TANTARA marin̈y an̈aty boky ty. Boaka amy Baiboly nangalan̈a tantara jiaby ato. Tantarainy ato rango Zan̈ahary niasa raha jiaby zisk’amy raha misy amin’andra ziôty. Tantarainy ato koa raha kasain’ny Zan̈ahary hatao amy ho avy.

Boky ty mikoran̈a hevitry maventy araiky hita amy Baiboly. Izitỳ koa mikoran̈a olo aby velon̈o tamin’andran’ny Baiboly, ndreky raha nataon-drô. Hazavain̈a ato koa fa Zan̈ahary han̈amia fiain̈ana tsisy farany olonany ambony tany eto.

Misy tantara 116 an̈aty boky ty, nizarain̈a valo. Isaka fizaran̈a, misy fan̈azavan̈a hely antsendriky. Tantara tsiaraikiaraiky ao nalahatra arakaraka raha nandalo tamy zen̈y. Izio han̈ampy anao hahay fotoan̈a nisian’ny tantara io.

Tantara jiaby an̈aty boky ty nivolan̈iny tamy faomba tsotra, beky ankamaraozan’ny tsaiky hahavita hamaky izitỳ ndray tsisy olo man̈ampy izy. Anarô raimandreny koa hahita zanakanarô madiniky ravoravo, izikoa anarô mamaky izio matetiky amin-drô. Na tanora na matoe, samy ho tia izitỳ aby.

Amy faran’ny tantara tsiaraikiaraiky, misy toko sy andininy boaka amy Baiboly. Ke zahay mandrisiky anao hamaky tantara aby io amy Baiboly.