Mifen̈a Baka ho Matotro Fotony “Andrany Jehovah Efa Marikitry”
“Irarian̈a atsika handroso malaky baka ho matotro.”—HEB. 6:1.
1, 2. Ino raha nandalo ke nan̈ambela iro Kristianin̈y ta Jerosalema ndreky Jodia “hilefa an̈abony bongo?”
TAMY Jesosy tambony tany tatỳ, pianatranany aby io nan̈aton̈o izy sady nan̈ontany: “Karakory hahaizan̈a fan̈atrehanao ndreky farany rafitry donia ty?” Faminanian̈a nivolan̈iny Jesosy tamindro baka tio io, tanteraka voanalohany tamy taonjato voanalohany. Izy nivolan̈a fa ho hisy raha araiky tsy mahazatra foeky handalo, ke baka amizio ahaizan̈a fa efa marikitry farany. Ke izikoa fa hitandro raha zen̈y, “lan̈iany a Jodia” tokony “hilefa an̈abony bongo.” (Mat. 24:1-3, 15-22) Mba ho hainy pianatrany Jesosy aby io edy ma raha zen̈y izikoa fa miboaka, ke ho vitandro han̈araka toromariky namezany?
2 Efa kadiriny 30 taon̈o tafaranizen̈y, tamy taon̈o 61, apostoly Paoly nanoratra hafatra ten̈a mampieritreritry tamindro Kristianin̈y hebreo nipetraka ta Jerosalema ndreky tamy man̈odidin̈y tio. Mbala tsendriky hainy Paoly ndreky iro piaramanompo taminany aby io fa kaiky kadiriny dimy taon̈o tafara tatỳ, niboaka lamariky ahaizan̈a fa efa manomboko “fahorian̈a be” niny Jiosy aby io. (Mat. 24:21) Tamy taon̈o 66, Cestius Gallus niaraka tamy maramila Romanin̈y, navy nan̈afiky Jerosalema. Fa iro baka tio niala tampoko, ke nanjary afaka nilefa amy zay Kristianin̈y aby io.
3. Ino ma fampirisihan̈a namezany Paoly iro Kristianin̈y tamy taonjato voanalohany aby io, avio nan̈ino?
3 Iro Kristianin̈y aby io ten̈a nila nahay nandiniky mba ahaizandro fa kaiky raha nandalo io fahatantirahany volan̈a Jesosy in̈y, ndreky ahaizandro fa iro mila milefa. Kanefa nisy tamindro nanjary ‘tsy nazoto nitandren̈y’, ke miran̈a tsaiky hely fo fotony “ronono” fo raha tadiavindro. (Vakia Hebreo 5:11-13.) Ndray nisy sasany efa ela tamy fahamarin̈ana koa, nanomboko ‘niala tamy Zan̈ahary velon̈o.’ (Heb. 3:12) Sasany ndraiky nanjary “zatra” tsy nivory, ndray efa ‘mahaimarikitry fo haviany andra io.’ (Heb. 10:24, 25) Ke ten̈a nilaindro fampirisihan̈a nataony Paoly ty: “Fotony efa nialantsika fampianaran̈a fototro momba Kristy, irarian̈a atsika handroso malaky baka ho matotro.”—Heb. 6:1.
4. Nan̈ino ma atsika tsy tokony ho varian̈a, avio atsika tokony hifen̈y han̈ino?
4 Mbala ho tanteraka farany aminandrantsika zioty koa faminanian̈a nikoran̈iny Jesosy in̈y. “Efa marikitry andra maventiny Jehovah.” (Zef. 1:14) Izio fotoan̈a hamaran̈ana doniany Satana ty. Ke lombolombony taloha, atsika tsy tokony varian̈a, fa hifandray tsarabe amy Jehovah fo. (1 Pet. 5:8) Efa man̈ano raha zen̈y ma anao? Izikoa atsika mifen̈y ho matotro, zen̈y han̈ampy atsika hangala onon̈o fo vanimpotoan̈a misy atsika ziô io.
Karakory ma matotro zen̈y?
5, 6. a) Karakory ma olo matotro zen̈y? b) Ino raha mila hatao izikoa tiho matotro?
