Taratasy voanalohany nisoratin’i Petera
1 Baka amy Petera, apôstôlin’i Jesosy Kristy, handeha aminarô mpivahiny miparitaka a Ponto, Galatia, Kapadokia, Azia, ndreky Bitynia. Ia, taratasy ty handeha aminarô voafidy 2 eraka raha efa hain’ny Zan̈ahary Babantsika tsialohaloha, tsy amin-jôvy zen̈y fa aminarô namasin̈iny tamy fan̈ahy masin̈y, amy zen̈y anarô han̈araka volan̈a ndreky hamafazan̈a lion’i Jesosy Kristy:
Irarian̈a ho be ankitin̈y hatsaram-pan̈ahy miavaka* haboakan’ny Zan̈ahary aminarô ndreky fiadanan̈a hamezany anarô.
3 Derain̈a Zan̈ahary Baban’i Jesosy Kristy Tômpontsika, fôtony be ankitin̈y famindram-pô naboakany tamintsika. Atsika naterany ndraiky amy zen̈y atsika hanan̈a fan̈antinan̈a velon̈o, nohon’izy nanangana Jesosy Kristy tamy maty. 4 Nan̈ano zen̈y izy baka atsika hanan̈a lova tsy mety robaka,* tsisy loto, sady maharitry. Raha zen̈y miambin̈y anarô an-dan̈itry an̈y. 5 Nohon’ny anarô manan̈a finoan̈a, Zan̈ahary mampiasa angôvonany hiaraovan̈a anarô, amy zen̈y anarô hahazo famonjian̈a. Famonjian̈a zen̈y efa vôn̈ono habaribary amy fotoan̈an’ny farany. 6 Baka amy raha zen̈y mahavy anarô ravoravo mare, natà anarô nalahelo fôtony anarô tsy maintsy niaritry raha sarotro isan-karazany tan̈atin’ny fotoan̈a fôhiky. 7 Anarô niaritry raha aby zen̈y, beky ho hita fa matanjaka ankitin̈y finoan̈anarô. Ary finoan̈a matanjaka karaha zen̈y mbala valera mandilatra volamena, fôtony volamena ndray efa nandalo* môtro, izio mbala mety ho robaka fo. Ke nohon’ny anarô manan̈a finoan̈a karaha zen̈y, anarô hahazo dera ndreky voninahitry aviô fan̈ajan̈a, lera Jesosy Kristy habaribary. 8 Ndray anarô tsiary nahita izy, anarô tia izy; aviô ndray anarô ziô mbala tsy mahita izy, anarô mino izy sady ravoravo mare ke tsy hay foeky fomba ivolan̈ana haravoan̈anarô, 9 fôtony nohon’ny anarô manan̈a finoan̈a, takatranarô tanjon̈onarô, tsy ino zen̈y fa famonjian̈a anarô.
10 Irô mpaminan̈y nan̈ambara momba hatsaram-pan̈ahy miavaka naboakan’ny Zan̈ahary taminarô in̈y nitsakaraka mare sady nifen̈y hahay raha momba famonjian̈a io. 11 Taloha tan̈y, Zan̈ahary nampiasa fan̈ahy masin̈y nan̈ambaran̈a tamindrô fa Kristy hijaly, aviô afaran’izen̈y izy hamezan̈a voninahitry. Zen̈y nahavy irô tsy vôly nikaroko ino aby raha havoa Kristy, baka iô ombian̈a raha aby zen̈y hiboaka. 12 Nataon’ny Zan̈ahary haindrô mpaminan̈y aby io fa irô faminanian̈a nirahan̈a nambarandrô in̈y tsy natao nindrô fa ninarô. Fa ziôty ndraiky, irô olo nan̈ambara vaovao tsara taminarô aby in̈y efa nan̈ambara momba raha aby zen̈y taminarô, irô koa fa nahazo fan̈ahy masin̈y baka an-dan̈itry. Ary irô anjely aby io tihahay momba raha aby zen̈y.
13 Ke ankafatara jerinarô amy zen̈y anarô ho vôn̈ono hiasa, aviô ataova raha hahavy anarô hisain̈y tsarabe fo. Aza vôly man̈anten̈a hatsaram-pan̈ahy miavaka handeha haboaka aminarô amy fotoan̈a han̈abaribarian̈a Jesosy Kristy. 14 Anarô ziô efa zanakan’ny Zan̈ahary sady man̈araka volan̈anany, ke anarô aza man̈eky hifihezin’ny* fan̈irian̈a ratsy nanan̈anarô taloha eky. Anarô tamy zin̈y bakà mbala tsy nahay Zan̈ahary. 15 Masin̈y Araiky nikaiky anarô io, ke tôkony ho masin̈y koa anarô amy raha jiaby ataonarô,* 16 fôtony ty raha efa voasoratra: “Anarô tsy maintsy masin̈y, fôtony zaho masin̈y.”
17 Zan̈ahary Babantsika io tsy man̈avakavaka fa mitsara olo tsiaraikiaraiky eraka raha nataondrô. Ke izikoa anarô mivavaka aminany ankitin̈y, aboahanarô amy raha ataonarô fa anarô mavozo izy, an̈atin’ny fotoan̈a maha mpivahiny anarô. 18 Hainarô bakà fa tsy baka tamy raha mety robaka karaha ataon’ny volafotsy na volamena nahavy anarô navaotan̈a tamy* fomba fiainan̈a tsisy dikany nilovainarô tamindrô dadilahibenarô aby io.* 19 Fa lion’i Kristy nan̈avaotan̈a anarô. Lionany io valera mare, sady mitovy amy lion’ny zanaka ôndrikôndriky tsisy tsin̈iny sady tsisy tasy. 20 Marin̈y ndraiky fa izy efa voafidy* talohan’ny nan̈oren̈ana donia ty, kanefa nohon’ny aminarô, amin’ny andra farany ziôty izy nabaribary. 21 Baka tamy raha nataony nahavy anarô mino Zan̈ahary. Zan̈ahary nanangana izy tamy maty ndreky nan̈amia voninahitry izy, amy zen̈y anarô hino ndreky han̈anten̈a Zan̈ahary.
22 Anarô ziô efa man̈araka fahamarin̈ana, zen̈y nahavy anarô nan̈adio ain̈inarô ndreky mahavy anarô tsy mihatsaravelatsihy foeky fa ten̈a mifankatia.* Ke, ataova fo raha hampifankatia anarô amy fô jiaby. 23 Fôtony, tsy baka tamy voan-draha mety lò nahavy anarô nateraka ndraiky, fa baka tamy voan-draha tsy mety lò* ndreky baka tamy volan̈an’ny Zan̈ahary velon̈o tsisy farany. 24 Fôtony “olombelon̈o jiaby io miran̈a ahitry fo, aviô hatsaran̈andrô* miran̈a folera an-kiaka an̈y. Malazo ahitry, baka iô miraraka felan’ny folera, 25 fa volan̈an’i Jehovah ndraiky maharitry mandrakizay.” “Volan̈a” io vaovao tsara nambara taminarô in̈y.