მათე
1 თენა რე წიგნ იესო ქრისტეშ*, დავით დო აბრაამიშ ქომოლსქუაშ, ცხოვრებაშ გურშენ*.
2 აბრაამს ქაშუ ისაკიქ,
ისაკის — იაკობიქ,
იაკობის — იუდაქ დო თიშ ჯიმალეფქ.
3 იუდას თამარშე — ფერეციქ დო ზერახიქ,
ფერეცის — ხეცრონქ,
ხეცრონს — რამქ,
4 რამს — ამინადაბიქ,
ამინადაბის — ნახშონქ,
ნახშონს — სალმონქ,
5 სალმონს რახაბშე ქაშუ ბოაზიქ,
ბოაზის რუთშე — ობედიქ,
ობედის — იესექ,
6 იესეს — მეფე დავითიქ,
დავითის ურიაშ ოსურშე ქაშუ სოლომონქ,
7 სოლომონს — რობოამქ,
რობოამს — აბიაქ,
აბიას — ასაქ,
8 ასას — იეჰოშაფატიქ,
იეჰოშაფატის — იეჰორამქ,
იეჰორამს — უზიაქ,
9 უზიას — იოთამქ,
იოთამს — ახაზიქ,
ახაზის — ხიზკიაქ,
10 ხიზკიას — მენაშექ,
მენაშეს — ამონქ,
ამონს — იოშიაქ.
11 ბაბილონშა გინოხორაფაშ პერიოდის იოშიას ქაშუ იექონიაქ დო თიშ ჯიმალეფქ.
12 ბაბილონშა გინოხორაფაშ უკულ იექონიას ქაშუ შეალთიელქ,
შეალთიელს — ზერუბაბელქ,
13 ზერუბაბელს — აბიუდიქ,
აბიუდის — ელიაკიმქ,
ელიაკიმს — აზორქ,
14 აზორს — ცადოკიქ,
ცადოკის — აქიმქ,
აქიმს — ელიუდიქ,
15 ელიუდის — ელეაზარქ,
ელეაზარს — მათანქ,
მათანს — იაკობიქ.
16 იაკობის ქაშუ იოსებიქ, მარიამიშ ქომონჯიქ. მარიამქ ეიორჩქინ იესო, ნამდგას ქრისტეს უძახუდეს.
17 თაშ ნამდა, აბრაამშე დავითშახ 14 თაობა რდჷ, დავითშე ბაბილონშა გინოხორაფაშახ ხოლო — 14 დო ბაბილონშა გინოხორაფაშე ქრისტეშახ ხოლო — 14 თაობა.
18 თენა რე იესო ქრისტეშ დაბადებაშ ამბე: თიმ დროს თიშ დიდა მარიამ იოსებშა რდჷ დანიშნულ. თინეფ დიო ვა რდესჷ დაქორწინებულ, მუჟამსით მარიამქ წმინდა შურით* დეორსულ. 19 თიშ ქომონჯ* იოსებ ჯგირ კოჩ რდჷ დო ვაკოდ, თინა ხალხის გეგშაჸათუკო, ათეშენ გინოჭყვიდ, ტყობაშე ჩეთხუკო. 20 თენა გეგნოჭყვიდუნ, იეჰოვაშ* ანგელოზიქ გეგმეცხად სიზმარო დო უწუ: „იოსებ, დავითიშ სქუა, სქან ოსურიშ, მარიამიშ, ჸუდეშა მინოჸუნაფაშა ვა გაშქურინას, მუშენდა ბაღანა, ნამუთ ქვარაშა ალუხე, წმინდა შურშე რე. 21 თინა ბოშის გეიორჩქინანს, ნამდგას იესო ოკო ქიგიოდვე, მუშენდა თინა ირსხენს მუშ ხალხის ცოდეფშე“. 22 თე ირფელქ მართალო მოხვად, ნამდა შისრულუკო იეჰოვაშ სიტყვეფქ, ნამუთ მუშ წინასწარმეტყველს ორაგადაფუ: 23 „დეორსულებ ცირასქუა დო გეიორჩქინანს ბოშის, ნამდგას ემანუელს ქიგიოდვანა“, მუთ თაშ ითარგმნუ: „ჩქინწკუმა რე ღორონთ“.
24 გოკურცხჷ იოსებიქ დო თეშ მიქცუ, მუჭოთ იეჰოვაშ ანგელოზიქ უწუ; თიქ ჸუდეშა მიდეჸუნ მუშ ოსურ, 25 მარა ვა დუნჯირ თიწკუმა, სოიშახ ბაღანაქ ვერჩქინდჷ, ნამდგას იოსებიქ იესო ქიგიოდვჷ.