Anjely aby io Nivolan̈a fa Teraka Jesosy

Aogosto Kaisara pitondra tamy Fanjakan̈a Romanin̈y tamy zen̈y. Nirahiny nimpody tamy tanànandro aby olo jiaby, hanoratra an̈aran̈a. Josefa ndreky Maria amy zay nandeha tamy tany faviany Josefa tan̈y. Efa tsy ela ho teraka Maria tamy zen̈y.

Iro koa fa navy ta Betlehema tan̈y, tsisy tany nety nipitrahandro, koa tsy tan̈aty variony aomby fo. Tao Maria niteraka Jesosy. Nifon̈osiny lamba malemilemy izy, baka io nataony tamy tany fihinanany biby.

Narikitry ta Betlehema tao nisy piambin̈y ondrikondriky niambin̈y bibindro alin̈y andra. Tio fo nisy anjely nitsangana talohandro. Feno hazavan̈a nikodidin̈y iro. Izio voninahitriny Jehovah. Navozo mare iro piambin̈y ondrikondriky aby io, fa anjely io nivolan̈a tamindro: ‘Anaro aza mavozo. Zaho hivolan̈a vaovao tsara aminaro. Teraka a Betlehema an̈y izioty Mesia.’ Taminio maro anjely niboaka tamy lan̈itry. Iro nivolan̈a: ‘Voninahitry amy Zan̈ahary andan̈itry an̈y, baka io fiadanan̈a ambony tany.’ Iro anjely aby io baka tio tsy hita eky. Nan̈ano karakory amy zay iro piambin̈y ondrikondriky aby io?

Iro nivolan̈a tamy namandro: ‘Atsika izioty hengo a Betlehema.’ Betibetiky iro fa navy tan̈y, ke hitandro Josefa ndreky Maria niaraka tamy zazamena tan̈atiny variony aomby.

Piambin̈y ondrikondriky aby io nitantara raha nivolan̈iny anjely tamindro. Lany fan̈ahy olo jiaby naharen̈y zen̈y. Nidinihiny Maria mare volan̈a anjely aby in̈y, ke tsy nadin̈any foeky. Nimpody taminy ondrikondrikindro tan̈y iro piambin̈y ondrikondriky aby io. Iro nan̈ano mersy Jehovah tamy raha jiaby hitandro ndreky ren̈indro.