Fumana Uvuyo Kumsebenzi Wokwenza Abafundi
“Hambani ke ngoko niye kubenza abafundi.”—MAT. 28:19.
1-3. (a) Abaninzi bavakalelwa njani ngokuqhuba izifundo zeBhayibhile? (b) Yiyiphi imibuzo esiza kuyihlolisisa?
OMNYE udade okhonza neqela elithetha isiHindi eUnited States wabhala wathi, “Kwiiveki ezili-11 ezidluleyo bendiqhuba isifundo kwintsapho esuka ePakistan. Siye sakha ubuhlobo nayo. Iinyembezi ziyazehlela xa ndicinga ukuba le ntsapho iza kubuyela ePakistan kungekudala. Andenziwa buhlungu kukushiywa yile ntsapho nje kuphela kodwa ndililiswa naluvuyo endilufumanayo njengoko ndiyifundisa ngoYehova.”
2 Njengalo dade, ngaba nawe uye walufumana uvuyo lokufunda iBhayibhile nomntu othile? UYesu nabafundi bakhe benkulungwane yokuqala bafumana uvuyo olukhulu kumsebenzi wokwenza abafundi. Xa abafundi abangama-70 abaqeqeshwa nguYesu babuya nengxelo evuyisayo, uYesu naye waba “novuyo olugqithiseleyo ngomoya oyingcwele.” (Luka 10:17-21) Ngokufanayo, abaninzi namhlanje bafumana uvuyo olungathethekiyo ekwenzeni abafundi. Kaloku, ngowama-2007, abavakalisi abasebenza nzima nabanovuyo, baye baqhuba umlinganiselo wezifundo zeBhayibhile ezizizigidi ezithandathu ezinesiqingatha nyanga nganye!
3 Noko ke, abanye abavakalisi abakalufumani uvuyo olubangelwa kukuqhuba isifundo seBhayibhile. Kusenokwenzeka ukuba kukho abanye abangekaqhubi nesifundo esinye kwiminyaka yakutshanje. Yiyiphi imiqobo esinokujamelana nayo njengoko sizama ukuqhuba isifundo seBhayibhile? Sinokuyoyisa njani? Nguwuphi umvuzo esiwufumanayo njengoko sisenza konke okusemandleni ethu ukuthobela umyalelo kaYesu othi: “Hambani ke ngoko niye kubenza abafundi”?—Mat. 28:19.
Imiqobo Enokuphelisa Uvuyo Esinalo
4, 5. (a) Abantu abaninzi basijonga njani isigidimi sethu kwezinye iindawo ehlabathini? (b) Yiyiphi imiqobo abajamelana nayo abavakalisi kwezinye iindawo?
4 Kwezinye iindawo ehlabathini, abantu balwamkela ngomdla uncwadi lwethu ibe bayakulangazelela ukufunda nathi iBhayibhile. Esinye isibini esitshatileyo esisuka eOstreliya esasikhonza eZambia kangangethutyana sabhala sathi: “Akuxokwa xa kusithiwa intsimi yaseZambia ivundile. Kumnandi ngendlela engathethekiyo ukunikela ubungqina kwizitrato zalapho! Abantu babezizela kuthi, abanye befika bawabize ngegama amaphephancwadi abawafunayo.” Kule minyaka imbalwa idluleyo, abazalwana noodade baseZambia baqhuba izifundo zeBhayibhile ezingaphezu kwama-200 000—ngokomlinganiselo, umvakalisi omnye waqhuba isifundo seBhayibhile esingaphezu kwesinye.
5 Noko ke, kwezinye iindawo kusenokungabi lula ukuba abavakalisi bahambise iincwadi baze baqhube izifundo zeBhayibhile rhoqo. Ngoba? Abavakalisi badla ngokufika abantu bengekho emakhaya, ibe abo bakhoyo badla ngokungabi namdla kunqulo. Kusenokwenzeka ukuba bakhulele kumakhaya ekunganqulwayo kuwo okanye bacaphukela uhanahaniso lonqulo lobuxoki. Abantu abaninzi benzakalisiwe—bahlinzwa baza balahlwa ngokomoya ngabalusi bobuxoki. (Mat. 9:36) Sinokusiqonda isizathu sokuba, abo bantu babe mathidala ukuxubusha ngeBhayibhile.
