5 Lera Karakory Ndreky Aia ma Tokony Hivavahan̈a?

ANAO mety efa nahita fivavahan̈a mivolan̈a fa tsy mety izikoa fivavahan̈a tsisy tran̈o tsara ivavahan̈a. Efa asiandro lera koa tsy maintsy ivavahan̈a. Fa Baiboly ma mivolan̈a zen̈y?

Baiboly ndraiky mivolan̈a fa misy fotoan̈a tokony hivavahan̈a. Karaha ambaka nataony Jesosy, izy nan̈ano mersy Zan̈ahary, talohaniro ndreky pianatranany aby io nihina. (Lioka 22:17) Taminiro niaraka nan̈ano fotoampivavahan̈a, niaraka nivavaka koa iro. Efa nahazatra iro tamy synagoga baka raha zen̈y, ke mbala nan̈ano izio fo iro. Efa fataondro tamy tempoly ta Jerosalema tan̈y koa izio. Tan̈y baka “tran̈o fivavahan̈a” nataony Zan̈ahary ‘niny firenena jiaby.’​—Marka 11:17.

Iro panompony Zan̈ahary izioty koa mivory ke miaraka mivavaka, mety mahazo valimbavaka iro. Zan̈ahary ravoravo, fotony baka iro miray sain̈y, avio man̈ano vavaka mifan̈araka amy toro lalan̈any Baiboly. Mety handrisiky Zan̈ahary han̈ano raha tsy niritriretiny foeky vavaka ataondro io. (Hebreo 13:18, 19) Vavolombelon̈o Jehovah izioty koa mivavaka, isaka iro mivory. Kahinay anao mba ho avy, hitandren̈y vavaka ataondro an̈y.

Fa Baiboly ndraiky tsy mivolan̈a fa misy lera ndreky tany efa tsy maintsy hivavahan̈a. Koran̈iny Baiboly ao fa iro panompony Zan̈ahary taloha tan̈y samy tamy lera nivavahandro, avio samy tamy tany nivavahandro. Ohatra, Jesosy nivolan̈a karaha ty: ‘Anao koa mivavaka, midira aminy efitrinao ao, ke varavaran̈anao koa fa voafodinao, mivavaha amy Babanao andan̈itry tsisy olo mahita an̈y. Izy mahita anao fo, ke izy han̈amia rady anao.’​—Matio 6:6.

Tsara raha koran̈iny Jesosy zen̈y, sa karakory? Dikanizio baka, anao mety mikoran̈a mitokan̈a amy Panjakany raha jiaby, na kelera na kelera, avio na aia na aia. Izy tsy maintsy hitandren̈y anao fo. Zen̈y nahavy Jesosy natetiky nivavaka nitokan̈a tamy Jehovah. Tandraraiky izy nivavaka nampikiaka andra, nangataka taridalan̈a momba fanapahankevitry ten̈a maventy hiraisiny.​—Lioka 6:12, 13.

Koran̈iny Baiboly koa fa nisy lelahy ndreky man̈angy koa nivavaka, iro koa fa nisy problemo na nangala fanapahankevitry maventy. Ndraiky iro nivavaka tan̈atiny fondro tao fo, fa nisy lera koa iro nivavaka mare. Avio, nisy lera iro nivavaka manokan̈a, nisy lera koa iro nivavaka niaraka taminolo maro. Zan̈ahary foeky nandrisiky iro karaha ty: “Aza voly mivavaka.” (1 Tesalonianina 5:17) Zan̈ahary io be fitiavan̈a, ke izy von̈ono fo hitandren̈y zay olo man̈ano sitraponany.

Fa ny raha misy, maro olo tsy matoky tsao tsy mahatsara izy vavaka io. Na anao koa mety han̈ontany: ‘Vavaka io ma ten̈a hazahoan̈a hatsaran̈a?’