Hlakulela Uthando Olungasokuze Lutshitshe
‘Uthando lunyamezela izinto zonke. Uthando aluze lutshitshe.’—1 KOR. 13:7, 8.
1. (a) Ziziphi izinto ezidla ngokuthethwa ngothando? (b) Ziziphi izinto ezithandwa ngabantu abaninzi?
ZININZI izinto eziye zathethwa ngabantu ngothando. Kwiingoma ezininzi kubalaseliswa uthando. Wonk’ umntu uyakufuna ukuthandwa. Kodwa uthando ekuthethwa ngalo kwiincwadi nakwiimovie ezithengiswa kuyo yonk’ indawo namhlanje, lolwasentsomini. Kanti abantu abathanda uThixo ngokwenene nabamelwane babo banqabe ngeyona ndlela. IBhayibhile yaxela kwangaphambili ukuba ezi zinto zaziya kwenzeka ngemihla yokugqibela. Abantu ‘bayazithanda, bathanda imali, bathanda iziyolo kunokuba bathande uThixo.’—2 Tim. 3:1-5.
2. Ithini iBhayibhile ngokuthanda izinto ezingafanelekanga?
2 Abantu bayakwazi ukubonakalisa uthando kodwa iLizwi likaThixo lisilumkisa ngokuthanda izinto ezingafanelekanga. IBhayibhile isixelela into eyenzekayo xa umntu ethanda izinto ezingafanelekanga. (1 Tim. 6:9, 10) Ngaba usayikhumbula into eyathethwa ngumpostile uPawulos ngoDemas? Nangona wayekunye noPawulos, uDemas wathanda izinto zehlabathi. (2 Tim. 4:10) Umpostile uYohane walumkisa amaKristu ngale ngozi. (Funda eyoku-1 kaYohane 2:15, 16.) Ukuthanda ihlabathi nezinto zalo ezidlulayo akuvisisani nokuthanda uThixo nezinto ezivela kuye.
3. Yiyiphi ingxaki esijamelene nayo yaye oku kuphakamisa yiphi imibuzo?
3 Nangona siphila kweli hlabathi, asiyonxalenye yalo. Ngenxa yoko, simele sikuphephe ukuba nembono yeli hlabathi egqwethekileyo ngothando. Masilumkele ukubanjiswa ngumgibe wokuthanda izinto ezingafanelekanga. Ngoko ke, ngubani esifanele simthande? Zintoni ezinokusinceda sihlakulela uthando olunyamezela izinto zonke nolungasokuze lutshitshe? Olu thando lusinceda njani ngoku yaye luya kusinceda njani kwixesha elizayo? Iimpendulo ezinokusinceda nezinokusikhokela ngendlela efanelekileyo, sinokuzifumana kuThixo.
Ukuhlakulela Ukuthanda UYehova
4. Yintoni esifanele siyenze ukuze uthando lwethu ngoThixo lukhule?
4 Igama elithi ukuhlakulela lisenokubhekisela nasekuhlakuleleni izinto ezilinyiweyo. Cinga ngomlimi osebenza nzima elima umhlaba aze atyale izityalo. Ulindele ukuba ezo zityalo zikhule. (Heb. 6:7) Ngokufanayo, uthando lwethu ngoThixo lufanele lukhule. Yintoni esifanele siyenze ukuze uthando lwethu lukhule? Simele silime umhlaba omhle osezintliziyweni zethu, apho inyaniso yoBukumkani yayityalwe khona. Sinokukwenza oku ngokufunda ngenkuthalo iLizwi likaThixo ukuze simazi ngakumbi. (Kol. 1:10) Ukuya kwiintlanganiso rhoqo size sibe nenxaxheba kuzo kuya kusinceda simazi ngakumbi. Ngaba senza umgudu ukuze sifumane ulwazi olungakumbi?—IMize. 2:1-7.
5. (a) Sinokuzazi njani iimpawu zikaYehova ezibalaseleyo? (b) Yintoni esiyifundayo ngokusesikweni, ubulumko namandla kaThixo?