6. Abanye basenokuba balwa nayiphi imiqobo?
6 Abanye abavakalisi abathembekileyo bajamelana nemiqobo eyahlukahlukeneyo enokubenza bangabi nalo uvuyo. Nangona ngaxa lithile babekhuthele kumsebenzi wokwenza abafundi, ngoku bakhathazwa yimpilo okanye kukwaluphala. Kanti eminye kule miqobo inokubangelwa kwasithi. Ngokomzekelo, ngaba uzibona ungakufanelekeli ukuqhuba isifundo seBhayibhile? Unokuvakalelwa kanye njengoMoses xa wathunywa nguYehova ukuba aye kuthetha noFaro. UMoses wathi: “Ndiyangxengxeza, Yehova, kuba umkhonzi wakho lo akazange waba liciko, ukususela ekuthetheni kwakho nam, nangezolo, nangaphambi koko.” (Eks. 4:10) Omnye umqobo onxulumene nalo wokuzibona ungafaneleki kukoyika ukungaphumeleli. Sinokuzikhathaza ngento yokuba umntu esithetha naye akanakuba ngumfundi ngenxa yokuba singenabo ubuchule bokufundisa. Kuba sicinga ukuba asizi kuphumelela sinokuliyeka lihambe namanzi ithuba lokuqhuba isifundo. Sinokuyoyisa njani le miqobo sigqiba kuthetha ngayo?
Lungisa Intliziyo Yakho
7. Yintoni eyayikhuthaza uYesu kubulungiseleli bakhe?
7 Inyathelo lokuqala kukulungisa iintliziyo zethu. UYesu wathi: “Umlomo uthetha ngokuphuphuma kwentliziyo.” (Luka 6:45) Into eyayikhuthaza uYesu kubulungiseleli bakhe kukubaxhalabela ngokunyanisekileyo abanye. Ngokomzekelo, wathi akubona imeko yokomoya emandundu yamaYuda, ‘wawasizela.’ Wathi kubafundi bakhe: “Isivuno sikhulu . . . Ngoko ke, bongozani iNkosi yesivuno ukuba ikhuphe abasebenzi baye esivunweni sayo.”—Mat. 9:36-38.
8. (a) Yintoni esimele sicinge ngayo? (b) Yintoni esinokuyifunda kwinto eyathethwa ngomnye umfundi weBhayibhile?
8 Njengoko sisenza abafundi, kufuneka sicinge nzulu ngendlela thina esiye sancedwa ngayo kukufundelwa iBhayibhile. Masicinge nangabantu esiza kudibana nabo kubulungiseleli nendlela ekuya kubanceda ngayo ukuva isigidimi esisishumayelayo. Elinye ibhinqa labhalela iofisi yesebe yelizwe lalo lisithi: “Ndiwabulela gqitha amaNgqina andifundisayo ekhayeni lam. Kusenokwenzeka ukuba ndiyawadina maxa wambi ngemibuzo yam emininzi yaye ndisoloko ndiwatyela ixesha. Kodwa ayandithantamisa yaye ayakulangazelela ukundifundisa. Ndiyambulela uYehova noYesu ngokundithumelela aba bantu.”