5 Paoly tsy vitany nandrisiky iro Kristianin̈y tamy taonjato voanalohany tan̈y mba ho matotro fo fa, nivolan̈iny tamindro koa karakory olo matotro zen̈y. (Vakia Hebreo 5:14.) Olo matotro zen̈y tsy mivelon̈o amy “ronono” fo fa iro koa mila mihina “hanin̈y mahery.” Haindro fa iro sady mila “fampianaran̈a fototro” avio koa mila ‘raha lalin̈y’ momba fahamarin̈ana. (1 Kor. 2:10) Efa zarindro ampiasain̈y koa fahaizandro mieritreritry io. Man̈ano zen̈y iro lera fa mampihatra raha efa haindro, ke loso haindro man̈avaka ny tsara ndreky ratsy. Lera iro mila manapakevitry, efa haindro ino toro lalan̈a Baiboly afaka man̈ampy iro ndreky akory fomba han̈arehan̈a izio.
6 Paoly nanoratra fa “atsika mila mitandrin̈y mare mandilatrany taloha, amy raha efa ren̈intsika, tsao atsika ho voatariky hiala aminany.” (Heb. 2:1) Mety efa tsy azontsika onon̈o aby fa kaiky atsika io efa voatariky hiala amy finoan̈a. Zen̈y mahavy atsika mila ‘mitandrin̈y mare lombolombony taloha’ izikoa fa mianatra Baiboly. Avio ilaintsika tsiaraikiaraiky man̈ontany ten̈a karaha ty: ‘Zaho ty ma mivelon̈o amy fampianaran̈a fototro fo? Efa fahazaran̈a fo ma han̈arehako fahamarin̈ana, fa tsy ten̈a baka amy fonaka eky? Ino raha mila ataoko han̈aboahako fa zaho ten̈a mandroso ankitin̈y?’ Izikoa atsika tiho matotro, misy raha aroe ty, farany vitsy, mila ataontsika: Mila mahay tsarabe Volan̈a Zan̈ahary, baka io mila mianatra man̈araka izio.
Mahay tsarabe Volan̈a Zan̈ahary
7. Ino hatsaran̈a ho azontsika izikoa atsika mahay tsarabe Volan̈a Zan̈ahary?
7 Paoly nivolan̈a: “Fa lan̈iany mbala mivelon̈o amy ronono, mbala tsy mahay tsarabe fahamarin̈ana fotony mbala tsaiky.” (Heb. 5:13) Izikoa tiantsika ho matotro, atsika mila mahay tsarabe raha volan̈iny Zan̈ahary an̈atiny Baiboly ao. Akory fomba ahaizantsika zen̈y? Atsika mila mazoto mianatra izio, ndreky iro lahatsoratra maro aboakany “panompo atokisan̈a ndreky mahadiniky raha.” (Mat. 24:45-47) Izikoa atsika man̈ano zen̈y, atsika hanjary hahay fomba fihevitriny Zan̈ahary, avio atsika hampiofan̈a fahaizantsika misain̈y. Zahava baka ohatrany Osnah. a Karaha ty nambarany ranabavy io: “An̈isany fampatsiarovan̈a ten̈a nisy vokany taminaka mila mamaky Baiboly tsy tapaka zen̈y. Taon̈o aroe zaho vo nahavita namaky Baiboly rango amboanalohany firaka amparany. Zaho nahatsapa fa karaha mbala vo sambany zaho nahay momba Pamoron̈o. Nanjary haiko lalan̈anany, raha tiany ndreky halany. Loso haiko koa fa izy kaiky mahery aminy ankitin̈y sady ten̈a be fahendrena. Famakian̈a Baiboly isanandra io koa ten̈a nan̈ampy zaho hahavita hiatriky raha ten̈a sarotro nandalo tamy fiain̈ananaka.”
8. Misy vokany amintsika ma Volan̈a Zan̈ahary io?
8 Volan̈a Zan̈ahary io izikoa vakintsika tsy tapaka, izio manjary misy vokany amintsika. (Vakia Hebreo 4:12.) Misy vokany amy toetrintsika izio, ke man̈ampy atsika hanjary hankasitrahany Jehovah. Akory fahitanao izy? Anao ma mbala mila manokan̈a fotoan̈a maromaro hamakian̈a ndreky hisaintsain̈ana raha koran̈iny Baiboly?
9, 10. Karakory ma olo mahay tsarabe Volan̈a Zan̈ahary zen̈y? Man̈ameza ohatra.
