Taratasy voanalohany nisoratin’i Petera
2 Adosoa aminarô aby haratsiam-pan̈ahy jiaby, ndreky fitaka, ndreky fihatsarambelatsihy, ndreky fialaon̈ana,* aviô fitsikoan̈a olo.* 2 Karaha ataon’ny zazamena sôfy mare tihigiaka ronono in̈y, ataova koa raha hahavy anarô han̈iry mare higiaka ronono baka amy volan̈an’ny Zan̈ahary. Izio ronono tsisy fangarony,* aviô baka amy zio hahavy anarô hitombo ke hivonjen̈a,* 3 anarô koa fa baka nan̈andran̈a* fa Tômpo io tsara.*
4 Izy vato velon̈o tsy niken’olombelon̈o, fa nifidin’ny Zan̈ahary salakady valera aminany. Anarô koa fa man̈aton̈o izy, 5 anarô aôrin̈y ke hanjary tran̈o ara-pan̈ahy baka anarô hanjary mpisôron̈o masin̈y, fôtony anarô koa mba vato velon̈o. Anarô han̈ano sôron̈o ara-pan̈ahy sady ankasitrahan’ny Zan̈ahary. Baka amy Jesosy Kristy mampamety raha jiaby zen̈y. 6 Karaha ty bakà ho Soratra Masin̈y: “A Ziona ao han̈apitrahako vato nifidiko. Izio vato fehizoro valera mare handeha hatao fôtotro. Tsisy andra hampadiso fan̈antinan̈a* lan̈iany olo man̈aboaka fa mino izio.”
7 Ke aminarô izy valera fôtony anarô mino izy. Fa tsy karaha zen̈y ndraiky izy amindrô olo tsy mino izy aby io, fôtony Soratra Masin̈y mivolan̈a: “Vato tsy nasiandrô mpan̈amboatra tran̈o aby io fôtiny edy nanjary vato fehizoro farany maventy.”* 8 Aviô koa “izio nanjary vato mampavoatsikon̈o ndreky lampimbato mandavo.” Irô voatsikon̈o ndreky lavo, fôtony irô tsy nan̈araka volan̈an’ny Zan̈ahary. Ary zen̈y tsarabe raha efa nambara tsialohaloha fa havoa irô. 9 Fa anarô ndraiky vahoaka “voafidy, mpanjaka sady mpisôron̈o, firenena masin̈y, ndreky vahoaka nifidin’ny Zan̈ahary hanjary fanan̈ananany manaokan̈a, amy zen̈y anarô han̈ambara amy tany jiaby fa Zan̈ahary io tsara.”* Izy araiky nikaiky anarô hiala amin’ny hiziky, ke handeha amin’ny hazavan̈anany mahagaga. 10 Anarô taloha bakà tsy firenena, fa anarô ziô ndraiky firenenan’ny Zan̈ahary. Aviô anarô taloha tsy nan̈aboahan̈a famindram-pô, fa anarô ziô ndraiky efa nan̈aboahan̈a famindram-pô.
11 Rahalahy ndreky ranabavy tiako aby, amy maha vahiny ndreky mpivahiny anarô, zaho mampirisiky anarô tsy han̈eky ho resin’ny fan̈irian̈an’ny nôfotro foeky. Irô fan̈irian̈a aby zen̈y bakà tsy vôly miady aminarô. 12 Anarô koa fa miaraka amin’olo amy donia ty, mifen̈a fo ho tsara fitondran-ten̈a. Amy zen̈y, ndray anarô an̈odiandrô fa man̈ano raha ratsy, masondrô tômpiny foeky hahita asa tsara ataonarô, ke irô han̈amia voninahitry Zan̈ahary amin’ny andra handinihany raha momba olombelon̈o.
13 Ty raha tian’ny Tômpo hataonarô: Ikia manam-pahifan̈a jiaby napetrakan’olombelon̈o, na mpanjaka zen̈y fôtony izy an̈abo, 14 na governera zen̈y, fôtony irô io nirahin’ny mpanjaka han̈asazy lan̈iany olo man̈ano raha ratsy fa hidera lan̈iany olo man̈ano ny tsara. 15 Anarô bakà tian’ny Zan̈ahary han̈ano ny tsara, misy hamodian̈a* vavan’olo tsy mandiniky fa mivolambolan̈a momba raha tsy haindrô. 16 Anarô olo afaka,* ke fahafahan̈a* anan̈anarô zen̈y hampiasay hanompoan̈a Zan̈ahary, fa tsy hanitrian̈a* raha ratsy. 17 Hajà karazan̈an’olo jiaby, tiava mpiara-manompo jiaby,* matahaora Zan̈ahary, baka iô hajà mpanjaka.
18 Mpanompo tôkony han̈aja tômpondrô ndreky havozo irô eraka ny tôkony ho izy; aviô tsy tômpo tsara fan̈ahy ndreky tsy sarôtiny fo tôkony hajaindrô, fa mboany lay sarôtiny koa. 19 Fôtony ravoravo Zan̈ahary izikoa baka amin’olo araiky tihanan̈a feon’ny fieritreretan̈a madio man̈oloan̈a izy mahavy olo io miaritry raha sarotro* ndreky mijaly nohon’ny raha tsy rariny. 20 Ino edy varany* izikoa baka amin’ny anarô manota mahavy anarô avoa popòko? Fa izikoa ndraiky baka amin’ny anarô man̈ano raha tsara mahavy anarô miaritry fijalian̈a, ravoravo mare Zan̈ahary.
21 Zen̈y tsarabe bakà antony nikahian̈a anarô, fôtony Kristy koa mba nijaly misy han̈avaotan̈a anarô, ke nan̈ambela môdely misy han̈arehanarô dianany tsarabe. 22 Izy tsy nanota, baka iô izy tsy namitaka.* 23 Izy koa fa nitihitihin̈a,* izy tsy namaly.* Izy koa fa nijaly, izy tsy nasiaka foeky, fa nankin̈iny tamin’ny Araiky mitsara erakan’ny rariny fo fiainan̈anany. 24 Izy nitondra fahotan̈antsika tan̈atin’ny ain̈inany, tamin’izy nahanton̈o tamy pôtô,* amy zen̈y atsika ho afaka amy fahotan̈a,* fa ho velon̈o baka han̈ano ny marin̈y. Aviô baka amy “ratranany nampajanga anarô.” 25 Anarô taloha karaha ôndrikôndriky very, fa anarô* ziô ndraiky efa nimpody amy tsiman̈ajanarô sady mpiandraikitrinarô.