5 UYehova usebenzisa iLizwi lakhe ukuze asichazele iimpawu zakhe. Xa sifunda iZibhalo size siqhubeke singenisa ulwazi ngoYehova, sinokuzixabisa ngakumbi iimpawu zakhe—okusesikweni, amandla, ubulumko nothando lwakhe olubalaseleyo. UYehova ubonisa okusesikweni kuyo yonke into ayenzayo nasemthethweni wakhe ogqibeleleyo. (Dut. 32:4; INdu. 19:7) Xa sicinga ngazo zonke izinto ezidalwe nguYehova sibona ubulumko bakhe obumangalisayo. (INdu. 104:24) Indalo iphela ibonisa ukuba uYehova unguMthombo wamandla amakhulu angenakuphela.—Isa. 40:26.
6. UThixo usibonise njani ukuba uyasithanda yaye oku kukuchaphazela njani wena?
6 Kunokuthiwani ngothando, uphawu lukaThixo olubalaseleyo? Luninzi kakhulu uthando lwakhe yaye lufikelela kuthi sonke. Olo thando ulubonise ngokulungiselela intlawulelo ukuze akhulule uluntu. (Funda eyabaseRoma 5:8.) Le ntlawulelo inokufumaneka kubo bonke abantu abasemhlabeni, kodwa abantu abaya kungenelwa kuyo ngabo bamthandayo uThixo baze babonise ukholo kuNyana wakhe. (Yoh. 3:16, 36) Ukunikela kukaThixo ngoYesu ukuze abe sisicamagushelo sezono zethu, kumele kusenze simthande.
7, 8. (a) Yintoni ekufuneka siyenze ukuze sibonise ukuba siyamthanda uThixo? (b) Abantu bakaThixo bayithobela ngaphantsi kwaziphi iimeko imiyalelo yakhe?
7 Sinokubonisa njani ukuba siyamthanda uThixo ngenxa yezinto asenzele zona? Impendulo ifumaneka kula mazwi aphefumlelweyo: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yoh. 5:3) Xa simthanda uYehova uThixo siya kuyithobela imiyalelo yakhe. Eso sesinye sezizathu ezibangela ukuba sinikele ubungqina ngegama lakhe nangoBukumkani, nto leyo ebangela ukuba abanye bangenelwe. Xa sisenza lo msebenzi ngomphefumlo uphela sibonisa ukuba siyakuthanda ukuthobela imiyalelo kaThixo.—Mat. 12:34.
8 Ehlabathini lonke abazalwana bethu bayaqhubeka bethobela imiyalelo kaThixo naxa isigidimi soBukumkani sichaswa ngokukrakra. Abanikezeli kwimigudu yabo yokufeza ubulungiseleli babo ngokupheleleyo. (2 Tim. 4:5) Loo nto iyasikhuthaza nathi ukuba sifundise abanye ngoThixo size sigcine yonke imiyalelo yakhe.
Isizathu Sokuba Simthande UYesu Kristu INkosi Yethu
9. UKristu wanyamezela ntoni yaye kwakutheni ukuze anyamezele?
9 Ukongezelela ekuthandeni uThixo, sinezizathu ezininzi zokuhlakulela uthando ngoNyana wakhe. Nangona singazange simbone uYesu, xa sifunda ngaye simthanda ngakumbi. (1 Pet. 1:8) Ziziphi ezinye zezinto uYesu awazinyamezelayo? Ngoxa wayeqhubeka esenza ukuthanda kukaYise, uYesu wayethiyiwe ngaphandle kwesizathu, etshutshiswa, etyholwa yaye egculelwa. Waphathwa kakubi nangezinye iindlela ezininzi. (Funda uYohane 15:25.) UYesu wazinyamezela zonke ezo zilingo kuba ethanda uYise wasezulwini. Ngenxa yothando, wafa njengedini waza waba yintlawulelo kwabaninzi.—Mat. 20:28.
10, 11. Umzekelo owamiselwa nguKristu usinceda njani?
