Taratasy faharoe handeha amindrô Tesalônianin̈y aby io
2 Rahalahy aby, Jesosy Kristy Tômpontsika mbala himpody, aviô atsika havoriny aminany an̈y. Ke momba raha aby zen̈y, ty raha ambaranay anarô:* 2 Aza mialamboetry ndreky miasaloha izikoa misy olo mivolan̈a fa efa navy andran’i Jehovah. Ary ndray irô mivolan̈a fa Zan̈ahary* lastiô nivolan̈a raha zen̈y, aviô ndray irô man̈ano mamaky izio amy taratasy ataondrô fa baka taminay, aza atao mampafombo anarô foeky raha zen̈y.
3 Aza ambela hisy olo foeky hamitaka anarô,* fôtony andra zen̈y tsy ho avy izikoa tsy efa misy antsendriky fivadiham-pinoan̈a,* aviô izikoa tsy efa abaribary antsendriky lelahy mpandika lalàn̈a, tsy azôvy zen̈y fa zanakan’ny fandripahan̈a. 4 Izy mpanohitry, aviô izy man̈ano ain̈inany an̈abon̈abon’ny raha jiaby tompoen’olo* na iritriretin’olo fa zan̈ahary. Izy mipetraka amy tempolin’ny Zan̈ahary ao, baka iô amason’olo jiaby izy man̈ano ain̈inany fa zan̈ahary. 5 Tsy azonarô onon̈o ma fa, tamy zaho taminarô tan̈y, efa matetiky zaho nivolan̈a raha aby zen̈y taminarô?
6 Hainarô tsarabe azôvy aby man̈ano raha hisakanan̈a fivadiham-pinoan̈a io, amy zen̈y lelahy io tsy habaribary izikoa tsy efa avy leranany. 7 Marin̈y ndraiky fa haratsiam-pan̈ahin’ny lelahy io ziô mbala misitriky,* fa izy fo efa miasa. Hibaribary haratsiam-pan̈ahinany io izikoa fa tsy iô eky olo manakana izy. 8 Habaribary lelahy mpandika lalàn̈a io. Jesosy Tômpo han̈aboaka didim-pitsaran̈a momba lelahy io ke izy haripaka, amy fotoan̈a himpodianan’i Jesosy. 9 Baka amin’ny angôvon’i Satana mahavy lelahy mpandika lalàn̈a io misy, ndreky mahavy izy man̈ano asa maro miavaka ndreky famantaran̈a mamitaka aviô fahagagan̈a. 10 Baka amy zen̈y koa mahavy izy han̈ano raha tsy marin̈y isan-karazany, misy hamitahan̈a lan̈iany olo ho ripaka. Zen̈y sazindrô, fôtony irô tsy nan̈eky fahamarin̈ana ndreky tsy tia izio. Izikoa bakà irô nan̈eky ndreky tia izio, irô tsy haripaka. 11 Ke Zan̈ahary man̈ambela irô ho voafitakan’ny fampianaran̈a tsy marin̈y baka irô hino vandy, 12 amy zen̈y irô jiaby hitsarain̈a fôtony irô tsy nino ny marin̈y fa ravoravo man̈ano raha tsy marin̈y.
13 Rahalahy aby, anarô tian’i Jehovah mare. Zahay tsy maintsy man̈ano mersy izy,* fôtony efa letry fa ela* izy nifidy anarô baka anarô ho voavonjy, ke izy nankamasin̈y anarô baka tamy fan̈ahy masin̈inany fôtony anarô nino ny marin̈y. 14 Izy nifidy* anarô ke nan̈iraka zahay han̈ambara vaovao tsara io taminarô fôtony anarô tiany ho voavonjy, ke hahazo voninahitry karaha nin’i Jesosy Kristy Tômpontsika. 15 Ke anarô, rahalahy aby, aza man̈eky ho voahozongozon̈o, baka iô aza miala amy raha nampianarin̈y anarô, ndray nivolan̈inay taminarô mivantan̈a eky izio na nisoratinay taminarô. 16 Zan̈ahary Babantsika io ten̈a tia atsika. Izy han̈aboaka hatsaram-pan̈ahy miavaka amintsika, ke izy tsy ho vôly hankahery atsika ndreky han̈amia atsika fan̈antinan̈a. Irarian̈a irô roen’i Jesosy Kristy Tômpontsika 17 hankahery anarô ndreky hankafatatra fônarô, amy zen̈y anarô tsy vôly han̈ano ny tsara ndreky hivolan̈a raha tsara.