9 Olo mahay Baiboly tsarabe zen̈y tsy vitany mahay raha koran̈inizio fo. Iro Kristianin̈y taminy andrany Paoly, volan̈iny fa mira tsaiky, mety nahay pitipitiny tamy raha koran̈iny Baiboly. Fa iro fo tsy nampihatra raha efa haindro, ke loso tsy nahazo hatsaran̈a. Izio tsy nambelandro hitaridalan̈a iro tamy fanapahankevitry nataondro tamy fiain̈ana.
10 Mahay tsarabe Volan̈a Zan̈ahary olo araiky izikoa mahay raha koran̈inizio ndreky mampihatra izio. Man̈aboaka zen̈y ohatrany ranabavy araiky ty, Kerena an̈arany. Nimalo Kerena ndreky olo fiasan̈a araiky taminany. Ke akory nataony handamin̈y problemo io? Ho izy: “Andininteny direkty navy tan̈aty jeriko, Romanina 12:18. Izio mivolan̈a fa “izikoa raha mbala mety atao, ataova raha ihavan̈anaro aminolo jiaby.” Ke zaho nan̈ontany izy tsao zahay afaka mikoran̈a hely lera ravan̈a.” Nilamin̈y tsarabe koran̈andro, avio gaga mare man̈angy io izikoa fa nahita ezaka nataony Kerena. Ke ho Kerena: “Hitako fa ten̈a tsara ankitin̈y mampihatra toro lalan̈a Baiboly.”
Mianara man̈araka volan̈a
11. Man̈ameza ohatra man̈aboaka fa tsy mora man̈araka volan̈a, izikoa fa tojy raha sarotro?
11 Mety tsy ho mora mampihatra raha nianarantsika baka tan̈atiny Baiboly, intsaka eky lera misy raha sarotro. Tsy ela hely tafarany nan̈avotany Jehovah iro Israelita aby io baka tamy fan̈andivozan̈a nataony Ezipsianin̈y, ohatra, iro efa “nitady malo tamy Mosesy” sady “tsy voly nitsapa jery Jehovah.” Ino nahavy iro nan̈ano raha karaha zen̈y? Fotony iro tsisy rano higiahan̈a. (Eks. 17:1-4) Tafara tatỳ koa, iro nan̈ano fifan̈ikian̈a tamy Jehovah, ke nan̈eky ‘han̈ano raha jiaby nivolan̈iny Jehovah.’ Kanefa tsy ampy fanjava aroe tafaranizen̈y iro efa nandika lalàn̈any Jehovah edy, ke nanompo sampy. (Eks. 24: 3, 12-18; 32:1, 2, 7-9) Ino ma nahavy iro nan̈ano zen̈y? Niasaloha ma iro fotony ela loatra Mosesy tavela tan̈abony bongo Horeba tan̈y? Navozo ma iro tsao tafihindro Amalekita aby io, ke ho resy? Taloha helinizen̈y baka, tamy Mosesy tio, iro nandresy Amalekita aby io. (Eks. 17:8-16) Fa na ino na ino antony, Israelita aby io “tsy nety nan̈araka volan̈a” ke iro navozo hiditry tamy Tany Nampan̈antinain̈y. (Asa. 7:39-41) Paoly nandrisiky Kristianin̈y mba ‘han̈ano erakany vitandro, tsao hisy amindro hanjary tsy han̈araka volan̈a karaha ataony sasany.’—Heb. 4:3, 11.
12. Karakory nataony Jesosy nianatra nan̈araka volan̈a, avio ino hatsaran̈a nazony?
12 Izikoa atsika tiho matotro, atsika mila mifen̈y fo man̈araka volan̈a Jehovah. Hitantsika baka aminy ohatrany Jesosy Kristy fa matetiky olo araiky mianatra man̈araka volan̈a, baka amy raha iaretany. (Vakia Hebreo 5: 8, 9.) Talohany naviany tambony tany tatỳ, Jesosy efa nan̈araka volan̈a Babany. Fa tsy mora taminany nan̈ano zen̈y taminizy nan̈atanteraka sitrapony Babany tambony tany tatỳ. Izy niatriky raha mampijaly mare, na arabatan̈a na aratsain̈y. Fa ndray tio raha farany sarotro aby zen̈y, Jesosy nan̈araka volan̈a Babany fo. Ke izy “natao lavorary” hahazo andraikitry vaovao namezany Zan̈ahary izy, tsy ino izio fa hanjary Panjaka ndreky Pisoron̈obe.