10 Izinto ezenziwa nguYesu ziyasichukumisa. Xa sicinga ngezinto uKristu asenzele zona, siya simthanda nangakumbi. Njengabalandeli bakhe, sifanele sihlakulele uthando olufanayo nolukaKristu ukuze siqhubeke sithobela umyalelo wakhe wokunikela ubungqina ngoBukumkani nokwenza abafundi.—Mat 28:19, 20.
11 Ngenxa yokuba uKristu ethanda lonke uluntu, siziva sinyanzelekile ukugqiba umsebenzi wethu ngaphambi kokuba kufike isiphelo. (Funda eyesi-2 kwabaseKorinte 5:14, 15.) Eqhutywa luthando, uKristu wakwazi ukuphumeza injongo kaThixo ngoluntu. Umzekelo kaKristu esimele siwulandele usinceda sibe nenxaxheba ekuphumezeni loo njongo. Ukuze sikwazi ukwenza oku, sifanele sihlakulele ukumthanda ngokunyanisekileyo uThixo. (Mat. 22:37) Xa sithobela imiyalelo kaYesu, sibonisa ukuba siyamthanda yaye sizimisele ukuxhasa ulongamo lukaThixo njengoYesu nokuba sekumnyam’ entla.—Yoh. 14:23, 24; 15:10
Ukufuna Indlela Egqwesileyo Yothando
12. Wayethetha ukuthini uPawulos xa ethetha ‘ngendlela egqwesileyo’?
12 Umpostile uPawulos wayexelisa uKristu. Ekubeni wayelandela emanyathelweni kaKristu, uPawulos wakwazi ukubongoza abazalwana bakhe ukuba baxelise yena. (1 Kor. 11:1) Nangona uPawulos wakhuthaza amaKristu aseKorinte ukuba aqhubeke ezifuna ngenzondelelo izipho zomoya ezazikho ngenkulungwane yokuqala, ezinjengokuphilisa nokuthetha ngeelwimi, wawabonisa nokuba kukho into ebaluleke ngakumbi ababenokuyisukela. Kweyoku-1 yabaseKorinte 12:31, wathi: “Ukanti ndinibonisa indlela egqwesileyo.” Umongo weendinyana ezilandelayo ubonisa ukuba le ndlela igqwesileyo yeyothando. Olu thando lwalugqwese ngayiphi indlela? UPawulos wakucacisa oku ngokwenza umzekelo. (Funda eyoku-1 kwabaseKorinte 13:1-3.) Ukuba wayeneziphiwo, esenza nezinto ezibalaseleyo kodwa engenalo uthando, yayiya kumnceda ngantoni loo nto? Yayingayi kumnceda nganto! Wakhokelwa ngumoya kaThixo ukuze acacise le ngongoma. Le ngongoma wayenza yacaca gca kuthi!
13. (a) Uthini umxholo wonyaka wowama-2010? (b) Kutheni kusithiwa uthando aluze lutshitshe?
13 Emva koku uPawulos uchaza uthando. (Funda eyoku-1 kwabaseKorinte 13:4-8.) Ngoko ke, khawuzihlole ukuba unalo na olu hlobo lothando. Nikela ingqalelo kwibinzana lokugqibela kwindinyana 7 nakwibinzana lokuqala kwindinyana 8, elithi: ‘Uthando lunyamezela izinto zonke. Uthando aluze lutshitshe,’ yaye lo iza kuba ngumxholo wonyaka wowama-2010. Phawula ukuba kwindinyana 8, uPawulos wathi iziphiwo zomoya, eziquka ukuprofeta nokuthetha ngeelwimi—ezazisetyenziswa ekuqalisweni kwebandla lamaKristu—zaziya kubhangiswa. Zaziya kuphela. Kodwa uthando luya kuhlala luhleli. UYehova ngumthombo wothando yaye ungunaphakade. Ngenxa yoko uthando alusokuze lutshitshe okanye luphele. Luya kuhlala luluphawu lukaThixo ongunaphakade.—1 Yoh. 4:8.