9. UYesu wanikela ingqalelo entwenini, ibe sinokumxelisa njani?
9 Kakade ke, asingabo bonke abantu abayixabisayo imigudu kaYesu yokubanceda. (Mat. 23:37) Abanye bamlandela kangangethuba elithile kodwa emva koko bazigatya iimfundiso zakhe baza “ababi sahamba naye.” (Yoh. 6:66) Noko ke, uYesu akazange avumele ukungathandwa kwesigidimi awayesishumayela kumenze avakalelwe kukuba asixabisekanga. Nangona uninzi lwembewu awayihlwayelayo lungazange lube nasiqhamo, uYesu wanikela ingqalelo kumsebenzi wakhe omhle. Wabona ukuba amasimi amhlophe ukuze kuvunwe yaye wafumana uvuyo olukhulu ngokuncedisa koko kuvuna. (Funda uYohane 4:35, 36.) Kunokuba sidinyazwe ngabo bangenamdla kwisigidimi esisishumayelayo, ngaba nathi asinakuthi njengoYesu, sinikele ingqalelo kwisivuno esinokuphuma kumhlaba esiwabelweyo? Makhe sibone indlela esinokusilondoloza ngayo eso simo sengqondo sihle.
Hlwayela Unenjongo Yokuvuna
10, 11. Yintoni onokuyenza ukuze uhlale unovuyo?
10 Umlimi uhlwayela imbewu enenjongo yokuvuna. Ngokufanayo, sifanele sishumayele sinenjongo yokuqalisa izifundo zeBhayibhile. Noko ke, kuthekani ukuba uyaya kubulungiseleli basentsimini kodwa bambalwa abantu obafumana emakhaya okanye kubonakala kunzima ukuwafumana amabuyelo akho? Oko kunokukudimaza. Ngaba umele uyeke ukushumayela kwindlu ngendlu? Ngokuqinisekileyo akunjalo! Abantu abaninzi basafumaneka ngale ndlela yokushumayela kudala isetyenziswa.
11 Noko ke, ngaba akunakukhe uzame nezinye iindlela zokufumana abantu ukuze uhlale unovuyo? Ngokomzekelo, ngaba ukhe wazama ukushumayela kubantu abasezitratweni okanye kwiindawo abaphangela kuzo? Ngaba unokubafowunela abanye okanye ubhale iinombolo zefowuni zabo sele ushumayele kubo ngoBukumkani ukuze uqhubeke uqhagamshelana nabo? Ngokuzingisa uze uzilungelelanise neemeko kubulungiseleli bakho, uya kuba novuyo lokufumana abantu abaya kusamkela isigidimi soBukumkani.
Ukujamelana Nokungabi Namdla Kwabantu
12. Yintoni esinokuyenza ukuba abantu abaninzi kwintsimi yethu babonakala bengenamdla?
12 Kuthekani ukuba abantu abaninzi kwintsimi yenu abanamdla kunqulo? Ngaba unokuqalisa incoko ngokuthetha ngezinto eziya kubangel’ umdla kubo? Umpostile uPawulos wawabhalela wathi amaKristu aseKorinte: “KumaYuda ndaba njengomYuda . . . Kwabo bangenamthetho ndaba njengongenamthetho, nangona ndingenguye ongenamthetho kuThixo.” Yayiyintoni injongo kaPawulos? Wathi: “Ndiye ndaba zizinto zonke kubantu bazo zonke iintlobo, ukuze ngandlela zonke ndisindise abathile.” (1 Kor. 9:20-22) Ngaba nathi ngokufanayo singakhangela izinto eziya kubangel’ umdla kubantu abakwintsimi yethu? Abantu abaninzi abanganquliyo bafuna ukuphucula ubomi beentsapho zabo. Kusenokwenzeka ukuba bafuna ukuphila ubomi obunenjongo. Ngaba sinokuvakalisa isigidimi soBukumkani ngendlela eya kuba nomtsalane kwabo bantu?
13, 14. Sinokulufumana njani uvuyo olungakumbi kumsebenzi wokwenza abafundi?
13 Abavakalisi abaninzi baye bafumana uvuyo olungakumbi kumsebenzi wokwenza abafundi, kwanakwimimandla enabantu abaninzi ababonakala bengenamdla. Bakwenze njani oko? Ngokufunda olunye ulwimi. Esinye isibini esikwiminyaka engama-60 ubudala safumanisa ukuba kukho amawakawaka abafundi abangamaTshayina neentsapho zabo kwintsimi yebandla laso. Umyeni uthi: “Ngenxa yoko, sakhuthazwa ukuba sifunde isiTshayina. Nangona oku kwakufuna ukuba sichithe ixesha suku ngalunye sifunda olu lwimi, oku kwaphumela ekuqalisweni kwezifundo zeBhayibhile ezininzi nabantu abantetho isisiTshayina abakummandla wethu.”
