4 Ino ma Raha Mety Koran̈iny Lera Mivavaka?

MISY olo mivolan̈a fa Rainay Izay any An-danitra vavaka fataony Kristianin̈y. Ndray marin̈y raha zen̈y ndray tsy marin̈y, ny raha azo antoko, maro olo diso hevitry momba izio. Antapitrisany olo man̈ano tsianjery vavaka io isanandra, mety matetiky foeky an̈atiny andra araiky. Kanefa tsy zen̈y raha tiany Jesosy hambara taminizy nampianatra vavaka modely io. Akory ahaizantsika zen̈y?

Karaha ty nambarany Jesosy momba vavaka io: ‘Anaro koa mivavaka, aza man̈ampodipody volan̈a mitovy fo.’ (Matio 6:7) Ke hay be fa Jesosy tsy mety hivolan̈a raha mifanohitry amy zen̈y, ke hamoron̈o volan̈a tokony halain̈a onon̈o ndreky hampodipody lera mivavaka. Fa tiany haboaka tamy vavaka modely in̈y raha mety koran̈iny lera mivavaka. Alo atsika handiniky vavaka io, amy Matio 6:9-13 ao.

“Anao Babanay andan̈itry an̈y, irarian̈a an̈aranao ho masin̈y.”

Tio Jesosy nampatsiaro pan̈aradia izy fa Jehovah zaraiky fo tokony hivavahan̈a. Asa mba hainao nan̈ino an̈aran̈any Zan̈ahary ny ten̈a raha maventy, avio nan̈ino izio tokony hankamasin̈iny?

Rango tamboanalohany tan̈y, an̈aranany io nisy nandoto fo. Karaha ataony Satana fahavalony Zan̈ahary, nivolan̈a fa Jehovah io Pitondra mavandy, tia ten̈a, avio tsy manan̈a fahifan̈a hanjaka amy raha niasainy. (Genesisy 3:1-6) Maro olo milan̈y amy Satana, ke iro mampianatra fa Zan̈ahary io masiaka, krimo ndreky pamaly faty. Misy koa olo mivolan̈a fa Pamoron̈o zen̈y tsisy foeky. Sasany baka efa nan̈adoso an̈aran̈a Jehovah io foeky izikoa fa nandika Baiboly, avio tsy imboandro koa olo mampiasa an̈aran̈a io.

Baiboly mivolan̈a fa Zan̈ahary han̈adoso raha tsy rariny jiaby zen̈y. (Ezekiela 39:7) Izy koa fa man̈ano zen̈y, hamezany anao raha ilainao, avio izy handamin̈y raha manahiran̈a. Amy fomba akory? Mamaly zen̈y volan̈any Jesosy fan̈araka.

“Irarian̈a ho avy Fanjakan̈anao.”

Iro pitondra fivavahan̈a aby io tsy mitovy hevitry, amy raha momba Fanjakan̈any Zan̈ahary. Fa iro olo aby nitandren̈y Jesosy aby io ndraiky efa nahay raha nikoran̈iny paminan̈y taloha be tan̈y fa hisy Fanjakan̈a araiky han̈ova donia ty avio Mesia, Pamonjy araiky nifidiny Zan̈ahary io pitondra amizio. (Isaia 9:6, 7; Daniela 2:44) Fanjakan̈any Zan̈ahary io hankamasin̈y an̈arany Zan̈ahary. Han̈aboely vandiny Satana izio, avio han̈afoan̈a asany Satana jiaby. Hifoan̈anizio ady, aretin̈y, mosary ndreky firaka amy fahafatesan̈a. (Salamo 46:9; 72:12-16; Isaia 25:8; 33:24) Ke anao koa fa mangataka haviany Fanjakan̈any Zan̈ahary io, anao mangataka fa tianao ho tanteraka iro raha jiaby handeha hataonizio.