Uthando Lunyamezela Izinto Zonke
14, 15. (a) Uthando lunokusinceda njani sinyamezele ubunzima? (b) Kwakutheni ukuze omnye umzalwana oselula angavumi ukulalanisa?
14 Yintoni enceda amaKristu anyamezele izilingo, iimeko ezinzima neengxaki? Luthando olusekelwe kwimigaqo. Olu thando alupheleli ekuncameni nje izinto eziphathekayo. Lubonakala nakumntu okulungeleyo ukugcina ingqibelelo yakhe ngenxa kaKristu naxa ubomi bakhe busesichengeni. (Luka 9:24, 25) Cinga ngamaNgqina athembekileyo awayevalelwe kwiinkampu zoxinaniso, kwiinkampu ekusetyenzwa nzima kuzo nasezintolongweni, ngeMfazwe Yehlabathi II nasemva kwayo.
15 Oku kungqinwa koko kwenzeka kuWilhelm owayeliNgqina eliselula laseJamani. Kunokuba alalanise, wahlala enyanisekile kwanaxa wayeza kudutyulwa ngamaNazi. Kwileta awayibhalela intsapho yakowabo ngaphambi kokuba abulawe, wathi: “Ngaphezu kwako konke simele sithande uThixo njengoko iNkokeli yethu uYesu Kristu yayalelayo. Ukuba siyammela, uya kusivuza.” Kamva, kwelinye inqaku leMboniselo, ilungu lentsapho yakowabo lathi: “Kumanzithinzithi eli xesha, njengentsapho siye saqinisekisa ukuba uthando lwethu ngoThixo luye lwasoloko lusiza kuqala.” Abazalwana abaninzi abavalelwe entolongweni eArmenia, e-Eritrea, eMzantsi Korea nakwamanye amazwe bavakalelwa ngaloo ndlela. Uthando lwaba bazalwana ngoYehova lomelele.
16. Abazalwana bethu baseMalawi baye banyamezela ntoni?
16 Kwiindawo ezininzi, ukholo nonyamezelo lwabazalwana bethu luvavanywa ngeendlela ezininzi. Umsebenzi wamaNgqina kaYehova aseMalawi wawuvaliwe ngurhulumente kangangeminyaka engama-26, etshutshiswa ngokuqatha yaye engcungcuthekiswa ngeendlela ezininzi. Avuzwa ngenxa yokunyamezela kwawo. Ukuqala kwawo ukutshutshiswa, amaNgqina ayemalunga ne-18 000 kwelo lizwe. Emva kweminyaka engama-30, inani lawo laya kufikelela kuma-38 393. Kuye kwenzeka into efanayo nakwamanye amazwe.
17. Baye bajamelana nantoni abanye abakumakhaya awahluleleneyo ngonqulo yaye yintoni eye yabanceda banyamezela?
17 Kuba nzima xa abantu bakaThixo betshutshiswa ngabachasi. Kodwa eyona nto inzima nangakumbi kuxa amaKristu athile ehlaselwa ngamalungu eentsapho zawo. Anokungcungcuthekiswa ziintsapho zawo okanye zizalamane zawo ezisondeleyo. Ngaba uYesu akazange atsho kwangaphambili ukuba oku kuya kwenzeka? Watsho, ibe oku kuye kwenzeka kubantu abaninzi. (Mat. 10:35, 36) Abantwana abaninzi baye banyamezela inkcaso yabazali babo abangengomaKristu. Abanye baye bade bagxothwa emakhayeni abo kodwa amanye amaNgqina aye abamkela ngobubele kumakhaya awo. Bambi baye balahlwa ziintsapho zabo. Yintoni eye yabanceda banyamezela? Kukuthanda abazalwana bawo, kodwa ngaphezu koko, kukuthanda uYehova noNyana wakhe.—1 Pet. 1:22; 1 Yoh. 4:21.
