Ino aby ma Raha Ahaizan̈a “Andra Farany” na “Vanimpotoan̈any Farany”?
Valiny baka amy Baiboly
Baiboly mikoran̈a momba raha maventy, fiain̈ana, ndreky toetrinolo mampiavaka “farany rafitry donia ty. (Matio 24:3) “Andra farany” ivolan̈any Baiboly fotoan̈a io na koa “fotoan̈any farany.”—2 Timoty 3:1; Daniela 8:19.
Ino aby faminanian̈a sasany momba “andra farany”?
Baiboly efa nan̈ambara tsialohaloha raha maro miaraka miboaka. “Famantaran̈a” andra farany izio. (Lioka 21:7) Diniha baka iro ohatra aby ty:
Ady erantany. Jesosy efa nivolan̈a tsialohaloha: “Hisy firenena hiady firenena, hisy fanjakan̈a hiady fanjakan̈a.” (Matio 24:7) Mira zen̈y koa raha koran̈iny Apokalypsy 6:4 momba sevaly tsy arabakiteny, “han̈adoso fiadan̈ana ambony tany.”
Mosary. Jesosy nivolan̈a karaha ty: “Hisy mosary.” (Matio 24:7) Bokiny Apokalypsy mikoran̈a momba sevaly hafa koa, mitondra mosary amy tany isankazarany.—Apokalypsy 6:5, 6.
Horohorontany maventy. Jesosy nivolan̈a fa hisy “horohorontany amy tany maro.” (Matio 24:7; Lioka 21:11) Horohorontany erantany io hitondra jaly ndreky hamono olo maro mandilatrany taloha.
Valan̈aretin̈y. Jesosy nivolan̈a fa hisy valan̈aretin̈y, na “aretin̈y mamono.”—Lioka 21:11.
Tsy fan̈arahan̈a lalàn̈a. Nata efa tan̈atiny taonjato maro nisiany tsy fan̈arahan̈a lalàn̈a io, Jesosy efa nivolan̈a fa aminy andra farany, ‘ho maro olo tsy han̈araka lalàn̈a.’—Matio 24:12.
Fandrobatan̈a tany. Efa nan̈ambara Apokalypsy 11:18 fa olo “handrobaka tany.” Maro raha ataonolo handrobatan̈a tany ty. Iro tsy vitany kafiry ndreky tia man̈ano aferafera fo fa iro koa mbala mandrobaka tontolo iain̈ana.
Toetrinolo miova. Koran̈iny 2 Timoty 3:1-4 fa Baiboly efa nan̈ambara tsialohaloha fa ankamarozanolo “tsy hahay han̈ano mersy, tsy ho men̈atra mivadiky, ... tsy mety hifan̈arahan̈a, ho pan̈aratsy olo, tsy hahafehy ten̈a, ho masiaka mare, tsy ho tia ny tsara, ho pamadiky, ho mierin̈y olo, ho poerapoera.” Mahairatsy mare toetrinolo aminy andra izioty, ke zen̈y mahavy fotoan̈a misy atsika izioty io koran̈iny “andra sarotro tsy mora atrefin̈y.”
Fianakavian̈a tsy mifankatia. Koran̈iny 2 Timoty 3:2, 3 fa maro olo “tsy ho tia havany”, avio tsaiky “tsy han̈aja raimandreny.”
Olo tsy ho tia Zan̈ahary. Jesosy efa nivolan̈a: “Fitiavan̈anolo maro hahaihanintsy.” (Matio 24:12) Raha tiany Jesosy volan̈iny io, ankamarozanolo tsy ho tia Zan̈ahary. Karaha zen̈y koa koran̈iny 2 Timoty 3:4 fa aminy andra farany, olo aby io ho ‘tia man̈ano raha mamparavoravo iro tompiny fo fa tsy ho tia Zan̈ahary.’
Fivavahan̈a mihatsaravelatsihy. Efa nambarany Baiboly tsialohaloha fa olo zahan̈a karaha manompo Zan̈ahary, kanefa iro tsy man̈araka fitsipikiny Zan̈ahary aby.
Mahaimitombo fahaizanolo faminanian̈a amy Baiboly. Bokiny Daniela efa nan̈ambara tsialohaloha fa “amy fotoan̈any farany”, hahaihitombo fahaizanolo maro ny marin̈y amy Baiboly, an̈atinizen̈y fahaizanolo ny marin̈y momba faminanian̈a aby io.—Daniela 12:4.
Fitorian̈a erantany. Jesosy efa nivolan̈a: “Hambara amy tany jiaby misy olo antsendriky vaovao tsara mikasiky Fanjakan̈a ty.”—Matio 24:14.
Ho maro olo tsy hijery famantaran̈a io. Jesosy efa nivolan̈a fa olo tsy hijery iro porofo ahaizan̈a fa farany io efa ten̈a marikitry. (Matio 24:37-39) Fan̈ampinizen̈y koa, 2 Petera 3:3, 4 efa nan̈ambara fa olo sasany hivolan̈a fa mbala tsisy raha miova zen̈y fiain̈ana izioty, ke mbala karaha taloha fo zen̈y fiain̈ana.
Tanteraka faminanian̈a jiaby. Jesosy nivolan̈a fa faminanian̈a jiaby io miaraka tanteraka an̈atiny fotoan̈a araiky fa tsy sasany fo na ankamarozany fo.—Matio 24:33.
Ten̈a efa miain̈y aminy “andra farany” ma atsika io?
Ia. Raha misy erantany ndreky konty mifan̈araka amy raha koran̈iny Baiboly ivolan̈ana fa nanomboko taminy 1914 andra farany io. Tamy taon̈o nisiany Ady Lehibe Voalohany. Izikoa tianao ino ivolan̈ana fa fiain̈ana nahairatsy erantany io man̈ambara fa aminy andra farany atsika izioty, zahava video ty:
Taminy 1914, Fanjakan̈any Zan̈ahary nanomboko nanjaka tandan̈itry tan̈y, ke nan̈atsipy Satana Devoly ndreky iro demony aby io baka tan̈y raha voanalohany nataonizio. Ambony tany atỳ fo iro mbala imboan̈a manohitry Fanjakan̈a io. (Apokalypsy 12:7-12) Hita baka amy toetrinolo mahairatsy ndreky raha ataondro izioty fa Satana ankitin̈y manjaka amy donia ty. Zen̈y mahavy andra farany io kahian̈a “fotoan̈a sarotro tsy mora hatrefin̈y.”—2 Timoty 3:1.
Maro olo kivy amy fiain̈ana aminy andra sarotro izioty io. Miasaloha iro, fotony efa tsisy hainolo karakory atao miaraka miain̈y zen̈y. Olo sasany baka efa mavozo mare han̈ano karakory ny amaray.
Fa amindro olo maro kivy io, mbala misy ny manan̈a fan̈antinan̈a momba ny amaray. Iro resy lahatra fa tsy ho ela Fanjakan̈any Zan̈ahary han̈ano raha han̈adosoan̈a problemo jiaby erantany. (Daniela 2:44; Apokalypsy 21:3, 4) Iro miambin̈y tsarabe fotoan̈a han̈atantirahany Zan̈ahary fampan̈antinan̈anany. Mankahery iro mare volan̈any Jesosy ty: “Lan̈iany miaritry firaka amy farany fo ho voavonjy.”—Matio 24:13; Mika 7:7.