“Irarian̈a hatao ambony tany eto koa sitraponao, karaha andan̈itry an̈y.”

Natao tandan̈itry tan̈y sitrapony Zan̈ahary, tamy Jesosy niady tamy Satana ndreky iro demony aby io. Tsisy raha nahasakana izio. (Apokalypsy 12:9-12) Ke hita baka amy fangatahan̈a nambarany Jesosy io fa atokisan̈a tsara fa hatao ambony tany eto koa sitrapony Zan̈ahary, karaha efa nataony andan̈itry hipitrahany an̈y io. Fan̈atantirahan̈a sitrapony Zan̈ahary io baka hitondra hatsaran̈a farany maro amy zavaboary jiaby. Nata Jesosy, olo lavorary mba nivavaka sitrapony Zan̈ahary io hatao fa tsy sitraponazy.​—Lioka 22:42.

“Amia zahay niany hanin̈y sahaza zahay niany.”

Jesosy nivolan̈a fa atsika mety mangataka raha ilaintsika koa. Tsisy maharatsy mivavaka momba raha ilaintsika isanandra aminany. Raha zen̈y baka hahaihampatsiaro atsika fo fa Jehovah “nan̈amia olo jiaby ain̈y, fahin̈ana ndreky raha jiaby.” (Asan’ny Apostoly 17:25) Baiboly mivoaln̈a fa Jehovah io Baba be fitiavan̈a, man̈amia raha jiaby ilainy zanany. Izy tsy han̈amia raha tsy hahatsara zanany foeky.

“Fafà hadisovan̈anay.”

Asa anao man̈eky fa ten̈a mila fafan̈a hadisovan̈anao? Maro olo izioty tsy mahay dikany fahotan̈a zen̈y foeky, avio izio raha ten̈a ratsy. Fa Baiboly mivolan̈a fa baka amy fahotan̈a io mahavy problemo farany maventy mahazo atsika, an̈isanizen̈y fahafatesan̈a. Matetiky manota koa atsika, fotony nandova fahotan̈a. Ke izikoa Zan̈ahary tsy mamela helokontsika, atsika tsy han̈anten̈a hahazo fiain̈ana tsisy farany aminy amaray an̈y zen̈y foeky. (Romanina 3:23; 5:12; 6:23) Nakiry izy haintsika raha koran̈iny Baiboly fa ‘Jehovah tsara toetry ndreky von̈ono hamela heloko.’​—Salamo 86:5.

“Avota aminy araiky ratsy in̈y zahay.”

Fahitanao izy, anao ma ten̈a mila fiarovany Zan̈ahary? Maro olo tsy mino fisiany Satana, “araiky ratsy” io. Fa Jesosy nivolan̈a fa misy ankitin̈y Satana io. “Pitondra donia ty” izy ho Jesosy. (Jaona 12:31; 16:11) Satana efa nahavita nandrobaka donia fiheziny ty. Tiany koa hanafiky anao, baka anao tsy hifandray marikitry amy Jehovah, Babanao io. (1 Petera 5:8) Fa Jehovah mahery lavitry mandilatra Satana, ke Jehovah von̈ono hiaro lan̈iany olo tia izy.

Famintin̈ana raha momba vavaka modely in̈y fo raha nataontsika tio fa tsy voakoran̈a ato raha jiaby mety koran̈iny izikoa fa mivavaka. Fa aza adin̈a raha koran̈iny 1 Jaona 5:14: “Ty raha atokisantsika amy Zan̈ahary: Zay raha angatahintsika aminany, izikoa mifan̈araka amy sitraponany, izy mitandren̈y atsika.” Ke aza mieritreritry foeky fa tsisy dikany problemo mahazo atsika, ke tsy mila koran̈iny amy Zan̈ahary zen̈y.​—1 Petera 5:7.

Fa karakory fo raha momba fotoan̈a ndreky tany ivavahan̈a? Ten̈a raha maventy ma zen̈y?