Tantara 3

Lelahy Ndreky Man̈angy Voanalohany

INO raha tsy mampiran̈a sary ty ndreky araiky ao in̈y? Misy olo iô. Irô io lelahy ndreky man̈angy voanalohany. Azôvy ma niasa irô io? Zan̈ahary. Hainao an̈arany? Jehovah. Azôvy fo olo aroe io? Adama an̈aran̈a lelahy io, Eva an̈aran̈a man̈angy io.

Kara’ty nataon’i Jehovah niasa Adama. Izy nangala faotaka, baka iô nataony olo, nasiany loha, maso, tan̈ana, vity. Nitsofin’ny Zan̈ahary amy zay ôron̈onany, direkity velon̈o Adama.

Nisy asa nirahin’ny Zan̈ahary nataon’Adama. Adama nirahiny han̈ano an̈aran̈a biby jiaby. Mety ela Adama vo nahita an̈aran̈a namiany biby aby io. Lera Adama nan̈amia an̈aran̈a biby amy zay, izy nahita raha manky. Hainao ino raha manky io?

Biby jiaby samy nisy vady. Nisy elefan lahy ndreky elefan vavy, baka iô nisy lion lahy ndreky lion vavy. Kanefa, Adama tsisy vady. Ke Jehovah nan̈ano raha nampandry Adama mare. Baka iô izy nangala taolan-tritry araiky tamin’Adama. Taolan-tritry in̈y niasainy man̈angy. Man̈angy ty amy zay nanjary vadin’Adama.

Misaora ravoravo Adama tamy zen̈y! Eva koa tamy zen̈y mba ravoravo napetraka tamy zaridain̈y tsara be io! Iziô irô mahavita miteraka. Irô ndreky zanakan-drô amy zay hiaraka hiadan̈a amy paradisa ao.

Tian’i Jehovah Adama ndreky Eva hipetraka ambony tany eto tsisy farany. Tiany irô hiasa, han̈ano tany jiaby ty karaha zaridain̈’Edena. Misaora ravoravo Adama ndreky Eva nieritreritry asa tsara miambin̈y irô zen̈y! Tsa mba tianao han̈ano tany ty paradisa tsara? Fahasambaran̈’Adama ndreky Eva tsy nahadin̈y ela. Atsika hizaha nan̈ino irô tsy sambatra eky.

Salamo 83:18; Genesisy 1:26-31; 2:7-25.