Karakory ma Nitadiavan̈a Ndraiky ny Marin̈y Amy Baiboly?

Baiboly efa nivolan̈a fa Jesosy ndreky apostoly aby io koa fa maty, Kristianin̈y sasany hivadiky, ke tsy hampianatra raha marin̈y amy Baiboly. (Asan’ny Apostoly 20:29, 30) Zen̈y ankitin̈y raha niboaka. Fampianaran̈a Jesosy ndreky fanompoan̈a sampy naharonolo aby io, ke sarotro nahita ny marin̈y. (2 Timoty 4:3, 4) Nan̈ino ma zahay mivolan̈a fa mahavita man̈azava ny marin̈y amy Baiboly?

Naboakany Jehovah ny marin̈y. Jehovah efa nivolan̈a fa ‘lera andra farany an̈y, ho hainolo fo ny marin̈y.’ (Daniela 12:4) Tamy 1870, nisy olo sasany nahazo onon̈o fa tsy fan̈araka amy Baiboly raha ampianariny fivavahan̈a maro. Iro amy zay nandiniky tsarabe raha ten̈a ampianariny Baiboly, ke nanjary haindro fo ny marin̈y, fotony Jehovah nan̈ampy iro.

Lelahy aby mafatoky niaraka nandiniky Baiboly. Raha ataonay izioty mira raha nataondro nandiniky Baiboly taloha tan̈y in̈y fo. Iro koa fa nandiniky Baiboly, dinihindro tsiaraikaraiky hevitry an̈aty ao. Iro koa fa tojy toko ndreky andininy sarotro, iro nizaha andininy hafa man̈azava izin̈y amy Baiboly ao. Iro koa fa nahita ny marin̈y, soratindro izin̈y. Baka tamy fianarandro Baiboly karaha zen̈y nahaizandro an̈aran̈a Zan̈ahary ndreky Fanjakan̈anany ndreky raha tiany hatao amy tany ty. Nanjary haindro koa fa olo maty tsisy raha vitany eky, fa iro fo mbala hivilominy Zan̈ahary. Nialandro koa finoan̈a raha diso ndreky fombany fivavahan̈a diso, fotony iro efa nahay ny marin̈y amy Baiboly.—Jaona 8:31, 32.

Tamy 1879, iro Pianatra Baiboly aby io nahay fa mila ambara olo ny marin̈y hitandro. Ke tamy taon̈o io nanomboko nan̈amboaran̈a boky Ny Tilikambo Fiambenana Manambara ny Fanjakan’i Jehovah. Mbala maro koa boky momba Baiboly amboariny Vavolombelon̈o Jehovah. Misy amy volan̈a kadiriny 750 karazany iro io, rasain̈y aminolo amy tany 240. Nanjary hainolo fo ny marin̈y koa fa ela ny ela!

• Koa fa naty Jesosy ndreky apostoly aby io, ino raha niboaka?

• Karakory nitadiavan̈a ndraiky ny marin̈y amy Baiboly ao?