14 Enoba akukwazi ukufunda olunye ulwimi, unokusebenzisa incwadana ethi Good News for People of All Nations xa udibana nabantu abathetha olunye ulwimi. Kanti usenokuzifumanela uncwadi ngolwimi lwabantu odibana nabo. Liyinyaniso elokuba, kufuna ixesha nomgudu ukuthetha nabantu bolunye ulwimi. Kodwa khumbula lo mgaqo ufumaneka kwiLizwi likaThixo: “Lowo uhlwayela ngokuyintabalala uya kuvuna intabalala.”—2 Kor. 9:6.
Lo Msebenzi Ngowebandla Lonke
15, 16. (a) Kutheni ukwenza abafundi kungumsebenzi webandla lonke? (b) Abakhulileyo banayiphi indima?
15 Noko ke, ukwenza abafundi akungomsebenzi womntu nje omnye. Kunoko, kungumsebenzi webandla lonke. Kutheni sisitsho nje? UYesu wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.” (Yoh. 13:35) Eneneni, xa izifundo zeBhayibhile zisiya kwiintlanganiso zethu, zidla ngokuchukunyiswa luthando olubonakaliswa apho. Esinye isifundo seBhayibhile sabhala sathi: “Ndikuthanda gqitha ukuya kwiintlanganiso. Abantu abalapho banobubele gqitha!” UYesu wathi abo baba ngabalandeli bakhe basenokuchaswa zizizalwana zabo. (Funda uMateyu 10:35-37.) Noko ke, wabathembisa ukuba ebandleni baya kufumana “abantakwabo noodade wabo noonina nabantwana” abaninzi bokomoya.—Marko 10:30.
16 Abazalwana noodade abakhulileyo banendima ebalulekileyo ekuncedeni izifundo zeBhayibhile zenze inkqubela. Bakwenza njani oko? Kwanokuba abanye abakhulileyo abasakwazi ukuqhuba ezabo izifundo zeBhayibhile, iimpendulo zabo ezakhayo kwiintlanganiso zomeleza ukholo lwabo bonke abaphulaphuleyo. Iminyaka abayichithe behamba “endleleni yobulungisa” ilinika isidima ibandla ize itsalele abantu abanyanisekileyo kwintlangano kaThixo.—IMize. 16:31.
Indlela Yokoyisa Uloyiko
17. Sinokwenza ntoni xa sivakalelwa kukuba asinakukwazi ukuwenza lo msebenzi?
17 Kuthekani ukuba uvakalelwa kukuba akunakukwazi ukuwenza lo msebenzi? Khumbula ukuba uYehova wanceda uMoses ngokumnika umoya oyingcwele kwakunye nomntu awayeza kusebenza naye, umntakwabo uAron. (Eks. 4:10-17) UYesu wathembisa ukuba umoya kaThixo uya kusixhasa kumsebenzi wokushumayela. (IZe. 1:8) Ngaphezu koko, uYesu wathuma abasebenzi ukuba baye kushumayela ngababini. (Luka 10:1) Ngoko ke, ukuba ukufumanisa kunzima ukuqhuba isifundo seBhayibhile, thandazela umoya kaThixo ukuba ukunike ubulumko uze uhambe nomntu onokukomeleza aze akuncede ngamava akhe. Kuyalomeleza ukholo lwethu ukukhumbula ukuba uYehova wakhetha ukusebenzisa abantu nje abaqhelekileyo—“izinto ezibuthathaka zehlabathi”—ukuphumeza lo msebenzi ukhethekileyo.—1 Kor. 1:26-29.