13. Karakory ahitan̈a fa atsika mianatra man̈araka volan̈a Jehovah?
13 Atsika ke? Von̈ono ma anao han̈araka volan̈a Jehovah fo ndray efa miatriky raha ten̈a sarotro? (Vakia 1 Petera 1:6, 7.) Mazava torohevitry amezany Zan̈ahary momba fitondranten̈a, fan̈anaovan̈a ny marin̈y amy volan̈a ndreky raha atao, volan̈a mety ndreky tsy mety, famakian̈a ndreky fianaran̈a Baiboly, fandihanan̈a mivory ndreky mitory. (Josoa 1:8; Mat. 28:19, 20; Efes. 4:25, 28, 29; 5:3-5; Heb. 10:24, 25) Man̈ano raha aby io fo ma anao ndray iô raha sarotro? Fan̈arehanao volan̈a Jehovah man̈aboaka fa anao efa mahaimatotro fo.
Ino ma mahatsara matotro zen̈y?
14. Tantarà ohatra man̈aboaka fa fifen̈ana ho matotro io ten̈a miaro atsika.
14 Kristianin̈y araiky izikoa manan̈a fahaizan̈a misain̈y efa nampiofan̈iny hahay han̈avaka ny tsara ndreky ratsy, ho voaro. Fotony baka donia misy atsika ty ten̈a efa “tsy mahay men̈atra eky.” (Efes. 4:19) Rahalahy Jason, ohatra, ten̈a tia namaky iro boky ndreky gazety aby io tsy tapaka. Izy nahita asa. Viavy fo piaramiasa taminany tao. “Ankamaraozandro man̈angy aby io ndraiky” ho Jason, “naloto fitondranten̈a, fa nisy araiky tamindro hitako karaha mba tsaratsara fitondranten̈a sady lian̈a tamy fahamarin̈ana. Nisy fotoan̈a, zahay roe fo tan̈aty tran̈o araiky, ke izy nitady hitolon̈o ndreky hiôroko zaho. Sambarako sangisanginany fo izio, fa izy nisisiky mare ke kalikaly tsy voasakako. Tamy zen̈y, tadidiko raha nandalo tamy rahalahy araiky zay koran̈iny Tilikambo Fiambesan̈a. Tojy fakampan̈ahy karaha zen̈y koa izy tampiasan̈anany. Lahatsoratra io tao nikoran̈a ohatrany Josefa ndreky vadiny Potifara.b Ke direkty man̈angy piaramiasa taminaka io naposiko tan̈y, ke izy nilefa.” (Gen. 39:7-12) Ravoravo Jason fotony tsy loso lavitry raha io, ke nilamin̈y fo eritreritrinany.—1 Tim. 1:5.
15. Amy karakory fifen̈ana ho matotro io mankafatatra fontsika?
15 An̈isany mahatsara fifen̈ana ho matotro io koa, izio mankafatatra fontsika, ke atsika tsy “han̈eky ho voatarikiny fampianaran̈a maro samihafa ndreky hafahafa.” (Vakia Hebreo 13:9.) Atsika izikoa mifen̈y handroso fo, jerintsika loso mifantoko amy raha “ten̈a maventy.” (Fil. 1:9, 10) Ke mahaimahavy atsika mankasitraka Zan̈ahary nan̈amia atsika iro fitaovan̈a jiaby afaka man̈ampy atsika io fo atsika. (Rom. 3:24) Kristianin̈y araiky mahay mankasitraka karaha zen̈y hanjary hahay hisain̈y tsarabe karaha olobe, ke hahaiharikitry Jehovah fo.—1 Kor. 14:20.
