Zan̈ahary Nanampôno Niasa Raha

BOAKA amy Zan̈ahary raha tsara jiaby anan̈atsika. Izy nan̈ano masoandra mampazava atsika lera matsan̈a, baka iô fanjava ndreky lakintan̈a mampazava atsika lera alin̈y. Zan̈ahary koa nan̈ano tany hipitrihatsika.

Tsy masoandra, fanjava, lakintan̈a ndreky tany raha voanalohany namboarin’ny Zan̈ahary. Hainao ino raha voanalohany namboariny? Olo tsy hita maso karaha izy. Anjely ikahian̈a irô amy Baiboly. Zan̈ahary nan̈ano anjely hipetraka an-dan̈itry miaraka aminany.

Anjely voanalohany namboarin’ny Zan̈ahary tsy miran̈a raha hafa namboariny. Izy Zanaka Zan̈ahary talan̈olo, baka iô koa izy niaraka niasa tamy Babany. Izy nitatahy Zan̈ahary nan̈amboatra raha hafa jiaby, hitatsika ndreky tsy hitatsika. Irô nan̈amboatra masoandra, fanjava, lakintan̈a ndreky tanitsika ty.

Karakôry eky tany tamy zen̈y? Tamy voanalohany, tsy nety nipitrahan̈a tany ty. Tsisy raha tambony tany, koa tsy ranomasin̈y fo. Tian’ny Zan̈ahary tany misy olo mipetraka. Ke izy nanampôno nan̈ano raha beky tany mety hipitrahan̈a. Ino aby ma raha nataony?

Voanalohany, tany mila mazava. Zen̈y nahavy Zan̈ahary nan̈ano masoandra, mampazava tany jiaby. Nataony zen̈y, beky misy matsan̈a ndreky alin̈y. Baka iô, tany naboakan’ny Zan̈ahary boaka tan-dranomasin̈y.

Tsendriky nisy raha tambony tany tamy zen̈y, miran̈a sary io. Tsisy folera, tsisy kakazo, tsisy biby foeky. Tan̈aty ranomasin̈y koa, tsisy laoko. Mbala maro asan’ny Zan̈ahary tamy zen̈y, beky tany manjary tsara, hipitrahan’ny biby ndreky olo.

Jeremia 10:12; Kolosianina 1:15-17; Genesisy 1:1-10.