18. Sinokukoyisa njani ukoyika ukungaphumeleli?
18 Sinokukoyisa njani ukoyika ukungaphumeleli? Kufuneka siyiqonde into yokuba ukwenza umfundi akufani nokupheka isidlo, kuba ukunandipheka kwaso kuxhomekeke kumpheki kuphela. Kunoko, ukwenza umfundi kungumsebenzi wabantu abaliqela. UYehova wenza eyona ndima ibalulekileyo yokumtsalela kuye loo mntu. (Yoh. 6:44) Thina nabanye abasebandleni senza konke okusemandleni ethu sisebenzisa ubuchule bethu bokufundisa ukuze sincede lo mfundi aqhubele phambili. (Funda eyesi-2 kuTimoti 2:15.) Yena umfundi ufanele akusebenzise oko akufundayo. (Mat. 7:24-27) Kuba buhlungu xa lo mntu eyeka ukufunda iBhayibhile. Sinethemba lokuba abafundi beBhayibhile baya kuzenzela ukhetho olufanelekileyo, kodwa mntu ngamnye umele ‘aziphendulele kuThixo.’—Roma 14:12.
Siya Kufumana Wuphi Umvuzo?
19-21. (a) Kusinceda njani ukuqhuba izifundo zeBhayibhile? (b) UYehova ubajonga njani bonke abo banenxaxheba kumsebenzi wokushumayela?
19 Ukuqhuba izifundo zeBhayibhile kusenza sihlale sifuna kuqala uBukumkani. Kanti kulibethelela ngamandla iLizwi likaThixo kwiingqondo nakwiintliziyo zethu. Kutheni kunjalo nje? Omnye uvulindlela ogama linguBarak uthi: “Ukuqhuba izifundo zeBhayibhile kuyakunyanzela ukuba ukuthande ukufunda iLizwi likaThixo. Ndifumanise ukuba kufuneka kweyiseke mna kuqala koko ndikufundayo ngaphambi kokuba ndifundise omnye umntu.”
20 Ukuba akunaso isifundo seBhayibhile, ngaba oko kuthetha ukuba inkonzo yakho ayixabisekanga kuThixo? Akunjalo konke konke! UYehova uyixabisa gqitha imigudu esiyenzayo ukuze simdumise. Bonke abanenxaxheba kumsebenzi wokushumayela ‘bangabasebenzi abangamadlelane kaThixo.’ Noko ke, ukuqhuba izifundo zeBhayibhile kubangela ukuba sibe novuyo olungakumbi njengoko sibona uThixo ekhulisa imbewu esiyityalileyo. (1 Kor. 3:6, 9) Omnye uvulindlela ogama linguAmy uthi: “Njengoko ubona isifundo seBhayibhile sisenza inkqubela, uba nombulelo ongazenzisiyo kuYehova ngokukusebenzisa ukuze unike loo mntu isipho esimangalisayo—ithuba lokwazi uYehova nokufumana ubomi obungunaphakade.”
21 Ukwenza konke okusemandleni ethu ukuze siqalise size siqhube izifundo zeBhayibhile kuya kusinceda siqhubeke sinikel’ ingqalelo ekukhonzeni uThixo ngoku nasekomelezeni ithemba esinalo lokusindela kumhlaba omtsha. Njengoko sixhaswa nguYehova, siya kukwazi nokunceda abo basiphulaphulayo ukuba basinde. (Funda eyoku-1 kuTimoti 4:16.) Oko kuya kusinika uvuyo olungathethekiyo!
Ngaba Uyakhumbula?
• Yiyiphi imiqobo enokuthintela abanye ekuqhubeni izifundo zeBhayibhile?
• Sinokwenza ntoni ukuba abantu abaninzi kwintsimi yethu babonakala bengenamdla?
• Nguwuphi umvuzo esiya kuwufumana ngokuqhuba izifundo zeBhayibhile?
[Imifanekiso ekwiphepha 9]
Ngaba usebenzisa iindlela ezihlukahlukeneyo zokushumayela ukuze ufumane abantu abanyanisekileyo?