16. Ino nan̈ampy ranabavy araiky hanan̈a fô ‘matanjaka’?
16 Ranabavy Louise nivolan̈a fa tafarany batisanany, raha ten̈a maventy taminany fazahoan̈a sitraka aminolo. Karaha ty ho izy: “Zaho tsy nan̈ano raha ratsy. Kanefa zaho tsy nahatsapa mba man̈iry tihanompo Jehovah zen̈y. Tsapako fa zaho mila man̈ano fan̈ovoan̈a, izikoa tiako han̈ano erakany vitako amy fanompoan̈a izy. Ke zaho nifen̈y mare nan̈ano izio tamy fonaka jiaby.” Louise izikoa fa nifen̈y mare karaha zen̈y, fonany loso ‘natanjaka.’ Ke raha zen̈y nan̈ampy izy lera izy fa narary mare. (Jak. 5:8) Ho Louise: “Nijaly mare ndraiky zaho, fa zaho fo ten̈a nahatsapa marikitry Jehovah.”
Areha amy fô jiaby volan̈a Zan̈ahary
17. Nan̈ino ma fan̈arehan̈a volan̈a io ten̈a nilain̈y mare tamy taonjato voanalohany?
17 Paoly nan̈iraka iro Kristianin̈y ta Jerosalema ndreky Jodia mba ho ‘matotro.’ Torohevitrinany zen̈y ten̈a nan̈avotro iro Kristianin̈y tamy taonjato voanalohany io. Nanjary nazava tamindro baka izio, izikoa fa niboaka lamariky nivolan̈iny Jesosy in̈y. Izikoa fa hitandro “mitsangana an̈aty toeran̈a masin̈y ao raha mampangaroharo mahavy fandravan̈ana in̈y”, tsy ino izio fa tafiky Romanin̈y niditry ndreky nikodidin̈y Jerosalema, direkty haindro Kristianin̈y aby io fa iro efa mila “milefa an̈abony bongo an̈y.” (Mat. 24:15, 16) Nan̈araka fampitandreman̈a namezany Jesosy io iro Kristianin̈y aby io ke niala ta Jerosalema tao, talohany nandravan̈ana izio. Erakany raha volan̈iny Eusèbe pahay tantara, iro nandeha nilefa ta Pela, tanàna araiky tamy faritry bibongo ta Gileada. Ke tan̈y, tsy navoa iro raha ratsy mare handeha havoa Jerosalema io.
18, 19. a) Nan̈ino ma atsika amy zioty ten̈a mila man̈araka volan̈a? b) Ino raha ho hitantsika amy lahatsoratra man̈araka?
18 Karaha zen̈y koa, izikoa atsika mifen̈y ho matotro ndreky man̈araka volan̈a fo, ho avotro atsika lera fa tanteraka faminanian̈any Jesosy momba “fahorian̈a be” tsisy ambaka izy io. (Mat. 24:21) Han̈araka volan̈a fo ma atsika ndray ino ndray ino toromariky meky hamezany “panompo atokisan̈a” atsika? (Lioka 12:42) Rango zioty, atsika efa mila mianatra ‘han̈araka volan̈a amy fô jiaby!’—Rom. 6:17.
19 Fahaizantsika misain̈y io mila ampiofan̈intsika, izikoa atsika tiho matotro. Man̈ano zen̈y atsika izikoa mifen̈y hahay tsarabe raha koran̈iny Volan̈a Zan̈ahary, avio mianatra man̈araka volan̈a. Tsy mora amy tanora mifen̈y ho matotro zen̈y. Fa amy lahatsarotra man̈araka atsika hahita fa ho vitandro fo han̈ano zen̈y.
[Lamariky amy pazy ambany]
a Nivoan̈a an̈aran̈a sasany.
b Zahava lahatsoratra amy Tilikambo Fiambesan̈a (malagasy) 1 Oktobra 1999, titranizio “Mahazo Hery Hilazana hoe Tsia Raha ny Amin’ny Fanaovan-dratsy.”
Ino Raha Nianaranao Tato?
• Karakory ma matotro zen̈y, avio ino raha mila atao baka ho matotro?
• Izikoa atsika tiho matotro, nan̈ino ma atsika mila mahay tsarabe Volan̈a Zan̈ahary?
• Karakory ahaizan̈a man̈araka volan̈a zen̈y?
• Ino hatsaran̈a ho azonolo araiky matotro?
[Sary]
Ho vitantsika hiatriky problemo, izikoa atsika mampihatra raha koran̈iny Baiboly
[Sary]
Nan̈avotro fahin̈anandro Kristianin̈y tamy taonjato voanalohany tan̈y fan̈arehan̈a torohevitriny Jesosy