2 Azovy ma Tokony Hivavahan̈a?

OLO maro mihevitry fa mety fo vavaka jiaby, na azovy na azovy ivavahan̈a. Man̈eky raha zen̈y iro olo tia fikambanampinoan̈a ndreky iro olo mieritreritry fa tiany Zan̈ahary aby fivavahan̈a jiaby, nata iro io samby isany. Fa ten̈a marin̈y ma zen̈y?

Baiboly mampianatra fa ankamarozany vavakanolo tsy avy amy tany tokony handifasan̈a izy. Tamy fotoan̈a nanoratan̈a Baiboly, naro olo nivavaka tamy sary vongana, kanefa Zan̈ahary efa natetiky nampitandrin̈y iro fa halany raha zen̈y. Ohatra, koran̈iny Salamo 115:4-6 fa ‘iro io misy sofin̈y fa iro tsy maharen̈y raha.’ Mazava raha tiany koran̈iny amy zen̈y. Tsy ho hisy dikany foeky vavaka atao amy zan̈ahary tsy maharen̈y raha zen̈y.

Ty misy tantara amy Baiboly mankamarin̈y raha zen̈y. Elia paminan̈iny Jehovah nivolan̈a tamy paminan̈iny Bala fa iro samy hivavaka amy zan̈aharindro, ke Zan̈ahary hamaly vavaka io ny ten̈a Zan̈ahary aminany, fa araiky tsy hamaly vavaka io ndraiky zan̈ahary tsy izy. Paminan̈iny Bala nan̈eky, ke nivavaka mare ndreky nahadin̈y ela tamy zan̈aharindro iro, ndraiky farany nandronton̈o mare foeky. Fa ‘tsisy raha namaly ndreky nitandren̈y’ iro foeky. (1 Mpanjaka 18:29) Ino fo basy raha niboaka, Elia koa fa nivavaka?

Direkty efa namaly edy Zan̈aharinany. Nandefa motro baka tandan̈itry tan̈y izy nandravan̈a fan̈atitry nataony Elia. Nan̈ino ma Elia nahazo valimbavaka? Diniha baka 1 Mpanjaka 18:36, 37. Fohiky mare vavaka nataony. Volan̈a hebreo 30 fo nivolan̈iny, fa intelo izy nampiasa an̈aran̈any Zan̈ahary, Jehovah.

Dikany Bala zen̈y “tompo”, fa nisy karazany maro Bala nivavahandro Kananita aby io, arakaraka faritry nisy iro. Fa Jehovah Zan̈ahary io ndraiky araiky fo. Karaha ty nivolan̈iny tamy vahoakanany: “Zaho Jehovah zen̈y! Efa zen̈y an̈aranaka. Ke voninahitrinaka tsy hamiako olo hafa.”​—Isaia 42:8.

Fa izio ma vavaka nataony paminan̈iny Bala aby io ndreky vavakany Elia in̈y ma tsy samy nandeha tamy zan̈ahary araiky fo? Diniha baka: Iro olo nivavaka tamy Bala jiaby nirahin̈y nivaroten̈a ndreky nan̈ano soron̈o olombelon̈o foeky. Nan̈ambany iro raha zen̈y. Fa iro Israelita nivavaka tamy Jehovah efa niala tamy raha karaha zen̈y, ke iro io olo mendriky. Dikanizen̈y Jehovah ndreky Bala io ten̈a tsy miran̈a. Zahava hely baka! Izikoa anao mandefa taratasy aminolo manankaja araiky kamaradinao. Asa anao hieritreritry fa loso aminolo hafa ratsy fan̈ahy an̈y taratasy io, izikoa nataonao mazava tsara adiresy nandifasanao izy? Tsy hieritreritry zen̈y anao. Ke tsisy ny hafa amy zen̈y koa vavaka io.

Anao koa mivavaka amy Jehovah, anao mivavaka amy Pamoron̈o sady Babanolo jiaby.a Karaha ty nataony Isaia, izy koa fa nivavaka: ‘A Baba Jehovah e!’ (Isaia 63:16) Baba io edy raha tiany Jesosy koran̈iny, taminizy nivolan̈a karaha ty tamy pan̈aradia izy aby io: “Zaho hanonga amy Babako ndreky Babanaro, Zan̈aharinaka ndreky Zan̈aharinaro.” (Jaona 20:17) Jehovah io Babany Jesosy, ke izy Zan̈ahary nivavahany Jesosy. Iro pianatranany aby io koa nirahiny nivavaka tamy Babany io.​—Matio 6:9.

Fa Baiboly ma tsy mivolan̈a fa atsika tokony hivavaka amy Jesosy na amy Maria, na aminy olo masin̈y na aminy anjely? Ehe! Jehovah zaraiky fo tokony hivavahantsika. Misy antony aroe ty: Voanalohany, vavaka io mbala an̈isany fanompoan̈a Zan̈ahary. Zen̈y mahavy Baiboly mivolan̈a fa Jehovah zaraiky fo tokony hitompoentsika. (Eksodosy 20:5) Faharoe, Baiboly mivolan̈a fa Jehovah io “Pitandren̈y vavaka.” (Salamo 65:2) Jehovah nata tia mirasa andraikitry, vavaka io tsy namezany olo hafa hitandren̈y izio. Izy mampan̈anten̈a fa izy foeky hitandren̈y vavaka ataontsika.

Ke izikoa tianao tandrin̈esany Zan̈ahary vavakanao, tsarova raha koran̈iny Soratra Masin̈y ty: ‘Zay olo mikaiky an̈arany Jehovah fo ho voavonjy.’ (Asan’ny Apostoly 2:21) Fa izio ma ren̈iny Jehovah vavaka jiaby ataonolo? Sa misy raha hafa koa tokony ho haintsika?