18. Uthando olunyamezela izinto zonke lunokuwanceda njani amaKristu atshatileyo?
18 Kukho nezinye izinto ebomini ezifuna sibonise uthando olunyamezela izinto zonke. Ngenxa yothando, abantu abatshatileyo baye bathobela amazwi kaYesu athi: “Oko uThixo akubophelele ngedyokhwe ndawonye makungahlukaniswa mntu.” (Mat. 19:6) Xa efumana ‘imbandezelo enyameni yawo,’ amaKristu atshatileyo afanele akhumbule ukuba uYehova ubandakanyekile emtshatweni wawo. (1 Kor. 7:28) ILizwi lakhe lithi ‘uthando lunyamezela izinto zonke,’ yaye indoda nomfazi abanolu phawu bayamanyana baze babe nomtshato owomeleleyo.—Kol. 3:14.
19. Yintoni eye yenzeka kubantu bakaThixo emva kokuba kwehle iintlekele zemvelo?
19 Uthando luyasinceda sinyamezele izinto zonke naxa kwehle iintlekele zemvelo. Yiloo nto eyenzekayo xa kwabakho inyikima kumazantsi ePeru naxa iNkanyamba uKatrina yonakalisa imimandla ethile yeGulf yaseUnited States. Abazalwana bethu abaninzi baphulukana namakhaya abo nezinto zabo eziphathekayo. Beqhutywa luthando, abazalwana abahlukahlukeneyo bazisa izinto zokubanceda yaye amatshantliziyo ancedisa ekwakhiweni kwamakhaya nasekulungiseni iiHolo zoBukumkani. Oku kubonisa ukuba abazalwana bayathandana yaye bayanyamekelana ngawo onke amaxesha.—Yoh. 13:34, 35; 1 Pet. 2:17.
Uthando Aluze Lutshitshe
20, 21. (a) Kutheni uthando lubaluleke kangaka? (b) Kutheni uzimisele ukuhlakulela uthando?
20 Njengabantu bakaYehova, siyayibona indlela ekububulumko ngayo ukuphila ngendlela egqwesileyo yothando. Eneneni, luyagqwesa kuzo zonke iimeko. Phawula indlela umpostile uPawulos awakugxininisa ngayo oku. Okokuqala, uchaza ukuba iziphiwo zomoya ziya kuphela lize ibandla lamaKristu likhule ngokomoya. Emva koko uqukumbela ngokuthi: “Noko ke, zintathu izinto eziya kuhlala zihleli, lukholo, nethemba, nothando; kodwa eyona inkulu kuzo luthando.”—1 Kor. 13:13.
21 Ekugqibeleni, izinto esinokholo lokuba ziya kwenzeka, ziza kwenzeka yaye emva koko akuyi kuba yimfuneko ukuba nokholo. Xa izinto zonke zenziwe ntsha, akuyi kuba yimfuneko ukuba siqhubeke sinethemba. Kodwa ke kuthekani ngothando? Alusokuze lutshitshe okanye luphele. Luya kuhlala lukho. Njengoko sikhangele phambili ekuphileni ubomi obungunaphakade, ngokuqinisekileyo siya kulubona size siluqonde ngakumbi uthando lukaThixo. Ukuba wenza ukuthanda kukaThixo uze ufune eyona ndlela igqwesileyo yothando olungasokuze lutshitshe, unokuphila ngonaphakade.—1 Yoh. 2:17.
Ubuya Kuphendula Uthini?
• Kutheni sifanele sikuphephe ukuthanda izinto ezingafanelekanga?
• Uthando lunokusinceda sinyamezele ntoni?
• Sinokutsho njani ukuba uthando alusokuze lutshitshe?
[Amagama acatshulweyo akwiphepha 27]
Umxholo wonyaka wowama-2010 uza kuthi: ‘Uthando lunyamezela izinto zonke. Uthando aluze lutshitshe.’—1 Kor. 13:7, 8.
[Umfanekiso okwiphepha 25]
Ukuthanda uThixo kusenza sinikele ubungqina
[Umfanekiso okwiphepha 26]
Uthando olungatshitshiyo lwabangela ukuba abazalwana noodade baseMalawi banyamezele ubunzima