lwaluza kuxakeka kakhulu ukuba lungaphulaphula. Lwaluza kuzixakekisa ngezinto zobu bomi. Wongezelela wathi abo bazixakekisayo bengasiphulaphuli isigidimi soBukumkani baza kutshatyalaliswa.—Mateyu 24:14, 37-39; Luka 17:28-30.

Namhlanje, amaNgqina kaYehova ashumayela iindaba ezilungileyo zoBukumkani bukaThixo kumazwe angaphezu kwama-230. Kanye njengokuba uYesu watsho kwangaphambili abantu abaninzi abafuni kuphulaphula besithi “baxakekile.” Kodwa siyakucela ukuba nangona uxakekile ukhe uziphe ithuba lokuhlolisisa oko kufundiswa yiBhayibhile ngoBukumkani bukaThixo. Sinethemba lokuba uza kuthi xa ufunde ngeentsikelelo uThixo azibekele abantu bakhe ungqinelane nathi xa sisithi ukuphulaphula nokusebenzisa isigidimi seBhayibhile kuyinto ebalulekileyo nesimele sizinike ixesha layo.a

[Umbhalo osemazantsi]