Problemo Man̈amia Fan̈antinan̈a
“Aminandra farany an̈y, fiain̈ana ho sarotro.”—2 TIMOTY 3:1.
ASA anao mba efa naharen̈y na nahita foeky raha mampalahelo aby ty?
● Aretin̈y nandripaka olo antapitrisany.
● Mosary namono olo anjatony.
● Horohorontany nahafaty olo andrivony baka io maro olo nanjary tsisy tany ipitrahan̈a.
Amy pazy man̈araka aby io ao, mikoran̈a toejavatra mampisaintsain̈y. Ho hitanao ao koa fa Baiboly efa nivolan̈a tsialohaloha fa raha aby zen̈y hiboaka amy fotoan̈a araiky kaian̈a “andra farany.”a
Lahatsoratra aby ty tsy natao handrisian̈a lahatra anao fa fiain̈ana iain̈antsika ziô ten̈a manahiran̈a. Azo antoko baka fa efa hitanao raha zen̈y. Fa izity natao hahavy anao hanan̈a fan̈antinan̈a. Izity hikoran̈a faminanian̈a tsiota efa tanteraka, baka io hazavainy ato fa dikanizen̈y efa tsy ho ela “andra farany” io ho tapitry. Ho hitanao ato koa sasany aminy hevitrinolo tsy mino raha zen̈y, ndreky antony mahavy atsika tokony hino fa misy raha tsara miambin̈y atsika tsy ho ela.
[Lamariky amy pazy ambany]
a Koa tianao ho hay nan̈ino Zan̈ahary man̈ambela raha ratsy aby io misy, zahava lahatsoratra “Nan̈ino Jaly Ndreky Raha Ratsy io Ambelany Zan̈ahary Fo?” (malagasy) amy gazety ty.