Rango Niasan̈a Raha Jiaby Zisk’amy Safodrano

Boaka aia ma nahavy lan̈itry ndreky tany? Karakôry ma nampanisy masoandra, fanjava ndreky lakintan̈a, ndreky raha jiaby ambony tany eto? Baiboly man̈amia valiny mazava fa Zan̈ahary niasa raha jiaby. Raha voanalohany koran̈iny amy bokitsika ty, tantara an̈aty Baiboly mikasiky niasan’ny Zan̈ahary raha jiaby.

Atsika hianatra fa anjely raha voanalohany niasain’ny Zan̈ahary. Irô tsy hita maso karaha Zan̈ahary. Tany ty nataony hipitrahan’olo. Zan̈ahary niasa lelahy ndreky man̈angy. Adama ndreky Eva an̈aran-drô. Napetrany tamy zaridain̈y tsara irô. Irô naty, fôtony tsy nan̈araka volan̈a Zan̈ahary.

Izikoa konten̈a, rango niasan̈a Adama zisk’amy Safodrano, 1 656 taon̈o. Naro olo ratsy fan̈ahy tamy zen̈y. Tan-dan̈itry tan̈y, nisy anjely ratsy, Satana ndreky demony. Tambony tany tatỳ, Kaina ndreky olo ratsy fan̈ahy maro, an̈isan’izen̈y olo maro befatiarin̈y be sady fatatra. Nisy koa olo tsara fan̈ahy: Abela, Enoka ndreky Noa. Amy Fizaran̈a VOANALOHANY amy boky ty, atsika hahita tantaran-drô, baka iô raha nandalo tamy zen̈y.